San yu kan du fu tron wan mati fu Gado?

„TE WAN sma e tan poti prakseri na sani di a sondu skin wani, dan a bakapisi fu dati na dede, ma te wan sma e tan poti prakseri na sani di abi fu du nanga a yeye, dan a bakapisi fu dati na libi nanga vrede”, na so na apostel Paulus skrifi (Romesma 8:6). Nanga den wortu dati na apostel e sori taki wan sma no musu wani nomo fu de wan mati fu Gado. Te yu luku en bun, a sani disi na wan seryusu tori. Efu wan sma no e poti prakseri na sani di abi fu du nanga a yeye, noso nanga Gado, dan a o dede. Na a tra sei, a o tan na libi te a e poti prakseri na sani di abi fu du nanga Gado. Ma san na a ’libi nanga a vrede’ di so wan sma o kisi? Soleki fa Bijbel e sori, dan so wan sma abi wan korostu firi èn a abi vrede nanga Gado nownow kaba, èn na ini a ten di e kon a o kisi têgo libi (Romesma 6:23; Filipisma 4:7). Fu dati ede Yesus ben taki a sani disi: „Blesi de tapu den sma di kon si tak’ den abi Gado fanowdu.”—Mateyus 5:3, Nyun Testamenti.

A leisi di yu e leisi a tijdschrift disi e sori taki yu wani sabi moro fu Gado, èn dati na wan bun sani. Ma fu di sma abi difrenti denki fu a tori disi, yu e aksi yusrefi kande: ’San a wani taki fu de wan mati fu Gado? Fa wan sma kan tron wan mati fu Gado?’

„Denki soleki fa Krestes e denki”

Wi si kaba taki na apostel Paulus ben sori o prenspari a de fu poti prakseri na sani di abi fu du nanga Gado, èn a ben sori san na den winimarki te wan sma e du dati. Ma a ben sori tu san a wani taki fu de wan mati fu Gado trutru. Paulus ben sori den Kresten na ini na owruten foto Korente taki tu sortu sma de. Yu abi sma di e denki soleki fa libisma e denki, èn disi wani taki dati den lobi fu du san a sondu skin fu den wani. Ma na a tra sei, yu abi sma di lobi fu du sani di abi fu du nanga Gado. Paulus ben skrifi: „Wan sma di e denki soleki fa libisma e denki no e teki den sani di abi fu du nanga a yeye fu Gado, bika a e si den sani dati leki don sani.” Ma tra fasi leki dati, Paulus e sori taki wan mati fu Gado „e denki soleki fa Krestes e denki”.—1 Korentesma 2:14-16.

Sobun, te wan sma wani de wan mati fu Gado, dan a musu „denki soleki fa Krestes e denki” (Romesma 15:5; Filipisma 2:5). Disi wani taki tu dati a musu waka na Yesus baka (1 Petrus 2:21; 4:1). O moro wan sma e denki soleki fa Krestes e denki, o moro a e kon tron wan bun mati fu Gado, èn a o man kisi „libi nanga vrede”.—Romesma 13:14.

Fa wan sma kan kon sabi fa „Krestes e denki”?

Ma efu wan sma wani denki soleki fa Krestes e denki, dan a musu kon sabi fosi fa Krestes e denki. Sobun, a fosi sani di wan sma musu du efu a wani tron wan mati fu Gado, na fu kon sabi fa Yesus e denki. Ma fa yu kan kon sabi fa wan sma ben denki di ben libi sowan 2000 yari pasa? We, fa yu kon sabi prenspari sma di ben e libi fositen na ini yu kondre? A no de fu taki dati yu kon sabi den fu di yu leisi fu den. Na so a de tu taki te yu wani kon sabi fa Krestes e denki, dan a de prenspari fu leisi den tori fu Yesus di skrifi na ini Bijbel.—Yohanes 17:3.

Wi kan feni fo moi tori di abi fu du nanga Yesus na ini den Evangelietori di Mateyus, Markus, Lukas, nanga Yohanes skrifi. Te yu e leisi den tori disi bun, dan dati sa yepi yu fu kon sabi fa Yesus ben e denki, san ben de den moro dipi firi fu en, èn fu san ede a ben du sani. Te yu e teki ten fu denki dipi fu den sani di yu leisi fu Yesus, yu o kon sabi fa a ben de.  Srefi te yu feni taki yu na wan bakaman fu Krestes kaba, toku a bun fu leisi èn denki dipi fu den sani dati, bika dati o yepi yu fu ’tan kisi moro nanga moro sabi fu wi Masra èn Frulusuman Yesus Krestes di o sori wi moro nanga moro fu en no-frudini bun-ati’.—2 Petrus 3:18.

Sobun, meki wi go luku wan tu fu den sani di skrifi na ini den Evangelietori fu kon sabi san Yesus ben du fu de wan bun mati fu Gado. Te yu du dati, dan yu musu aksi yusrefi fa yu kan waka baka na eksempre fu en.—Yohanes 13:15.

Fa „den froktu fu a yeye” o yepi wan sma fu tron wan mati fu Gado?

Na Evangelie skrifiman Lukas ben taki dati Gado meki en santa yeye kon na Yesus tapu di a teki dopu, èn taki Yesus ben „furu nanga santa yeye” (Lukas 3:21, 22; 4:1). Yesus srefi ben taigi den bakaman fu en krin taki a de prenspari fu meki a santa yeye fu Gado, noso a krakti fu En, tiri den (Genesis 1:2; Lukas 11:9-13). Fu san ede dati de so prenspari? Fu di a yeye fu Gado abi a krakti fu kenki wan sma en denki, so taki a e bigin denki soleki fa Krestes e denki (Romesma 12:1, 2). A santa yeye e meki taki wan sma kisi fasi soleki ’lobi, prisiri, vrede, langa pasensi, bun-ati, bunfasi, bribi, safri-ati, èn a o man dwengi ensrefi’. Sma di abi den fasi disi di Bijbel e kari „den froktu fu a yeye”, na sma di de mati fu Gado trutru (Galasiasma 5:22, 23). Sobun, wan sma di e poti prakseri na sani di abi fu du nanga Gado, e meki a yeye fu Gado tiri en.

Ala ten Yesus ben sori den froktu fu a yeye na ini en diniwroko. Sma ben kan si krin taki Yesus sori lobi, bun-ati, nanga bunfasi gi den sma di trawan ben si leki mofinasma na ini a libimakandra (Mateyus 9:36). Fu eksempre, luku wan tori di na apostel Yohanes skrifi. A tori e taki: „Di [Yesus] waka pasa, a si wan man di breni sensi di a gebore.” Den disipel fu Yesus ben si a man tu, ma gi den a man disi ben de wan sondari. Den ben aksi en: „Suma ben du sondu, . . . na a man disi srefi, noso na en papa nanga mama?” Tra sma ben si a man disi tu, ma gi den a man disi ben de wan sma di ben e begi sma sani nomo. Den ben taki: „A no a man disi ben gwenti sidon begi sma sani?” Ma gi Yesus, a breniman disi ben de wan sma di ben abi yepi fanowdu. Yesus taki nanga a breniman èn a meki taki a ben man si.—Yohanes 9:1-8.

San a tori disi e leri yu fu a fasi fa Krestes ben denki? A fosi sani di yu e leri, na taki Yesus no ben e wisiwasi mofinasma, ma a ben sori trutru sari-ati gi den. A di fu tu sani, na taki Yesus no ben wakti fu sma aksi en yepi, ma ensrefi ben du wan sani wantewante fu yepi den. Yu denki taki yu e waka baka na eksempre disi fu Yesus? Yu e si sma soleki fa Yesus ben si den? Yu e yepi den so taki den kan abi wan moro bun libi èn yu e yepi den fu abi a howpu taki sani o waka moro bun na ini a ten di e kon? Noso yu lobi soso den sma di prenspari, èn yu no e poti prakseri na den sma di no de so prenspari?  Efu yu e si sma soleki fa Yesus ben si den, dan yu e waka soifri na en baka.—Psalm 72:12-14.

Fa begi e yepi wan sma fu tron wan mati fu Gado?

Den Evangelietori e sori taki Yesus ben gwenti fu begi Gado (Markus 1:35; Lukas 5:16; 22:41). Di Yesus ben e du en diniwroko na grontapu, dan a ben meki ten fu begi. A disipel Mateyus ben skrifi: „Baka di [Yesus] seni den sma gowe, dan en wawan kren na tapu a bergi fu go begi” (Mateyus 14:23). Yesus kisi krakti na den momenti te en wawan ben e taki nanga en hemel Tata (Mateyus 26:36-44). Na so a de tu na ini a ten disi taki mati fu Gado e suku okasi fu taki nanga Gado, fu di den sabi taki disi sa yepi den fu tron wan moro bun mati fu a Mekiman èn a o yepi den fu denki soleki fa Krestes e denki.

Nofo tron Yesus ben e begi bun langa (Yohanes 17:1-26). Fu eksempre, fosi Yesus teki den 12 man di ben o tron en apostel, a „go na a bergi fu begi èn heri neti a begi Gado” (Lukas 6:12). Aladi a no abi fu de so taki mati fu Gado e begi heri neti, toku den e waka baka na eksempre fu Yesus. Fosi den e teki wan prenspari bosroiti na ini den libi, den e teki nofo ten fu begi Gado meki a tiri den nanga en santa yeye, so taki den kan teki bosroiti di o meki den tron moro bun mati fu Gado.

Yesus ben begi fayafaya tu, èn wi musu teki na eksempre fu en. Luku san Lukas ben skrifi fu a fasi fa Yesus ben begi a neti bifo a dede. „A sani ben kon so kefalek hebi gi en, taki a bigin begi nanga moro faya; ne en sweti tron leki dropu brudu di ben e fadon na gron” (Lukas 22:44). Disi no ben de a fosi leisi di Yesus ben begi fayafaya. Ma na a okasi disi di a kisi a moro hebi tesi leki libisma, a begi „nanga moro faya”, èn Gado ben arki a begi fu en (Hebrewsma 5:7). Mati fu Gado e teki na eksempre fu Yesus. Te den e kisi hebi tesi, den e begi „nanga moro faya”, èn den e aksi Gado fu gi den en santa yeye, fu tiri den, èn fu yepi den.

A de krin fu si taki Yesus ben e begi furu, èn fu dati ede a no e fruwondru wi taki den disipel fu en ben wani du a srefi sani tu. Dati meki den aksi en: „Masra, leri wi fa fu begi” (Lukas 11:1). Na so a de tu na ini a ten disi taki den sma di abi warderi gi sani di abi fu du nanga na anbegi fu Gado èn di wani taki Gado en santa yeye tiri den, e begi na a fasi fa Yesus ben e begi. Trutru mati fu Gado e si begi leki wan prenspari sani.

Wan sma di de wan mati fu Gado e preiki a bun nyunsu

Na ini na Evangelietori fu Markus, wan tori skrifi pe Yesus ben e dresi furu sikisma te lati neti. A tra dei, frukufruku mamanten di Yesus ben e begi en wawan, den apostel fu en ben kon na en, èn den taigi en taki furu sma ben e suku en fu di den ben wani kande taki a dresi den. Ma Yesus taigi den: „Kon meki wi go na wan tra presi na den pikin foto di de na ini a birti, so taki mi kan preiki drape tu.” Dan Yesus taigi den fu san ede a ben wani go preiki: „Na fu disi Gado ben seni mi kon” (Markus 1:32-38; Lukas 4:43). Aladi Yesus ben feni en prenspari fu dresi sma, toku a moro prenspari wroko fu en ben de fu preiki a bun nyunsu fu Gado Kownukondre.—Markus 1:14, 15.

A de so te now ete, taki den sma di e denki soleki fa Krestes e denki, na sma di e fruteri trawan fu Gado Kownukondre. Yesus ben taigi ala den sma di wani tron en bakaman:  „Go na sma fu ala kondre èn meki den tron disipel, . . . leri den fu du ala san mi komanderi unu” (Mateyus 28:19, 20). Boiti dati, Yesus ben taki na fesi: „A bun nyunsu disi fu a kownukondre o preiki gi sma na heri grontapu, so taki sma fu ala kondre kan yere dati, èn dan a kaba o kon” (Mateyus 24:14). Gado Wortu e sori taki a preikiwroko e du nanga yepi fu a santa yeye. Dati meki sma di e du a wroko disi fayafaya, na mati fu Gado trutru.—Tori fu den Apostel 1:8.

A de fanowdu taki milyunmilyun sma e wroko makandra, so taki a Kownukondre boskopu kan preiki gi sma na heri grontapu (Yohanes 17:20, 21). Boiti taki den sma di e du a wroko disi na mati fu Gado, den musu orga bun tu na heri grontapu. Yu sabi suma na den sma di e waka baka Krestes èn di e preiki a bun nyunsu fu a Kownukondre na heri grontapu?

Yu e du den sani di de fanowdu fu tron wan mati fu Gado?

A no de fu taki dati tra sani de di yu musu du tu fu kan de wan mati fu Gado trutru. Ma yu e du den sani kaba di wi luku na ini na artikel disi? Efu yu wani sabi efu dati de so, dan aksi yusrefi: ’Mi e leisi Gado Wortu, Bijbel ibri dei, èn mi e denki dipi fu den sani di mi leisi? Mi e sori den froktu fu a yeye na ini mi libi? Mi abi a gwenti fu begi? Mi wani abi demakandra nanga den sma di e preiki a bun nyunsu fu Gado Kownukondre na heri grontapu?’

Te yu e ondrosuku efu yu e du den sani disi, dan dati sa yepi yu fu sabi efu yu na wan mati fu Gado trutru. Wi e gi yu a deki-ati fu du san de fanowdu nownow so taki yu kan kisi „libi nanga vrede”.—Romesma 8:6; Mateyus 7:13, 14; 2 Petrus 1:5-11.

[Faki/​Prenki na tapu bladzijde 7]

SMA DI DE MATI FU GADO

◆ lobi Gado Wortu

◆ e sori den froktu fu a yeye

◆ e begi Gado doronomo èn e du dati na wan opregti fasi

◆ e preiki a Kownukondre bun nyunsu gi trawan

[Prenki na tapu bladzijde 5]

Bijbel e yepi yu fu kon sabi „fa Krestes e denki”