Yu „gudu na ini Gado ai”?
Yu „gudu na ini Gado ai”?
„Na so a sa waka nanga a sma di wani moro nanga moro gudu, ma di no gudu na ini Gado ai.”—LUKAS 12:21.
1, 2. (a) Fu san ede sma ben de klariklari fu gowe libi den moro prenspari sani na ini den libi? (b) Sortu sani kan muilek gi Kresten fu du, èn san kan pasa nanga den?
SENSI TEN a de so taki sma na ini difrenti kondre e suku gudu. Fu eksempre, na ini a di fu 19 yarihondro, sma fu difrenti kondre ben go na Australia, Zuid-Afrika, Kanada, nanga Amerkankondre soso fu suku gowtu. Den sma disi ben de klariklari fu gowe libi den oso nanga den lobiwan fu den, fu go na wan kondre di den no sabi srefisrefi èn pe a libi tranga. Iya, furu sma no abi trobi fu du sani di o meki den libi kon de na ini kefar, èn den de klariklari fu gowe libi den moro prenspari sani na ini den libi, soso fu kan kisi den gudu di den wani.
2 Aladi a de so na ini a ten disi taki na ini furu kondre sma no e go suku den sortu gudu dati, toku den musu wroko bun tranga fu sorgu gi densrefi. Na ini a ten disi, a sani dati kan muilek srefisrefi, èn a kan de wan hebi. A kan pasa makriki taki wi e broko wi ede so te nanga san wi o nyan, san wi o weri, èn pe wi o tan, taki wi no e poti so furu prakseri moro na den moro prenspari sani. A kan tu taki wi e frigiti san na den moro prenspari sani na ini wi libi (Romesma 14:17). Yesus ben fruteri wan agersitori di e sori krin taki a sani disi kan pasa nanga wi. Na agersitori disi skrifi na ini Lukas 12:16-21.
3. Fruteri syatu sortu agersitori Yesus gi, soleki fa dati skrifi na ini Lukas 12:16-21.
3 Yesus ben fruteri na agersitori disi na a srefi okasi di a ben gi a warskow taki wi musu luku bun taki wi no e kisi bigi-ai, soleki fa wi ben si krin na ini na artikel na fesi. Baka di Yesus ben gi a warskow dati, a ben taki fu wan guduman di no ben de tevrede nanga den furu bun sani di ben lai na ini den maksin fu en. A man disi broko den maksin fu en èn a bow moro bigiwan, so taki a ben man poti moro bun sani na ini. Di a denki taki en libi seti kaba, dan Gado taigi en taki a o dede èn taki wan tra sma o kisi ala den bun sani di a kibri na ini den maksin fu en. Na a kaba fu na agersitori Yesus taki: „Na so a sa waka nanga a sma di wani moro nanga moro gudu, ma di no gudu na ini Gado ai” (Lukas 12:21). San wi kan leri fu na agersitori disi? Fa wi kan du den sani di wi leri fu na agersitori disi?
A man ben abi wan problema
4. Fa a man ben de kande, soleki fa dati kon na krin na ini na agersitori fu Yesus?
4 Na ini furu kondre, sma sabi na agersitori disi fu Yesus. Yesus bigin na agersitori na a fasi disi: „A gron fu wan guduman ben gi furu nyanyan.” Yesus no ben taki dati a man kon gudu fu di a bedrigi sma noso fu di a du wan kruka bisnis. Sobun, Yesus no ben taki dati a man disi ogri. Fu taki en leti, te wi e luku san Yesus taki, dan wi kan frustan taki a man disi ben wroko tranga. Wi e si taki a man disi ben seti sani na fesi èn taki a ben kibri sani gi a ten di e kon. Kande a ben du disi so taki en osofamiri ben kan abi wan bun libi. Sobun, gi wan sma di no e si a tori leki fa Gado e si en, a gersi leki a man disi ben e wroko tranga èn a ben e meki tranga muiti fu sorgu gi ensrefi.
5. Sortu problema a man na ini na agersitori fu Yesus ben abi?
5 Awansi fa a no fa, Yesus ben sori taki a man na ini na agersitori ben abi bun furu gudu kaba. Ma soleki fa Yesus taki, dan a guduman disi ben abi wan problema. A gron fu en ben gi moro nyanyan leki san a ben fruwakti. A nyanyan ben de moro leki san a ben abi fanowdu èn a no ben abi presi na ini den maksin fu en fu poti a nyanyan. San a man ben musu du?
6. Sortu bosroiti furu futuboi fu Gado musu teki na ini a ten disi?
6 Na ini a ten disi, furu futuboi fu Yehovah e kisi fu du nanga a srefi situwâsi leki a di fu a guduman. Tru Kresten e meki muiti fu de opregti, fu wroko tranga, èn fu du den wroko bun (Kolosesma 3:22, 23). Awansi den e wroko gi wan basi, noso den abi den eigi bisnis, nofo tron a de so taki den e wroko bun, èn son leisi den e wroko moro bun leki furu tra sma. Te den e kisi na okasi fu kisi wan moro hei posisi noso fu wroko moro moni, dan den musu bosroiti san den o du. Den musu teki a wroko dati so taki den kan meki moro moni? A srefi sortu sani e pasa tu nanga furu yongu Kotoigi di e wroko bun na skoro. Leki bakapisi fu dati den kan kisi na okasi fu go na kefalek heiskoro. Den musu teki na okasi dati èn du san furu sma ben o du?
7. Fa a guduman lusu a problema fu en?
7 Meki wi go luku na agersitori fu Yesus baka. San a guduman du di a gron fu en gi so furu nyanyan taki a no ben abi nowan presi fu poti den sani dati? A bosroiti fu broko den maksin di a ben abi kaba, èn a bow moro bigiwan so taki a ben kan poti ala aleisi nanga ala den bun sani na ini. A sani disi di a ben abi na prakseri fu du meki a denki taki ala sani ben o waka bun gi en. ’A taki na ensrefi: „We, mi poti wan lo bun sani na wan sei gi furu yari; mi o teki en safrisafri, nyan, dringi èn meki prisiri.”’—Lukas 12:19.
Fu san ede a ben de wan „donman”?
8. Sortu tumusi prenspari sani a guduman ben frigiti?
8 Ma soleki fa Yesus sori, dan a sani di a guduman ben abi na prakseri no ben o abi bun bakapisi gi en kwetikweti. A gersi leki a sani di a man ben abi na prakseri ben de wan koni sani, ma a frigiti wán tumusi prenspari sani. A no hori na prakseri san Gado wani. A man ben denki ensrefi nomo, a ben e denki fa a ben o teki en safrisafri, èn fa a ben o nyan, dringi, èn meki prisiri. A ben e denki taki a ben o libi „furu yari” langa, fu di a ben abi „furu bun sani”. Ma a de wan sari sani taki a libi fu en no waka soleki fa a ben denki. A sani di pasa nanga a man, de soleki fa Yesus ben taki: „Srefi te wan sma abi furu gudu, toku den sani di a abi no kan gi en libi” (Lukas 12:15). A srefi neti dati a man lasi ala sani di a ben wroko tranga fu kisi, fu di Gado ben taigi en: „Yu donman, a neti disi srefi yu o lasi yu libi. Dan suma o kisi den sani di yu tyari kon na wan?”—Lukas 12:20.
9. Fu san ede a guduman na ini na agersitori ben de wan donman?
9 Now wi o go luku a moro prenspari sani di Yesus ben wani tyari kon na krin na ini na agersitori. Gado taki dati a man don. Wan wortubuku e taki dati ala ten te den gebroiki a Griki wortu dati, dan a abi fu du „nanga wan sma di no frustan sani bun” (Exegetical Dictionary of the New Testament). A buku e taki dati na ini na agersitori disi Gado gebroiki a wortu dati fu sori taki „na fu soso gudusma e seti sani gi a ten di e kon”. A wortu disi no e gebroiki gi wan sma di no abi sabi, ma gi „wan sma di e weigri fu erken taki a abi Gado fanowdu”. A sani di Yesus ben taki fu a guduman e meki wi prakseri san a ben taigi den Kresten na ini a fosi yarihondro fu a gemeente Laodisea, na ini Pikin Asia. A ben taigi den: „Yu e taki: ’Mi na wan guduman, mi abi wan lo gudu kaba, mi no abi notinoti fanowdu’, ma yu no sabi taki yu na wan mofinasma, taki sma e firi sari gi yu, taki yu pôti, taki yu breni èn taki yu de nanga sososkin.”—Openbaring 3:17.
10. Fu san ede a no de so taki wan sma o libi langa te a abi „furu bun sani”?
10 A bun fu denki dipi fu den sani di wi kan leri fu na agersitori disi. A kan de so taki wi de leki a guduman na ini na agersitori? A de so taki wi e wroko bun tranga fu sorgu taki wi abi „furu bun sani”, ma wi no e du san de fanowdu so taki na ini a ten di e kon, wi sa man libi langa? (Yohanes 3:16; 17:3) Bijbel e taki: „Warti sani no sa tyari wini kon na a dei fu atibron”, èn „a sma di e frutrow tapu den gudu fu en, sa fadon” (Odo 11:4, 28). Fu dati ede, Yesus gi a warskow disi na a kaba fu na agersitori: „Na so a sa waka nanga a sma di wani moro nanga moro gudu, ma di no gudu na ini Gado ai.”—Lukas 12:21.
11. Fu san ede a no warti noti efu wan sma e poti en frutrow tapu den gudu fu en èn efu a e denki taki den sani dati o meki en libi waka bun?
11 Di Yesus taki „na so a sa waka”, dan a sori taki a sani di ben pasa nanga a guduman na ini na agersitori, sa pasa tu nanga den sma di e poti den frutrow tapu den gudu fu den èn di e si den gudu leki a wan-enkri sani di o meki den libi waka bun. A bigi fowtu di den sma disi e meki no de taki den „wani moro nanga moro gudu”, ma taki den no de „gudu na ini Gado ai”. A disipel Yakobus ben gi wan srefi sortu warskow, di a skrifi: „We dan, unu e taki: ’Tide noso tamara wi sa go na a foto disi, wi sa tan wan yari drape, wi sa du bisnis, èn wi sa meki moni’, ma unu no sabi fa a libi fu unu sa de tamara.” San den musu du? „Na presi fu dati, un musu taki: ’Efu Yehovah wani, dan wi sa de na libi èn wi sa du disi noso dati’” (Yakobus 4:13-15). Awansi omeni moni noso gudu wan sma abi, ala den sani dati no warti noti efu a no gudu na ini Gado ai. Ma san a wani taki dati wan sma gudu na ini Gado ai?
San a wani taki dati wan sma gudu na ini Gado ai?
12. San wi musu du fu kon gudu na ini Gado ai?
12 Yesus ben sori taki wan sma di gudu na ini Gado ai de heri tra fasi leki wan sma di e meki tranga muiti fu kisi moro nanga moro gudu. Sobun, Yesus e sori taki a moro prenspari sani na ini wi libi no musu de den gudu di wi e suku fu abi, noso a koloku di wi e suku fu abi nanga yepi fu den gudu fu wi. Na presi fu dati, wi musu gebroiki den gudu fu wi na so wan fasi taki wi e tron moro bun mati fu Yehovah. Te wi e du dati, dan wi o gudu na ini Gado ai. Fu san ede? Fu di na so fasi wi o kisi furu blesi fu en. Bijbel e fruteri wi: „Na den blesi fu Yehovah e meki sma kon gudu, èn a no e meki wi firi sari.”—Odo 10:22.
13. Fa den blesi fu Yehovah „e meki sma kon gudu”?
13 Te Yehovah e blesi a pipel fu en, dan ala ten a e gi en pipel den moro bun sani (Yakobus 1:17). Fu eksempre, a kondre di Yehovah gi den Israelsma, ben de „wan kondre di lai merki nanga oni”. Aladi a kondre Egepte ben de wan kondre di lai merki nanga oni tu, toku wan prenspari sani ben de di ben meki a kondre fu den Israelsma de tra fasi. Moses ben taigi den Israelsma taki a kondre fu den ben de „wan kondre di Yehovah un Gado e sorgu gi”. Sobun, sani ben o waka bun gi den fu di Yehovah ben o sorgu gi den. Solanga den Israelsma ben o tan getrow na Yehovah, den ben o kisi bogobogo blesi fu en, èn a ben de krin fu si taki a libi fu den ben bun moro leki di fu tra pipel. Iya, na den blesi fu Yehovah „e meki sma kon gudu”!—Numeri 16:13; Deuteronomium 4:5-8; 11:8-15.
14. San den sma di gudu na ini Gado ai, e kisi?
14 Den sma di abi furu gudu e broko den ede nofo tron fa tra sma e si den. Disi de fu si nofo tron na a fasi fa den e libi. Den wani meki sma si o kefalek den de, fu di den ’e prodo nanga den gudu di den abi’ (1 Yohanes 2:16). Tra fasi leki den sma disi, den sma di gudu na ini Gado ai, na sma di Gado feni bun. Boiti dati, den e kisi a no-frudini bun-ati fu Gado bogobogo, èn den de bun mati fu en. Den sma dati de koloku trutru èn sani e waka bun gi den. Iya, nowan gudu kan gi den so wan bun libi (Yesaya 40:11). Ma wi musu piki na aksi disi ete: San wi musu du fu gudu na ini Gado ai?
San wi musu du fu gudu na ini Gado ai?
15. San wi musu du fu gudu na ini Gado ai?
15 Na ini na agersitori fu Yesus, a man ben seti sani gi ensrefi fu a ten di e kon èn a ben e wroko tranga soso fu kon gudu, èn dati meki Gado taki dati a de wan donman. Fu dati ede, efu wi wani gudu na ini Gado ai, dan wi musu meki tranga muiti fu du den sani di Gado e si leki warti sani trutru, èn wi musu du den sani dati fayafaya. Wán fu den sani disi na san Yesus ben gi leki komando, namku: „Fu dati ede, go na sma fu ala kondre èn meki den tron disipel” (Mateyus 28:19). Wi no musu gebroiki wi ten, wi krakti, nanga den koni fu wi soso fu meki wi libi kon moro bun, ma wi musu gebroiki den sani dati na ini a Kownukondre preikiwroko èn na ini a wroko fu meki disipel. Te wi e du dati, dan a de neleki wi e poti moni na bangi noso na ini wan bisnis fu di wi sabi taki wi o kisi wini fu dati. Den sma di du dati kisi blesi fu Gado, soleki fa a e kon na krin na ini den ondrofenitori di e kon now.—Odo 19:17.
16, 17. Sortu ondrofenitori yu kan fruteri di e sori san sma du fu kon gudu na ini Gado ai?
16 Luku na eksempre fu wan man di de wan Kotoigi fu Yehovah na ini wan kondre na Asia. A man disi ben meki furu moni nanga a wroko di a ben du fu meki computer. Ma a wroko fu en ben teki ala a ten fu en, èn a ben firi leki a bribi fu en ben kon swaki. Te fu kaba a no meki muiti moro fu abi wan moro bun posisi na wrokope, ma a gowe libi a wroko èn a bigin wan bisnis pe a ben meki ice cream èn seri dati na strati. A du disi so taki a ben kan abi moro ten fu du a diniwroko fu en, èn fu tyari den frantwortu fu en moro bun. Den sma di a ben wroko nanga den fosi, ben lafu en. Ma fa sani ben waka nanga a brada disi? „Fu taki en leti, mi ben e meki moro moni leki di mi ben abi a wroko fu meki computer”, na so a e taki. „Mi kon de moro koloku fu di mi no abi den broko-ede di mi ben abi fosi na a presi pe mi ben e wroko. Ma san de moro prenspari, na taki now mi de wan moro bun mati fu Yehovah.” Fu di a brada disi go du wan tra wroko, meki a ben man go na ini a furuten diniwroko, èn now a e dini na a bijkantoro fu Yehovah Kotoigi na ini a kondre fu en. Iya, a blesi fu Yehovah „e meki sma kon gudu” trutru.
17 Wan tra eksempre, na di fu wan uma di gro kon bigi na ini wan osofamiri di ben e si heiskoro-leri leki wan tumusi prenspari sani. Na uma disi go na heiskoro na ini Fransikondre, Meksikow, nanga Switserland, èn a ben kisi na okasi fu du wan kefalek wroko. A ben taki: „Mi ben meki en na ini a grontapu disi, fu di mi ben abi wan hei posisi èn sma ben e lespeki mi. Ma na a tra sei, mi no ben de koloku kwetikweti.” Bakaten na uma disi leri sabi Yehovah. A ben taki: „O moro mi ben leri sabi Yehovah, o moro mi ben wani plisi en. Fu di mi ben wani sori warderi gi san Yehovah du gi mi, meki mi go na ini a furuten diniwroko.” Na uma gowe libi a wroko fu en, èn syatu baka dati a teki dopu. Now a de koloku, fu di a de 20 yari kaba na ini a furuten diniwroko. A sisa disi e fruteri: „Son sma e denki taki na fu soso mi teki heiskoro-leri, ma den e si taki mi de koloku, èn den e feni en moi fu si taki mi e tyari misrefi na wan bun fasi. Ibri dei mi e begi Yehovah meki a yepi mi fu abi sakafasi so taki a kan feni mi bun.”
18. Fa wi kan gudu na ini Gado ai neleki Paulus?
18 Saulus, di ben tron na apostel Paulus, ben abi na okasi fu meki en na ini grontapu na a ten dati. Toku a skrifi bakaten: „Mi e si ala sani trutru leki soso sani, fu di a sabi fu Krestes Yesus, mi Masra, warti moro ala sani” (Filipisma 3:7, 8). Paulus ben feni taki den gudu di a kisi fu Krestes, warti moro leki iniwan sani di a ben kan kisi na ini grontapu. Na so a de tu taki te wi no e suku fu du sani gi wisrefi nomo, ma wi e meki muiti fu du ala san wi man fu dini Gado, dan wi o gudu na ini Gado ai. Gado Wortu e gi wi a dyaranti disi: „Te wan sma abi sakafasi nanga frede gi Yehovah, dan a o kisi gudu, glori nanga libi.”—Odo 22:4.
Yu kan tyari disi kon na krin?
• Sortu problema a guduman na ini na agersitori fu Yesus ben abi?
• Fu san ede Gado ben taki dati a guduman na wan donman?
• San a wani taki dati wan sma gudu na ini Gado ai?
• Fa wi kan kon gudu na ini Gado ai?
[Aksi fu a tori disi]
[Prenki na tapu bladzijde 26]
Fu san ede Gado ben taki dati a guduman na wan donman?
[Prenki na tapu bladzijde 27]
Fa a kan de wan bigi tesi gi wi te wi e kisi na okasi fu meki moro moni?
[Prenki na tapu bladzijde 28, 29]
„Na den blesi fu Yehovah e meki sma kon gudu”