„Koni e kibri sma”

„A MORO bun fu kisi koni, leki fu kisi gowtu! Èn a moro bun fu kon frustan sani, leki fu kisi solfru”, na so Odo 16:16 e taki. Fu san ede koni warti so? Fu di „koni e kibri sma, neleki fa moni e kibri sma; ma a wini di sabi e tyari kon, na taki koni srefi e hori den sma di abi en, na libi” (Preikiman 7:12). Ma fa koni e hori sma na libi?

Te wi e kisi koni fu Gado, namku te wi e kisi soifri sabi fu Gado Wortu, Bijbel, èn te wi e du san wi e leri, dan dati e yepi wi fu libi na wan fasi di Yehovah feni bun (Odo 2:10-12). Kownu Salomo fu Israel fu owruten e taki: „Den opregtisma e wai pasi gi ogri. A sma di e kibri en pasi e kibri en sili” (Odo 16:17). Iya, koni e kibri sma gi ogri èn a e hori sma na libi! Den bun rai na ini Odo 16:16-33 e sori fa a koni fu Gado kan yepi wi fu tron moro bun sma, èn fa a kan yepi wi fu taki èn fu handri na wan fasi di fiti. *

„Abi sakafasi”

Na agersifasi, koni e taki: ’A hei di wan sma e hei ensrefi, èn bigimemre, na sani di mi no lobi kwetikweti’ (Odo 8:13). Heimemre nanga koni na tu sani di no e koti. Wi musu handri nanga koni èn wi musu luku bun taki wi no e kisi heimemre. Wi musu luku bun nanga a sani disi, spesrutu te sani e waka bun gi wi, noso te wi kisi frantwortu na ini a Kresten gemeente.

Odo 16:18 e gi wi a warskow disi: „Bigimemre e kon bifo wan sma fadon, èn wan yeye fu heimemre e kon bifo wan sma e naki futu.” A fosi sma di fadon, ben de wan volmaakti yeye manpikin fu Gado, di meki ensrefi tron Satan Didibri (Genesis 3:1-5; Openbaring 12:9). Na fu di a kisi heimemre meki a fadon, a no so? Bijbel e poti prakseri na a tori disi te a e taki dati wan man di tron wan Kresten no so langa pasa, no musu kisi a frantwortu fu teki fesi na ini a Kresten gemeente, „bika a kan kisi bigimemre èn Gado kan strafu en soleki fa a strafu Didibri” (1 Timoteyus  3:1, 2, 6). A no de fu taki dati wi musu luku bun taki wi no e taki noso e du sani di kan meki trawan kisi bigimemre, èn wi musu luku bun taki wisrefi no e kisi bigimemre tu!

Odo 16:19 e taki: „A moro bun fu abi sakafasi èn fu de nanga den safri-atiwan, na presi fu prati gudu nanga den wan di e hei densrefi.” A tori fu Kownu Nebukadnesar fu Babilon fu owruten, e sori taki disi na bun rai. A man disi di ben abi heimemre, meki sma bow wan bun bigi popki fu ensrefi kande, na tapu na lagipresi fu Dura. A kan taki den ben poti a popki disi na tapu wan hei sani so taki a heri popki ben hei sowan 27 meter (Danièl 3:1). A bun bigi popki disi ben musu prenki a Kownukondre fu Nebukadnesar. Aladi sani soleki a bun bigi popki dati, bigi monumenti, nanga bun bigi gebow na kefalek sani gi libisma, toku den sani dati na noti gi Gado. A psalm skrifiman ben singi: „Yehovah hei, èn toku a e si den sma di abi sakafasi; ma a no wani sabi den sma di abi bigimemre” (Psalm 138:6). Fu taki en leti, „san bigi na sma ai, na wan tegu sani gi Gado” (Lukas 16:15). A moro bun te wi „suku fu du wroko di sma e si leki pikin sani”, na presi fu „suku bigi sani”.—Romesma 12:16.

Taki ’leki wan sma di man si sani krin èn di man overtoigi trawan’

Fa wi o taki te wi abi koni? A koni kownu e taigi wi: „A sma di man si a fini fu wan tori, sa feni bun, èn a sma di e frutrow tapu Yehovah sa de koloku. Wan sma di koni, na wan sma di man frustan sani bun, èn a sma di e taki switi wortu sabi fa fu overtoigi trawan. Den sma di man si sani krin, sa kisi libi, èn a sani di sa gi den donsma trangaleri, na den eigi donfasi. Na ati fu a koni sma e meki a taki sani di e sori taki a man si sani krin, èn a man overtoigi sma nanga en mofo.” —Odo 16:20-23.

Te wi abi koni, dan wi sa man taki na wan fasi di e sori taki wi man si sani krin, èn wi sa man overtoigi trawan. Fu san ede dati de so? Fu di wan koni sma e pruberi fu „feni bun” na ini wan tori, èn a e „frutrow tapu Yehovah”. Te wi e meki muiti fu poti prakseri na den bun fasi fu trawan, dan a sa de moro makriki gi wi fu taki bun fu den sma dati. Wi no sa taki grofu nanga sma, èn wi no sa suku fu haritaki nanga den, ma na presi fu dati, wi sa taigi den sani di sa overtoigi den èn di sa meki den firi bun. Te wi e kon frustan a situwâsi fu wan sma moro bun, dan dati sa yepi wi fu kon frustan sortu problema a abi èn fa a e du na ini a situwâsi dati.

A de tumusi prenspari tu fu taki nanga koni te wi e du a Kownukondre preikiwroko èn te wi e gi sma leri fu tron disipel. Te wi e leri trawan san a Wortu fu Gado e taki, dan wi no e suku nomo fu meki den kon sabi sani fu Bijbel. Fu taki en leti, wi wani doro na ati fu sma. Fu dati ede, wi musu taki na wan fasi di e overtoigi sma. Na apostel Paulus ben gi Timoteyus a rai fu tan du den sani di a ben  ’kon bribi fu di sma ben overtoigi en’.—2 Timoteyus 3:14, 15.

Soleki fa wan buku e taki, dan a Griki wortu di vertaal nanga „overtoigi” wani taki „fu taki-go-taki-kon nanga wan sma, fu meki a kisi wan tra denki fu sani” (An Expository Dictionary of New Testament Words, fu W. E. Vine). Fu man meki a sma di e arki wi kisi wan tra denki fu sani, dan wi musu sabi fa a sma e denki, sortu sani a lobi, san na a situwâsi fu en, èn fa a kweki. Na so wi o sabi fa fu overtoigi a sma dati. Fa wi kan kon sabi ala den sani dati? A disipel Yakobus e piki: „De gaw fu yere, ma no de gaw fu taki” (Yakobus 1:19). Te wi e aksi sma fa den e denki fu spesrutu sani, èn te wi e arki bun san a sma e piki, dan wi kan kon sabi san de na ini en ati.

Na apostel Paulus ben sabi heri bun fa fu overtoigi trawan (Tori fu den Apostel 18:4). Srefi wan fu den sma di ben e gens en, namku Demetrius, wan solfrusmeti, ben taki: „A no na ini Efeise wawan, ma na ini pikinmoro a heri distrikt Asia a Paulus disi kisi furu sma so fara taki den e bribi [tra sani] now” (Tori fu den Apostel 19:26). A de so taki Paulus ben e meki bigi taki a ben abi bun bakapisi na ini a preikiwroko fu di a ben koni? Nôno, kwetikweti. A ben e si a preikiwroko fu en leki wan sani di a ben e du „nanga yepi fu a yeye èn a krakti [fu Gado]” (1 Korentesma 2:4, 5). Wi e kisi yepi tu fu a santa yeye fu Yehovah. Fu di wi e frutrow tapu Yehovah, meki wi de seiker taki a sa yepi wi te wi e pruberi fu taki na wan fasi di e sori taki wi man si sani krin, èn te wi e pruberi fu overtoigi sma di wi e miti na ini a diniwroko fu wi.

Fu dati ede, a no e fruwondru wi taki Bijbel e taki dati „wan sma di koni” na wan sma di „man frustan sani bun”! (Odo 16:21) Iya, wan sma di man si sani krin „sa kisi libi”. Ma fa a de nanga den donsma? Den sma disi ’no lobi koni nanga trangaleri’ (Odo 1:7). San e miti den sma disi fu di den no wani teki a trangaleri fu Yehovah? Soleki fa wi si kaba, dan Salomo ben taki: „A sani di sa gi den donsma trangaleri, na den eigi donfasi” (Odo 16:22). Den sma disi e kisi moro trangaleri, èn nofo tron dati na wan hebi strafu gi den. Boiti dati, den donsma kan kisi problema, den kan kisi syen, siki, èn den kan dede fruku.

A kownu fu Israel e sori moro fara fa koni e yepi wi fu taki na wan fasi di fiti. A e taki: „Switi wortu na wan oni-godo, den bun gi a sili èn den e dresi den bonyo” (Odo 16:24). Neleki fa oni sukru èn a e tapu na angri fu wan sma wantewante, na so wi kan gi sma deki-ati te wi e taigi den sani di e meki den firi bun. Oni bun tu gi a gosontu fu sma èn a kan dresi soro. Na so a de tu te wi e taigi sma sani di e meki den firi bun. Den sani disi e tranga a bribi fu den.—Odo 24:13, 14.

No waka ’wan pasi di gersi wan reti pasi’

„Wan pasi de di de reti na ini na ai fu wan man, ma den pasi fu dede na a kaba fu en te  fu kaba” (Odo 16:25). A sani disi e sori wi taki wi musu luku bun taki wi no e kisi wan fowtu denki fu sani èn taki wi no e du sani di no e kruderi nanga a wet fu Gado. Wi leki libisma kan feni taki a bun fu du wan spesrutu sani, aladi a sani dati no e kruderi nanga den regtfardiki gronprakseri na ini Gado Wortu. Boiti dati, Satan kan kori wan sma, so taki a sma disi de nomonomo fu du wan sani di a e si leki wan bun sani, aladi a sani dati sa tyari dede kon gi en.

A moro bun fasi fa wi kan sorgu taki wi no e kori wisrefi, na te wi abi koni, te wi man frustan sani bun, èn te a leri fu Gado Wortu e tiri a konsensi fu wi. Te wi musu teki bosroiti di abi fu du nanga a fasi fa wi musu tyari wisrefi, nanga na anbegi fu wi, noso nanga wan tra sani, dan a moro bun fasi fa wi kan sorgu taki wi no e kori wisrefi, na te wi e meki den markitiki fu Gado sori wi san bun èn san no bun.

„A sili fu a fayafaya wrokoman wroko tranga gi en”

A koni kownu e taki moro fara: „A sili fu a fayafaya wrokoman wroko tranga gi en, fu di en mofo dwengi en trutru fu du dati” (Odo 16:26). Salomo e taki dati te wan wrokoman e angri gi nyanyan, dan dati kan ’wroko tranga gi en’ fu di na angri fu en sa meki a du wan sani fu tapu na angri fu en. Te wan sma abi angri, noso te wan sma wani wan bun sani, dan a sma dati sa meki muiti fu kisi san a wani. A sani disi a no wan ogri. Ma son leisi wan sma e angri so te fu kisi wan sani, taki a sma e kon gridi. A de leki te wan faya di sma meki fu bori nyanyan e kon bigi so te taki a e bron wan heri busi. Wan sma di gridi no man basi ensrefi èn a sani dati sa tyari takru bakapisi kon gi en. Fu di wan koni sma sabi san kan pasa te a gridi, meki a e luku bun fu no kon gridi, awansi na bun sani a wani.

No „waka wan pasi di no bun”

Den sani di wi e taki kan tyari takru bakapisi kon neleki wan bigi faya. Salomo e sori san kan pasa te wi e poti prakseri na den fowtu fu sma èn te wi e meki trawan kon sabi den fowtu disi. A e taki: „Wan wisiwasi man e suku fu du ogri, èn wan faya di e bron de na tapu en mofobuba. Wan man di e du triki sani e tan meki trobi, èn wan ogri-ati leiman e prati den wan di de bun nanga makandra.”—Odo 16:27, 28.

Wan man di e suku fu pori a nen fu wan trawan, na wan „wisiwasi man”. Wi musu pruberi fu poti prakseri na den bun fasi fu trawan, èn wi musu taki sani di e meki trawan kisi lespeki gi den. A bun fu arki sma di e taki ogri fu trawan? Den sani di den sma disi e taki kan meki wi kisi wan takru denki  fu trawan, den kan pori bun mati, èn den kan tyari prati kon na ini a gemeente. Te wi koni, dan wi no sa arki den sma disi.

Salomo e warskow wi gi wan sani di kan meki sma waka wan pasi di no bun. A e taki: „Wan ogri-ati man sa kori en mati, èn a sa meki a waka wan pasi di no bun. A e meki sani nanga en ai fu kori trawan. A e du ogri, aladi a e tai en mofo.”—Odo 16:29, 30.

A de so taki tru anbegiman kan kon tron sma di e du ogridu? Furu sma na ini a ten disi kon tron sma di e ’kori trawan’. Den e gi sma deki-ati fu du ogridu. Kande wi no e du ogri-ati sani. Ma sondro fu wi sabi, wi kan kon lobi ogridu. Milyunmilyun sma kon lobi luku felem noso sport di lai nanga ogridu, a no so? Bijbel e warskow wi krin: „A sma di e waka nanga konisma, sa kon koni, ma a sma di abi demakandra nanga donsma, no sa abi bun bakapisi” (Odo 13:20). A no de fu taki dati a koni fu Gado e kibri wi!

Fa a de nanga wan sma di sori en heri libi langa taki a abi koni èn taki a man frustan sani bun, èn di ’no waka wan pasi di no bun’? Te wi e handri na wan regtfardiki fasi wi heri libi langa, dan Gado sa feni wi bun èn sma sa abi lespeki gi wi. Odo 16:31 e taki: „Weti wiwiri de leki wan kownu-ati di e moi wan sma, te a sma dati e libi na wan regtfardiki fasi.”

Tra fasi leki dati, Gado no lobi wan sma di e atibron esi. Kain, a fosi manpikin fu Adam nanga Eva, ben ’atibron srefisrefi’ tapu en brada Abel, èn a ’bigin feti nanga en, èn a kiri en’ (Genesis 4:1, 2, 5, 8). Aladi wi abi leti son leisi fu atibron nanga trawan, toku wi musu luku bun taki wi no e lasi wisrefi. Odo 16:32 e taki krin: „A man di no e atibron esi, bun moro wan tranga man, èn a man di e dwengi en yeye bun moro a wan di e teki wan foto abra.” Te wi e atibron so te taki wi e lasi wisrefi, dan wi no e handri nanga koni. A sani disi na wan swakifasi di kan ’meki wan sma waka wan pasi di no bun’.

Te „Yehovah e bosroiti fa sani e waka”

A kownu fu Israel e taki: „Den e trowe a lot na tapu sma bowtu, ma na Yehovah e bosroiti fa sani e waka” (Odo 16:33). Na ini Israel fu owruten, a ben e pasa son leisi taki Yehovah ben e meki sma trowe lot fu kon sabi san a ben wani den fu du. Den lot disi ben de pikinpikin ston noso pikin pisi udu. A fosi sani di den ben e du, na taki den ben e aksi Yehovah fu bosroiti san ben musu pasa. Baka dati, den ben e trowe den lot na ini a krosi fu den, èn den ben e hari a lot. Na so den ben e kon sabi san Gado ben wani den fu du.

Na ini a ten disi Yehovah no e meki sma trowe lot fu meki den kon sabi san a wani den fu du. A tyari a wani fu en kon na krin na ini Bijbel, a Wortu fu En. Fu man kisi a koni fu Gado, dan wi musu kon sabi krin san skrifi na ini Bijbel. Fu dati ede wi musu leisi Bijbel ibri dei. —Psalm 1:1, 2; Mateyus 4:4.

[Futuwortu]

[Prenki na tapu bladzijde 8]

Fu san ede koni bun moro gowtu?

[Prenki na tapu bladzijde 9]

Fa yu kan overtoigi sma te yu e du a preikiwroko?

[Prenki na tapu bladzijde 10]

„Wan wisiwasi man e suku fu du ogri”

[Prenki na tapu bladzijde 11]

Te wan sma e atibron so te taki a e lasi ensrefi, dan dati kan ’meki taki a waka wan pasi di no bun’

[Prenki na tapu bladzijde 12]

Wi kan kon tron sma di lobi ogridu