Yu sa „tan waka nanga a yeye”?
Yu sa „tan waka nanga a yeye”?
„Tan waka nanga a yeye, dan unu no sa du nowan sani di a sondu skin wani.”—GALASIASMA 5:16.
1. San o yepi wi fu no de gaw fu denki taki wi sondu teige a santa yeye?
TE WI e du san na apostel Paulus ben taki, dan wi no sa de gaw fu denki taki wi sondu teige a santa yeye fu Yehovah. Paulus ben taki: „Tan waka nanga a yeye, dan unu no sa du nowan sani di a sondu skin wani” (Galasiasma 5:16). Te wi e meki a yeye fu Gado tiri wi, dan wi no sa meki takru lostu basi wi.—Romesma 8:2-10.
2, 3. Sortu wini wi sa kisi te wi e tan waka nanga a yeye?
2 Te wi e „tan waka nanga a yeye”, dan dati sa yepi wi fu gi yesi na Yehovah. Wi sa man sori den srefi fasi fu Gado te wi de na ini a preikiwroko, na den gemeente konmakandra, na oso, èn na tra presi. A fasi fa wi e handri nanga wi trowpatna, den pikin fu wi, wi Kresten brada nanga sisa, èn nanga tra sma, sa sori efu wi abi den froktu fu a yeye.
3 Te wi e libi „na yeye fasi soleki fa Gado e si en”, dan wi no sa du sondu (1 Petrus 4:1-6). Te wi e meki a yeye tiri wi, dan wi no sa abi fu frede taki wi du wan sondu di wi no man kisi pardon fu dati. Sortu tra wini wi sa kisi te wi e tan waka nanga a yeye?
Tan krosibei na Gado èn na Krestes
4, 5. Te wi e meki a yeye tiri wi, dan fa wi o prakseri fu Yesus?
4 Fu di wi e waka nanga a santa yeye, meki wi man tan abi wan bun matifasi nanga Gado èn nanga en Manpikin. Di Paulus ben e taki fu den sani di a yeye e meki sma du, dan a taigi den Kresten na ini Korente: „Mi wani fu unu [di ben anbegi kruktugado fosi] sabi, taki te wan sma e taki nanga yepi fu a yeye fu Gado, dan a sma dati noiti o taki: ’Yesus na wan frufruktu sma!’; èn nowan sma kan taki: ’Yesus na Masra!’, boiti efu a e taki nanga yepi fu a santa yeye” (1 Korentesma 12:1-3). Te wan sma e fluku Yesus, dan a no de fu taki dati a denki fu a sma e komoto fu Satan Didibri. Ma fu di wi leki Kresten e waka nanga a santa yeye, meki wi abi na overtoigi taki Yehovah gi Yesus wan opobaka èn taki A gi en wan posisi di meki taki a hei moro ala tra sma di Gado meki na hemel èn na grontapu (Filipisma 2:5-11). Wi e bribi na ini a frulusu-ofrandi fu Krestes, èn wi e si Yesus leki a Masra di Gado poti fu tiri wi.
5 Na ini a fosi yarihondro, son sma di ben kari densrefi Kresten no ben bribi taki Yesus kon na grontapu leki wan libisma (2 Yohanes 7-11). Fu di son sma ben bribi a falsi leri dati, meki den no ben wani poti bribi na ini den tru tori di den Buku fu Bijbel e fruteri fu Yesus, a Mesias (Markus 1:9-11; Yohanes 1:1, 14). Te wi e meki a santa yeye tiri wi, dan wi no sa bribi den falsi leri dati. Soso te wi e tan poti prakseri na den tru leri fu Gado, dan Yehovah o tan feni wi bun èn wi o man „tan waka na ini a waarheid” (3 Yohanes 3, 4). Fu dati ede, meki wi abi a fasti bosroiti fu no poti bribi na ini den leri fu sma di fadon komoto na bribi, so taki wi kan tan abi wan bun matifasi nanga wi hemel Tata.
6. Te sma e meki a yeye fu Gado tiri den, dan sortu fasi den sma o abi?
6 Paulus ben taki dati den „sani di sondu libisma e du”, na sani soleki na anbegi di sma e anbegi falsi gado, a kon di sma e kon nanga falsi leri, sosrefi hurudu, nanga yayolibi. Ma a ben taki: „Den sma di de fu Krestes Yesus ben spikri a sondu skin fu den na a postu, makandra nanga den firi èn den tranga lostu fu den. Efu wi e meki a yeye tiri wi libi, dan meki wi tan waka tu nanga a yeye na wan fasi di fiti” (Galasiasma 5:19-21, 24, 25). Sortu fasi den sma abi di e meki a yeye fu Gado tiri den? Paulus ben skrifi: „Den froktu fu a yeye na lobi, prisiri, vrede, langa pasensi, bun-ati, bunfasi, bribi, safri-ati, dwengi yusrefi” (Galasiasma 5:22, 23). Meki wi go luku den difrenti froktu disi.
„Wi musu lobi makandra”
7. San na lobi, èn fa wan sma e sori taki a abi lobi?
7 Nofo tron, te wan sma e sori lobi, di de wán fu den froktu fu a yeye, dan a sma dati e firi gi trawan, a e broko en ede nanga den, èn a abi wan bun matifasi nanga den sma dati. Bijbel e taki dati „Gado na lobi” fu di a de a moro bun eksempre fu lobi. A frulusu-ofrandi fu Yesus Krestes e sori o furu lobi Gado nanga en Manpikin abi gi libisma (1 Yohanes 4:8; Yohanes 3:16; 15:13; Romesma 5:8). Sma kan si taki wi na bakaman fu Yesus fu di wi lobi makandra (Yohanes 13:34, 35). Fu taki en leti, wi kisi a komando fu „lobi makandra” (1 Yohanes 3:23). Èn Paulus taki dati lobi abi langa pasensi èn a abi switifasi. A no e dyarusu, a no e meki bigi, a no abi bigimemre, a no e tyari ensrefi na wan fasi di no fiti, èn a no e suku en eigi bun. Lobi no e mandi esi èn a no e tan memre na ogri di trawan du. A no e prisiri nanga sani di no de regtfardiki, ma a e prisiri nanga sani di tru. A e frudrage ala sani, a e bribi ala sani, a e howpu ala sani, èn a e horidoro awansi san e pasa. Boiti dati, lobi no e kaba noiti.—1 Korentesma 13:4-8.
8. Fu san ede wi musu sori lobi gi wi Kresten brada nanga sisa?
8 Te wi e gi pasi taki a yeye fu Gado e meki wi kon abi lobi, dan wi sa sori lobi gi Gado èn gi tra sma (Mateyus 22:37-39). Na apostel Yohanes ben skrifi: „A sma di no lobi en brada e tan na ini dede. Ibri sma di e teige en brada, na wan kiriman. Unu sabi taki nowan kiriman abi têgo libi na ini en” (1 Yohanes 3:14, 15). Wan kiriman ben kan kisi kibri na ini wan fu den foto fu Israel, soso te a no ben e abi bita-ati gi a sma di a kiri (Deuteronomium 19:4, 11-13). Te wi e meki a santa yeye tiri wi, dan wi sa sori lobi gi Gado, gi wi Kresten brada nanga sisa, èn gi tra sma.
„A prisiri di Yehovah e gi, de leki wan fortresi gi unu”
9, 10. San na prisiri? Kari wan tu sani di musu meki wi den nanga prisiri.
9 Wan sma di abi prisiri, de koloku trutru. Yehovah na „a koloku Gado” (1 Timoteyus 1:11; Psalm 104:31). A Manpikin e prisiri fu du san en Tata wani (Psalm 40:8; Hebrewsma 10:7-9). Èn „a prisiri di Yehovah e gi, de leki wan fortresi gi [wi]”.—Nehemia 8:10.
10 A prisiri di Gado e gi wi, e meki taki wi de koloku te wi e du a wani fu en, srefi te wi abi problema, te wi e sari, noso te wi e kisi frufolgu. Fu tru, „a sabi fu Gado” e meki wi de koloku! (Odo 2:1-5) A soifri sabi di wi abi fu Gado èn a bribi di wi abi na ini en èn na ini a frulusu-ofrandi fu Yesus, e meki taki wi e prisiri fu abi wan bun matifasi nanga Gado (1 Yohanes 2:1, 2). Wan tra sani di e meki wi prisiri, na taki wi e anbegi Yehovah makandra nanga brada nanga sisa na heri grontapu (Sefanya 3:9; Hagai 2:7). A Kownukondre howpu di wi abi èn a grani di wi abi fu meki a bun nyunsu bekènti e meki wi prisiri tu (Mateyus 6:9, 10; 24:14). Wan tra sani di e gi wi prisiri, na a howpu di wi abi fu libi fu têgo (Yohanes 17:3). Fu di wi abi a moi howpu disi, meki wi musu „de nanga prisiri srefisrefi”.—Deuteronomium 16:15.
Lobi vrede èn abi langa pasensi
11, 12. (a) San na vrede? (b) Fa a vrede fu Gado e yepi wi?
11 Vrede na wan tra froktu fu a yeye. Wan sma di abi vrede abi wan korostu firi èn a no e broko en ede tumusi nanga sani. Wi hemel Tata na wan Gado fu vrede, èn wi kisi a dyaranti: „Yehovah srefi sa blesi en pipel nanga vrede” (Psalm 29:11; 1 Korentesma 14:33). Yesus ben taigi den disipel fu en: „Te mi o gowe, dan mi o meki unu abi vrede, mi o gi unu a vrede fu mi” (Yohanes 14:27). Fa dati ben o yepi den bakaman fu en?
12 A vrede di Yesus gi den disipel fu en, gi den wan korostu firi èn a yepi den fu no frede tumusi. Den ben abi vrede spesrutu di a santa yeye ben kon na den tapu (Yohanes 14:26). Na ini a ten disi, wi abi „a vrede fu Gado” pasa marki, fu di wi abi a santa yeye èn fu di Gado e piki den begi fu wi. A vrede disi e meki taki wi no e broko wi ede tumusi (Filipisma 4:6, 7). Boiti dati, a yeye fu Yehovah e yepi wi fu libi na ini vrede nanga wi brada nanga sisa, èn nanga tra sma.—Romesma 12:18; 1 Tesalonikasma 5:13.
13, 14. San na langa pasensi, èn fu san ede wi musu sori a fasi disi?
13 Wan sma di abi langa pasensi, lobi vrede. Dati na fu di a sma disi e horidoro te a e kisi tesi noso te sma e du ogri nanga en, aladi a e howpu taki sani sa waka moro bun. Gado abi langa pasensi (Romesma 9:22-24). Yesus ben abi langa pasensi tu. Wi kan kisi wini tu fu a pasensi di Yesus sori, fu di Paulus ben skrifi: „Krestes Yesus ben abi sari-ati nanga mi, so taki a ben kan teki mi, a moro bigi sondari, leki buweisi taki a abi langa pasensi, èn na so fasi mi ben kan de wan eksempre gi den sma di ben o bribi na ini en fu den kan kisi têgo libi.”—1 Timoteyus 1:16.
14 Te wi abi langa pasensi, dan dati o yepi wi fu no atibron te trawan e taigi wi hati sani, noso te den e du wan hati sani nanga wi. Paulus ben gi Kresten a deki-ati: „Abi langa pasensi nanga ala sma” (1 Tesalonikasma 5:14). Fu di wi alamala na sondu libisma di e meki fowtu, meki a no de fu taki dati wi wani sma fu abi langa pasensi nanga wi te wi du wan sani di hati den firi fu den. Fu dati ede, meki wi du ala muiti fu „abi langa pasensi nanga prisiri”.—Kolosesma 1:9-12.
Abi switifasi nanga bunfasi
15. San na switifasi èn fa wan sma kan sori switifasi?
15 Wi e sori taki wi abi switifasi te wi e gi trawan deki-ati nanga den sani di wi e taki èn te wi e du bun gi den. Yehovah nanga en Manpikin abi switifasi (Romesma 2:4; 2 Korentesma 10:1). Futuboi fu Gado nanga Krestes musu abi switifasi (Mika 6:8; Kolosesma 3:12). Srefi sma di no de mati fu Gado ben e sori ’bun furu switifasi gi trawan’ (Tori fu den Apostel 27:3; 28:2). Efu den sma disi ben man du dati, dan a no de fu taki dati wi man sori switifasi tu te wi e „tan waka nanga a yeye”.
16. O ten wi musu sori switifasi?
16 Awinsi wi abi leti fu atibron nanga wan sma di taki noso du wan sani di hati wi, toku wi kan sori switifasi. Paulus ben taki: „Unu kan kisi atibron, ma toku un no musu du sondu; no meki son dongo, dan unu e mandi ete; no gi Didibri okasi. . . . Tron sma di e du bun gi makandra, èn sori sari-ati na wan lobi fasi; un musu gi makandra pardon nanga un heri ati neleki fa Gado e gi unu pardon nanga en heri ati tu nanga yepi fu Krestes” (Efeisesma 4:26, 27, 32). Wi musu sori switifasi spesrutu gi den wan di e kisi tesi. Efu wan Kresten owruman e si taki wan brada noso sisa de fu du wan seryusu sondu, ma a no e gi en Bijbel rai soso fu di a frede taki a o hati den firi fu a sma dati, dan na so fasi a no e sori switifasi.—Efeisesma 5:9.
17, 18. San na bunfasi, èn fa wi kan sori a fasi disi na ini wi libi?
17 Wan sma di abi bunfasi ala ten e du bun sani. Gado bun dorodoro (Psalm 25:8; Sakaria 9:17). Yesus bun èn a no abi fowtu. Ma di wan man ben kari en „Bun Leriman”, dan a no ben feni dati bun (Markus 10:17, 18). Soleki fa a sori, dan Yesus ben sabi taki Gado wawan bun dorodoro.
18 Fu di wi na sondu libisma, meki wi no e du bun ala ten (Romesma 5:12). Ma toku wi kan sori a fasi disi efu wi e aksi Gado fu ’leri wi fu du bun’ (Psalm 119:66). Paulus ben taigi den Kresten na ini Rome: „Misrefi sabi heri bun tu taki unu sosrefi abi bunfasi bogobogo fu di unu abi furu sabi” (Romesma 15:14). Wan Kresten owruman musu de „wan sma di lobi bun sani” (Titus 1:7, 8). Efu wi e meki a yeye fu Gado tiri wi, dan trawan sa kon sabi wi leki sma di abi bunfasi, èn Yehovah sa ’memre den bun sani di wi du’.—Nehemia 5:19; 13:31.
Abi „trutru bribi sondro fu hoigri”
19. San na bribi, soleki fa Hebrewsma 11:1 e taki?
19 Bribi na ete wan froktu fu a yeye. Bijbel e taki: „Bribi na te wan sma e fruwakti taki den sani di a e howpu, o kon seiker; a de a krin buweisi fu sani di de trutru, ma di wi no man si” (Hebrewsma 11:1). Te wi abi bribi, dan wi sabi taki ala den sani di Yehovah pramisi sa kon tru seiker. Fu di krinkrin buweisi de taki den sani di wi no man si de trutru, meki wi kan bribi den sani dati. Fu eksempre, te wi e luku den sani di Gado meki, dan dati e gi wi na overtoigi taki wan Mekiman de. Na a bribi dati wi o abi te wi e tan waka nanga a yeye.
20. San na „a sondu di kan kisi wi makriki”, èn san wi musu du fu no du den sani di sondu libisma e du?
20 Te wi no abi bribi, dan dati na „a sondu di kan kisi wi makriki” (Hebrewsma 12:1). Wi musu frutrow tapu a yeye fu Gado. Disi sa yepi wi fu no du den sani di sondu libisma e du, wi no sa feti baka gudu, èn wi no sa bribi falsi leri di kan pori wi bribi (Kolosesma 2:8; 1 Timoteyus 6:9, 10; 2 Timoteyus 4:3-5). Fu di a yeye fu Gado e tiri den futuboi fu en na ini a ten disi, meki den abi a srefi bribi leki den futuboi fu en di ben e libi bifo Krestes kon na grontapu (Hebrewsma 11:2-40). Èn te wi srefi abi „trutru bribi sondro fu hoigri”, dan dati sa tranga a bribi fu trawan.—1 Timoteyus 1:5; Hebrewsma 13:7.
Sori safri-ati fasi èn dwengi yusrefi
21, 22. San na safri-atifasi, èn fu san ede wi musu sori a fasi disi?
21 Wan sma di abi safri-ati no e atibron esi. Wán fu den fasi fu Gado, na a safri-ati fasi fu en. Wi sabi disi fu di Yesus, di ben sori safri-ati fasi tu, ben e sori den srefi fasi fu Yehovah (Mateyus 11:28-30; Yohanes 1:18; 5:19). San wi leki futuboi fu Gado musu du dan?
22 Fu di wi na Kresten, meki wi musu ’abi safri-ati gi ala sma’ (Titus 3:2). Wi e sori safri-ati fasi te wi de na ini a preikiwroko. Te wan brada noso sisa e du wan sondu, dan lepi Kresten e kisi a rai fu yepi en „na wan safri-ati fasi” (Galasiasma 6:1). Te wi „abi sakafasi dorodoro nanga safri-atifasi”, dan wi sa sorgu taki wánfasi nanga vrede de na mindri wi nanga wi Kresten brada nanga sisa (Efeisesma 4:1-3). Wi sa sori safri-ati fasi te wi e tan waka nanga a yeye èn te wi e dwengi wisrefi.
23, 24. San a wani taki fu dwengi wisrefi, èn fa a fasi disi e yepi wi?
23 Te wi man dwengi wisrefi, dan wi no sa denki, taki, noso du sani di no fiti. Yehovah ’ben tan dwengi ensrefi’ fosi a du wan sani teige den Babilonsma di ben pori Yerusalem (Yesaya 42:14). En Manpikin ’libi wan eksempre gi wi’, fu di a ben e dwengi ensrefi te sma ben e pina en. Èn na apostel Petrus ben gi Kresten a rai fu no abi sabi wawan, ma fu leri fu dwengi densrefi tu.—1 Petrus 2:21-23; 2 Petrus 1:5-8.
24 Kresten owruman musu man dwengi densrefi (Titus 1:7, 8). Fu taki en leti, ala sma di e meki a santa yeye tiri den kan dwengi densrefi, èn na so fasi den no sa du hurudu, den no sa taki doti-taki, èn den no sa du nowan sani di Yehovah no feni bun. Te wi e meki a yeye fu Gado gi wi a krakti fu dwengi wisrefi, dan trawan sa si dati fu di wi o taki èn du sani di Gado feni bun.
Tan waka nanga a yeye
25, 26. Te wi e waka nanga a yeye, dan fa dati e yepi wi fu libi bun nanga trawan, èn sortu wini wi sa kisi na ini a ten di e kon?
25 Te wi e waka nanga a yeye, dan dati sa yepi wi fu tan preiki a bun nyunsu fu a Kownukondre fayafaya (Tori fu den Apostel 18:24-26). Wi sa libi bun nanga trawan, èn spesrutu den wan di e dini Gado nanga den heri ati sa prisiri fu abi demakandra nanga wi. Te wi e meki a santa yeye tiri wi, dan wi sa gi tra anbegiman fu Yehovah deki-ati fu tan waka nanga a yeye tu (Filipisma 2:1-4). Disi na san ala Kresten wani du, a no so?
26 Na ini a grontapu disi di Satan e tiri, a no makriki fu waka nanga a yeye (1 Yohanes 5:19). Ma toku, milyunmilyun sma e du dati na ini a ten disi. Te wi e frutrow tapu Yehovah nanga wi heri ati, dan wi sa prisiri fu a libi nownowde, èn wi sa man tan gi yesi na den regtfardiki markitiki fu a Sma di e gi wi santa yeye na wan lobi-ati fasi.—Psalm 128:1; Odo 3:5, 6.
San na yu piki?
• Te wi e „waka nanga a yeye”, dan fa dati e yepi wi fu abi wan bun matifasi nanga Gado èn nanga en Manpikin?
• San na den froktu fu a santa yeye?
• Fa wi kan sori den froktu fu a yeye fu Gado?
• Te wi e waka nanga a yeye, dan fa dati e tyari wini kon gi wi now, èn na ini a ten di e kon?
[Aksi fu a tori disi]
[Prenki na tapu bladzijde 23]
A santa yeye fu Yehovah e meki taki wi abi lobi gi wi Kresten brada nanga sisa
[Prenki na tapu bladzijde 24]
Sori switifasi fu di yu e taki èn e du bun sani