Tu aparti sani pasa na wan kongres na ini Georgia

SMA no o frigiti den tu aparti sani di pasa na ini a kondre Georgia na ini 2006. Fu 7 yuli te go miti 9 yuli a „Frulusu de krosibei!” Distrikt Kongres fu Yehovah Kotoigi ben e hori na siksi presi na ini a kondre. A kongres ben gi sma a moi okasi fu leri tumusi moi sani fu Bijbel, èn moro leki 17.000 sma ben nyan bun fu a programa.

Na ini yanuari 2006 den brada bigin suku wan bun presi pe dusundusun sma ben kan kon na a moro bigi kongres di ben o hori na ini Tbilisi, a mamafoto fu Georgia. Na den tra presi pe a kongres ben o hori tu, den sma ben kan arki a programa nanga yepi fu wan telefon sistema.

Wan tu yari kaba, a de so taki Kotoigi na ini Georgia safrisafri e kisi moro fri fu anbegi a Gado fu den. Aladi sma ben e gens den Kotoigi fosi, toku den Kotoigi tan du muiti fu suku wan presi fu hori a kongres na ini a mamafoto èn den ben abi a frutrow taki den ben o feni wan presi. Den sma fu Georgia lobi fu sori switifasi èn den lobi fu teki sma na oso. Ma toku, wan tu prenspari man na ini a kondre de teige den Kotoigi, fu di den no lobi a bribi fu den. Den man disi ben o yuru wan presi gi den Kotoigi aladi den no ben lobi den?

Den brada fu a Kongres Komte ben go luku difrenti stadion nanga bigi sporthal. Den basi fu den presi disi ben pramisi fu yuru den presi gi den brada, ma di den brada taki o ten den wani du dati, dan den basi no ben wani moro. Yu kan frustan taki a komte ben fruwondru di a basi fu a bigi hal na ini Tbilisi, agri fu yuru a presi dati gi Yehovah Kotoigi. A hal disi de na mindrisei fu a foto, èn den moro prenspari konmakandra noso fesa fu a kondre e hori drape.

A ben gi den brada deki-ati fu si taki a muiti di den du, meki taki den feni wan bun presi fu  hori a kongres. Fu dati ede, a komte bigin seti sani fu orga a kongres na ini Tbilisi, èn sosrefi den tra kongres di ben o hori na ini tra foto na ini a kondre, soleki Tsnori, Kutaisi, Zugdidi, Kaspi, nanga Gori. Den brada ben musu du furu so taki den sma na ala den presi pe a kongres ben o hori, ben kan yere a programa na a srefi ten. Ala sani ben seti kaba fu hori a kongres. Ne wantronso, wán wiki bifo a kongres ben o bigin, den basi fu a hal no ben wani yuru a presi moro gi den brada, sondro fu taki fu san ede.

A fosi aparti sani

San den brada ben o du wán wiki bifo a kongres? A wan-enkri sani di den ben kan du na fu go baka na Marneuli, wan boitipresi di de sowan 40 kilometer fara fu Tbilisi. Furu kongres ben hori drape kaba na wan gron fu wan famiri di de Yehovah Kotoigi. Fosi, sma ben e prani sani na a gron disi. Na ini den lasti tin yari, disi ben de a wan-enkri presi pe den gemeente fu Tbilisi ben kan hori den kongres. Ma na ini a foto Marneuli, sma du furu ogri-ati sani nanga Yehovah Kotoigi.

Wán leisi tapu 16 september 2000, skowtu fu a foto Marneuli ben tapu a pasi so taki den Kotoigi no ben man go na a kongres. Baka dati na Orthodox priester Vasili Mkalavishvili, di sma ben puru leki priester, ben kon nanga wan tu bus di lai nanga ogriman. Den ben tapu den oto nanga den bus di ben de na pasi fu go na a kongres na ini Marneuli. Den hari furu fu den sma puru fu den bus nanga den oto, èn den fon den sma srefisrefi. Boiti dati, den fufuru den sani fu den sma, èn sosrefi den Bijbel nanga Bijbel publikâsi fu den.

Sowan 60 ogriman ben du ogri nanga den sma na a kongres di ben hori na ini Marneuli. Sowan 40 Kotoigi ben kisi mankeri. Den dyuku wan brada na ini en borsu nanga wan nefi. Wan tu fu den ogriman ben abi syatu-mofo gon na den, èn nanga atibron den ben sutu go na loktu. Wán fu den hori wan gon gi a sisa di abi a gron, èn a ben wani taki a sisa gi en a moni nanga den gowtu sani di a abi. Den ogriman broko sani na ini en oso di ben de na bakasei fu a gron, èn den fufuru den gudu fu en. Baka di den broko ala den fensre fu na oso, den bron den Bijbel publikâsi nanga den bangi di den brada ben meki spesrutu gi a kongres. Den buku di den bron ben hebi sowan 1500 kilo. Na presi taki den skowtu tapu den ogriman, den ben du ogri nanga den Kotoigi tu. *

 Boiti taki a Kongres Komte ben sabi taki ogri ben kan miti den baka, den ben abi wan tra problema, namku taki den ben musu luku fa den ben o seti sani so taki nofo sidonpresi de gi den 5000 sma di ben o kon na a kongres. Nofo tron sowan 2500 sma ben kan sidon drape. Fa den ben o lusu a problema disi na ini so wan syatu pisi ten? A ben de leki wan wondru di tu birtisma ben wani yuru a gron fu den gi den brada.

A no ben makriki fu seti ala sani na den gron so taki a kongres ben kan hori drape. A sani di ben meki en moro muilek, na taki alen ben e fadon a heri wiki bifo a kongres. Patata ben prani na a gron fu den birtisma, èn den brada ben musu puru den patata. A fosi sani di den brada du, na taki den diki den patata puru aladi hebi alen ben e fadon. Baka dati, den puru den skotu èn den meki wan daki fu tapu den sma gi a son noso na alen. Den ben musu meki moro udu bangi, èn den ben musu seti a geluid na den tra gron tu. Den brada nanga sisa ben e sa udu, den ben e spikri sani, èn den ben e boro sani, iya, den ben e wroko dei nanga neti èn sonwan fu den no ben sribi srefi.

Ala sma ben aksi densrefi: „Fa wi o du te alen e kon ete na den dei fu a kongres? Wi o saka go na ini a tokotoko?” Den brada ben bai drei grasi fu poti tapu a nati gron. Te fu kaba, son ben skèin! A ben moi fu si taki ala den dri dei fu a kongres, son ben skèin.

Di den sma doro na a kongres, den si fa a presi moi. A moi boitipresi ben gersi wan paradijs. Den sma ben abi bun sidonpresi, èn figabon, tra froktubon, karu nanga tomati ben de na den lontu. Bakasei fu a podium ben moi fu di droifibon ben de drape. Wawan leisi te a programa ben e hori, den sma ben kan yere kakafowru e bari, èn den ben yere umafowru e bari te den sma fu den tra gron ben teki den eksi fu den. Den ben yere tra sani tu di yu gwenti yere na wan boitipresi, ma den sani dati ben moi fu yere. Na presi taki den sani disi ben puru a prakseri fu den arkiman, den ben poti ala den prakseri na a programa pe den leri moi sani fu Bijbel. Ma tra moi sani ben de tu di meki taki den sma no frigiti a kongres disi.

A di fu tu aparti sani

Na a kaba fu a freida mamanten programa, den arkiman kisi fu yere wan sani di den no ben fruwakti srefisrefi. Brada Geoffrey Jackson, wan memre fu a Tiri Skin fu Yehovah Kotoigi, meki bekènti taki a heri Bijbel, namku a New World Translation of the Holy Scriptures, de na ini Georgiatongo now. * Furu fu den sma  ben fruwondru fu a sani disi, èn den ben krei. Wan osofamiri di ben breiti srefisrefi, ben taki: „Wi no man tapu fu taki fa wi de nanga tangi gi a Bijbel disi, iya, a Bijbel disi komoto fu Yehovah. Na ini so wan syatu pisi ten nomo den du so wan bigi wroko!”

Wan sisa fu a foto Tsalendjikha, di ben arki a programa nanga yepi fu a telefon sistema, ben taki: „Mi no abi wortu nofo fu taki fa mi ben breiti taki wi kisi a heri Bijbel. Mi wani taki unu tangi gi a tumusi moi kongres disi di hori dri dei langa. Disi ben de wan heri moi kongres di mi no sa frigiti.” Wan osofamiri na ini wan gemeente na westsei fu Georgia, di de leti na sei a Blaka Se, ben taki: „Fosi, wi ben abi wán Bijbel nomo na ini wi osofamiri, ma now wi ala fo abi wi eigi Bijbel. Now ibriwan fu wi kan abi en eigi Bijbel fu studeri.”

Ma san den arkiman no sabi, na taki wan tu sani no waka so makriki. Fu eksempre, aladi den brada ben druk a Bijbel kaba èn ben seni en biten go na Georgia gi a kongres, den lantiman fu a kantoro di musu gi primisi fu meki sani kon na ini a kondre, ben weigri fu meki den Bijbel kon na ini Georgia. Den brada go na a lantiman fu a kantoro pe borgu kan go te lanti no handri bun nanga den. A lantiman dati ben man sorgu taki den Bijbel ben kon na ini a kondre leti bifo a distrikt kongres bigin. A ben seni srefi wan wrokoman fu en go na a kongres na ini a foto Marneuli so taki a ben kan teki wan tu fu den nyun Bijbel disi gi a kantoro fu den.

Den sma fu Georgia e gi sma wan switikon soleki fa den gwenti

Ete wan reide de fu san ede a distrikt kongres na ini Marneuli ben de wan spesrutu kongres gi Yehovah Kotoigi na ini Georgia. Wan memre fu a Tiri Skin fu Yehovah Kotoigi ben de na a kongres. Ala sma na a kongres ben breiti so te taki a brada disi ben de drape, èn ibriwan fu den ben wani gi en wan switikon soleki fa den gwenti drape na ini a kondre. Bifo a kongres, na a ten fu a kongres, èn baka a kongres, Brada Jackson no ben abi trobi fu tanapu furu yuru langa fu taki den brada nanga sisa odi.

Na ini 1903, na a kaba fu wan tra kongres, wan brada ben taki: „Mi na wan pôtiman. Mi leri furu bun sani na a kongres disi. Ma awansi wan sma ben o gi mi 1000 Amerkan dala gi ala den moi sani di mi leri, toku mi no ben o teki a moni dati.” Dati pasa moro leki 100 yari kaba, ma na so den Kotoigi ben firi tu di den ben go na den moi kongres di ben hori na ini a waran pisi ten fu a yari 2006 na ini a kondre Georgia.

[Futuwortu]

[Faki na tapu bladzijde 19]

„A pikinwan” kon bigi

Den wortu fu Yesaya 60:22 kon tru na ini Georgia. A tekst dati e taki: „A pikinwan srefi sa tron wán dusun, èn a wan di no abi so furu makti sa tron wan makti kondre. Misrefi, Yehovah, sa meki a go moro esi te a ten gi dati doro.” Na ini wan pisi ten fu sowan 20 yari a nomru fu Kownukondre preikiman na ini Georgia kren fu pikinmoro 100 te go miti sowan 16.000. Den fayafaya preikiman fu Gado Wortu e hori sowan 8.000 bijbelstudie ibri wiki. Disi e sori taki a wroko na ini Georgia man go na fesi moro.

[Karta na tapu bladzijde 16]

(Efu yu wani si pe den sani disi skrifi, luku a tijdschrift)

ROSIA FEDERATIE

GEORGIA

⇨ Zugdidi

⇨ Kutaisi

Marneuli ⇨ Gori

⇨ Kaspi

⇨ Tsnori

TBILISI

TORKUKONDRE

ARMEINIA

ASERBADYAN

[Sma di abi a reti fu a prenki]

Globe: Based on NASA/Visible Earth imagery

[Prenki na tapu bladzijde 16]

Wan stonpopki na ini Tbilisi

[Prenki na tapu bladzijde 17]

Nanga yepi fu telefon, den sma na feifi tra presi ben kan arki a kongres programa di ben hori na ini a foto Marneuli

[Prenki na tapu bladzijde 18]

Den sma na a kongres ben breiti srefisrefi di den kisi a heri Bijbel na ini Georgiatongo