Horidoro aladi yu e wakti a dei fu Yehovah
Horidoro aladi yu e wakti a dei fu Yehovah
„Boiti taki un abi bribi . . . un musu horidoro.”—2 PETRUS 1:5, 6.
1, 2. San a wani taki fu horidoro, èn fu san ede Kresten musu du dati?
A BIGI dei fu Yehovah de heri krosibei (Yoèl 1:15; Sefanya 1:14). Leki Kresten di abi a fasti bosroiti fu tan getrow na Gado, wi e angri fu si a ten te a sa kon na krin taki na Yehovah abi a reti fu tiri hemel nanga grontapu. Aladi wi e wakti a ten dati, sma no lobi wi kwetikweti, den e kosi wi, den e frufolgu wi, èn den wani kiri wi fu di wi na anbegiman fu Yehovah (Mateyus 5:10-12; 10:22; Openbaring 2:10). Fu dati ede wi musu horidoro. Disi wani taki dati wi musu tan getrow aladi wi e kisi tesi. Na apostel Petrus ben gi wi a rai disi: „Boiti taki un abi bribi . . . un musu horidoro” (2 Petrus 1:5, 6).Wi musu horidoro fu di Yesus ben taki: „A sma di horidoro te na a kaba, na en o kisi frulusu.”—Mateyus 24:13.
2 Wi e kon siki, sari sani e miti wi, èn wi e kisi tra tesi tu. Satan ben o breiti srefisrefi efu wi ben o lasi bribi! (Lukas 22:31, 32) Yehovah kan gi wi a krakti fu horidoro awansi sortu tesi wi e kisi (1 Petrus 5:6-11). Luku wan tu ondrofenitori di e sori taki wi kan horidoro èn taki wi kan tan abi wan tranga bribi, aladi wi e wakti a dei fu Yehovah.
Den horidoro aladi den siki
3, 4. Gi wan eksempre fu sori taki wi kan dini Yehovah na wan getrow fasi awansi wi siki.
3 Na ini a ten disi, Gado no e du wondru fu dresi wi te wi siki, ma a e gi wi a krakti fu horidoro (Psalm 41:1-3). Wan uma di nen Sharon e taki: „Sensi mi de, mi de na ini wan rolsturu. Syatu baka di mi gebore mi kon siki, èn fu dati ede mi no ben man taki bun moro èn mi no ben man waka bun tu, èn a sani dati meki taki mi no ben man du furu sani di tra pikin man du.” Di Sharon kon leri sabi Yehovah, èn di a kon sabi taki Yehovah o meki sma kon gosontu baka, dan a sani disi gi en howpu. Aladi a no man taki bun èn a no man waka bun, toku a Kresten diniwroko e gi en prisiri. Sowan 15 yari pasa, a ben taki: „Awansi mi no de gosontu, toku mi man horidoro fu di mi e frutrow tapu Gado èn fu di mi e anbegi en. Mi breiti srefisrefi taki mi na wan anbegiman fu Yehovah èn taki a e tan yepi mi doronomo!”
4 Na apostel Paulus ben gi den Kresten na ini Tesalonika a rai fu „taki na wan fasi di e trowstu den wan di lasi-ati” (1 Tesalonika 5:14). Te sani no e waka soleki fa sma ben fruwakti, dan dati kan meki den lasi-ati. Luku san Sharon ben skrifi na ini 1993: „Fu di a ben hati mi taki sani no waka soleki fa mi ben fruwakti, meki mi . . . lasi-ati, èn a teki dri yari langa fosi mi kisi misrefi baka. . . . Den owruman trowstu mi èn den gi mi rai. . . . Nanga yepi fu A Waktitoren, Yehovah yepi wi na wan lobi-ati fasi fu kon frustan moro bun san fu du te wi lasi-ati. Iya, Yehovah e broko en ede nanga a pipel fu en, èn a e frustan fa wi e firi” (1 Petrus 5:6, 7). Sharon e dini Gado getrow ete aladi a e wakti a bigi dei fu Yehovah.
5. Sortu buweisi de taki Kresten man horidoro awansi den abi furu broko-ede?
5 Son Kresten abi furu broko-ede fu di so furu ogri miti den na ini a libi. Na a ten fu a di fu Tu Grontapufeti, Harley si den ogri-ati sani di pasa na a ten dati, èn fu dati ede a ben e kisi takru dren. Te a ben e sribi, dan a ben gwenti bari: „Luku bun! Luku bun!” Te a ben e wiki, dan en heri skin ben nati nanga sweti. Ma a ben man fiti den rai fu Gado na ini en libi, èn baka wan pisi ten a no ben kisi den takru dren disi so furu moro.
6. Fa wan Kresten horidoro aladi a ben e firi brokosaka srefisrefi ten na ten?
6 Wan Kresten di abi wan siki di e meki taki a e firi brokosaka srefisrefi ten na ten, ben feni en muilek fu preiki oso fu oso. Ma toku a ben tan teki prati na a wroko disi, fu di a ben sabi taki a diniwroko sa tyari libi kon gi en èn gi den wan di e arki a bun nyunsu (1 Timoteyus 4:16). Son leisi, te a brada disi ben doro kaba na wan oso, a no ben abi deki-ati srefi fu kari den sma. A brada e taki: „Te fu kaba, mi ben kisi misrefi baka. Mi ben e go na wan tra oso, èn mi ben e pruberi en ete wan leisi. Fu di mi tan dan du a preikiwroko, meki a bribi fu mi no kon swaki.” A ben hebi tu gi a brada disi fu go na den konmakandra, ma a ben de seiker taki a ben o kisi wini te a ben e kon makandra nanga den brada nanga sisa fu en. Fu dati ede, a meki muiti fu de na den konmakandra disi.—Hebrewsma 10:24, 25.
7. Fa son sma e horidoro, aladi den frede fu taki te furu sma e arki den, noso aladi den frede fu go na konmakandra?
7 Son Kresten e frede srefisrefi gi spesrutu situwâsi noso sani. Fu eksempre, a kan taki den e frede fu taki te furu sma e arki den, noso den e frede fu go na konmakandra. Prakseri o muilek a de gi den Kresten disi fu gi piki na den Kresten konmakandra, noso fu abi wan prati na a Theokrasia Diniwroko-skoro! Toku den e horidoro, èn wi breiti te den de na den konmakandra èn te den e teki prati na den konmakandra disi.
8. Sortu prenspari sani e yepi sma di e firi brokosaka srefisrefi?
8 Wan sma di e firi brokosaka srefisrefi musu rostu bun èn a musu sribi nofo. Kande a sa de fanowdu taki a sma disi e go suku datrayepi. Ma wan prenspari sani di kan yepi den sma disi, na te den e begi Gado fu yepi den. Psalm 55:22 e taki: „Trowe yu hebi na tapu Yehovah, èn ensrefi sa horibaka gi yu. Noiti a sa gi pasi taki a regtfardikiwan e degedege.” Fu dati ede, awansi san pasa „frutrow tapu Yehovah nanga yu heri ati”.—Odo 3:5, 6.
Den horidoro aladi wan lobiwan fu den dede
9-11. (a) San kan yepi wi fu horidoro te wi e sari fu di wan lobiwan fu wi dede? (b) Fa na eksempre fu Ana kan yepi wi fu horidoro te wan lobiwan fu wi dede?
9 Te wan sma dede, dan den famiriman fu en e sari trutru. Abraham ben krei di en lobi wefi Sara dede (Genesis 23:2). Srefi Yesus di ben de volmaakti „bigin krei” di en mati Lasarus dede (Yohanes 11:35). Sobun, a no de fu taki dati yu e sari te wan lobiwan fu yu dede. Ma Kresten sabi taki den dedewan sa kisi wan opobaka (Tori fu den Apostel 24:15). Fu dati ede, den no e „sari neleki fa tra sma e sari fu di den no abi wan howpu”.—1 Tesalonikasma 4:13.
10 San wi kan du te wi e sari fu di wan lobiwan fu wi dede? Luku na agersitori disi. Nofo tron, wi no e tan firi sari te wan mati fu wi e go na wan tra kondre, fu di wi sabi taki a o drai kon baka wan dei. Te wi e si a dede fu wan getrow Kresten na a srefi fasi, dan wi no sa sari so furu, fu di wi sabi taki a o kisi wan opobaka.—Preikiman 7:1.
11 Te wi e frutrow dorodoro tapu „a Gado fu ala trowstu”, dan dati sa yepi wi fu horidoro te wan lobiwan fu wi dede (2 Korentesma 1:3, 4). A tori fu Ana, na uma di ben lasi en masra na ini dede, e gi wi deki-ati tu. Na uma disi lasi en masra baka di a ben trow seibi yari. Ma di a ben abi 84 yari, dan a ben e du santa diniwroko ete gi Yehovah na a tempel (Lukas 2:36-38). Fu di a ben de getrow na Gado, meki a ben man horidoro aladi a ben e sari èn aladi a ben de en wawan. Te wi e teki prati doronomo na a Kresten diniwroko èn na a Kownukondre preikiwroko, dan dati kan yepi wi fu horidoro aladi wi e sari fu di wan lobiwan fu wi dede.
San fu du te tesi e miti wi
12. Sortu tesi son Kresten kisi na ini a osofamiri libi fu den?
12 Son Kresten e kisi tesi na ini den osofamiri libi. Fu eksempre, efu wan trowpatna e du sutadu, dan dati kan tyari bigi problema kon! A trowpatna di e ondrofeni a sari sani disi no man bribi taki a sani disi miti en, èn a e sari srefisrefi. A sani disi kan meki taki a no man sribi èn taki a e krei doronomo. Fu di a kon muilek srefisrefi gi en fu du den sani di a gwenti fu du, meki a no e du sani na a yoisti fasi, èn den sani dati kan tyari tra problema kon srefi. Kande a trowpatna disi no man nyan bun moro, kande a e kon mangri, noso a e lasi-ati. Kande a hebi gi en fu teki prati na a Kresten diniwroko. Èn a no de fu taki dati a sani disi kan abi bun furu krakti tapu den pikin!
13, 14. (a) Fa a begi fu Salomo e gi wi deki-ati? (b) Fu san ede wi musu begi Gado fu gi wi en santa yeye?
13 Te wi e kisi den sortu tesi disi, dan Yehovah e gi wi a yepi di wi abi fanowdu (Psalm 94:19). Den sani di Kownu Salomo ben taki na ini a begi fu en di a gi a tempel abra na Yehovah, e sori krin taki Gado e arki den begi fu a pipel fu en. Salomo ben begi Gado: „Awansi sortu begi iniwan sma noso a heri pipel fu Israel abi, noso awansi sortu yepi den e aksi fu kisi, fu di ibriwan fu den abi den eigi sari, èn den trutru e bradi den mindri-anu opo go na a sei fu na oso disi, dan meki a de so taki yu srefi e arki den komoto fu hemel, a presi pe yu e tan, èn yu musu gi den pardon èn yu musu handri, èn yu musu pai ibriwan fu den gi a fasi fa den handri, (fu di yu wawan sabi na ati fu ala den manpikin fu libisma); so taki den kan abi frede gi yu ala den dei di den e libi na tapu a gron di yu gi den tata fu den.”—1 Kownu 8:38-40.
14 Wan sani di kan de wan bigi yepi gi wi, na te wi e tan begi Gado fu gi wi a santa yeye fu en (Mateyus 7:7-11). Te wi kisi a yeye disi, dan wi sa de nanga prisiri èn wi sa abi vrede (Galasiasma 5:22, 23). Wi no sa firi sari moro fu di wi hemel Tata e piki den begi fu wi. Wi sa de nanga prisiri, iya, wi no sa broko wi ede moro, ma wi sa abi vrede!
15. Sortu bijbeltekst kan yepi wi fu no broko wi ede tumusi?
15 A no de fu taki dati wi e broko wi ede te wi abi problema. Ma wi no sa broko wi ede tumusi te wi e hori den wortu fu Yesus na prakseri. A ben taki: „No broko un ede moro nanga un libi, iya, nanga san unu o nyan noso san unu o dringi noso san unu o weri na un skin. . . . Fu dati ede, tan suku a kownukondre nanga [Gado] En regtfardikifasi fosi, dan unu sa kisi ala den tra sani tu” (Mateyus 6:25, 33, 34). Na apostel Petrus e gi wi a rai fu ’trowe ala wi sorgu na tapu Gado, bika a e broko en ede nanga wi’ (1 Petrus 5:6, 7). A bun te wi e meki muiti fu lusu den problema fu wi. Ma te wi du ala san wi man, dan wi no musu broko wi ede moro, ma wi musu begi Gado. A psalm skrifiman ben taki: „Poti yu hebi tapu Yehovah, èn frutrow na en tapu, èn ensrefi sa handri.”—Psalm 37:5.
16, 17. (a) Fu san ede wi sa broko wi ede ten na ten? (b) Sortu wini wi sa kisi te wi e fiti a rai na ini Filipisma 4:6, 7?
16 Paulus ben skrifi: „No broko un ede nanga nowan sani, ma begi Gado ala san unu wani, èn du dati fayafaya sosrefi, èn taki en tangi tu; èn a vrede fu Gado di bigi moro leki san libisma man frustan, sa kibri un ati èn un frustan nanga yepi fu Krestes Yesus” (Filipisma 4:6, 7). A no de fu taki dati wi sa broko wi ede ten na ten, fu di wi na sondu bakapikin fu Adam (Romesma 5:12). Den wefi fu Esau, di ben de Hètsma, ben meki Isak nanga Rebeka, a getrow papa nanga mama fu Esau, sari srefisrefi (Genesis 26:34, 35). Den Kresten disipel Timoteyus nanga Trofimus ben musu fu broko den ede fu di den ben e siki (1 Timoteyus 5:23; 2 Timoteyus 4:20). Paulus ben e broko en ede nanga den Kresten brada nanga sisa fu en (2 Korentesma 11:28). Ma a „Yereman fu begi” ala ten de klariklari fu yepi den wan di lobi en.—Psalm 65:2.
17 Aladi wi e wakti a dei fu Yehovah, wi e kisi yepi nanga trowstu fu „a Gado fu vrede” (Filipisma 4:9). Yehovah abi „sari-ati nanga switifasi”, a ’bun èn a de klariklari fu gi pardon’ èn „a e hori na prakseri taki wi na doti” (Exodus 34:6; Psalm 86:5; 103:13, 14). Fu dati ede, meki wi ’begi Gado fayafaya’ fu di dati sa gi wi „a vrede fu Gado”, iya, wi sa abi wan trutru korostu firi.
18. Fa Yob 42:5 e sori taki wi kan „si” Gado?
18 Te wi e si taki den begi fu wi kisi piki, dan dati e gi wi na overtoigi taki Gado de nanga wi. Baka di Yob ben pasa den tesi di miti en, dan a taki: „Na yere nomo mi ben yere san tra sma taki fu yu [Yehovah], ma now mi eigi ai si yu” (Yob 42:5). Te wi sabi fa Yehovah de, te wi abi bribi, èn te wi e warderi en, dan wi kan hori na prakseri sortu bun Gado du gi wi. Te wi e du dati, dan wi sa „si” en heri tra fasi now. Te wi e kon sabi Yehovah na a fasi disi, dan dati sa gi wi wan korostu firi!
19. Fa wi sa kisi wini te wi e ’trowe ala wi sorgu tapu Yehovah’?
19 Te wi e kisi tesi, dan wi musu ’trowe ala wi sorgu tapu Yehovah’, èn na so wi sa kisi wan korostu firi di sa kibri wi ati nanga wi frustan. Dipi na ini wi ati wi no sa bruya, èn wi no sa frede. Wi no sa broko wi ede tumusi.
20, 21. (a) Fa a tori fu Stefanus e sori taki wi kan abi wan korostu firi te sma e frufolgu wi? (b) Taki fu wan tu eksempre fu sma fu a ten disi di ben abi wan korostu firi aladi tesi ben e miti den.
20 A disipel Stefanus ben sori taki a ben abi wan korostu firi di hebi tesi miti en fu di a ben de wan anbegiman fu Gado. Fosi a gi wan lasti kotoigi, dan ala den sma na ini a Sanhedrin „si taki en fesi ben de leki a fesi fu wan engel” (Tori fu den Apostel 6:15). A fesi fu en ben e sori taki a no ben frede èn taki a no ben e atibron, iya, a ben gersi a di fu wan engel noso wan boskopuman fu Gado. Baka di Stefanus sori den sma taki na den kiri Yesus, dan a sani dati ’hati den krutuman èn den bigin atibron srefisrefi’. „Fu di a santa yeye ben de na Stefanus tapu, meki a luku go na hemel èn a si a glori fu Gado, èn sosrefi Yesus di ben e tanapu na Gado en reti-anusei.” A fisyun disi gi en deki-ati èn a tan getrow te na dede (Tori fu den Apostel 7:52-60). Aladi wi no e kisi fisyun, toku Gado kan gi wi wan korostu firi te sma e frufolgu wi.
21 Na a ten fu a di fu Tu Grontapufeti, den Nazi tiriman gi wan tu Kresten dedestrafu. Luku san den Kresten disi ben taki fosi sma kiri den. Wán fu den ben fruteri san miti en di a ben de na krutubangi. A ben taki: „Den gi mi dedestrafu. Mi arki, èn baka dati mi taki: ’Tan getrow te na dede.’ Mi taki wan tu tra sani di wi Masra ben taki, èn dati ben de ala. . . . Ma un no musu broko un ede, bika mi no e frede srefisrefi!” Di wan yongu Kresten di ben kisi dedestrafu yere taki den ben o koti en ede puru, dan a skrifi en papa nanga mama: „Mindrineti pasa kaba. Mi kan kenki mi prakseri ete. Ma efu mi ben o drai baka gi Masra, dan mi no ben o man de koloku moro na ini a grontapu disi, a no so? Ma now unu abi na overtoigi taki mi gowe libi a grontapu disi leki wan koloku sma èn nanga wan korostu firi.” Iya, wi kan de seiker taki Yehovah e horibaka gi den getrow futuboi fu en.
Yu kan horidoro!
22, 23. Sortu dyaranti yu kan abi aladi yu e horidoro teleki a dei fu Yehovah kon?
22 Kande den tesi disi no miti yu. Ma a getrow man Yob ben abi leti di a taki: „Libisma, di wan uma meki, e libi syatu èn a abi furu problema” (Yob 14:1). Kande yu na wan papa noso wan mama di e meki ala muiti fu kweki den pikin fu yu soleki fa Gado wani. A tru taki den e kisi tesi na skoro, ma a no de fu taki dati yu breiti trutru te den e sori taki den abi a fasti bosroiti fu tan getrow na Yehovah èn fu tan hori densrefi na den regtfardiki markitiki fu en! Kande problema nanga tesi e miti yu na yu wrokope. Ma yu kan horidoro na ini den sortu situwâsi disi fu di ’Yehovah e tyari a lai gi yu ala dei’.—Psalm 68:19.
23 Kande yu feni taki yu no de so prenspari, ma hori na prakseri taki Yehovah noiti sa frigiti a wroko di yu du gi en, èn a lobi di yu sori gi a santa nen fu en (Hebrewsma 6:10). A kan yepi wi fu horidoro te wi e kisi tesi fu di wi e anbegi en. Sobun, tan hori a wani fu en na prakseri te yu e begi èn te yu e teki bosroiti. Disi sa gi yu a dyaranti taki Yehovah sa blesi yu èn taki a sa horibaka gi yu aladi yu e horidoro teleki a dei fu en kon.
Fa yu ben sa piki?
• Fu san ede Kresten musu horidoro?
• San kan yepi wi fu horidoro te wi kon siki èn te wan lobiwan fu wi dede?
• Fa begi e yepi wi fu horidoro te wi e kisi tesi?
• Fu san ede wi man horidoro aladi wi e wakti a dei fu Yehovah?
[Aksi fu a tori disi]
[Prenki na tapu bladzijde 29]
Te wi e frutrow tapu Yehovah, dan wi sa man horidoro te wan lobiwan fu wi dede
[Prenki na tapu bladzijde 31]
Te wi e begi Gado fayafaya, dan wi sa man horidoro te wi e kisi tesi