„Wi lobi makandra aladi wi e taki difrenti tongo”

Fri. Frulusu. Katibo no de moro. Hondrohondro yari langa, sma e angri fu kisi frulusu fu den problema nanga den banawtu fu a libi. Fa wi kan lusu den problema di wi e kisi na ini wi libi? Oiti wi o kisi frulusu wan dei? Efu dati de so, dan fa wi o kisi frulusu?

NA FU a tori dati Yehovah Kotoigi ben taki na den Distrikt Kongres di ben hori dri dei langa, èn di ben bigin na ini mei 2006. A thema ben de „Frulusu de krosibei!”

Neigi fu den kongres disi ben de internationaal kongres, pe dusundusun sma fu tra kondre ben kisi wan kari fu kon. Den neigi kongres disi ben hori na ini yuli nanga augustus 2006 na ini Praag, a mamafoto fu a Tyekia Republiek; na ini Bratislava, a mamafoto fu Slowâkia; na ini Chorzów nanga Poznan, di de na ini Polen; * èn na feifi foto na ini Doisrikondre, namku Dortmund, Frankfurt, Hamburg, Leipzig, nanga München. Ala nanga ala moro leki 313.000 sma ben go na den kongres disi.

Fa sma ben tyari densrefi na den kongres disi? San sma di no de Kotoigi, ben feni fu den kongres disi? Èn fa den sma di ben go na den kongres ben e firi na a kaba fu den kongres?

Den ben musu sreka sani

Den fisitiman nanga den Kotoigi na ini den foto pe den kongres ben o hori, no ben man wakti fu a kongres bigin, fu di den ben sabi taki den kongres ben o moi srefisrefi. A no ben makriki fu sreka nofo sribipresi gi den sma fu tra kondre di ben o kon na den kongres. Fu eksempre, brada nanga sisa fu Polen ben de klariklari fu teki 13.000 fisitiman fu Owstu-Europa na ini den oso, so taki den ben kan go na a kongres na ini Chorzów. Sma ben komoto fu Amerkankondre, Armeinia, Belarus, Estkondre, Georgia, Kasakstan, Kirgistan, Latfia, Litonia, Moldafia, Rosiakondre, Tayikistan, Turkmenistan, Ukraini, nanga Usbekistan.

Furu fu den sma di ben kon fu tra kondre, ben musu sreka sani wan tu mun na fesi. Tatiana, wan pionier na tapu na èilanti Kamchatka, di de wan pisi fu Rosiakondre èn di de na a noord-owstusei fu Yapan, ben poti moni na wan sei wán yari na fesi so taki a ben kan go na a kongres. A kongres ben de sowan 10.500 kilometer fara fu a presi pe Tatiana ben e tan. A ben musu frei feifi yuru langa nanga opolani, baka dati a ben go nanga loko sowan dri dei langa, èn te fu kaba a ben sidon  30 yuru langa na ini wan bus fu doro na Chorzów.

Dusundusun brada nanga sisa yepi fu sreka sani gi den kongres. Den seti ala sani bun na den stadion, so taki den kongres ben kan hori (Deuteronomium 23:14). Fu eksempre, den Kotoigi na Leipzig krin a stadion heri bun, èn den taki dati den ben o krin a presi tu te a kongres ben kaba. Leki bakapisi fu dati den Kotoigi no ben abi fu pai a moni di den sma fu a stadion aksi fu krin a presi.

Sma kisi kari fu kon na a kongres

Den gemeente na heri grontapu ben meki bekènti na ala sei taki a „Frulusu de krosibei!” kongres ben o hori. Den sma di ben go na den internationaal kongres, ben teki prati fayafaya na a wroko disi. Den ben tan gi sma kari fu kon na a kongres teleki lati neti na a dei bifo a kongres bigin. Sortu bun bakapisi den ben abi, fu di den ben de so fayafaya fu gi sma wan kari?

Bogdan, wan Kotoigi fu Polen, ben miti wan owru man di ben wani kon na a kongres. Ma fu di a man no ben abi nofo moni, meki a no ben kan go na Chorzów di de 120 kilometer fara fu pe a ben tan. Ma wan presi ben kon opo na ini a bus di a gemeente ben yuru. Bogdan e fruteri: „Wi taigi a man taki a ben kan kon nanga wi sondro fu pai, ma taki a ben musu kon 5.30 mamanten na a presi pe a bus ben o teki sma.” A man ben go nanga den na a kongres. Bakaten a man skrifi den brada taki: „Baka di mi go na a kongres, mi teki a bosroiti fu de wan moro bun sma.”

Na ini Praag, wan man ben e tan na ini wan fu den hotel pe Kotoigi fu Ingrisikondre ben tan tu. Wan neti a man disi taigi den Kotoigi taki ensrefi ben go na a kongres a dei dati. Fu san ede a ben go? A man taki na fu di tin difrenti preikiman gi en wan kari na tapu strati, meki a ben feni taki a ben musu fu go! Den sani di a si èn yere drape ben naki en ati èn a ben wani sabi moro.—1 Timoteyus 2:3, 4.

Den kisi bun leri fu Bijbel

Den lezing na a kongres ben sori sma fa fu lusu difrenti problema. Nanga yepi fu krin rai di komoto fu Bijbel, den brada ben sori fa fu lusu den problema dati, noso san wi musu du fu horidoro.

Owrusma, sikisma, sma di lasi wan lobiwan na ini dede, noso sma di abi tra problema, kisi deki-ati fu Bijbel, èn na so fasi den kisi a howpu taki sani o waka bun gi den (Psalm 72:12-14). Trowpatna kisi Bijbel rai fa fu abi wan koloku trowlibi, èn papa nanga mama kisi rai tu fa fu kweki den pikin bun (Preikiman 4:12; Efeisesma 5:22, 25; Kolosesma 3:21). Yongu Kresten di e kisi koni rai fu Bijbel na oso èn na ini a gemeente, e kisi problema na skoro tu fu di den speri e dwengi den fu de leki den. Na a kongres den yonguwan disi leri fa fu kakafutu gi a problema disi, èn den leri fa fu „wai pasi gi den lostu di yongusma abi”.—2 Timoteyus 2:22.

Den abi brada nanga sisa na heri grontapu

Ala ten Yehovah Kotoigi e kisi bun Bijbel rai na den konmakandra fu den (2 Timoteyus 3:16). Den kongres disi ben de aparti, fu di sma fu difrenti kondre ben de drape. Den srefi lezing ben hori na ala den internationaal kongres, aladi den  ben hori na ini difrenti tongo. Ibri dei den brada fu a Tiri Skin fu Yehovah Kotoigi ben hori lezing. A ben moi fu yere tu fa a wroko e go na ini tra kondre. Den sani disi ben vertaal na ini difrenti tongo gi den sma di ben de drape.

Den sma di ben kon na a kongres ben wani miti den brada nanga sisa fu tra kondre. Wan brada ben taki: „Aladi wi ben taki difrenti tongo, toku dati no ben de wan problema.” „Ma a ben meki wi abi moro prisiri na a kongres. Den fisitiman abi difrenti kulturu, ma den de leki brada nanga sisa, fu di den abi a srefi bribi.” Den sma di ben kon na a kongres na ini München, ben taki disi: „Wi lobi makandra aladi wi e taki difrenti tongo.” Awansi fu sortu kondre den sma komoto èn awansi sortu tongo den taki, den alamala ben feni taki den de bun mati fu makandra, iya, taki den na Kresten brada nanga sisa fu makandra.—Sakaria 8:23.

Sma sori warderi gi a kongres

A takru weer na a ten fu den kongres na ini Polen, meki en muilek gi den arkiman fu arki. Alen ben e fadon furu na a ten fu a kongres èn a ben kowru sowan 14 graden Celcius. Wan brada fu Amerkankondre ben taki: „Noiti ete mi si so wan takru weer na wan kongres pe a ben kowru so, èn dati meki mi no ben frustan furu fu a programa. Ma fu di so furu sma fu tra kondre ben de, fu di ala sani ben e waka so moi, èn fu di sma ben e sori switifasi trutru, meki a weer no ben trobi mi so furu. Mi no o frigiti a kongres disi noiti, fu di a ben moi srefisrefi!”

Wan sani di ben meki a kongres disi moi srefisrefi gi den sma di e taki Pôlsutongo, na taki den kisi a buku Inzicht in de Schrift na ini a tongo fu den. Iya, a no fu noti den ben tan na a kongres aladi a ben kowru èn alen ben e fadon. Na ala den kongres disi den arkiman ben prisiri fu kisi a nyun buku di nen Leef met Jehovah’s dag in gedachten.

Tra sani ben de di meki taki furu sma no sa frigiti den kongres disi. Kristina, wan sisa fu a Tyekia Republiek, di ben yepi den fisitiman fu tra kondre te den ben go nanga bus na a kongres, ben taki: „Di den fisitiman ben o go baka na den kondre, dan wan sisa tyari mi go na wan sei, a brasa mi, èn a taigi mi: ’A no spotu sorgu yu sorgu mi! Yu ben tyari nyanyan kon langalanga na wi sidonpresi èn yu ben gi wi watra srefi fu dringi. Grantangi gi a bigi lobi di yu sori.’” A sisa disi ben de nanga tangi taki sani ben seti taki den fisitiman fu tra kondre ben kisi nyanyan. „Noiti ete wi ben seti so wan bigi sani”, na so wan brada ben taki. „Ibri dei wi ben musu prati sowan 6500 preti nyanyan. A ben moi fu si fa so furu sma, èn sosrefi pikin-nengre ben e yepi wi.”

Wan sisa fu Ukraini di ben go na a kongres na ini Chorzów, ben taki: „Den brada nanga sisa fu wi sori lobi gi wi, den sorgu wi, èn den ben lobi fu gi wi sani. A sani dati naki wi ati trutru. Wi no sabi san wi musu taki moro fu taki den tangi gi san den du.” Annika, wan meisje fu aiti yari di komoto fu Finland, ben skrifi go na a bijkantoro fu Yehovah Kotoigi na ini Polen: „A kongres ben moro moi leki san mi ben fruwakti. A de wan kefalek moi sani fu de na ini na organisâsi fu Yehovah, fu di wi abi mati na heri grontapu!”—Psalm 133:1.

San tra sma di no de Kotoigi ben taki fu a kongres

Bifo a kongres ben hori, dan sani ben seti gi wan tu fu den fisitiman taki den ben kan go luku wan tu moi presi fu a kondre. Na den boitipresi fu Beieren, den fisitiman ben go na den Kownukondre zaal èn den brada nanga sisa drape ben gi den wan switikon. Wan uma di  no de wan Kotoigi èn di ben tyari wan grupu Kotoigi go luku wan tu presi, ben fruwondru fu si a lobi di den brada nanga sisa ben abi gi makandra. Wán fu den Kotoigi di ben de na ini a grupu ben taki: „Di wi ben drai go baka na a hotel, na uma disi ben taki dati wi ben de heri tra fasi leki den tra grupu di a ben tyari go koiri. Na uma ben taki dati wi ben weri krosi di fiti, èn taki wi alamala ben arki den wan di ben teki fesi na ini a grupu. Nowan sma ben kosi, èn sani no ben waka bruyabruya. Na uma ben fruwondru fu si fa sma di no sabi densrefi, ben tron bun mati wantewante fu makandra.”

Wan brada na ini Praag, di ben wroko na a Nyunsu Afdeling fu a kongres, ben taki: „Sonde mamanten a skowtu di ben teki fesi na ini a grupu fu skowtu di ben musu luku fa sani ben e waka na a kongres, ben kon drape. A si taki ala sani ben e waka bun, èn fu dati ede a no ben abi noti fu du. A ben taki tu dati wan tu sma fu a birti ben aksi en san ben e pasa na a stadion. Di a taki dati na Yehovah Kotoigi e hori wan konmakandra drape, dan furu fu den no ben lobi a sani dati. Ma a ben piki den sma: ’Efu sma ben e tyari densrefi pikinso nomo leki fa den Yehovah Kotoigi e tyari densrefi, dan skowtu no ben o abi fu de moro.’”

Furu sma kisi frulusu kaba!

Gado Wortu, Bijbel, e meki Kresten fu difrenti kulturu libi na ini vrede èn na ini wánfasi nanga makandra (Romesma 14:19; Efeisesma 4:22-24; Filipisma 4:7). A sani disi ben de krin fu si na den internationaal kongres disi di ben nen „Frulusu de krosibei!” Yehovah Kotoigi kisi frulusu kaba fu furu fu den problema di e miti a grontapu disi. Wan tu fu den problema na ini a grontapu disi na taki sma e desko trawan, den e feti nanga makandra, èn den feni taki a ras fu den de moro prenspari. Ma Yehovah Kotoigi e leri fu puru den sani disi na ini den ati. Den sabi taki heri esi nowan fu den problema dati sa de moro na grontapu.

Den sma di go na den kongres disi ondrofeni taki Kotoigi de na ini wánfasi, aladi den de fu difrenti kondre nanga difrenti kulturu. A sani disi ben de krin fu si na a kaba fu den kongres. Ala sma ben e naki anu, den ben e brasa den nyun mati fu den, èn den ben e meki fowtow (1 Korentesma 1:10; 1 Petrus 2:17). Den fisitiman di ben drai go baka na den oso èn na a gemeente fu den, ben de nanga prisiri èn den de seiker taki heri esi ala den problema nanga den broko-ede no o de moro. Den sma disi kisi deki-ati fu tan abi a fasti bosroiti fu hori steifi na Gado „wortu di e gi libi”.—Filipisma 2:15, 16.

[Futuwortu]

[Faki/​Prenki na tapu bladzijde 10]

Den ben de wán aladi den ben taki 26 tongo

Na ala den neigi kongres, a programa ben e hori na ini a tongo di den sma fu a kondre dati e taki. Na den kongres di ben hori na ini Doisrikondre, den lezing ben hori na ini 18 tra tongo tu. Na ini Dortmund, den lezing ben hori na ini Arabiatongo, Farsitongo, Potogisitongo, Spanyorotongo, nanga Rosiatongo. Na ini Frankfurt, den ben hori a kongres na ini Ingrisitongo, Fransitongo, nanga Serfiatongo noso Krowâsiatongo. Na ini Hamburg, den ben hori den lezing na ini Deinsitongo, Bakratongo, Sweidsitongo, nanga Tamiltongo. Na ini Leipzig, a ben de na ini Sneisitongo, Pôlsutongo, nanga Torkutongo. Na ini München, a kongres ben hori na ini Grikitongo, Italiatongo, nanga a Dofusma-tongo fu Doisrikondre. Na a kongres na ini Praag, den lezing ben hori na ini Tyekiatongo, Ingrisitongo, nanga Rosiatongo. Na ini Bratislava, a programa ben hori na ini, Ingrisitongo, Hongariatongo, Slowâkiatongo, nanga a Dofusma-tongo fu Slowâkia. Na ini Chorzów, den lezing ben hori na ini Pôlsutongo, Rosiatongo, Ukrainitongo, nanga a Dofusma-tongo fu Polen. Èn na ini Poznan, a programa ben de na ini Pôlsutongo nanga Fensitongo.

Ala nanga ala a kongres ben hori na ini 26 tongo! Fu tru, den sma di ben kon na den kongres no ben taki a srefi tongo, ma den ben de wán fu di den lobi makandra.

[Prenki na tapu bladzijde 9]

Den fisitiman fu Krowâsia di ben kon na Frankfurt ben prisiri fu kisi a „Nyun Grontapu-vertaling” na ini den eigi tongo