Yu e memre disi ete?

Yu ben prisiri fu leisi den Waktitoren di kon na doro no so langa pasa? We, luku efu yu kan gi wan piki tapu den aksi di e kon now:

• Na ini den Kresten Griki Buku fu Bijbel, a wortu „gemeente” abi fu du nanga fo difrenti sani. San na den sani dati?

Na a fosi presi a wortu gemeente abi fu du nanga a grupu fu salfu Kresten (na ini son tekst Yesus de na ini a grupu disi). Tra leisi baka „a gemeente fu Gado” abi fu du nanga ala Kresten di e libi na ini wan spesrutu pisi ten. Na a di fu dri presi a wortu disi abi fu du nanga ala Kresten di e libi na ini wan spesrutu kontren. Èn na a di fu fo presi a wortu disi abi fu du nanga wan grupu sma di de memre fu wan gemeente.—15/4, bladzijde 21-23.

• O ten Kresten no o kisi kari moro fu go na hemel?

Bijbel no e gi wi krin piki tapu na aksi disi. Na ini a yari 33, Kresten bigin kisi kari fu go na hemel, èn disi go doro te na ini a ten fu wi. Baka 1935 a marki fu a preikiwroko kenki, fu di den tru Kresten ben e suku moro furu fu tyari a bigi ipi kon na wan. A santa yeye meki son Kresten di dopu baka 1935 kon sabi taki den abi a howpu fu go na hemel, èn fu dati ede wi no kan taki soifri o ten Kresten no o kisi wan kari moro fu go na hemel. Den wan di de trutru salfuwan, no kisi moro santa yeye leki den wan fu a bigi ipi èn den no e fruwakti tu taki trawan dini den. Awinsi sortu howpu wan Kresten abi, a musu de getrow èn a musu tan du san Gado wani.—1/5, bladzijde 30, 31.

• A de so taki a pramisi di Yefta meki, ben wani taki dati a ben o tyari en umapikin leki wan bron-ofrandi gi Gado?

Dati no de so kwetikweti. Yefta ben wani gi Gado wan sma di ben o dini En en heri libi langa na ini a tabernakel, soleki fa wet di Moses ben gi den Israelsma ben e sori (1 Samuel 2:22). Na umapikin fu Yefta du san en papa ben pramisi, fu di a dini Yehovah en heri libi langa na ini a tabernakel. Dati ben de wan bigi ofrandi trutru, fu di noiti na umapikin disi ben o trow.—15/5, bladzijde 9, 10.

• Fa a kodeks ben de wan yepi gi den Kresten fu fosi?

Buweisi e sori taki den Kresten ben e gebroiki bukulolo te na a kaba fu a fosi yarihondro bifo Krestes. Na ini den yarihondro baka dati, son sma ben wani tan gebroiki bukulolo, aladi trawan ben feni a kodeks moro bun. Sabiman e bribi taki na fu di den Kresten ben e gebroiki a kodeks, meki sma na ala sei bigin gebroiki en tu.—1/6, bladzijde 14, 15.

• San na a Geser kalender?

A Geser kalender na wan pisi plata ston di meki fu karki. Sabiman feni a kalender disi na ini 1908, na a presi pe a foto Geser ben de. Furu sabiman e bribi taki den sani di skrifi na tapu a ston disi, na skorowroko fu wan boi. Sabiman e bribi moro fara taki den sani di skrifi tapu a ston disi abi fu du nanga den mun fu a yari te sma ben e prani noso koti nyanyan. A sma di skrifi den sani na tapu a ston disi bigin nanga a mun di de a srefi leki september/oktober na tapu a kalender fu a ten disi, èn na a mun dati sma ben e bigin nanga a kotiwroko. A kari sosrefi difrenti sani di sma ben e prani èn den pisi ten di den ben e prani noso ben e koti nyanyan.—15/6, bladzijde 8.

• San a wani taki fu sondu teige a santa yeye?

Wan sma kan sondu teige Yehovah en santa yeye, èn sma no man kisi pardon gi a sondu disi (Mateyus 12:31). Na Gado e bosroiti efu wi no sa kisi pardon gi wan sondu di wi du, èn a kan puru en santa yeye na wi tapu (Psalm 51:11). Efu wi e sari trutru fu wan sondu di wi du, dan dati e sori taki wi abi berow èn taki wi no sondu teige a santa yeye.—15/7, bladzijde 16, 17.

• Fu san ede Kownu Saul ben aksi suma na a papa fu David, aladi a ben sabi David kaba (1 Samuel 16:22; 17:58)?

Saul no ben wani sabi soso a nen fu David en papa. Saul ben si taki David ben abi so wan tranga bribi èn so furu deki-ati, taki a wini Goliat. Fu dati ede a ben wani sabi suma na a man di ben kweki a boi disi. A kan taki Saul ben abi na prakseri fu meki Isai, noso tra sma fu en famiri tron fetiman na ini a legre fu Israel.—1/8, bladzijde 31.