Gado e si san yu e du?

A DE SO TAKI Yehovah, a bigi Mekiman, man si? A no de fu taki dati a man si! Bijbel e sori krin: „Yu denki taki a sma di meki na ai, no man si?” (Psalm 94:9) Yehovah man si sani di libisma no man si kwetikweti. Yehovah e si wi, ma boiti dati en „na a sma di e ondrosuku ati” (Odo 17:3; 21:2). Iya, a man sabi san wi e denki, a sabi fu san ede wi e du sani, èn a sabi den moro dipi firi fu wi.

Yehovah sabi sortu problema wi e kisi na ini wi libi, èn te wi e aksi en fu yepi wi, a e du dati. A psalm skrifiman ben skrifi: „Den ai fu Yehovah e luku den regtfardikisma, èn den yesi fu en e yere te den e bari fu kisi yepi. Yehovah de krosibei fu den wan di lasi-ati; èn den wan di e firi brokosaka, a e frulusu” (Psalm 34:15, 18). Wi e kisi trowstu trutru fu sabi taki Yehovah sabi na ini sortu situwâsi wi de, èn te wi e aksi en nanga wi heri ati fu yepi wi, dan a e du dati.

Yehovah Gado e si den sani di sma e du kibrikibri. Iya, „den ai fu a sma di wi musu gi frantwortu, e si ala sani krin èn nowan sani kibri gi en” (Hebrewsma 4:13). Sobun, te wi e du bun noso te wi e du ogri, Gado e si ala sani (Odo 15:3). Fu eksempre, Genesis 6:8, 9 e taki dati „Noa ben e prisiri na ati fu Yehovah”, èn a „ben e waka nanga a tru Gado”. Iya, Yehovah ben feni Noa bun èn a ben blesi en, fu di Noa ben gi yesi na en èn fu di Noa ben hori ensrefi na den regtfardiki markitiki fu Gado (Genesis 6:22). Tra fasi leki Noa, den sma fu en ten ben e du ogri èn den ben e tyari densrefi na wan fasi di no fiti kwetikweti. Gado ben e si ala den sani di den ben e du. A ben „si taki libisma ben e du bun furu ogri sani na grontapu èn taki doronomo den ben e prakseri soso ogri”. Te fu kaba, Yehovah pori den ogrisma dati, ma a kibri Noa nanga en osofamiri.—Genesis 6:5; 7:23.

Yehovah sa feni yu bun te a e luku yu? Iya, den ai fu Yehovah „e luku heri grontapu fu sori en krakti fu a bun fu den sma di lobi en nanga den heri ati” (2 Kroniki 16:9). Heri esi, a o pasa baka taki Yehovah o pori ala ogrisma èn a o kibri den safri-ati sma.—Psalm 37:10, 11.