Aksi fu leisiman
Aksi fu leisiman
Baka di David kiri Goliat, Kownu Saul seni kari David fu wroko gi en. Ma fu san ede Saul aksi David bakaten: „Boi, suma na yu papa?”—1 Samuel 16:22; 17:58.
Son sma e denki taki Saul ben frigiti suma David ben de, fu di den taki syatu nomo di den ben miti a fosi leisi. Ma dati no kan de so, fu di a tori di skrifi na ini 1 Samuel 16:18-23 e sori taki Kownu Saul ben seni sma spesrutu fu kari David. Saul ben kon lobi David trutru èn a ben poti en fu syow den fetisani fu en. A ben musu fu de so taki Saul ben sabi David bun.
Son Bijbel sabiman e taki dati sma skrifi 1 Samuel 17:12-31 nanga 17:55–18:5 bakaten, fu di den vers disi no skrifi na ini son kopi fu a Griki Septuaginta vertaling fu den Hebrew Buku fu Bijbel di ben kaba skrifi na ini a di fu tu yarihondro bifo a ten fu Krestes. Ma a no de wan koni sani fu denki dati, soso te wi e luku den kopi dati fu a Septuaginta, fu di den vers disi de fu feni na ini tra moro owru dokumenti fu den Hebrew Buku fu Bijbel.
Soleki fa a sori, dan Saul ben aksi Abner fosi suma ben de David, èn baka dati a aksi David srefi. A sani disi e sori taki Saul no ben wani sabi soso a nen fu David en papa. Fu di Saul ben kon si taki David ben abi wan tranga bribi èn taki a ben abi furu deki-ati fu kiri Goliat, meki Saul ben wani sabi suma ben de David en papa. A kan de so taki Saul ben abi na prakseri fu poti Isai, a papa fu David, noso tra famiri fu en, na ini a legre, fu di a ben denki taki den ben abi so furu deki-ati leki David.
Soleki fa 1 Samuel 17:58 e taki, dan David ben piki Saul nomo: „Mi papa na yu futuboi Isai fu Betlehem.” Ma den sani di skrifi baka a vers disi, e sori taki den ben taki moro langa. Den Bijbel sabiman C. F. Keil nanga F. Delitzsch, e taki fu a sani disi: „Na ini 1 Samuel 18:1 skrifi taki ’David kaba taki nanga Saul’. Den wortu disi e sori taki Saul ben abi wan langa takimakandra nanga David, fu di a ben e taki moro fara nanga David fu den famiri fu en.”
Te wi e luku ala den sani disi, wi kan taki dati di Saul aksi „Boi, suma na yu papa?”, dan Saul no ben wani sabi nomo san na a nen fu David, fu di a ben sabi en nen kaba. Ma Saul ben wani sabi suma ben de David.
[Prenki na tapu bladzijde 31]
Fu san ede Saul aksi David suma na en papa?