„Wan getrow kotoigi na hemel”

LANGA ten kaba, sma di e skrifi puwema nanga singi, gwenti fu skrifi fa a munkenki moi. Fu eksempre, wan singi di skrifi na ini Bijbel, e taki fu wan uma „di moi leki a furu mun” (Singi fu Salomo 6:10). Èn wan psalm skrifiman e kari a munkenki „wan getrow kotoigi na hemel” (Psalm 89:37). San den wortu disi wani taki?

A mun e tan drai lontu grontapu ibri 27,3 dei. A kan taki na fu a sani disi ede a psalm skrifiman e taki dati a mun de getrow. Ma kande a psalm skrifiman ben abi wan moro prenspari sani na prakseri. A kari a munkenki „wan getrow kotoigi” na ini wan profeiti singi di e taki fu a Kownukondre fu Gado. Na fu a Kownukondre disi Yesus ben leri den bakaman fu en fu begi.—Mateyus 6:9, 10.

Moro leki 3000 yari pasa, Yehovah Gado sroto wan Kownukondre frubontu nanga Kownu David fu owruten Israel (2 Samuel 7:12-16). A frubontu disi ben de fu sori taki leki bakapikin fu Kownu David, Yesus ben abi a reti fu tron kownu fu ala ten (Yesaya 9:7; Lukas 1:32, 33). Disi na san a psalm skrifiman ben taki fu a kownusturu fu a „pikin” fu David: „Neleki munkenki a sa seti steifi te ten di no skotu, èn neleki wan getrow kotoigi di de na hemel.”—Psalm 89:36, 37.

Sobun, a ’leti di e basi a neti’, namku a munkenki, e memre wi heri bun taki Krestes o tiri fu têgo (Genesis 1:16). Disi na san Danièl 7:14 e taki fu a Kownukondre fu en: „En tirimakti na wan tirimakti di e tan te ten di no skotu èn a no sa lasi gowe, èn en kownukondre na wan di no sa kisi pori.” A munkenki na wan kotoigi di e memre wi na a Kownukondre dati èn na den blesi di a sa tyari kon gi libisma.

[Sma di abi a reti fu a prenki na tapu bladzijde 32]

Moon: NASA photo