Barsilai—Wan man di no ben e denki tumusi furu fu ensrefi

’FU SAN EDE mi musu tron wan hebi gi yu?’ A man di ben taigi Kownu David a sani disi ben de Barsilai, wan owru man di ben abi 80 yari. Bijbel e taki dati a ben de „wan prenspari man”, fu di a ben gudu (2 Samuel 19:32, 35). Barsilai ben e libi na ini a kondre Gilead, wan kontren na a owstusei fu a Yordanliba, pe furu bergi de.—2 Samuel 17:27; 19:31.

San ben e pasa na a ten di Barsilai taigi David a sani disi? Èn fu san ede na owru man disi taki a sani dati?

Sma opo densrefi teige a kownu

David ben de na ini wan muilek situwâsi. Absalom, a manpikin fu en, poti ensrefi leki kownu baka di a „suku fu wini na ati fu den man fu Israel”. A ben de krin taki Absalom ben o kiri iniwan sma di ben o horibaka gi en papa. Dati meki David nanga den futuboi fu en gowe libi Yerusalem (2 Samuel 15:6, 13, 14). Di David doro na ini Mahanaim, wan kontren na a owstusei fu Yordanliba, dan Barsilai kon yepi en.

Barsilai nanga tu tra man, namku Syobi nanga Makir, gi David wan lo sani di a ben abi fanowdu. Den dri getrow futuboi disi sori taki den ben e frustan na ini sortu muilek situwâsi David nanga den man fu en ben de. Den ben taki: „Angri e kiri den sma na ini a sabana, den weri, èn watra e kiri den.” Barsilai, Syobi, nanga Makir du ala san den man fu gi David nanga den man fu en san den ben abi  fanowdu. Den gi den bedi, tarwe, gerst, blon, losi karu, bonki, pesi, oni, botro, skapu nanga tra sani.—2 Samuel 17:27-29.

A no de fu taki dati den man disi ben musu luku bun, fu di Absalom ben o kiri iniwan sma di ben e horibaka gi David, a sma di ben abi a reti fu de kownu. Dati meki di Barsilai yepi David, dan dati sori taki a ben abi deki-ati.

A situwâsi kenki

Syatu baka dati, den srudati fu Absalom miti nanga den man fu David. Den tu grupu disi bigin feti na ini a busi fu Efraim, èn a kan taki dati ben de na ini a birti fu Mahanaim. A legre fu Absalom lasi a feti „èn bun furu sma lasi den libi na wan ogri-ati fasi a dei dati”. Absalom ben suku fu lowe, ma a no teki langa fosi sma kiri en.—2 Samuel 18:7-15.

Now David ben man tiri baka leki kownu na ini Israel, sondro taki wan sma ben e suku fu gens en. Den bakaman fu en no ben abi fu libi moro leki loweman. Boiti dati, fu di den tan getrow na David, meki a ben abi lespeki gi den èn a ben e warderi den.

Di David ben o drai go baka na Yerusalem, dan „Barsilai, a Gileadsma saka komoto na Rogelim fu go na a Yordanliba nanga a kownu, fu abra Yordanliba makandra nanga en”. Na a okasi dati, David aksi Barsilai: „Abra a liba makandra nanga mi, èn mi sa meki yu nyan nanga mi na ini Yerusalem.”—2 Samuel 19:15, 31, 33.

A no de fu taki dati David ben abi bigi warderi gi a yepi di a ben kisi fu Barsilai. David ben wani pai Barsilai baka gi a bun di a ben du gi en. Ma a no ben wani du dati nanga gudu. Barsilai ben gudu kaba, sobun a no ben abi den sani dati fanowdu. Kande David ben wani taki Barsilai ben musu dini na ini en kownu-oso, fu di na owru man disi ben abi bun fasi. A ben o de wan bigi grani gi Barsilai fu dini fu ala ten na ini a kownu-oso, fu di a ben o kisi furu wini leki wan mati fu a kownu.

Barsilai ben abi sakafasi èn a ben sabi san prenspari

Disi na san Barsilai piki Kownu David: „Mi no sa libi langa moro, dan fu san ede mi musu go na Yerusalem makandra nanga a kownu? Now mi abi aititenti yari. Mi sabi san bun èn san ogri, noso yu futuboi man tesi san a e nyan èn san a e dringi, noso mi man yere fa den mansma nanga den umasma e singi?” (2 Samuel 19:34, 35) Sobun, Barsilai taigi a kownu na wan lespeki fasi taki a no man go nanga en, èn na so a no teki a tumusi moi grani di a ben o kisi. Ma fu san ede a du dati?

Kande Barsilai no ben wani go nanga David, fu di a ben owru kaba èn a no ben man du so furu moro. Kande a ben firi taki a no ben o libi langa moro (Psalm 90:10). A ben du san a ben man fu yepi David, ma a ben sabi tu taki a ben owru kaba. Barsilai no ben gridi fu kisi biginen, ma na presi fu dati a hori na prakseri taki a no ben man du so furu moro. Tra fasi leki Absalom di ben e suku nomo fu kisi biginen, Barsilai sori sakafasi soleki fa a fiti.—Odo 11:2.

Kande Barsilai no ben wani go tu, fu di a no ben wani meki en moro muilek gi a sma di Gado poti leki kownu. Barsilai aksi David: „Fu san ede yu futuboi musu tron wan hebi gi yu, mi kownu?” (2 Samuel 19:35) Aladi Barsilai  ben e horibaka gi David ete, toku a kan taki a ben sabi taki wan moro yongu man ben o man du a wroko moro bun leki en. Kande a ben abi en eigi manpikin na prakseri, di a taki: „Luku yu futuboi Kimham. Meki en abra makandra nanga kownu, èn du nanga en san yu wani.” David no firi wan fasi, ma a du san Barsilai taigi en. Fu taki en leti, fosi David abra a Yordanliba, a „bosi Barsilai èn a blesi en”.—2 Samuel 19:37-39.

Hori na prakseri san prenspari

A tori fu Barsilai e sori wi taki wi musu hori na prakseri san prenspari. A tru taki wi no musu weigri fu teki grani na ini a gemeente, èn wi no musu weigri tu fu meki muiti fu kisi moro grani, soso fu di wi wani libi wan switi libi, noso fu di wi feni taki wi no man teki frantwortu na wi tapu. Gado kan yepi wi te wi e aksi en fu gi wi a krakti nanga a koni fu tyari den frantwortu disi.—Filipisma 4:13; Yakobus 4:17; 1 Petrus 4:11.

Ma wi musu hori na prakseri san moro prenspari. Fu eksempre, kande wan Kresten brada e du furu kaba na ini a diniwroko fu Yehovah. A sabi taki, efu a teki moro frantwortu, dan a no o man sorgu en osofamiri bun soleki fa Bijbel e taigi sma fu du. A brada disi ben o sori taki a abi sakafasi èn taki a sabi san de prenspari te a no ben o teki moro frantwortu na en tapu fu wan pisi ten, a no so?—Filipisma 4:5; 1 Timoteyus 5:8.

A bun te wi e denki dipi fu a bun eksempre fu Barsilai. A ben de getrow, a ben abi deki-ati, a ben lobi fu yepi sma, èn a ben abi sakafasi. Ma san moro prenspari, na taki Barsilai ben abi a fasti bosroiti fu poti na anbegi fu Gado na a fosi presi na ini en libi.—Mateyus 6:33.

[Karta na tapu bladzijde 15]

(Luku publikasi)

Barsilai di ben abi aititenti yari waka a langa pasi fu go yepi David

GILEAD

Rogelim

Sukot

Mahanaim

Yordanliba

Gilgal

Yerikow

Yerusalem

EFRAIM

[Prenki na tapu bladzijde 13]

Fu san ede Barsilai no ben wani go nanga David?