San o yepi sma fu difrenti ras fu no desko makandra moro?

NA INI Spanyorokondre wan refri ben musu tapu wan futubal prei. Fu san ede? Fu di wan lo sma di ben kon luku a prei ben bigin kosi wan fu den futubal man di komoto fu Kamerun. Den ben kosi en so kefalek taki a ben wani gowe fu a veld. Na ini Rosiakondre a de wan aladei sani taki sma e du ogri nanga sma fu Afrika, Asia, nanga Latijns-Amerika. Te wi e agersi den difrenti leisi di sma du ogri nanga sma fu tra ras na ini 2004, dan wi e si taki dati na 55 procent moro furu leki a yari bifo, èn na ini 2005 a sani disi pasa 394 leisi. Na ini Ingrisikondre sowan 33 procent fu sma fu Asia nanga blakaman ben feni taki den lasi a wroko fu den, fu di den de fu wan tra ras. Den eksempre disi e sori fa a situwâsi de na heri grontapu.

Sma e sori na difrenti fasi taki den e desko tra ras. * Son leisi den e kosi den, noso sondro fu denki den e taigi den hati sani. Ma san de moro ogri, na taki na ini son kondre den tiriman wani kiri ala den sma fu wan tra ras. San na a rutu fu a problema disi? San wi kan du fu no desko sma fu tra ras? Wan dei ala sma sa libi na ini vrede nanga makandra? Bijbel e leri wi wan tu moi sani di abi fu du nanga den tori disi.

Sma e kwinsi trawan èn den abi bita-ati gi trawan

Bijbel e taki: „Bika sensi libisma yongu, den e prakseri soso ogri” (Genesis 8:21). Dati meki son sma lobi fu kwinsi trawan. Bijbel e taki moro fara: „Luku, den watra-ai fu den wan di e kisi kwinsi, ma den no ben abi nowan sma fu trowstu den; èn den wan di e kwinsi den abi makti.”—Preikiman 4:1.

Bijbel e sori taki na sensi ten a de so taki sma fu difrenti ras e desko makandra. Fu eksempre, moro leki 3000 yari pasa, wan Farao fu Egepte ben kari a Hebrew man Yakob nanga en heri osofamiri fu kon tan na ini Egepte. Ma bakaten, wan tra Farao ben kon frede gi a bigi grupu sma disi di ben kon tan na ini en kondre. Bijbel e taki san ben de a bakapisi: „A kownu taigi a pipel fu en: ’Luku, den manpikin fu Israel furu moro wi èn den tranga moro wi. Kon meki wi handri na wan koni fasi, so taki den no e kon moro furu. . . . ’ Dati meki den poti basi na den tapu fu kwinsi den fu wroko tranga” (Exodus 1:9-11). Te den sma fu a famiri fu Yakob ben meki wan boi, dan den Egeptesma ben musu kiri en.—Exodus 1:15, 16.

San na a rutu fu a problema?

Den kerki no ben leri sma taki den no musu desko trawan. Aladi a tru taki son sma du ala san den man fu sorgu taki sma no e kwinsi trawan moro, toku nofo tron den kerki srefi ben teki a sei fu den wan di ben kwinsi trawan. Na so a ben de na ini Amerkankondre taki den wetiman ben e kwinsi den blakaman, fu di den ben poti wan lo hebi wet gi den. Te den wetiman ben feni taki wan blakaman du wan ogri, dan den ben anga en sondro fu tyari en go na fesi krutu. Teleki 1967 a ben de so tu taki wetiman nanga blakaman no ben mag trow nanga makandra. A srefi sani ben e pasa tu na ini Zuid-Afrika na a ten di den tiriman ben hori den difrenti ras aparti. Den wetiman di no ben de so furu, ben gebroiki wet fu tan hori a makti fu den. Wan fasi fa den ben du dati na fu poti a wet taki sma fu tra ras no mag trow nanga wetiman. Na ini ala tu kondre sonwan fu den sma di ben horibaka gi den wet disi, ben de fayafaya kerkisma.

Ma Bijbel e sori wan moro prenspari reide fu san ede sma fu difrenti ras e desko makandra. A  e sori fu san ede sma fu son ras e kwinsi trawan. Bijbel e taki: „A sma di no lobi trawan, no kon sabi Gado, bika Gado na lobi. Efu wan sma e taki: ’Mi lobi Gado’, ma toku a e teige en brada, dan a sma dati na wan leiman. Bika a sma di no lobi en brada di a man si, no man lobi Gado di a no man si” (1 Yohanes 4:8, 20). A tekst disi e sori san na a moro prenspari reide fu san ede sma fu son ras e desko trawan. Sma e handri na a fasi disi, awansi den e go na kerki noso den no e go. Den e handri so fu di den no kon leri sabi Gado èn fu di den no lobi En.

Sma di sabi Gado, e libi na ini vrede nanga sma fu tra ras

Fa wan sma o man libi na ini vrede nanga trawan te a sabi Gado èn te a lobi En? Sortu sani di skrifi na ini Gado Wortu e yepi sma fu no du ogri nanga trawan fu wan tra ras? Bijbel e sori taki Yehovah na a Tata fu ala sma. Bijbel e taki: „Fu taki en leti, wán Gado nomo de gi wi, a Tata; ala sani komopo fu en” (1 Korentesma 8:6). Boiti dati, Bijbel e taki: „Fu wán sma nomo [Yehovah] meki ala tra sma” (Tori fu den Apostel 17:26). Sobun, te yu e luku en bun, dan ala sma na brada nanga sisa fu makandra.

Sma fu ala ras kan de nanga tangi taki Gado gi den libi, ma den alamala kisi wan sani fu den fositen tata di no de so moi. A Bijbel skrifiman Paulus ben taki: „Wán man meki sondu kon na grontapu.” Sobun, „ala sma sondu èn den no man doro a glori fu Gado” (Romesma 3:23; 5:12). Yehovah na wan Gado di lobi te sani e difrenti fu makandra, èn fu dati ede nowan enkri sani di a meki de soifri leki wan trawan. Toku, a no gi nowan ras wan reide fu denki taki den bun moro wan tra ras. Aladi a de so taki na heri grontapu sma e denki taki a ras fu den bun moro tra ras, toku a denki disi de teige den sani di Bijbel e leri. A de krin fu si taki a sabi di wi e kisi fu Gado, e meki taki ala sortu sma kan libi na ini vrede nanga makandra.

Gado lobi ala pipel

Son sma e aksi densrefi efu na Gado meki sma si a wan ras moro prenspari leki a trawan, di a teki den Israelsma leki en pipel èn di a leri den fu de aparti fu tra pipel (Exodus 34:12). A ben de so taki Gado ben teki a pipel Israel leki a spesrutu pipel fu en, fu di Abraham, a fositen tata fu Israel, ben abi wan tranga bribi. Gado srefi ben tiri Israel fu owruten di a ben poti tiriman èn a ben gi den difrenti wet. Te den Israelsma ben hori densrefi na a seti disi, dan tra pipel ben kan si a difrenti na mindri a fasi fa Gado e tiri èn a fasi fa libisma e tiri tra pipel na tra presi. Na a ten dati Yehovah ben leri den Israelsma sosrefi taki wan ofrandi ben de fanowdu fu meki ala libisma kon bun baka nanga En. Na so ala pipel ben kisi wini fu a fasi fa  Yehovah ben handri nanga Israel. Yehovah du disi fu di a ben taigi Abraham: „Na yu bakapikin sa meki taki ala den pipel fu grontapu sa man kisi blesi gi densrefi trutru fu di yu arki mi.”—Genesis 22:18.

Boiti dati, den Dyu ben abi a grani fu kisi den santa boskopu fu Gado èn fu de a pipel pe a Mesias ben o gebore. Ma a sani disi sosrefi ben de gi a bun fu ala pipel. Na ini den Hebrew Buku fu Bijbel di den Dyu ben kisi, Gado skrifi taki wan ten o kon te ala pipel o kisi bigi blesi. A moi sani di skrifi na: „Furu pipel sa go fu tru èn den sa taki: ’Kon, un pipel, èn meki wi go na a bergi fu Yehovah èn na a oso fu a Gado fu Yakob; èn a sa leri wi den pasi fu en’ . . . A wan pipel no sa opo go feti teige a tra pipel, èn den no sa leri fu feti moro. Èn ibriwan fu den sa sidon trutru na ondro en droifibon èn na ondro en figabon, èn nowan sma sa de di e meki den beifi.”—Mika 4:2-4.

Aladi Yesus Krestes srefi ben e preiki gi den Dyu, toku a ben taki tu: „A bun nyunsu disi fu a kownukondre o preiki gi sma na heri grontapu, so taki sma fu ala kondre kan yere dati” (Mateyus 24:14). Sma fu ibri kondre ben o yere a bun nyunsu. Na so Yehovah gi wan moi eksempre fu di a sori wi taki wi no musu feni taki a wan ras bun moro a trawan. „Gado no lobi a wan sma moro a trawan, ma awansi fu sortu kondre wan sma de, efu a e du san de regtfardiki èn a e frede Gado, dan Gado feni a sma dati bun.”—Tori fu den Apostel 10:34, 35.

Den wet di Gado gi a pipel Israel fu owruten, e sori sosrefi taki A lobi ala pipel. A Wet ben sori taki den Israelsma ben musu du moro leki fu sori switifasi nomo gi sma di no ben de Israelsma. Luku san a Wet taki: „A trakondre sma di e tan na ini un kondre musu de leki un eigi kondreman. Un musu lobi en leki unsrefi, bika unu ben de trakondre sma tu na ini Egepte” (Lefitikus 19:34). Furu fu den wet fu Gado ben leri den Israelsma fu abi switifasi gi trakondre sma. Dati meki di Boas, wan afo fu Yesus, ben si wan pôti uma fu wan tra kondre e piki aleisi na a gron fu en, dan a du san Gado ben leri en. Fu dati ede a sorgu taki den sma di ben e koti nyanyan na a gron fu en, ben libi furu aleisi gi na uma.—Rut 2:1, 10, 16.

Yesus e leri sma fu abi switifasi

Moro leki iniwan sma, Yesus sori taki a sabi Gado. A sori den bakaman fu en fa den musu abi switifasi gi ala sortu sma. Wan leisi a bigin taki nanga wan Samaria uma. Furu Dyu ben tegu gi den Samariasma, dati meki na uma ben fruwondru di Yesus taki nanga en. Na wan switifasi Yesus yepi na uma fu frustan fa a kan kisi têgo libi.—Yohanes 4:7-14.

Yesus leri wi tu fa wi musu handri nanga sma fu tra ras, di a ben fruteri wan agersitori fu wan Samariaman di ben du bun gi wan tra sma. A man disi ben si wan Dyu di ben kisi hebi mankeri fu di fufuruman ben fon en. A Samariaman ben kan denki: ’Fu san ede mi musu yepi wan Dyu? Den Dyu e tegu gi a pipel fu mi.’ Ma Yesus ben sori taki a Samariaman ben abi wan tra denki leki den Dyu. Aladi tra sma ben waka pasa a Dyu di kisi mankeri, toku a Samariaman  „firi sari gi en” èn a sorgu gi ala sani di a Dyu ben abi fanowdu. Na a kaba fu na agersitori disi Yesus ben taki dati iniwan sma di wani taki Gado feni en bun musu du a srefi sani.—Lukas 10:30-37.

Na apostel Paulus ben leri den sma di wani plisi Gado taki den musu kenki a fasi fa den de èn taki den musu handri na a srefi fasi fa Gado e handri nanga sma. Paulus ben skrifi: „Kenki a fasi fa unu ben de fosi, èn tapu nanga den sani di unu ben e du, èn kon tron nyun sma di e kisi nyun fasi nanga yepi fu soifri sabi, so taki unu e kon gersi a Sma di ben meki unu kisi den fasi disi; na so fasi a no sa abi trobi efu wan sma na wan Grikisma noso wan Dyu, efu wan sma besnèi noso efu a no besnèi, efu a de wan trakondre sma, wan Skitsma . . . Ma boiti den sani disi, un musu abi lobi, èn a musu de leki wan krosi na un skin, bika lobi na wan volmaakti banti di e meki sma kon de wán.”—Kolosesma 3:9-14.

A de so taki sabi fu Gado e kenki a fasi fa sma de?

A de so trutru taki te wan sma sabi Yehovah Gado, dan dati e kenki a fasi fa a e handri nanga sma fu wan tra ras? Luku na eksempre fu wan uma di ben komoto fu wan kondre na ini Asia èn di ben kon tan na ini Kanada. Na uma disi ben firi brokosaka fu di sma ben desko en. A ben miti Yehovah Kotoigi, èn a bigin studeri Bijbel nanga den. Bakaten, a ben skrifi den wan brifi fu taigi den taki a abi warderi gi den. A ben skrifi na ini a brifi: ’Unu na wetiman di abi switifasi trutru. Di mi kon si taki unu de trutru tra fasi leki den tra wetiman, mi ben aksi misrefi fu san ede dati de so. Mi ben denki go, denki kon, èn mi ben kon frustan taki unu na Kotoigi fu Gado. Wan sani musu fu de na ini Bijbel di meki taki unu de so. Mi ben si na den konmakandra fu unu taki ala sma e moksi nanga makandra, iya, a no abi trobi efu na wetiman, blakaman, noso sma fu wan tra ras. Ma wan sani di ben de krin fu si na taki unu abi a srefi ati, fu di unu no e luku fu sortu ras wan sma de, ma unu alamala de leki brada nanga sisa fu makandra. Now mi sabi suma meki unu sori switifasi. Dati na a Gado fu unu.’

Gado Wortu e taki dati wan ten o kon te „grontapu sa kon furu trutru nanga a sabi fu Yehovah” (Yesaya 11:9). Nownow kaba, a Bijbel profeititori disi e kon tru, fu di wan bigi ipi fu milyunmilyun sma di „komoto fu ala kondre, lo, pipel, nanga tongo”, e anbegi Gado na ini wánfasi (Openbaring 7:9). Den e wakti a dei te sma no sa abi bita-ati moro gi makandra, ma taki sma na heri grontapu sa lobi makandra soleki fa Yehovah ben wani dati, di a taigi Abraham: „Ala den famiri na grontapu sa kisi blesi.”—Tori fu den Apostel 3:25.

[Futuwortu]

[Prenki na tapu bladzijde 4, 5]

A Wet fu Gado ben leri den Israelsma fu lobi trakondre sma

[Prenki na tapu bladzijde 5]

San wi kan leri fu na agersitori fu a Samariaman di ben du bun gi wan tra sma?

[Prenki na tapu bladzijde 6]

Gado no gi nowan ras wan reide fu denki taki den bun moro tra ras