Yu e broko yu ede nanga trawan neleki fa Yehovah e du dati?

„TROWE ala un sorgu na [Gado] tapu, bika a e broko en ede nanga unu” (1 Petrus 5:7). A sani disi di Petrus e taigi wi fu du, e sori taki Gado lobi wi trutru! Yehovah Gado e broko en ede nanga ibriwan fu den futuboi fu en. Wi no abi fu frede noti fu di wi sabi taki A e kibri wi.

Neleki Yehovah wi musu broko wi ede tu nanga trawan, èn wi musu du sani fu sori taki dati de so. Fu di wi na sondusma, meki wi musu luku bun nanga wan tu sani te wi e sori trawan taki wi e broko wi ede nanga den. Fosi wi poti prakseri na wan tu fu den sani dati, meki wi go luku na sortu fasi Yehovah e sorgu gi a pipel fu en.

A psalm skrifiman David e agersi Gado nanga wan skapuman, fu sori fa A e sorgu gi a pipel fu en. David e taki: „Yehovah na mi Skapuman. Mi no sa mankeri noti. Na ini wei di furu nanga grasi a e meki mi didon; a e tyari mi go na presi pe mi kan rostu èn pe furu watra e lon. A e meki mi sili kisi krakti baka. . . . Awansi mi e waka na ini a lagi presi pe furu dungru de, toku mi no e frede nowan ogri, bika yu de nanga mi.”—Psalm 23:1-4.

Fu di David ben de wan skapuman tu, meki a ben sabi san a wani taki fu sorgu gi skapu. Wan skapuman e kibri den skapu fu en gi lew, busi-dagu, nanga beer di wani nyan den. A e sorgu taki den skapu no e waka gowe fu na ipi, a e go suku den skapu di lasi, a e tyari den wan di weri na ini en anu, èn a e dresi den wan di siki èn di kisi mankeri. Ibri dei a e gi den watra fu dringi. Disi no wani taki dati den skapu no fri fu du san den wani. Nôno, den skapu fri, ma den e kisi kibri fu a skapuman.

Na so Yehovah e sorgu gi a pipel fu en. Na apostel Petrus ben taki: ’Unu e kisi kibri nanga yepi fu a krakti fu Gado.’ Den wortu ’unu e kisi kibri’ wani taki trutru ’wan sma e luku unu’ (1 Petrus 1:5). Fu di Yehovah e broko en ede trutru nanga wi, meki a e luku wi ala ten, èn a de srekasreka fu yepi wi te wi e suku yepi na en. Ma Yehovah meki wi leki sma di man teki den eigi bosroiti, èn fu dati ede a no e taigi wi san wi musu du èn sortu bosroiti wi musu teki.

Teki na eksempre fu Gado te yu e kweki den pikin fu yu

„Manpikin na wan gudu di e kon fu Yehovah.” Fu dati ede, papa nanga mama musu luku bun taki ogri no e miti den pikin fu den, èn den musu sorgu gi den (Psalm 127:3). Fu man du dati, dan a kan de fanowdu fu gi den pikin deki-ati fu taki san den e denki en fa den e firi. Èn den musu hori den sani dati na prakseri. Papa nanga mama di e taigi den pikin fu den ibri tron baka san den musu du èn san den no musu du, sondro fu luku san den pikin srefi wani, de leki skapuman  di e tai titei na den neki fu den skapu, fu basi den. Nowan skapuman ben o du dati nanga den skapu fu en, èn Yehovah no e du dati tu nanga wi.

Mariko * e taki: „Furu yari langa mi ben gwenti fu taigi den pikin fu mi: ’Yu musu du disi’ èn ’Yu no musu du dati’. Mi ben denki taki na dati mi ben musu du leki mama. Mi no ben e prèise den, èn mi no ben e teki ten fu taki nanga den.” Na umapikin fu Mariko ben gwenti fu taki bun langa nanga den mati fu en na a telefon, ma a no ben e taki furu nanga en mama. „Ne mi kon si fu san ede dati ben de so”, na so Mariko e taki. „Te mi umapikin ben e taki nanga den mati fu en, dan a ben gwenti taki sani di ben e sori taki a ben e firi gi den mati fu en. A ben e taki sani soleki ’Ai, yu abi leti’, noso ’Mi tu’. Mi bigin taki den srefi sortu sani disi fu gi mi umapikin deki-ati fu taigi mi fa a e firi, èn fosi yu denki wi bigin taki moro nanga makandra, èn mi ben e kisi moro prisiri fu den takimakandra dati.” A sani disi e sori o prenspari a de fu abi bun takimakandra nanga den pikin fu yu, èn a no yu leki papa noso mama wawan musu taki, ma den pikin musu taki tu.

Soleki fa wi si, dan papa nanga mama musu gi den pikin fu den deki-ati fu taki fa den e firi èn san den wani, ma pikin musu frustan taki den papa nanga mama e broko den ede nanga den, fu di den no wani taki ogri miti den. Bijbel e gi pikin a rai fu gi yesi na den papa nanga mama, èn a e taigi den tu fu san ede den musu du dati: „Dan a sa go bun nanga yu èn yu kan tan langa ten na grontapu” (Efeisesma 6:1, 3). Te pikin e frustan bun taki den sa kisi wini te den e gi yesi na den papa nanga mama, dan den sa de klariklari fu gi yesi.

Te yu e sorgu gi den skapu fu Yehovah

A fasi fa a Kresten gemeente seti, e sori taki Yehovah e sorgu den futuboi fu en na wan lobi-ati fasi. Leki Edeman fu a gemeente, Yesus Krestes taigi den owruman fu sorgu gi den skapu fu en (Yohanes 21:15-17). A Griki wortu di vertaal nanga „opziener” komoto fu wan wortu di wani taki „luku wan sani bun”. Fu sori den owruman fa den musu du dati, Petrus e gi den a rai disi: „Luku den skapu fu Gado di a gi unu fu sorgu, èn no du dati neleki na dwengi wan sma dwengi unu, ma du dati nanga prisiri; no du en tu fu di unu lobi fu kisi wini na wan fasi di no fiti, ma du en fu di unu e angri fu dini trawan; un no musu  prei basi tu gi den wan di de wan gudu fu Gado, ma un musu tron eksempre gi den skapu.”—1 Petrus 5:2, 3.

Iya, a frantwortu fu den owruman de neleki a di fu wan skapuman. Kresten owruman musu sorgu gi den wan di abi wan swaki bribi, èn den musu yepi den so taki den kan libi baka soleki fa Yehovah wani. Den owruman abi a frantwortu fu seti sani na ini a gemeente, den musu sreka konmakandra, èn den musu sorgu taki sani e waka na wan orga fasi na ini a gemeente.—1 Korentesma 14:33.

Ma den wortu fu Petrus e warskow owruman gi wan tra sani. Iya, den no musu „prei basi” na ini a gemeente. Wan sani di kan sori taki wan owruman e du dati, na te a e poti wet di no de fanowdu. Fu di na owruman wani du ala san a man fu sorgu taki ogri no e miti den skapu, meki a kan go tumusi fara. Na ini wan gemeente fu wan Owstusei kondre, den owruman ben poti wet fa fu taki trawan odi na ini a Kownukondre zaal. Wán fu den wet disi ben sori suma ben musu taki odi fosi. Den owruman ben poti den wet disi fu di den ben feni taki den sani disi ben o sorgu taki vrede ben o tan na ini a gemeente. A no de fu taki dati den owruman disi ben e pruberi fu du bun, ma wi kan taki dati den ben sorgu a gemeente na a fasi fa Yehovah e sorgu gi a pipel fu en? A moi fu sabi fa na apostel Paulus ben e denki fu a tori disi. A ben taki: „A no de so taki wi na basi fu un bribi, ma wi e wroko makandra nanga unu so taki unu kan de nanga prisiri, bika na a bribi fu unu e meki taki unu e tanapu kánkan” (2 Korentesma 1:24). Yehovah e frutrow a pipel fu en.

Boiti taki lobi-ati owruman no e poti wet di no e kruderi nanga Bijbel, den no e fruteri sma den tori fu trawan. Na so fasi den e sori tu taki den e broko den ede trutru nanga den skapu. Den e hori a warskow fu Gado na prakseri: „No fruteri sma den tori fu trawan.”—Odo 25:9.

Na apostel Paulus ben agersi a gemeente fu den salfu Kresten nanga a skin fu wan libisma. A ben taki: „Gado meki a skin na so wan fasi . . . so taki pratifasi no ben sa de na ini a skin, ma taki den pisi fu a skin e broko den ede na a srefi fasi nanga makandra” (1 Korentesma 12:12, 24-26). Den memre fu a Kresten gemeente musu meki ala muiti fu sori taki den e broko den ede nanga makandra.—Filipisma 2:4.

Fa tru Kresten kan sori taki den ’e broko den ede nanga makandra’? Den kan du disi te den e begi gi makandra, èn te den e yepi den wan di abi yepi fanowdu. Disi sa gi trawan deki-ati fu du bun. Luku fa Tadataka kisi wini fu di trawan ben broko den ede nanga en. A teki dopu di a ben abi 17 yari, èn a ben de a wan-enkri sma fu en famiri di e dini Yehovah. A e taki: „Wan osofamiri na ini a gemeente ben gwenti fu kari mi fu kon nyan na den oso èn fu abi demakandra nanga den. Te mi ben e go na skoro ibri mamanten, dan mi ben gwenti fu go na den oso fu taki fu a deitekst nanga den. Den gi mi rai san fu du te mi ben e kisi problema na skoro, èn den ben e begi makandra nanga mi. A famiri disi leri mi fu de klariklari fu gi sani.” Now Tadataka e du san a leri fu di a e dini na wán fu den bijkantoro fu Yehovah Kotoigi.

Na apostel Paulus e taki fu ete wan tra sani di wi musu hori na prakseri te wi e poti prakseri na trawan. A taki fu wan tu uma di ben tron ’konkruman èn di ben e bumui nanga tra sma tori, fu di den ben e taki sani di den no musu taki’ (1 Timoteyus 5:13). Aladi a bun fu poti prakseri na trawan, toku wi musu luku bun taki wi no e bemui na ini sma tori. Te wi e poti tumusi furu prakseri na trawan, dan wi sa ’taki fu sani di wi no musu taki’, fu di wi sa bigin krutu trawan.

A bun fu hori na prakseri taki Kresten e difrenti fu makandra. Den no e libi na a srefi fasi, den no e nyan den srefi sani, èn den no e meki prisiri na a srefi fasi. Solanga den e hori densrefi na den gronprakseri fu Bijbel, ibriwan fu den kan du san ensrefi wani. Paulus gi den Kresten fu Rome a rai disi: „No meki wi krutu makandra moro. . . . Meki wi du muiti fu du den sani di e tyari vrede kon èn fu du den sani di e gi trawan deki-ati” (Romesma 14:13, 14). Te wi wani sori trutru taki wi e broko wi ede nanga trawan na ini a gemeente, dan dati no wani taki dati wi musu bumui na ini den tori, ma wi musu de klariklari fu yepi den. Te wi e broko wi ede nanga makandra na a fasi disi, dan lobi nanga wánfasi sa de na ini wi osofamiri èn na ini a gemeente.

[Futuwortu]

[Prenki na tapu bladzijde 19]

Prèise den pikin fu yu èn sori taki yu lobi den, so taki den kan taigi yu san den e denki èn fa den e firi