Sma na ini Pikin Asia e teki a Kresten bribi
Sma na ini Pikin Asia e teki a Kresten bribi
NA INI a fosi yarihondro, moro nanga moro sma ben e tron memre fu den Kresten gemeente na ini Pikin Asia (a moro bigi pisi fu Torkukondre fu a ten disi). Furu Dyu nanga tra sma ben e teki a Kresten bribi. Wan Bijbel wortubuku e taki: „Boiti Siria-Palestina, Pikin Asia ben de wán fu den fosi presi pe furu sma teki a Kresten bribi.”
Te wi e luku den sani di skrifi na ini Bijbel, èn den sani di tra historia skrifiman skrifi, dan wi e kon frustan moro bun fa a du kon taki furu sma fu a kontren dati teki a Kresten bribi. Meki wi luku san wi kan leri fu den tori dati.
Den fosi Kresten na ini Pikin Asia
Tapu a Pinksterfesa fu a yari 33, wan grupu sma di ben e taki difrenti tongo ben kon makandra na ini Yerusalem. Den sma disi ben de Dyu di ben e libi na ini den kondre lontu Palestina, èn sosrefi Dyu di ben teki a Kresten bribi. Na a prenspari konmakandra disi, sma fu Pikin Asia kon sabi a Kresten bribi fu a fosi leisi. Den apostel fu Yesus ben preiki a bun nyunsu gi den sma disi. Bijbel e taki dati sma ben kon fu kontren soleki Kapadosia, Pontus, a distrikt Asia, * Frigia, nanga Pamfilia. Ala den kondre disi ben de na ini Pikin Asia. Sowan dri dusun sma di ben yere a bun nyunsu, teki a Kresten bribi, èn den teki dopu. Di den drai go baka na a kondre fu den, dan den meki den sma drape kon sabi a nyun bribi fu den.—Tori fu den Apostel 2:5-11, 41.
Te wi e luku san Bijbel e taki fu a pisi ten di Paulus go preiki leki zendeling na ini Pikin Asia, dan wi e kon sabi moro fini fa den sma na ini a kontren dati kon sabi a Kresten bribi. Di Paulus go drape a fosi leisi, na a ten fu 47/48 G.T., dan en nanga den Kresten brada fu en teki boto na Siprus fu go na Pikin Asia. Den doro na a foto Perga na ini Pamfilia. Na ini a foto Antiokia na ini Pisidia, furu sma gi yesi na a boskopu fu den. A sani disi meki taki den Dyu drape kon dyarusu, èn den gens Paulus. Di Paulus hari go na a zuid-owstusei fu doro na Ikonium, dan tra Dyu drape suku fu du ogri nanga den zendeling. Den sma di ben e libi krosibei fu Listra, ben e bribi sani esi-esi, èn den bigin taki dati Paulus na wan gado. Ma di Dyu fu Antiokia nanga Ikonium doro drape, dan den bigin gens den zendeling. A sani disi meki taki den sma drape bigin fringi ston na tapu Paulus, èn den libi en fu a dede! Baka di a sani disi miti den brada, dan Paulus nanga Barnabas hari go moro fara na Derbe di ben de na ini Galasia, wan politiek distrikt fu Rome. Den sma fu a kontren drape ben e taki Likaoniatongo. Den brada seti gemeente drape, èn den poti brada leki owruman. Yu kan frustan taki sowan 15 yari baka a Pinksterfesa fu a yari 33, bun furu sma na ini Pikin Asia ben kon abi a Kresten bribi.—Tori fu den Apostel 13:13–14:26.
Na a ten fu 49 te go miti 52 G.T., Paulus go preiki leki zendeling fu a di fu tu leisi na farawe kontren. Disi leisi Paulus nanga den tra brada di ben de nanga en, waka go na Listra, èn a ben musu fu de so taki den pasa na ini a foto Tarsus na ini Silisia, a kontren pe a ben e tan. Baka di den go luku den brada baka na ini Listra, dan den hari go na a noordsei. Paulus ben wani „preiki a wortu” na ini den distrikt Bitinia nanga Asia. Ma a santa yeye tapu en fu du dati. Den ben musu preiki a bun nyunsu na wan tra ten na ini den kontren dati. Gado meki Paulus go na den kontren na a noord-westsei fu Pikin Asia te go miti Troas di ben de na a sesyoro. Bakaten, Paulus kisi wan fisyun pe Gado sori en taki a ben musu go preiki a bun nyunsu na ini Europa.—Tori fu den Apostel 16:1-12; 22:3.
Na a ten fu 52 te go miti 56 G.T., Paulus teki waka fu go preiki leki zendeling fu a di fu dri leisi. Disi leisi a go baka na Pikin Asia, èn a doro na ini Efeise, wan prenspari foto na a se syoro fu Asia. Paulus go kaba na Efeise, di a ben e drai go baka na oso, na a di fu tu leisi di a ben go preiki leki zendeling. Wan grupu Kresten ben e preiki na ini a foto dati, èn Paulus nanga den tra brada di ben de nanga en, wroko makandra nanga den brada disi pikinmoro dri yari langa. Na a ten dati difrenti problema miti den èn sma ben wani du den ogri tu. Wan leisi wan tu solfrusmeti fu Efeise meki opruru. Den man disi no ben wani taki a bun nyunsu pori a bisnis fu den, fu di den ben e meki furu moni nanga den sani di den ben e meki gi falsi anbegi.—Tori fu den Apostel 18:19-26; 19:1, 8-41; 20:31.
A zendelingwroko di den brada ben e du na ini Efeise, meki taki furu sma teki a Kresten bribi. Tori fu den Apostel 19:10 e taki: „Ala den sma di ben tan na ini a distrikt Asia, namku Dyu nanga Grikisma, kon yere a wortu fu Masra.”
A wroko e go na fesi na ini Pikin Asia
Di a ten ben e doro gi Paulus fu komoto na ini Efeise, dan a skrifi wan brifi gi den Korentesma. Na ini a brifi disi a taki: „Den gemeente fu Asia e seni taki unu odi” (1 Korentesma 16:19). Sortu gemeente Paulus ben abi na prakseri? A kan taki a ben taki fu den gemeente na ini Kolose, Laodisea, nanga Hièrapolis (Kolosesma 4:12-16). Wan buku e taki: „A no de fu taki dati den gemeente na ini Smirna, Pergamum, Sardes, nanga Filadelfia ben seti fu di Paulus ben preiki leki zendeling na ini Efeise. . . . Ala den gemeente disi ben de sowan 192 kilometer moro fara fu Efeise, èn den pasi di ben e go na den gemeente disi ben bun srefisrefi” (Paul—His Story).
Sobun, sowan 20 yari baka a Pinksterfesa fu 33 G.T., wan tu Kresten gemeente ben de na a zuidsei èn na a west-sei fu Pikin Asia. Fa a ben de nanga a kontren fu Pikin Asia?
Gemeente di kisi brifi fu Petrus
Bakaten, na a pisi ten fu 62 G.T. te go miti 64 G.T., na apostel Petrus skrifi en fosi brifi nanga yepi fu santa yeye. A skrifi en gi den Kresten na ini Pontus, Galasia, Kapadosia, Asia, nanga Bitinia. Den brifi fu Petrus e sori taki a ben musu fu de so taki Kresten gemeente ben de na ini den kontren disi, fu di a gi den owruman fu den gemeente disi a rai fu „luku den skapu”. O ten den gemeente disi ben seti?—1 Petrus 1:1; 5:1-3.
Paulus ben preiki a bun nyunsu na ini sonwan fu den kontren pe den gemeente ben de di ben kisi den brifi fu Petrus. Ma a no ben go preiki na Kapadosia nanga Bitinia. Bijbel no e taki fa den sma fu den kontren dati kon sabi a Kresten bribi, ma a kan taki den ben kon sabi dati nanga yepi fu den Dyu nanga den tra sma di ben de na a Pinksterfesa di ben hori na ini Yerusalem na a yari 33. Awinsi fa a no fa, di Petrus ben skrifi den brifi fu en, sowan 30 yari baka a Pinksterfesa, gemeente ben de „na ala sei fu Pikin Asia”, soleki fa wan sabiman e taki.
Den seibi gemeente fu a buku Openbaring
Di den Dyu opo densrefi teige den Romesma, dan a sani dati meki taki Yerusalem kisi pori na ini a yari 70. A kan taki sonwan fu den Kresten fu Yudea froisi go tan na Pikin Asia. *
Na a kaba fu a fosi yarihondro, Yesus Krestes meki na apostel Yohanes skrifi brifi gi den seibi gemeente na ini Pikin Asia. Den brifi disi di ben de gi den gemeente na ini Efeise, Smirna, Pergamum, Tiatira, Sardes, Filadelfia, nanga Laodisea, e sori taki difrenti sani ben e pasa na ini den gemeente disi di ben kan pori a bribi fu den brada nanga sisa. Sma ben e du hurudu, den ben e tyari pratifasi kon na ini a gemeente, èn den ben e kon nanga falsi leri.—Openbaring 1:9, 11; 2:14, 15, 20.
Den e dini Gado nanga sakafasi èn nanga den heri sili
A de krin taki a buku Tori fu den Apostel, no e taki fu ala den brada nanga sisa di meki muiti fu meki sma kon sabi a Kresten bribi. A buku disi e taki fu a wroko di Petrus nanga Paulus ben du, ma furu tra disipel ben e preiki tu na tra presi. A wroko di ben e go na fesi na ini Pikin Asia, e sori taki den fosi Kresten ben gi yesi na a komando di Yesus ben gi den. Yesus ben taki: „Fu dati ede, go na sma fu ala kondre èn meki den tron disipel.”—Mateyus 28:19, 20.
Na ini a ten disi, a de so tu taki wi sabi pikinso nomo fu a wroko di Yehovah Kotoigi e du na wan getrow fasi na heri grontapu. Neleki fa a ben de nanga furu fu den getrow preikiman na ini Pikin Asia na ini a fosi yarihondro, na so wi no sabi furu fu den brada nanga sisa na ini a ten disi di e preiki a bun nyunsu. Ma toku den e du furu bun sani, èn den de koloku trutru fu di den sabi taki den e meki muiti fu kibri a libi fu trawan, soleki fa Gado wani den fu du.—1 Timoteyus 2:3-6.
[Futuwortu]
^ paragraaf 5 Na ini den Kresten Griki Buku fu Bijbel, èn na ini na artikel disi, a wortu „Asia” no abi fu du nanga a pisi fu grontapu di nen Asia, ma nanga a distrikt na a west-sei fu Pikin Asia, di Rome ben e tiri.
^ paragraaf 17 A historia skrifiman Eusebius (260-340 G.T.) e taki dati wan pisi ten bifo a yari 66, den „apostel ben musu komoto na ini Yudea fu di doronomo sma ben e suku fu kiri den. Ma den apostel ben e go na ala kondre fu leri sma a bun nyunsu, aladi Krestes ben e horibaka gi den.”
[Faki na tapu bladzijde 11]
SMA FU BITINIA NANGA PONTUS E KON SABI A KRESTEN BRIBI FU A FOSI LEISI
Den tu foto Bitinia nanga Pontus ben de na a syoro fu a Blaka Se na ini Pikin Asia. Plinius a Yonguwan, wan lantiman di ben e wroko gi Trayanus, a Kèiser fu Rome, ben skrifi furu sani di ben abi fu du nanga na aladei libi fu den sma na ini a distrikt disi.
Sowan 50 yari baka di Petrus ben seni den brifi fu en go na den gemeente na ini a kontren disi, dan Plinius aksi Trayanus fu taigi en san a musu du nanga den Kresten. Plinius ben skrifi: „Noiti mi kisi na okasi fu go luku fa den Kresten e kisi krutu. Fu dati ede, mi no sabi fa fu strafu den. Sma e tyari bun furu owruwan nanga yonguwan, guduwan nanga pôtiwan, man nanga uma, go na krutu èn a gersi leki a sani disi no o kaba. Den sma fu a tegu sekte disi no de fu feni na ini den foto wawan, ma sosrefi na ini den dorpu èn na den boitipresi.”
[Karta na tapu bladzijde 9]
(Efu yu wani si pe den sani disi skrifi, luku a tijdschrift)
PRESI PE PAULUS GO PREIKI
A fosi leisi
SIPRUS
PAMFILIA
Perga
Antiokia (fu Pisidia)
Ikonium
Listra
Derbe
A di fu tu leisi
SILISIA
Tarsus
Derbe
Listra
Ikonium
Antiokia (fu Pisidia)
FRIGIA
GALASIA
Troas
A di fu dri leisi
SILISIA
Tarsus
Derbe
Listra
Ikonium
Antiokia (fu Pisidia)
Efeise
ASIA
Troas
[Den seibi gemeente]
Pergamum
Tiatira
Sardes
Smirna
Efeise
Filadelfia
Laodisea
Tra presi
Hièrapolis
Kolose
LISIA
BITINIA
PONTUS
KAPADOSIA
[Prenki na tapu bladzijde 9]
Antiokia
[Prenki na tapu bladzijde 9]
Troas
[Sma di abi a reti fu den prenki]
© 2003 BiblePlaces.com
[Prenki na tapu bladzijde 10]
Komedi-oso na ini Efeise. —Tori fu den Apostel 19:29
[Prenki na tapu bladzijde 10]
A futu fu na altari fu Zeus na ini Pergamum. Den Kresten na ini a foto dati ben e libi ’pe a kownusturu fu Satan ben de’.—Openbaring 2:13
[Sma di abi a reti fu den prenki]
Pictorial Archive (Near Eastern History) Est.