Yehovah lobi retidu
Yehovah lobi retidu
„Mi, Yehovah, lobi retidu.”—YESAYA 61:8.
1, 2. (a) O ten wi kan taki dati wan sma e du san reti, èn o ten wi kan taki dati wan sma no e du san reti? (b) San Bijbel e taki fu a retidu fu Yehovah?
SOLEKI fa a sori, dan ’wan sma di e du san reti, na wan sma di no e teki sma sei, a de opregti, èn a e du san fiti èn san bun’. Wan sma di no e du san reti, no de opregti, a e denki takru fu trawan aladi a no sabi den bun, a e du ogri, èn a e du hati sani nanga trawan.
2 Pikinmoro 3500 yari pasa, Moses ben skrifi disi fu Yehovah, a Moro Hei Tiriman: „A e du ala sani na wan reti fasi. Wan Gado fu getrowfasi, di no e du kruktudu” (Deuteronomium 32:4). Moro leki seibi hondro yari bakaten, Gado meki Yesaya skrifi den wortu disi: „Mi, Yehovah, lobi retidu” (Yesaya 61:8). Èn na ini a fosi yarihondro, Paulus ben taki: „Wi kan taki dati Gado no de regtfardiki? Dati no kan kwetikweti!” (Romesma 9:14). Na ini a srefi yarihondro dati, Petrus ben taki: „Gado no lobi a wan sma moro a trawan, ma awansi fu sortu kondre wan sma de, efu a e du san de regtfardiki èn a e frede Gado, dan Gado feni a sma dati bun” (Tori fu den Apostel 10:34, 35). Iya, „Yehovah lobi retidu”.—Psalm 37:28; Maleaki 3:6.
Furu sma no e du san reti
3. Fa a du kon taki sma no e du san reti?
3 Na ini a ten disi, furu sma no e du san reti. Sma kan handri takru nanga wi na ala presi. A sani disi kan miti wi na wi wrokope, na skoro, na lantikantoro, èn na tra presi. Iya, srefi wi eigi famiriman kan handri takru nanga wi. A no de fu taki dati den sani disi a no fu tide. Den sani disi bigin di Satan Didibri, na ogri yeye di ben opo ensrefi teige Gado, gi wi fosi papa nanga mama deki-ati fu opo densrefi teige Gado. Yehovah ben gi Adam, Eva, nanga Satan a reti fu teki den eigi bosroiti, ma a no de fu taki dati a fasi fa den gebroiki a reti dati, no ben fiti. Fu di den trangayesi Gado, meki a heri libisma famiri e pina srefisrefi, èn den e dede te fu kaba.—Genesis 3:1-6; Romesma 5:12; Hebrewsma 2:14.
4. O langa kaba libisma e du sani di no reti?
4 Pikinmoro 6000 yari pasa sensi den fosi sma opo densrefi teige Gado na ini Eden, ma te now ete libisma no e du san reti. A sani disi no e fruwondru wi, fu di Satan na a gado fu a grontapu disi (2 Korentesma 4:4). Satan na wan leiman èn a tata fu lei, a e fruteri ogri-ati lei fu Yehovah èn a e gens En (Yohanes 8:44). Ala ten Satan du sani di no reti srefisrefi. Fu eksempre, bifo a Frudu fu a ten fu Noa, Satan ben meki tu taki a situwâsi na grontapu ben ogri srefisrefi. Dati meki Gado kon si taki „libisma ben e du bun furu ogri sani na grontapu èn taki doronomo den ben e prakseri soso ogri” (Genesis 6:5). Na a ten fu Yesus, a situwâsi ben de a srefi. Yesus ben taki: „Ibri dei abi nofo fu en eigi ogri”, noso en eigi problema, èn wán fu den problema disi na taki sma e du ogri nanga trawan (Mateyus 6:34). Bijbel e taki krin: „Ala den sani di Gado meki, e tan geme èn te now ete den alamala abi pen.”—Romesma 8:22.
5. Fu san ede moro nanga moro sma na ini a ten disi no e du san reti?
5 Soleki fa wi si, dan na ini den hondrohondro yari di pasa, sma du bun furu sani di no reti. Now sani kon moro ogri srefi. Fu san ede? Fu di wi e libi furu tenti yari kaba na ini den „lasti dei” fu na ogri sistema disi di e kon na wan kaba, èn den dei disi ben o ’de muilek ten di tranga fu pasa’. Bijbel ben taki dati na ini a ten disi sma ben o „lobi densrefi nomo, den sa lobi moni, den sa denki tumusi furu fu densrefi, den sa abi heimemre, den sa taki ogri fu trawan, . . . den no sa de nanga tangi, den no sa de loyaal; den no sa lobi trawan, den no sa wani meki kruderi, den sa de sma di e fruteri ogri-ati lei fu trawan, den no sa man dwengi densrefi, den sa du sani nanga trawan na wan ogri-ati fasi, den no sa lobi san bun; den sa de sma di e tori trawan, den sa du san densrefi wani, den sa abi bigimemre” (2 Timoteyus 3:1-5). Nofo tron na den takru fasi disi e meki taki sma no e du san reti.
6, 7. Sortu bigi ogri pasa nanga libisma na ini a ten disi?
6 Na ini den hondrohondro yari di pasa, sma na heri grontapu du bun furu sani di no reti. Noiti ete so furu orloku ben de. Fu eksempre, wan tu historia skrifiman e taki dati na ini a di fu Tu Grontapufeti wawan, sowan 50 te go miti 60 milyun sma lasi den libi, èn bun furu fu den sma disi na mansma, umasma, nanga pikin di no ben abi noti fu du nanga a feti. Baka di a feti dati kaba, milyunmilyun tra sma lasi den libi na ini difrenti pikin feti, èn bun furu fu den sma disi ben abi noti fu du tu nanga den feti disi. Satan e meki sma du den takru sani disi fu di a abi bigi atibron, èn fu di a sabi taki heri esi Yehovah sa pori en krinkrin. Bijbel e taki: „Didibri saka kon na unu èn a abi bigi atibron fu di a sabi taki en ten syatu.”—Openbaring 12:12.
7 Den legre fu den difrenti kondre e gebroiki pikinmoro wán bilyun Amerkan dala ibri yari fu pai gi orloku. Te yu e luku taki hondrohondro milyun sma no abi den sani di de fanowdu fu man tan na libi, dan a no de fu taki dati sma ben o man du furu bun sani nanga a moni dati. Pikinmoro wán milyard sma no abi nofo nyanyan, aladi trawan abi bogobogo. Wan organisâsi e taki dati pikinmoro feifi milyun pikin e dede fu angri ibri yari. A sani disi no bun srefisrefi! Prakseri sosrefi den someni beibi di e dede fu di sma e puru bere. Sma e denki taki na sowan 40 te go miti 60 milyun fu den beibi disi e dede ibri yari! Dati na wan bigi ogri trutru!
8. Suma wawan kan tyari trutru retidu kon gi libisma?
8 Tiriman no sabi fa den musu lusu den bigi problema di e miti libisma na ini a ten disi. Èn libisma no o man tyari wan kenki kon na ini a situwâsi disi. Gado Wortu ben taki dati na ini a ten disi „ogri sma nanga bedrigiman o kon ogri moro nanga moro; den o kori trawan èn trawan o kori den” (2 Timoteyus 3:13). So furu ogri e pasa na ini a ten disi, taki sma no man tyari wan kenki kon na ini a situwâsi disi. Na a Gado fu retidu wawan kan du dati. Na en wawan kan pori Satan, den ogri yeye, nanga den ogri-atisma.—Yeremia 10:23, 24.
Sma abi leti fu broko den ede
9, 10. Fu san ede Asaf lasi-ati?
9 Na ini a ten di pasa, srefi wan tu fu den Bijbel skrifiman ben e aksi densrefi fu san ede Gado no ben tyari wan kenki kon na ini a situwâsi na grontapu, so taki retidu nanga regtfardikifasi ben kan de na grontapu. Fu eksempre, luku a tori fu wan man di ben e libi na ini a ten di sma skrifi Bijbel. Na tapusei fu Psalm 73 a nen fu Asaf skrifi, èn kande a nen disi abi fu du nanga wan prenspari Leifisma di ben de wan pokuman na a ten di David ben de kownu. A kan tu taki a nen disi abi fu du nanga den pokuman fu na oso fu Asaf. Asaf nanga den bakapikin fu en skrifi furu poku di sma ben e singi te den ben e teki prati na a anbegi fu den. Ma toku a psalm skrifiman kon lasi-ati. A ben si fa den ogrisma ben gudu, èn fa nofo tron a ben gersi leki sani ben e waka bun gi den. Iya, a ben e gersi leki den no ben abi nowan enkri problema.
10 Bijbel e taki: „Mi ben e dyarusu tapu den sma di e meki bigi, te mi ben e si a vrede fu den ogrisma. Fu di den e dede sondro taki den e nyan pina; èn den fatu. Den no abi den problema di tra libisma abi, èn den no e kisi den tesi di tra libisma e kisi” (Psalm 73:2-8). Ma baka wan pisi ten, a Bijbel skrifiman disi kon si taki a no bun fu denki so (Psalm 73:15, 16). A psalm skrifiman pruberi fu si sani tra fasi, ma a no ben man frustan krin fu san ede den ogrisma no e kisi strafu gi den ogri di den e du, aladi reti-atisma e pina nofo tron.
11. San a psalm skrifiman, Asaf kon frustan?
11 Te fu kaba, a getrow man dati kon frustan san ben o pasa nanga den ogrisma. A kon sabi taki Yehovah ben o tyari wan kenki kon te fu kaba (Psalm 73:17-19). David ben skrifi: „Howpu tapu Yehovah èn hori a pasi fu en, èn en sa hei yu so taki yu kan kisi grontapu. Te den sa koti na ogriwan puru, dan yu sa si disi.”—Psalm 37:9, 11, 34.
12. San Yehovah o du nanga den ogrisma èn nanga den wan di e du takru sani nanga trawan? (b) Fa yu feni en taki Yehovah o tyari wan kaba kon na den takru sani di e pasa na grontapu?
12 A no de fu taki dati Yehovah abi en eigi ten te a sa pori den ogrisma èn den wan di e du takru sani nanga trawan. Disi na wan sani di getrow Kresten srefi musu tan hori na prakseri. Yehovah o pori den wan di no e du a wani fu en, èn a sa blesi den wan di e gi yesi na en. „En eigi ai e si, èn eigi ai di e brenki e ondrosuku den manpikin fu libisma. Yehovah srefi e ondrosuku a regtfardikisma, sosrefi a sma di e du ogri, èn En sili kwetikweti no lobi wan sma di lobi fu du ogri-ati sani. A sa meki trapu, faya, swarfu, nanga wan tranga winti fadon leki alen tapu den ogrisma . . . Bika Yehovah de regtfardiki; a lobi te sma e du sani na wan regtfardiki fasi.”—Psalm 11:4-7.
Wan nyun grontapu pe retidu sa de
13, 14. Fu san ede soso regtfardikifasi nanga retidu sa de na ini a nyun grontapu?
13 Te Yehovah sa pori a kruka sistema disi di Satan e tiri, dan grontapu sa kon tron wan tumusi moi presi. A hemel Kownukondre fu Gado sa tiri a grontapu disi, èn Yesus ben leri den bakaman fu en fu begi gi a Kownukondre disi. Sma no sa du ogri, ma den sa du regtfardiki sani, den no sa handri takru nanga trawan, ma den sa du san reti. Na a ten dati, a begi na ini Mateyus 6:10 sa kisi piki dorodoro. Drape skrifi: „Meki yu kownukondre kon. Meki yu wani pasa na grontapu soleki fa a e pasa na hemel.”
14 Bijbel e sori taki a tiri di wi sa kisi, o de wan tiri di ala reti-atisma na ini a ten disi e angri fu kisi. Na a ten dati Psalm 145:16 sa kon tru dorodoro. A tekst disi e taki: „Yu [Yehovah Gado] e opo yu anu èn e gi ala libisani den sani di den e angri fu kisi.” Boiti dati, Yesaya 32:1 e taki: „Luku! Wan kownu [Krestes Yesus na ini hemel] sa tiri na ini trutru regtfardikifasi; èn den granman [den wan di e teki presi gi Krestes na grontapu] sa tiri leki granman fu trutru retidu.” Disi na san Yesaya 9:7 e taki fu a Kownu Yesus Krestes: „A sa abi bun furu makti leki Granman, èn vrede sa de pasa marki te a sa sidon na tapu a kownusturu fu David, èn te a sa tiri a kownukondre fu en; a sa seti en steifi èn a sa horibaka gi en nanga retidu èn nanga yepi fu regtfardikifasi, bigin fu now èn te ten di no skotu. Iya, a faya fu Yehovah fu den legre sa du disi.” Yu kan si den blesi kaba di a regtfardiki Kownukondre dati sa tyari kon gi yu?
15. San Yehovah o du gi libisma na ini a nyun grontapu?
15 Na ini a nyun grontapu fu Gado, wi no sa abi fu taki den wortu moro di skrifi na Preikiman 4:1. A tekst disi e taki: „Mi fu mi sei ben drai fu luku ala den sani di sma e du na ondro a son fu kwinsi tra sma, èn, luku, den watra-ai fu den wan di e kisi kwinsi, ma den no ben abi nowan sma fu trowstu den; èn den wan di e kwinsi den abi makti, so taki den no ben abi nowan sma fu trowstu den.” A no de fu taki dati wi leki onvolmaakti libisma, no man frustan krin o moi a regtfardiki nyun grontapu dati sa de. Ogridu no sa de moro, ma na presi fu dati, sma sa du bun sani ibri dei. Iya, Yehovah sa tyari wan kaba kon na ala sani di no bun, èn a sa du dati na wan fasi di wi no man frustan kwetikweti. Fu dati ede, a fiti taki na apostel Petrus ben skrifi nanga yepi fu santa yeye: „Wi e fruwakti nyun hemel nanga wan nyun grontapu, soleki fa a ben pramisi, èn drape regtfardikifasi o tan”!—2 Petrus 3:13.
16. Fa den „nyun hemel” seti, èn sortu sani e pasa na ini a ten disi fu seti a „nyun grontapu”?
16 Iya, den „nyun hemel”, namku a hemel tirimakti fu Gado di abi Krestes leki kownu, seti kaba. A „nyun grontapu”, namku den reti-atisma di sa libi na ini a nyun grontapu, e kon makandra kaba na ini den lasti dei disi. Nownowde a nomru fu den sma disi doro pikinmoro seibi milyun kaba, den de na ini sowan 235 kondre, èn den e kon makandra na ini pikinmoro 100.000 gemeente. Den milyunmilyun sma disi e leri den regtfardiki èn reti fasi fu Yehovah, èn leki bakapisi fu dati, a Kresten lobi di den abi gi makandra, e meki taki den de na ini wánfasi, aladi den e libi na ini difrenti kondre na heri grontapu. Noiti ete a wánfasi disi ben de na grontapu, èn Satan nanga den bakaman fu en noiti no abi na wánfasi disi. A lobi nanga a wánfasi disi e sori o switi a sa de na ini a nyun grontapu fu Gado, pe regtfardikifasi nanga retidu sa de.—Yesaya 2:2-4; Yohanes 13:34, 35; Kolosesma 3:14.
Satan no sa wini wi
17. Fu san ede Satan no sa wini a pipel fu Yehovah te a e pruberi fu a lasti leisi fu pori den?
17 Heri esi Satan nanga den bakaman fu en sa pruberi fu pori den anbegiman fu Yehovah (Esekièl 38:14-23). A sani disi o pasa na ini a pisi ten di Yesus ben kari a ’bigi banawtu, di sensi a bigin fu grontapu teleki now no ben de ete, nôno, a no sa kon noiti moro tu’ (Mateyus 24:21). Satan sa man wini wi? Nôno. Gado Wortu e gi wi a dyaranti disi: „Yehovah lobi retidu, èn a no sa gowe libi den loyaalwan fu en. Fu tru den sa kisi kibri te ten di no skotu; ma den pikin fu den ogriwan, den sa koti puru fu tru. Na den regtfardikisma srefi sa abi grontapu leki a gudu fu den, èn den sa libi na tapu fu têgo.”—Psalm 37:28, 29.
18. (a) San Gado sa du te Satan sa pruberi fu pori a pipel fu En? (b) Fu san ede a bun taki yu poti prakseri baka na a Bijbel tori disi di e sori fa retidu sa wini?
18 Te Satan nanga den bakaman fu en o pruberi fu pori den futuboi fu Yehovah, dan Yehovah sa handri. Yehovah ben meki Sakaria skrifi: „A sma di e fasi unu, e fasi a popki fu mi ai” (Sakaria 2:8). A sa de neleki te wan sma pusu en finga go na ini Yehovah en ai. A sa handri wantewante èn a sa pori Satan nanga den bakaman fu en. Den bakaman fu Yehovah de heri tra fasi leki grontapusma, fu di den abi trutru lobi gi trawan, den de na ini wánfasi, den lobi vrede, èn den e hori densrefi na den wet fu lanti. Fu dati ede, Satan no o handri na wan reti fasi te a o pruberi fu pori den. Yehovah, a Sma di „lobi retidu” trutru, no sa meki a sani dati pasa. A sa handri fu a bun fu den, èn a sani dati sa meki taki den feanti fu en pipel sa kisi pori fu têgo, retidu sa wini, èn den wan di e anbegi a wan-enkri tru Gado sa kisi frulusu. Den kefalek moi sani disi o pasa heri esi!—Odo 2:21, 22.
San yu ben sa piki?
• Fu san ede so furu takru sani e pasa na grontapu?
• Fa Yehovah sa tyari wan kaba kon na den takru sani di e pasa na grontapu?
• San yu lobi fu na artikel disi di e sori fa retidu sa wini?
[Aksi fu a tori disi]
[Prenki na tapu bladzijde 23]
A pisi ten bifo a Frudu, ogridu ben lai na grontapu, èn na so a de tu na ini den „lasti dei” disi
[Prenki na tapu bladzijde 24, 25]
Na ini a nyun grontapu fu Gado, ogridu no sa de moro, ma na presi fu dati soso retidu nanga regtfardikifasi sa de