„Ondrosuku mi, o Yehovah”

„YEHOVAH na a sma di e ondrosuku ati” (Odo 17:3). A sani disi musu de wan bigi trowstu gi wi alamala. Fu san ede? Fu di wi hemel Tata no de leki libisma di e krutu soso den sani di den man si, ma a „e si fa na ati de”.—1 Samuel 16:7.

Fu taki en leti, wi srefi no man sabi ala ten fa wi e firi dipi na ini wi ati. Fu san ede? Fu di na „ati e kori sma moro leki iniwan tra sani èn a pori srefisrefi. Suma kan sabi en?” We, Gado sabi na ati, fu di a e taki: „Mi, Yehovah, e ondrosuku na ati, èn mi e ondrosuku den niri” (Yeremia 17:9, 10). Yehovah sabi „na ati”, iya, a sabi fu san ede wi e tyari wisrefi na wan spesrutu fasi, èn a sabi „den niri” fu wi, noso fa wi e denki èn e firi trutru.

Fu san ede Kresten e kisi tesi?

A no e fruwondru wi taki Kownu David fu owruten ben taigi Gado: „Ondrosuku mi, o Yehovah, èn tesi mi; krin den niri fu mi èn na ati fu mi” (Psalm 26:2). A de so taki David noiti no ben taki noso ben du wan sani di Yehovah no feni bun? A de so taki a no ben o abi fu frede te Yehovah ben o ondrosuku en ati? Kwetikweti! David ben de wan sondu sma neleki wi, èn a no ben man hori ensrefi na den markitiki fu Gado ala ten. Fu di David ben abi swakifasi, meki a du wan tu seryusu sondu, ma toku a ’ben e waka nanga wan krin ati’ (1 Kownu 9:4). Fa so? Fu di a teki a piri-ai fu Yehovah, èn a tyari kenki kon na ini en libi. Na so fasi a sori taki a ben lobi Yehovah trutru. A ben e dini Gado nanga en heri ati.

Fa a de nanga wi na ini a ten disi? Yehovah sabi taki wi na sondusma èn taki wi kan taki èn du sani di a no feni bun. Aladi Gado man sabi na fesi fa a libi fu wi o waka, toku a e bosroiti fu no sabi dati. Di a meki wi, dan a gi wi a reti fu teki wi eigi bosroiti, èn a e lespeki a reti dati di a gi wi na wan lobi-ati fasi.

Ma toku, Yehovah e ondrosuku na ati fu wi son leisi, èn a e ondrosuku tu fu san ede wi e du spesrutu sani. A kan gi wi na okasi fu sori san de na ini wi ati trutru. A kan gi pasi tu taki wi e kon de na ini difrenti situwâsi, noso taki difrenti problema e miti wi, so taki wi kan sori san de na ini wi ati. Disi e gi wi na okasi fu sori Yehovah taki wi e dini en nanga wi heri ati. Te wi e kisi den sortu tesi disi, dan wi kan sori Yehovah o tranga a bribi fu wi de, iya, wi kan sori en taki wi ’lepi èn taki wi bun na ala fasi, èn taki wi no e mankeri noti’.—Yakobus 1:2-4.

Wan sma fu owruten e kisi tesi

Ala ten den futuboi fu Yehovah e kisi tesi di e gi den okasi fu sori o tranga a bribi fu den de èn efu den e dini Yehovah nanga wan krin ati. Luku a tori fu a famiri-edeman Abraham. „A tru Gado tesi Abraham” (Genesis 22:1). Di Gado taki den wortu disi, dan Abraham ben sori kaba taki a ben abi bribi na ini Gado. Furu yari na fesi, Yehovah ben aksi Abraham fu froisi gowe libi a gudu foto Ur makandra nanga en osofamiri, fu go na wan kondre di a no ben sabi (Genesis 11:31; Tori fu den Apostel 7:2-4). A kan taki Abraham ben abi en eigi oso na ini Ur, ma toku a no bai wan oso di a ben e libi someni yari langa na ini Kanan (Hebrewsma 11:9). Fu di Abraham ben gwenti fu hari go fu a wán presi go na a trawan, meki ten na ten en nanga en osofamiri no ben abi nofo nyanyan, èn grupu fufuruman nanga tiriman di no ben e anbegi Yehovah ben wani du den ogri. Aladi den sani  disi ben e miti Abraham, toku a ben abi wan tranga bribi.

Bakaten, Abraham kisi wan moro bigi tesi. Yehovah ben taigi en: ’Grantangi, teki Isak, a wan-enkri manpikin fu yu di yu lobi trutru. Èn yu musu gi en leki wan bron-ofrandi’ (Genesis 22:2). A lobi di Abraham ben abi gi Isak ben tranga srefisrefi. Isak ben de a wan-enkri pikin di en nanga en wefi Sara ben abi. Gado pramisi Abraham a manpikin disi, èn na a manpikin disi wawan ben kan meki taki den bakapikin fu en ben o kisi a kondre Kanan. Boiti dati, wán fu den bakapikin disi ben o tyari blesi kon gi furu trawan, soleki fa Gado ben pramisi. Fu taki en leti, na Isak ben de a manpikin di Abraham ben o kisi, èn di gebore na wan wondru fasi!—Genesis 15:2-4, 7.

A no de fu taki dati Abraham no ben man frustan srefisrefi fu san ede Yehovah ben gi en a komando disi. A de so taki Yehovah ben wani Abraham fu tyari wan libisma leki ofrandi? Fu san ede a ben meki Abraham ondrofeni a bigi prisiri fu kisi wan manpikin tapu en owrudei, soso fu aksi en fu tyari a srefi manpikin leki wan ofrandi gi en? *

Aladi Abraham no ben sabi fu san ede Yehovah ben wani en fu kiri Isak, toku, a no draidrai fu gi yesi. Den waka dri dei langa fosi den doro na a bergi pe a ben musu go. Drape a bow wan altari èn a poti bron-udu na tapu. Now a momenti ben doro gi Abraham fu sori o tranga a bribi fu en ben de. Abraham teki a nefi, ma di a ben de fu kiri en manpikin, Yehovah meki wan engel tapu en, èn A taki: „Now mi sabi taki yu na wan sma di e frede Gado, fu di yu ben de klariklari fu gi mi yu wan-enkri manpikin” (Genesis 22:3, 11, 12). Den wortu dati ben musu fu de wan bigi trowstu gi Abraham! Abraham trutru ben abi wan tranga bribi, soleki fa Yehovah ben si kaba na fesi (Genesis 15:5, 6). Baka dati, Abraham srakti wan manskapu na presi fu Isak. Ne, Yehovah memre Abraham na a frubontu di ben abi fu du nanga wan bakapikin fu en. Wi kan frustan taki Abraham ben tron Yehovah en mati.—Genesis 22:13-18; Yakobus 2:21-23.

 A bribi fu wi e kisi tesi tu

Wi alamala sabi taki wi leki futuboi fu Gado no man wai pasi gi tesi. Ma furu fu den tesi di wi e kisi, no e kon fu di Yehovah e taigi wi fu du spesrutu sani, ma fu di A e gi pasi taki spesrutu sani e miti wi.

Na apostel Paulus ben skrifi: „Ala den wan di wani dini Gado na wan getrow fasi èn di de wán nanga Krestes Yesus, sa kisi frufolgu tu” (2 Timoteyus 3:12). A kan taki den sma di e frufolgu wi, na pikin na skoro, mati, famiriman, birtisma, noso tiriman di e bribi lei di sma fruteri fu wi. A kan taki den sma disi e kosi wi, kande den e fon wi, noso kande den e meki en muilek gi wi fu feni wroko fu man sorgu wisrefi. Tru Kresten e kisi fu du tu nanga problema di e miti ala sma. Dati na problema soleki siki, sani di no e waka soleki fa wi ben fruwakti, nanga kruktudu. Ala den sani disi e tesi a bribi fu wi.

Na apostel Petrus ben sori fu san ede a bun taki a bribi fu wi e kisi tesi: „Unu de nanga sari fu wan syatu pisi ten fu di unu kisi difrenti tesi, so taki a bribi fu unu di kisi tesi sa meki unu kisi prèise èn sosrefi glori nanga grani te Yesus Krestes o sori ensrefi; so wan bribi warti moro gowtu di e lasi gowe aladi faya meki a kon soifri” (1 Petrus 1:6, 7). Iya, Petrus e agersi den tesi di wi e kisi, nanga a bron di sma e bron gowtu nanga faya, fu meki a kon soifri. Den e du disi fu puru a doti na ini a gowtu, so taki soso a soifri gowtu e tan abra. Na wan srefi sortu sani e pasa nanga a bribi fu wi te wi e kisi tesi.

Fu eksempre, sma kan kisi problema fu di wan ongoloku noso wan rampu pasa. Toku den sma di abi trutru bribi, no e broko den ede tumusi. Den e feni trowstu, fu di den e poti bribi na ini a dyaranti disi di Yehovah gi libisma: „Mi no sa libi yu kwetikweti èn noiti mi no sa gowe fu yu” (Hebrewsma 13:5). Den e tan poti na anbegi fu den na a fosi presi na ini den libi, èn den abi a frutrow taki Yehovah Gado sa blesi den te den e du muiti fu kon abi den sani di den abi fanowdu trutru. A bribi fu den e yepi den fu horidoro na ini muilek ten èn a e sorgu taki den no e broko den ede tumusi, so taki a situwâsi di den de na ini no e kon moro muilek.

Fu di wi sabi taki tesi kan tyari kon na krin sortu swakifasi wi abi, meki wi musu tyari kenki kon, èn a sani dati sa tyari wini kon gi wi. A bun te wan sma e aksi ensrefi: ’Fa mi kan tranga a bribi fu mi? Mi musu teki moro ten fu studeri Gado Wortu seryusu èn fu denki dipi fu den sani di mi e leri? Mi teki na okasi fu go na ala den konmakandra fu de makandra nanga den brada nanga sisa fu mi? Mi e frutrow tapu misrefi, na presi fu begi Yehovah Gado fu taigi en sortu broko-ede mi abi?’ Ma moro sani de ete di wi musu du.

Fu man tranga a bribi fu wi, a kan de fanowdu fu poti moro prakseri na den sani di abi fu du nanga na anbegi fu wi, iya wi musu „kweki wan lostu gi a soifri merki di de na ini a wortu fu Gado” (1 Petrus 2:2; Hebrewsma 5:12-14). Wi musu pruberi fu de leki a man di a psalm skrifiman ben taki fu en: „A sani di e gi en prisiri, na a wet fu Yehovah, èn na ini a wet dati a e leisi nanga wan safri sten dei nanga neti.”—Psalm 1:2.

Disi wani taki dati wi musu du moro, leki fu leisi Bijbel nomo. A de prenspari taki wi e poti prakseri na den sani di Gado Wortu e leri wi, èn wi musu du san wi e leri (Yakobus 1:22-25). Te wi e du dati, dan a lobi di wi abi gi Gado sa kon moro tranga, wi sa man taigi en moro krin  san de na tapu wi ati, èn a bribi fu wi sa kon moro tranga.

Wi e kisi wini te a bribi fu wi kisi tesi

Te wi e frustan taki wi musu abi wan tranga bribi efu wi wani taki Gado feni wi bun, dan a sani dati sa gi wi deki-ati fu tranga a bribi fu wi. Bijbel e memre wi: „Sondro bribi wan sma no kan prisiri Gado, bika a sma di e anbegi Gado musu bribi taki a de trutru èn taki a sa pai den sma di e suku en fayafaya” (Hebrewsma 11:6). Dati meki wi musu de leki a man di ben begi Yesus: „Yepi mi efu mi e mankeri bribi!”—Markus 9:24.

Te a bribi fu wi e kisi tesi, dan dati kan gi trawan deki-ati tu. Fu eksempre, te wan lobiwan fu wi dede, dan a tranga bribi di wi leki Kresten abi na ini na opobaka, kan trowstu wi. Wi e sari, ma wi „no e sari neleki fa tra sma e sari fu di den no abi wan howpu” (1 Tesalonikasma 4:13, 14). Te tra sma e si fa a bribi fu wi e gi wi deki-ati, dan den kan kon frustan taki wi leki Kresten abi wan trutru warti sani. Disi kan meki taki den sa wani abi a srefi bribi leki wi, èn den sa wani studeri Gado Wortu fu tron disipel fu Yesus Krestes te fu kaba.

Yehovah sabi taki wan bribi di kisi tesi, na wan tumusi warti sani fu abi. Boiti dati, den tesi di wi e kisi e yepi wi fu kon si efu trutru a bribi fu wi e yepi wi fu horidoro. Te wi e kisi tesi, dan wi kan kon sabi tu sortu swakifasi wi abi so taki wi kan sabi moro bun sortu kenki wi musu tyari kon. Te fu kaba, wi kan yepi trawan fu tron disipel fu Yesus te wi e horidoro aladi wi e kisi tesi. Sobun, meki wi du ala san wi man fu tan abi wan tranga bribi, so taki baka te a kisi a wán tesi baka a trawan, wi sa de sma di e „kisi prèise èn sosrefi glori nanga grani te Yesus Krestes o sori ensrefi”.—1 Petrus 1:7.

[Futuwortu]

[Prenki na tapu bladzijde 13]

Den sani di Abraham du fu di a ben abi bribi, meki taki a tron wan mati fu Yehovah

[Prenki na tapu bladzijde 15]

Te wi e kisi tesi, dan a bribi fu wi sa yepi wi fu horidoro

[Sma di abi a reti fu a prenki na tapu bladzijde 12]

From the Illustrated Edition of the Holy Scriptures, by Cassell, Petter, & Galpin