A yeye fu yu sa libi go doro?

A DE so taki wi na skin nanga brudu nomo? Noso wan tra sani de ete? A de so taki wi e libi fu wan syatu pisi ten nomo? Noso wi abi wan sani na ini wi di wi no man si, èn di e libi go doro baka te wi dede?

Te a abi fu du nanga dede, dan den kerki fu grontapu e leri sma wan lo sani di e bruya den. Ma toku furu fu den kerki disi e agri nanga wan spesrutu sani: Libisma abi wan sani na ini den di no man dede èn di e libi go doro baka te den dede. Furu sma e bribi taki „a sani” disi na wan yeye di e libi go doro baka te wan sma dede. San yu e bribi? San na a yeye? A de so taki wi abi wan yeye di e gowe libi a skin baka te wi dede? Efu dati de so, dan san e pasa nanga a yeye disi?

„Da skin sondro da jeje de dede”

Na ini Bijbel, a Hebrew wortu nanga a Griki wortu di vertaal nanga „yeye”, trutru wani taki „a bro di wi e hari” noso, „a winti di e wai”. Ma a wortu „yeye” no abi fu du nomo nanga a bro di wan sma e bro. Fu eksempre, Bijbel e taki: „Da skin sondro da jeje de dede” (Yakobus 2:26, Da Bijbel na ini Sranantongo). Sobun, a yeye na a sani, noso a krakti di e hori wan sma na libi.

Te wi e luku san e pasa nanga wan sma syatu baka te a tapu fu bro, dan wi e si krin taki a yeye no abi fu du nomo nanga bro di wi e bro. Te wan sma tapu fu hari bro fu wan syatu pisi ten, dan a kan kisi ensrefi baka te sma e du sani fu meki a bro baka. Fu san ede dati so? Fu di libi de ete na ini en skin. Ma te libi no de moro na ini en skin, dan a no o man bro moro, awansi san sma e du. Sobun, a yeye, na a krakti di e hori wan sma na libi. Na a krakti disi wan pikin e kisi te a e bigin gro na ini en mamabere, èn solanga wan sma e tan bro, a krakti dati e tan na ini en skin.—Yob 34:14, 15.

A de so taki ibri sma abi wan tra sortu yeye? Noso a de so taki na a srefi krakti e hori ala sma na libi? Bijbel e piki den aksi disi krin. Koni Kownu Salomo ben sori taki a srefi yeye e hori ala libisma nanga meti na libi. A ben taki: „Wan kaba de gi den manpikin fu libisma èn wan kaba gi meti, èn den abi a srefi kaba. Soleki fa a wan e dede, na so a trawan e dede, èn den alamala abi a srefi yeye. . . . Den alamala e go na wán presi. Den alamala meki fu doti, èn den alamala e drai  go baka na doti. Suma sabi efu a yeye fu den manpikin fu libisma e opo go na loktu; èn efu a yeye fu den meti e saka go na ondro na grontapu?” (Preikiman 3:19-21) Iya, fu taki en leti, meti nanga libisma abi a srefi yeye noso krakti di e hori den na libi.

Wi kan agersi a yeye nanga stroom di e meki taki sani soleki radio noso telefisi e wroko. A stroom disi di wi no man si kan meki taki wan lampu e skèin, wan ventilator e drai, a kan meki taki wan radio noso telefisi e prei, èn a kan meki taki wan computer e wroko. A stroom srefi no man du den sani di den wrokosani disi e du. A stroom no e kenki kon tron wan tra sani, ma a e tan wan krakti. Na so a de nanga a yeye, noso a krakti di e hori wi na libi. A yeye srefi no man du den sani di wan sma e du. A krakti disi, noso a yeye no abi firi èn a no man denki, a de wan krakti nomo. Libisma nanga meti abi a srefi yeye. Sobun, te wan sma dede, dan a yeye fu en no e libi go doro na wan tra presi.

San e pasa nanga a yeye te wi dede?

Preikiman 12:7 e taki dati te wan sma dede, „a doti e drai go baka na a gron neleki fa a ben de fosi èn a yeye srefi e drai go baka na a tru Gado fu pe a komoto”. Ma disi no wani taki dati a yeye e gowe libi a skin fu go baka na Gado. Fu eksempre, luku san Yehovah ben meki a profeiti Maleaki taigi den trangayesi Israelsma: „Drai kon baka na mi èn mi sa drai kon baka na unu” (Maleaki 3:7). Efu den Israelsma ben wani ’drai go baka’ na Yehovah, dan den ben musu tapu fu du ogri, èn den ben musu hori densrefi baka na den regtfardiki markitiki fu Gado. A drai di Yehovah ben o ’drai go baka’ na Israel, ben wani taki dati a no ben o atibron moro nanga den. Disi no wani taki dati Yehovah nanga den Israelsma ben o komoto fu a wán presi go na a trawan. Fu taki en leti, a drai di den ben o ’drai go’, wani taki dati den ben o kon bun baka nanga makandra. Te Bijbel e gebroiki den wortu „drai go”, dan a no wani taki ala ten dati wan sani noso wán sma e komoto fu a wán presi go na a trawan.

Na so a de tu taki te wan sma dede, dan „a yeye srefi e drai go baka na a tru Gado fu pe a komoto”. Disi wani taki dati te a yeye,  noso a krakti di e hori wi na libi e gowe libi wan sma en skin, dan na a tru Gado wawan kan gi wi a krakti baka, fu di a krakti dati e komoto fu en. Sobun, na Gado wawan kan gi wan sma libi baka na ini a ten di e kon.

Fu gi wan eksempre, luku san na Evangelitori fu Lukas e taki fu a dede fu Yesus Krestes. Drape skrifi: „Yesus bari nanga wan tranga sten, taki: ’Mi Tata, mi e poti mi yeye na ini yu anu.’ Baka di a taki dati, a dede” (Lukas 23:46). Di Yesus dede, dan a yeye fu en, noso a krakti di ben e hori en na libi, gowe libi a skin fu en. Ma dati no wani taki dati a ben e go na en Tata na hemel. Fu taki en leti, Yesus ben de na ini a grebi, iya, a no ben de na libi. Ma baka dri dei, Gado gi en wan opobaka (Preikiman 9:5, 10). Srefi baka di Yesus kisi wan opobaka, a no go na hemel wantewante. Na presi fu dati, a tan „fo tenti dei” na grontapu, „a sori” den disipel fu en ’taki a de na libi’, èn baka dati „Gado opo en go na hemel” (Tori fu den Apostel 1:3, 9). Di Yesus dede, dan a ’poti en yeye na ini na anu fu en Tata’, èn a ben abi na overtoigi taki Yehovah ben o man gi en libi baka.

San na a yeye trutru?

Bijbel e sori krin san na a yeye. A yeye na a krakti di e hori wan sma na libi. Wi musu hari bro fu man tan na libi. Fu dati ede, libisma no abi wan sani na ini den di e libi go doro baka te den dede.

Sobun, den dedewan musu kisi wan opobaka fu man libi baka. Bijbel e pramisi: „No fruwondru fu disi, bika a yuru o kon te ala den sma di de na ini den grebi o yere [Yesus] en sten, èn den o komopo drape” (Yohanes 5:28, 29). A sani di de wan trutru howpu gi den dedewan, a no a leri di e taki dati a yeye no man dede, ma na a opobaka howpu di Gado gi libisma.

A de tumusi prenspari taki wi e kon sabi soifri san na a opobaka èn san dati wani taki gi libisma! A prenspari tu fu kon sabi Gado nanga Krestes (Yohanes 17:3). Yehovah Kotoigi na ini a birti fu yu sa prisiri fu studeri Bijbel nanga yu so taki yu kan kon sabi moro fu Gado, fu en Manpikin, èn fu den pramisi fu En. Wi e gi yu a kari fu miti nanga den Kotoigi, noso fu skrifi den sma di e tyari a tijdschrift disi kon na doro.

[Prenki na tapu bladzijde 4]

Den alamala abi a srefi yeye

[Sma di abi a reti fu a prenki]

Goat: CNPC—Centro Nacional de Pesquisa de Caprinos (Sobral, CE, Brasil)