Luku den mekisani èn kon leri sabi a Mekiman

KANDE yu yere fu Michelangelo, wan man fu Italiakondre di ben e meki skedrei nanga stonpopki. Awansi yu noiti si wan fu den moi wroko fu en, toku yu sa agri nanga a historia skrifiman di ben taki dati nowan sma ben sabi a wroko so bun leki Michelangelo. A no de fu taki dati Michelangelo ben koni. Den kefalek sani di a meki e sori krin taki a man disi ben sabi du en wroko heri bun, a no so?

Now, poti prakseri na den difrenti moi libisani di lai na grontapu. Wan professor ben taki fu a tori disi, èn a sani di a taki, tru. A man disi ben taki: „A fasi fa den libisani na grontapu meki, e sori krin taki na wan sma meki den.” A ben taki moro fara: „So furu difrenti sani de di e sori taki na wan sma meki den” (The New York Times). Fa wi kan poti prakseri na ala den sani dati, èn weigri fu bribi taki na wan sma meki den?

Na apostel Paulus di ben lobi poti prakseri na sani, ben taki fu den wan di ben e „dini èn ben e anbegi den sani di Gado meki, na presi taki den go dini èn anbegi a Sma di meki den sani disi” (Romesma 1:25). Fu di son sma e bribi na ini na evolutie-leri, meki den no wani, noso den no man si taki na wan sma meki ala libisani. Ma a leri disi tru? Luku san Christoph Schönborn, wan gran-beskopu fu a Lomsu Kerki fu Wenen ben taki: „Te wan leri e sori sma taki den libisani kon fu densrefi, aladi someni buweisi de di e sori taki dati no tru, dan a leri dati na wan lei.”

A sa de fanowdu ete fu ondrosuku sani?

Ma sma de di feni taki te den e bribi na ini wan Mekiman, dan „a no sa de fanowdu moro fu ondrosuku sani”. Wan artikel na ini wan tijdschrift e tyari kon na krin fa den sma disi e denki. Den sma disi feni taki „sabiman no ben o teki ten moro fu ondrosuku fa den sani disi du kon, fu di a de krin kaba taki ’na wan sma meki den sani disi’” (New Scientist). Den sma disi abi leti fu denki so? Kwetikweti. Fu san ede?

Te wi ben o bribi taki den libisani na grontapu kon fu densrefi, noso nanga yepi fu evolutie, dan fu taki en leti, wi no ben o meki muiti srefisrefi fu kon frustan fa den sani dati du kon. Ma te wi e bribi taki na wan koni Mekiman meki ala den sani di wi e si na wi lontu, dan wi sa wani kon sabi moro fu a koni fu En, èn wi sa wani kon sabi tu fa a gebroiki a koni dati fu meki den sani disi. Poti prakseri na a tori disi: Aladi den sabiman sabi taki na Leonardo da Vinci meki a skedrei „Mona Lisa”, toku dati no tapu den fu ondrosuku fa a meki a skedrei disi èn sortu sani a gebroiki fu  meki en. Na so a de tu taki te wi e bribi na ini wan Mekiman, dan dati no musu tapu wi fu kon sabi moro fu den sani di a meki.

Na presi taki Bijbel e tapu wi fu ondrosuku sani moro fini, a e gi wi deki-ati fu suku piki tapu aksi di abi fu du nanga a naturu, èn nanga Gado. Kownu David fu owruten ben e poti prakseri na a skin fu en di meki na wan kefalek koni fasi. A ben taki: „Yu meki mi na wan tumusi wondru fasi di e gi mi frede. Den wroko fu yu na wondruwroko, dati mi sili sabi heri bun” (Psalm 139:14). Fu taki en leti, Bijbel e sori taki a Mekiman e aksi na famiri-edeman Yob a sani disi: „Yu kon sabi o bradi grontapu de? Taigi mi, efu yu kon sabi ala den sani disi” (Yob 38:18). A sani disi e sori krin taki Gado no e tapu libisma fu kon sabi sani moro fini, a no so? Na presi fu dati, a tekst disi e sori taki a Koni Mekiman e gi sma deki-ati fu ondrosuku den sani di a meki. Luku sosrefi san a profeiti Yesaya e taigi wi fu du. A e taigi wi fu du wan sani di sa meki wi kon frustan moro bun suma na a Sma di meki den sani na hemel nanga grontapu. Yesaya ben taki: „Luku go na loktu. Suma meki den sani disi?” Iya, Yesaya 40:26 e taki wan sani di e kruderi nanga a pôpi leri fu Einstein. A tekst disi e sori taki na wan sma di abi tumusi bigi krakti, meki hemel nanga grontapu.

A no de fu taki dati a no ala ten wi e kan fruklari fa ala sani na hemel nanga grontapu du kon. Wan reide fu san ede dati de so, na fu di wi no man frustan ala sani. Yob ben sabi dati. A ben gi grani na a Mekiman, di e sorgu taki a grontapu fu wi e anga na noti, èn taki wolku di lai nanga watra e anga na loktu (Yob 26:7-9). Ma Yob ben sabi taki den wondru disi ’na soso wan tu fu den sani di a Mekiman du’ (Yob 26:14). A no de fu taki dati Yob ben wani kon sabi moro fu a grontapu di a ben e libi na tapu. Èn David ben agri taki a no ben sabi ala sani. A ben skrifi: „A sabi disi dangra tumusi gi mi. A hei so te taki mi no man frustan en.”—Psalm 139:6.

Te sma e bribi na ini wan Mekiman, dan dati no wani taki dati den no abi fu ondrosuku sani moro fini. A no de fu taki dati ala ten wi o man tan ondrosuku sani di abi fu du nanga den sani di Gado meki, èn nanga Gado srefi. Wan koni kownu fu owruten ben taki nanga sakafasi: „Srefi ten di no skotu a poti na ini den ati, so taki libisma noiti no sa kon sabi a  wroko finifini di a tru Gado meki fu sensi a bigin te na a kaba.”—Preikiman 3:11.

Wi musu taki fu Gado soso te tra fasi no de fu fruklari wan sani?

Son sma feni taki te sabiman no man fruklari fa son sani du kon, dan sma e taki nomo taki na Gado meki den sani dati. Sobun, den sma disi e taki fu Gado soso te tra fasi no de fu fruklari sani. Ma san na a problema trutru? A de so taki wi no man fruklari fa den mekisani du kon? Nôno, a heri problema, na taki na evolutie-leri fu Darwin no tru kwetikweti. Na evolutie-leri no man sori sma fa a du kon taki someni difrenti libisani de na grontapu. Fu taki en leti, den sma di e bribi na ini na evolutie-leri, e gebroiki a leri disi fu fruklari fu san ede wi no man frustan fa den difrenti libisani na grontapu du kon.

Soleki fa Bijbel e sori, dan Gado no de wan sma di wi kan si leki a Mekiman soso te wi feni dati bun. Na presi fu dati, a fasi fa ala libisani meki, e sori taki na Gado meki den sani disi. A psalm skrifiman e sori krin taki na Yehovah meki ala sani. A e taki: „Yu na a sma fu pe ala libi e komoto, èn a leti fu yu e meki taki wi man si leti” (Psalm 36:9, Today’s English Version). Bijbel e sori finifini taki Gado na a Sma „di meki hemel nanga grontapu nanga a se nanga ala sani di de na den ini” (Tori fu den Apostel 4:24; 14:15; 17:24). Wan leriman fu a fosi yarihondro ben abi leti di a skrifi taki na Gado „meki ala sani”.—Efeisesma 3:9.

Boiti dati, Gado seti „den wet fu hemel” namku den wet di e tiri ala den stari nanga planeiti na hemel, èn sabiman e meki muiti ete fu kon frustan den wet disi dorodoro (Yob 38:33). Den sani di Gado meki, bun dorodoro, èn a meki den fu di a ben wani taki furu difrenti libisani ben musu libi na grontapu.

Wi musu gebroiki wi krin frustan

A lasti sani di wi sa luku now, na a frustan di wi leki libisma kisi fu poti prakseri na sani. Sabiman John Horgan ben taki san a ben feni fu den difrenti denki di sabiman abi fu sani. A e taki: „Te krinkrin buweisi no de gi wan sani, dan wi no musu syen fu gebroiki wi frustan.”

Sma abi leti fu taki dati den libisani na grontapu kon fu densrefi? Aladi furu sma e bribi na ini na evolutie-leri, toku furu sma di e denki bun fu sani, sosrefi sabiman, e bribi taki na wan koni Mekiman meki ala sani. Wan sabiman e taki dati furu sma e „bribi taki wan sma meki den sani na hemel nanga grontapu, èn aladi a e fruwondru fu a sani disi, toku a sabi taki den sma disi abi leti”. Fu san ede den sma disi e bribi dati? Furu sma no abi muiti fu bribi a sani di na apostel Paulus ben taki na ini Hebrewsma 3:4. Drape skrifi: „Ibri oso abi wan sma di bow en.” Baka dati Paulus e taki: „A sma di bow ala sani na Gado”, èn a no de fu taki dati a sani disi tru. Soleki fa Bijbel e sori, dan wan sma di e bribi taki na wan libisma meki wan oso, no kan feni taki wan cel di meki na wan koni fasi, kon fu ensrefi.

Luku san Bijbel e taki fu den wan di no wani bribi taki wan Mekiman de: „A sma sondro frustan taki na ini en ati: ’Nowan Yehovah no de’” (Psalm 14:1). Na ini a tekst disi, a psalm skrifiman e krutu den wan di no wani  bribi ete taki Gado na a Mekiman. Wan sma ben kan abi en eigi denki fu a tori disi, na presi taki a e meki den buweisi overtoigi en. Tra fasi leki den sma disi, wan sma di abi sakafasi èn di e gebroiki en frustan, e bribi taki wan Mekiman de.—Yesaya 45:18.

Furu sma di e poti prakseri na sani, e bribi na ini den buweisi di e sori taki wan Gran Mekiman de.

Yu kan kon sabi a Mekiman

Efu wi e bribi taki na wan sma meki wi, dan nanga sortu marki a du dati? San na a marki fu a libi? Den sani di sabiman kon sabi, no man gi wi krin piki tapu den aksi disi. Ma a de prenspari taki wi e kon sabi den tori disi krin. Bijbel kan de wan bigi yepi gi wi. Boiti taki a buku disi e sori taki Yehovah na a Mekiman, a e sori tu taki Gado meki ala sani nanga wan marki, èn taki a no e du sani fu soso. Den Buku fu Bijbel e sori san Gado o du gi libisma, èn a sani disi e gi libisma wan howpu gi a ten di e kon.

Ma suma na Yehovah? Sortu Gado na en? Yehovah Kotoigi e gi yu deki-ati fu kon sabi wi Koni Mekiman leki wan sma di abi firi. Yu kan kon sabi san a nen fu en wani taki, sortu fasi a abi, èn fa a e handri nanga libisma. Nanga yepi fu en Wortu, Bijbel, yu sa kon si fu san ede wi musu poti prakseri na den tumusi moi sani di a meki, èn fu san ede wi musu gi grani na en leki a Mekiman.—Psalm 86:12; Openbaring 4:11.

[Prenki na tapu bladzijde 4]

Michelangelo

[Prenki na tapu bladzijde 5]

Den sani di sabiman ondrosuku, e sori taki wan Mekiman de

[Prenki na tapu bladzijde 6]

Den difrenti sani di e libi na grontapu e sori taki wan koni sma meki den

[Prenki na tapu bladzijde 7]

A no kan taki sani kon de sondro taki wan sma meki den