Den Hebrew Buku fu Bijbel „skrifi fu leri wi wan sani”

„NOITI sma o kaba fu meki furu buku” (Preikiman 12:12). A sani disi tru fu di bun furu buku de fu kisi na ini a ten disi. We dan, fa wan sma kan kon sabi sortu buku bun fu leisi?

Furu sma wani kon sabi wan tu sani fosi fu a sma di skrifi wan buku, fosi den e bosroiti fu leisi a buku dati. Son leisi den sma di e tyari wan buku kon na doro e skrifi na ini a buku san na a nen fu a skrifiman, pe a gebore, sortu skoroleri a kisi, èn sortu tra buku a skrifi. A de prenspari fu sabi suma na a skrifiman fu wan buku. Fu eksempre, wan ten ben de taki umasma di ben e skrifi buku ben e gebroiki a nen fu mansma leki den eigi nen, bika efu sma ben sabi taki na wan umasma skrifi a buku, dan den ben o denki taki a buku no ben bun nofo.

A sari fu taki dati son sma no e leisi den Hebrew Buku fu Bijbel, fu di den feni taki a Gado na ini den buku dati na wan ogri-ati gado di no ben abi sari-ati nanga den feanti fu en, ma a ben e kiri den alamala. * Meki wi luku san den Hebrew Buku fu Bijbel nanga den Kresten Griki Buku e taki fu a Skrifiman fu Bijbel.

A Skrifiman fu Bijbel

Soleki fa den Hebrew Buku fu Bijbel e sori, dan Gado ben taigi a pipel fu Israel: „Mi na Yehovah; mi no kenki” (Maleaki 3:6). Sowan 500 yari baka dati, a Bijbel skrifiman Yakobus ben taki fu Gado: „A Tata no e kenki soleki fa skaduw e kenki” (Yakobus 1:17). We dan, fu san ede son sma feni taki a Gado na ini den Hebrew Buku fu Bijbel e difrenti fu a Gado fu den Kresten Griki Buku fu Bijbel?

Fu taki en leti, den Buku fu Bijbel e sori taki Gado abi difrenti fasi. A buku Genesis e taki dati Gado „ben e sari srefisrefi”, taki En na a „Gado di meki hemel nanga grontapu”, èn taki En na ’a Sma di e krutu heri grontapu’ (Genesis 6:6; 14:22; 18:25). Den difrenti tekst disi e taki fu a srefi Gado, a no so? Iya, na so a de.

Luku na eksempre disi: A kan taki den sma fu wan kontren sabi wan krutuman leki wan sma di no e spotu nanga a wet, fu di a ben krutu wan afersi fu den. Ma kande den pikin fu en sabi en leki wan lobi-ati papa di lobi fu gi den sani. Kande den bun mati fu a krutuman disi feni taki a abi switifasi èn taki a lobi lafu. A krutuman,  a papa, nanga a mati, na a srefi sma. Na fu di a de na ini difrenti situwâsi, meki a e sori den difrenti fasi fu en.

Den Hebrew Buku fu Bijbel e taki tu dati Yehovah na „wan Gado di abi sari-ati nanga switifasi, di no e atibron esi, di abi bun-ati nanga waarheid pasa marki”. Ma Bijbel e leri wi tu taki „a no sa puru a strafu fu den wan di meki fowtu; a no sa du dati kwetikweti” (Exodus 34:6, 7). Den tu fasi disi di Gado abi e sori san a nen fu en wani taki. A nen „Yehovah” wani taki trutru „A e meki kon tron”. Disi wani taki dati Gado e tron iniwan sani di a musu tron fu man meki den pramisi fu en kon tru (Exodus 3:13-15). Ma a e tan a srefi Gado. Yesus ben taki: „Yehovah wi Gado na wán Yehovah.”—Markus 12:29.

Den Hebrew Buku fu Bijbel no bun moro?

Na ini a ten disi, sma gwenti fu meki nyun buku te den e kon sabi nyun sani, noso te den e kisi wan nyun denki fu sani. A de so tu taki den Kresten Griki Buku fu Bijbel kon na ini a presi fu den Hebrew Buku fu Bijbel? Nôno.

Efu Yesus ben wani taki den tori di abi fu du nanga a diniwroko fu en, èn den buku di den disipel fu en skrifi, ben musu kon na ini a presi fu den Hebrew Buku fu Bijbel, dan a no de fu taki dati a ben o meki sma kon sabi dati. Ma luku san Lukas e taki fu Yesus syatu bifo Yesus opo go na hemel: „A bigin taki fu den buku fu Moses èn fu a leri fu ala den Profeiti [na ini den Hebrew Buku fu Bijbel] fu tyari kon na krin gi den [tu fu den disipel fu en] san na den sani di skrifi fu en na ini Gado Buku.” Bakaten, Yesus sori ensrefi na den getrow apostel fu en èn na tra sma. Bijbel e taki moro fara: „Now a taigi den: ’Disi na den sani di mi ben taigi unu di mi ben de ete nanga unu, taki ala san a wet fu Moses, nanga den leri fu den Profeiti, nanga den Psalm skrifi fu mi, musu kon tru’” (Lukas 24:27, 44). Efu den Hebrew Buku fu Bijbel no ben bun moro, dan fu san ede Yesus gebroiki den na a kabapisi fu a diniwroko fu en na grontapu?

 Baka di a Kresten gemeente seti, den bakaman fu Yesus tan gebroiki den Hebrew Buku fu Bijbel fu poti prakseri na den profeititori di ben musu kon tru ete. Den poti prakseri tu na den prenspari gronprakseri na ini a Wet di Gado ben gi Moses, èn na den tori fu den owruten futuboi fu Gado, di e gi Kresten deki-ati fu tan getrow (Tori fu den Apostel 2:16-21; 1 Korentesma 9:9, 10; Hebrewsma 11:1–12:1). Na apostel Paulus ben skrifi: „Na Gado srefi ben meki sma skrifi ala den sani di de na ini Gado Buku; den sani disi bun” (2 Timoteyus 3:16). * Fa den Hebrew Buku fu Bijbel e tyari wini kon gi wi na ini a ten disi?

Rai gi na aladei libi

Luku wan eksempre di e sori fa sma na ini a ten disi e desko trawan di de fu wan tra ras. Na ini wan foto fu Etiopia, wan yonkuman di abi 21 yari, e taki: „Te wi wani go na wan presi, dan wi musu go na ini wan grupu. Te wi de na ini wan grupu, dan kande sma no sa pruberi fu du ogri nanga wi.” A e taki moro fara: „Wi no kan go na strati baka siksi yuru na neti, èn wi musu de na ai spesrutu na presi pe ogri kan miti wi makriki. Te sma e si wi, dan a fosi sani di den e si, na a kloru fu wi skin.” Den Hebrew Buku fu Bijbel e taki fu a muilek problema disi?

Den Israelsma fu owruten ben kisi a komando disi: „Efu wan trakondre sma e tan na ini un kondre, dan un no musu handri na wan takru fasi nanga en. A trakondre sma di e tan na ini un kondre musu de leki un eigi kondreman. Un musu lobi en leki unsrefi, bika unu ben de trakondre sma tu na ini Egepte” (Lefitikus 19:33, 34). Iya, na ini Israel fu owruten, a wet dati ben e sori taki sma ben musu lespeki „trakondre sma”, èn a wet dati skrifi na ini den Hebrew Buku fu Bijbel. Efu sma na ini a ten disi ben o hori densrefi na den gronprakseri di de fu feni na ini a wet disi, dan sma no o ben o desko trawan, a no so?

Aladi den Hebrew Buku fu Bijbel no taki finifini fa wi musu lusu moni problema, toku den e gi sma bun rai fa fu gebroiki moni na wan koni fasi. Fu eksempre, Odo 22:7 e taki: „A leniman na a futuboi fu a man di leni en.”  Furu sma di abi a wroko fu gi trawan rai te a abi fu du nanga moni tori, e agri taki te sma e borgu, dan den kan kisi moni problema.

Boiti dati, Kownu Salomo, a moro gudusma di oiti ben libi, ben taki krin fu a feti di sma e feti fu kon gudu nomonomo, soleki fa furu sma e du na ini a ten disi. A ben skrifi: „Wan sma di lobi solfru nomo, no sa de tevrede nanga solfru, èn a sma di lobi gudu no sa de tevrede nanga a moni di a e meki. Disi tu de fu soso” (Preikiman 5:10). Dati na trutru bun rai!

Wan howpu gi a ten di e kon

A moro prenspari sani di Bijbel e leri wi, na disi: A Kownukondre di Yesus Krestes sa tiri, sa tyari kon na krin taki Gado wawan abi a reti fu tiri hemel nanga grontapu, èn taki a sa santa a nen fu En.—Danièl 2:44; Openbaring 11:15.

Nanga yepi fu den Hebrew Buku fu Bijbel wi e kon sabi moro fini fa a libi sa de te a Kownukondre fu Gado sa tiri grontapu. Den sani dati e gi wi trowstu èn den e tyari wi kon moro krosibei na Yehovah Gado, a Sma di e gi wi trowstu. Fu eksempre, a profeiti Yesaya ben sori dati libisma nanga meti sa libi na ini vrede. A ben taki: „A wolfu sa tan trutru wan pisi ten na sei a pikin manskapu, èn a penitigri srefi sa go didon na sei a pikin bokoboko, èn a pikin kaw nanga a yongu lew di abi neki-wiwiri, nanga a meti di kisi bun nyanyan, alamala makandra; èn wan pikin boi sa de fesiman fu den” (Yesaya 11:6-8). Dati na wan tumusi moi howpu!

Èn fa a de nanga den wan di e pina fu di sma fu tra ras e desko den, fu di den e siki seryusu, noso fu di den abi moni problema di den no man lusu? Den profeititori na ini den Hebrew Buku fu Bijbel e taki disi fu Krestes Yesus: „A sa frulusu den mofinawan di e bari fu kisi yepi, sosrefi den sma di e kisi kwinsi èn ibri sma di no abi yepiman. A sa firi sari gi a mofinawan èn gi a pôtiwan, èn a sa frulusu den sili fu den pôtiwan” (Psalm 72:12, 13). Den sma di e bribi den pramisi disi e kisi howpu èn sosrefi a dyaranti taki wan kenki sa kon.—Hebrewsma 11:6.

Dati meki a no e fruwondru wi taki Gado meki na apostel Paulus skrifi: „Ala sani di sma skrifi fositen, ben skrifi fu leri wi wan sani, so taki a fasi fa wi e horidoro èn a trowstu di Gado Buku e gi, kan gi wi howpu”! (Romesma 15:4) Iya, den Hebrew Buku fu Bijbel de wan tumusi prenspari pisi ete fu Bijbel, Gado en Wortu. Den e tyari furu wini kon gi wi na ini a ten disi. Wi e howpu taki yu sa pruberi fu kon sabi moro fu san a heri Bijbel e leri trutru, so taki yu kan kon moro krosibei na Yehovah Gado, a Skrifiman fu Bijbel.—Psalm 119:111, 112.

[Futuwortu]

[Faki na tapu bladzijde 6]

NA OWRU TESTAMENTI NOSO DEN HEBREW BUKU FU BIJBEL?

Den wortu „owroe testamenti” skrifi na 2 Korentesma 3:14 na ini Da Bijbel na ini Sranantongo. Na ini a Bijbel dati, a Griki wortu di·a·theʹke, vertaal nanga „testamenti”. Ma furu nyun Bijbel fu a ten disi, soleki a Nyun-Grontapuvertaling fu den Kresten Griki Buku fu Bijbel, no vertaal a wortu di·a·theʹke nanga „testamenti”, ma nanga „frubontu”. Fu san ede?

Edward Robinson, wan sabiman di e skrifi wortubuku, ben taki: „Fu di na owru frubontu skrifi na ini den buku fu Moses, meki [di·a·theʹke] wani taki a buku fu a frubontu, noso den buku fu Moses, namku a wet.” Na 2 Korentesma 3:14, na apostel Paulus ben e taki fu a Wet di Gado ben gi Moses, èn a wet dati na wan pisi nomo fu den Hebrew Buku fu Bijbel.

We, san na a moro bun nen gi den fosi 39 buku fu a Santa Bijbel? Yesus Krestes nanga den bakaman fu en no ben feni taki den buku dati no ben bun moro, ma den ben kari den buku disi „Gado Buku” èn „den Santa Buku” (Mateyus 21:42; Romesma 1:2). Fu dati ede, Yehovah Kotoigi e kari na Owru Testamenti den Hebrew Buku fu Bijbel, fu di furu fu den buku dati ben skrifi na ini Hebrewtongo fosi. Na so den e kari a Nyun Testamenti den Griki Buku fu Bijbel tu, fu di Gado meki mansma skrifi den buku disi na ini Grikitongo.

[Prenki na tapu bladzijde 4]

Sma kan sabi wan man leki wan krutuman di no e spotu nanga a wet, leki wan lobi-ati papa, èn leki wan mati

[Prenki na tapu bladzijde 5]

Yesus ben gwenti fu gebroiki den Hebrew Buku fu Bijbel na ini a diniwroko fu en

[Prenki na tapu bladzijde 7]

Sortu Bijbel gronprakseri kan yepi wan sma fu teki bun bosroiti?