„Luku bun taki unu no kisi bigi-ai na nowan fasi”

„Srefi te wan sma abi furu gudu, toku den sani di a abi no kan gi en libi.”​—LUKAS 12:15.

1, 2. (a) Sortu sani sma na ini a ten disi e suku fu kisi? (b) San kan pasa nanga wi tu?

FURU sma feni taki yu musu abi moni, gudu, biginen, wan wroko di e pai bun furu moni, noso wan osofamiri, fu man abi wan bun libi. A tru taki na ini gudu kondre nanga pôti kondre, furu sma e meki muiti fu kon gudu èn fu abi wan moro bun libi. Ma na a tra sei, den no e meki muiti kwetikweti fu kon sabi sani fu Gado.

² Bijbel taki na fesi taki den sani disi ben o pasa. Na ini Bijbel skrifi: „Na ini den lasti dei muilek ten o de di tranga fu pasa. Bika sma sa lobi densrefi nomo, den sa lobi moni, . . . den sa de sma di lobi prisiri na presi taki den lobi Gado; a o gersi leki den e dini Gado na wan getrow fasi, ma a libi fu den o sori taki dati no de so” (2 Timoteyus 3:1-5). Fu di wi leki tru Kresten e miti den sortu sma disi ibri dei, meki a fasi fa den e denki èn e libi, kan meki taki wi o wani de tu leki den. San kan yepi wi fu no libi ’leki fa a grontapu sistema disi wani taki wi musu libi’?—Romesma 12:2.

3. Sortu rai di Yesus ben gi, wi sa go luku now?

³ Yesus Krestes, „a Moro Prenspari Fesiman èn a Sma di meki a bribi fu wi kon de volmaakti”, leri wi wan tu prenspari sani di abi fu du nanga a tori disi (Hebrewsma 12:2). Wan leisi di Yesus ben e taki nanga wan grupu sma fu leri den sani di abi fu du nanga a tru anbegi, dan wan man koti Yesus mofo. A man aksi en: „Leriman, taigi mi brada meki a prati a gudu nanga mi di wi papa libi gi wi.” A piki di Yesus gi, ben de seryusu rai gi a man èn sosrefi gi ala den sma di ben e arki. A ben gi den a seryusu warskow fu luku bun taki den no e kisi bigi-ai. Fu sori o seryusu a tori disi de, a fruteri den sma wan agersitori di ben musu poti den na prakseri broki. A bun taki wi e poti seryusu prakseri na a sani di Yesus taki na a okasi dati, èn wi o si sortu wini wi o kisi te wi e gebroiki a rai di a gi.—Lukas 12:13-21.

A man aksi wan sani di no fiti

4. Fu san ede a no fiti taki a man koti Yesus mofo?

⁴ Bifo a man poti na aksi disi, Yesus taigi den disipel fu en nanga den tra sma, taki den musu luku bun nanga a hoigrifasi fu sma, taki den no musu frede fu taigi sma taki den de wán nanga a Manpikin fu libisma, èn a taigi den taki den o kisi yepi fu a santa yeye (Lukas 12:1-12). A no de fu taki dati den tori disi ben de tumusi prenspari tori di den disipel ben musu hori na prakseri. Ma leti na ini so wan prenspari takimakandra di ben musu naki na ati fu den sma, a man koti Yesus mofo èn a aksi en fu lusu wan problema na mindri en nanga en brada, di ben abi fu du nanga gudu. Toku wi kan leri wan prenspari sani fu a tori disi.

5. San na aksi di a man ben poti, e sori fu en?

⁵ Wan buku e taki dati „den sani di wan sma e prakseri te a e arki wan takimakandra di abi fu du nanga Gado, e sori fa a de trutru”. Aladi Yesus ben taki fu seryusu afersi di ben abi fu du nanga a tru anbegi, a man disi ben e prakseri kande fa a ben kan kisi moro gudu. Bijbel no e taki efu a man disi ben abi a reti fu kragi taki den gudu fu a famiri no prati bun. A man ben sabi taki Yesus abi makti èn taki a sabi koti krutu na mindri libisma. Kande na fu dati ede a ben wani taki Yesus gi en leti (Yesaya 11:3, 4;  Mateyus 22:16). Awansi sortu reide a ben abi fu poti na aksi disi gi Yesus, a sani disi e sori taki a ben abi wan moro bigi problema, namku taki a no ben abi nowan lespeki gi sani di abi fu du nanga a tru anbegi. Fu dati ede, a de tumusi prenspari fu ondrosuku wisrefi, a no so? Fu eksempre, te wi de na den Kresten konmakandra a kan pasa makriki taki wi e prakseri tra sani, noso taki wi e prakseri san wi o du moro lati. Na presi fu dati, wi musu poti prakseri na den sani di wi e yere, èn wi musu luku na sortu fasi wi o du den sani di wi e yere na den konmakandra. Na so fasi wi sa man kisi wan moro bun matifasi nanga wi hemel Tata, Yehovah Gado, èn nanga wi Kresten brada nanga sisa.—Psalm 22:22; Markus 4:24.

6. Fu san ede Yesus no du san a man aksi en?

⁶ Awansi sortu reide a man ben abi fu poti na aksi, Yesus no du san a aksi en. Na presi fu dati, Yesus taigi en: „Suma poti mi leki krutuman fu unu, noso leki a sma di musu prati sani na un mindri?” (Lukas 12:14) Yesus ben taki dyaso fu wan seti di sma ben sabi heri bun, bika a Wet di Gado gi Moses e taki dati den krutuman na ini den foto ben musu krutu den sortu afersi disi (Deuteronomium 16:18-20; 21:15-17; Rut 4:1, 2). Ma Yesus ben broko en ede nanga tra prenspari sani, namku taki a ben musu gi kotoigi fu a Kownukondre èn taki a ben musu leri sma a wani fu Gado (Yohanes 18:37). Neleki Yesus, wi no musu meki den broko-ede fu a libi puru wi prakseri fu Kownukondre afersi, ma wi musu gebroiki wi ten nanga wi krakti fu preiki a bun nyunsu èn fu „go na sma fu ala kondre èn meki den tron disipel”.—Mateyus 24:14; 28:19.

Luku bun taki unu no e kisi bigi-ai

7. Sortu prenspari sani Yesus taki fu di a sabi den moro dipi firi fu sma?

⁷ Fu di Yesus sabi san na den moro dipi firi fu sma, meki a kon si taki a man ben abi wan moro bigi problema di a aksi Yesus fu krutu na afersi fu en. Sobun, Yesus no du san a man aksi en, ma na presi fu dati, a ben sori san na a rutu fu a problema. Yesus taki: „Tan na ai èn luku bun taki unu no kisi bigi-ai na nowan fasi, bika srefi te wan sma abi furu gudu, toku den sani di a abi no kan gi en libi.”—Lukas 12:15.

8. O ten wan sma abi bigi-ai, èn san so wan sma kan du srefi te a abi bigi-ai?

⁸ A no te wan sma wani abi moni noso tra sani di a abi fanowdu kande, dan dati wani taki dati a abi bigi-ai. Wan sma di abi bigi-ai gridi trutru fu abi moni, gudu, noso sani fu tra sma. Ala ten so wan sma wani abi moro sani èn te a abi den sani dati, dan toku den no nofo gi en. A sma disi gridi fu abi sani sondro taki a abi den fanowdu. Kande a wani abi den sani fu trawan, èn a no e prakseri sortu bakapisi dati sa abi gi tra sma. Wan sma di abi bigi-ai, e prakseri soso a sani di a wani abi, èn a o du ala san a man fu kisi a sani dati. A sani disi e kon tron so prenspari gi en, taki a kon de leki wan gado gi en. Hori na prakseri taki na apostel Paulus ben taki dati wan gridi sma de leki wan sma di e anbegi kruktugado, èn so wan sma no o go na ini a Kownukondre fu Gado.—Efeisesma 5:5; Kolosesma 3:5.

9. Gi sortu sani sma kan abi bigi-ai? Gi wan tu eksempre fu sma di ben abi bigi-ai.

⁹ A moi fu si taki Yesus ben warskow wi fu no kisi „bigi-ai na nowan fasi”. Wan sma kan abi bigi-ai gi difrenti sani. Wan tu fu den sani dati kari na ini den Tin Komando, namku: „Yu no musu abi bigi-ai gi na oso fu tra sma. Yu no musu angri fu abi a wefi fu wan tra sma. Boiti dati, yu no musu wani en srafu nanga en umasrafu, èn yu no musu wani a mankaw noso a buriki fu en, noso iniwan tra sani di de fu en” (Exodus 20:17). Na ini Bijbel furu eksempre de fu sma di du seryusu sondu fu di den ben abi bigi-ai gi wan sani. Satan ben de a fosi sma di ben abi bigi-ai gi sani di ben de fu wan tra sma. Satan ben wani a glori, a grani, nanga a makti di de fu Yehovah wawan (Openbaring 4:11). Eva ben abi bigi-ai fu di a ben wani a reti fu taki gi ensrefi san bun èn san ogri. Fu di Satan kori Eva fu bribi a sani  dati, meki libisma abi sondu èn den e dede (Genesis 3:4-7). Den ogri yeye ben de engel di no ben de tevrede nanga „a presi di den ben abi na ini a bigin, ma den gowe libi a reti tanpresi fu den”, so taki den ben kan abi wan sani di den no ben abi reti na tapu (Yudas 6; Genesis 6:2). Prakseri sosrefi Bileam, Akan, Gehasi, nanga Yudas Iskariot. Na presi taki den sma disi ben de tevrede nanga a fasi fa den libi ben e waka, den kon gridi fu abi moro nanga moro gudu. Fu dati ede den no tyari den frantwortu na wan yoisti fasi, èn na so den tyari rampu nanga pori kon tapu densrefi.

10. San a wani taki fu „tan na ai” soleki fa Yesus ben gi wi leki rai?

¹⁰ A moi fu si taki fosi Yesus gi a warskow taki wi musu luku bun fu no abi bigi-ai, a ben taki „tan na ai”. Fu san ede a taki dati? Fu di libisma de gaw fu taki dati wan tra sma gridi noso taki a abi bigi-ai, ma nofo tron den no feni taki densrefi gridi noso taki densrefi abi bigi-ai. Fu dati ede, na apostel Paulus e taki dati „te wan sma lobi moni, dan dati na wan rutu fu ala sortu ogri sani” (1 Timoteyus 6:9, 10). A disipel Yakobus e taki dati te takru lostu „kon lepi, a e tyari sondu kon” (Yakobus 1:15). Soleki fa Yesus ben gi wi leki rai, dan wi musu „tan na ai”. Disi no wani taki dati wi musu luku trawan fu si efu den abi bigi-ai, ma wi musu ondrosuku wisrefi fu kon sabi san de prenspari gi wi. Disi o yepi wi fu ’luku bun taki wi no kisi bigi-ai na nowan fasi’.

Te wan sma abi furu gudu

11, 12. (a) Sortu warskow di abi fu du nanga bigi-ai, Yesus ben gi? (b) Fu san ede wi musu gi yesi na a warskow fu Yesus?

¹¹ Ma ete wan reide de fu san ede wi musu luku bun fu no abi bigi-ai. Luku san Yesus e taki now: „Srefi te wan sma abi furu gudu, toku den sani di a abi no kan gi en libi” (Lukas 12:15). Wi musu poti seryusu prakseri na a sani disi trutru, fu di wi e libi na ini wan ten pe furu sma e feni taki gudu wawan kan meki den de koloku èn kan meki den libi waka bun. Yesus ben wani sori nanga den wortu dati, taki awinsi omeni gudu wan sma abi, a no o de koloku trutru èn a no o abi wan trutru bun libi.

¹² Ma son sma no e agri nanga a sani disi. Den feni taki te wan sma abi gudu, dan a o abi wan moro switi libi, èn dati o meki a de moro koloku. Fu dati ede den e du ala san den man èn den e wroko bun tranga fu bai ala den moimoi sani èn nyun-nyun sani di den wani. Den e denki taki te den abi den sani disi, dan den o abi  wan bun libi. Ma te sma e denki so, dan den no e frustan san Yesus ben wani tyari kon na krin.

13. San wi abi fanowdu na ini a libi, èn fa wi musu si den sani di wi abi?

¹³ Yesus no ben taki efu a bun, noso efu a fowtu fu abi furu gudu, ma a ben sori taki ’den sani di wan sma abi’ no kan gi en libi. Wi alamala sabi taki efu wi wani tan na libi, noso efu wi wani sorgu wisrefi, dan wi no abi tumusi furu sani fanowdu. Wi abi soso pikinso nyanyan fanowdu, wan sani fu weri, èn wan presi fu tan. Gudusma abi bun furu fu den sani disi, èn pôtisma e meki tranga muiti fu abi den sani di den abi fanowdu. Ma awansi sma pôti noso gudu, a srefi sani e pasa nanga den te den dede, namku taki den no abi noti moro (Preikiman 9:5, 6). Sobun, a no soso den sani di wan sma man kisi noso den sani di a abi, e gi en wan marki na ini en libi èn e meki a abi wan bun libi. A sani disi e kon na krin te wi e go luku fu sortu libi Yesus ben taki.

14. San wi kan leri fu a wortu „libi” di Yesus ben gebroiki?

¹⁴ Na ini na Evangelietori fu Lukas, Yesus taki dati ’den sani di wan sma abi, no kan gi en libi’. A wortu „libi” (na ini Grikitongo a wortu na zo·eʹ) di a gebroiki dyaso, no abi fu du nanga a fasi fa wan sma e libi, ma a abi fu du nanga a libi srefi. * Yesus ben sori taki a no abi trobi efu wi gudu noso efu wi pôti, efu wi abi ala sani na ini wi libi noso efu wi musu meki tranga muiti fu kisi san wi abi fanowdu. Ma awinsi fa wi libi de, wi no man taki o langa wi o libi noso efu wi o de na libi tamara srefi. Yesus ben taki na ini a Bergitaki fu en: „Suma fu unu di e broko en ede nanga sani, kan meki en libi kon pikinso moro langa?” (Mateyus 6:27) Bijbel e sori krin taki Yehovah wawan na „a Sma pe a libi komoto”, èn na en wawan kan gi getrowsma „a trutru libi” noso „têgo libi” na hemel noso na grontapu.—Psalm 36:9; 1 Timoteyus 6:12, 19.

15. Fu san ede furu sma e poti den frutrow tapu gudu?

¹⁵ Den sani di Yesus taki e sori dati a kan pasa makriki taki sma no sabi san prenspari na ini a libi. Ala libisma, guduwan nanga pôtiwan, abi sondu èn e dede te fu kaba. Moses ben taki: „Wi kan tron seibitenti yari; èn efu wi tranga wi kan tron aititenti yari; toku den yari dati e tyari soso broko-ede nanga pina kon; bika den musu pasa gowe esi-esi, èn na so wi e frei gowe” (Psalm 90:10; Yob 14:1, 2; 1 Petrus 1:24). Dati meki den sma di no abi wan bun matifasi nanga Gado, abi wan fowtu denki fu a libi. Soleki fa na apostel Paulus e taki, dan den sma disi e feni taki den musu ’nyan èn dringi, bika tamara den o dede’ (1 Korentesma 15:32). Trawan di feni taki a libi syatu èn taki den no sabi fa a libi o waka, e pruberi fu abi furu gudu so taki den abi a dyaranti taki sani o waka bun na ini den libi. Kande den feni taki den furu gudu di den abi sa meki a libi fu den waka sondro problema. Fu dati ede, den e wroko dei nanga neti fu abi moro moni nanga gudu, fu di den abi a fowtu denki taki den sani dati o meki den libi waka bun èn taki den o de koloku.—Psalm 49:6, 11, 12.

 San o meki wi libi waka bun na ini a ten di e kon?

16. Sortu sani no e meki wan sma abi wan bun libi trutru?

¹⁶ Wan sma di abi furu nyanyan, furu krosi, wan bun tanpe, nanga tra gudu, kan abi wan moro switi libi noso a kan kisi moro bun datrayepi di kan meki a libi pikinso moro langa. Ma a de so taki so wan libi na trutru wan moro bun libi, èn den sani disi o gi en a dyaranti taki sani o waka bun nanga en? A no te wan sma e libi langa, noso te a abi furu gudu, a abi wan bun libi trutru. Na apostel Paulus ben sori taki a no bun kwetikweti taki wi e poti wi frutrow tapu gudu. A ben skrifi Timoteyus: „Taigi den sma di gudu na ini a grontapu disi taki den no musu abi bigifasi èn taki den no musu frutrow tapu gudu di kan lasi gowe, ma den musu frutrow tapu Gado di e gi wi ala sani bogobogo, so taki wi kan abi prisiri.”—1 Timoteyus 6:17.

17, 18. (a) San wi e leri fu den moi eksempre fu sma di ben si gudu na a yoisti fasi? (b) Sortu agersitori di Yesus fruteri, wi sa go luku na ini na artikel di e kon?

¹⁷ A de wan don sani te wan sma e poti en frutrow tapu gudu bika den gudu „kan lasi gowe”. A famiri-edeman Yob ben gudu srefisrefi, ma di rampu miti en, den gudu fu en no ben man yepi en. Wantronso a ben lasi den sani di a ben abi. Fu di en nanga Gado ben de trutru bun mati, meki a ben man horidoro di ala den tesi nanga banawtu miti en (Yob 1:1, 3, 20-22). Abraham no ben meki den gudu di a abi, tapu en fu du a muilek sani di Yehovah taigi en. Fu dati ede Abraham kisi a blesi fu tron „a tata fu bun furu pipel” (Genesis 12:1, 4; 17:4-6). Wi kan leri moi sani fu den sortu eksempre disi. Awansi wi yongu noso owru, wi musu ondrosuku wisrefi fu kon sabi san de trutru prenspari na ini wi libi, èn fu kon sabi tapu sortu sani wi e poti wi frutrow.—Efeisesma 5:10; Filipisma 1:10.

¹⁸ Yesus taki wan tu sani nomo fu warskow wi fu no abi bigi-ai, èn fu sori wi san de prenspari na ini a libi. Den sani di a taki prenspari trutru èn den e leri wi furu. Ma a no dati wawan Yesus ben taki. A ben fruteri wan agersitori tu fu wan don guduman, èn na agersitori disi musu poti wi na prakseri broki. San wi na ini a ten disi kan leri fu na agersitori dati, èn fa wi kan du den sani di wi leri? Na artikel di e kon sa gi wi a piki tapu na aksi disi.

[Futuwortu]

San yu o piki?

• Fu san ede Yesus no du san a man aksi en, èn san wi e leri fu dati?

• Fu san ede wi musu luku bun taki wi no kisi bigi-ai, èn fa wi kan du dati?

• Fu san ede gudu no e meki wan sma tan na libi?

• San kan meki wan sma abi wan bun libi trutru, èn san kan gi en a dyaranti taki en libi o waka bun?

[Aksi fu a tori disi]

[Prenki na tapu bladzijde 23]

Fu san ede Yesus no du san a man aksi en?

[Prenki na tapu bladzijde 23]

Sma di abi bigi-ai kan kisi takru bakapisi

[Prenki na tapu bladzijde 25]

Fa Abraham sori taki a ben si gudu na a yoisti fasi?