Leri den pikin fu unu fu lobi Yehovah
Leri den pikin fu unu fu lobi Yehovah
„Leki peiri na ini na anu fu wan tranga man, na so den manpikin fu wan yongu papa de.”—PSALM 127:4.
1, 2. Fa pikin de leki „peiri na ini na anu fu wan tranga man”?
WAN man e seti ensrefi fu sutu wan peiri go na tapu wan sani. A e seti a peiri bun na ini a bo, èn a e hari a bo nanga ala en krakti. Aladi a e du dati, a e luku bun pe a o sutu a peiri. Ne a e sutu a peiri! A sa doro a marki? Wan tu sani de prenspari fu meki a peiri disi doro a marki. A fosi sani, na taki a sma musu man sutu bun. A di fu tu sani, na taki a musu hori na prakseri fa a winti e wai. Èn a di fu dri sani, na taki a peiri musu bun.
2 Kownu Salomo ben agersi pikin nanga „peiri na ini na anu fu wan tranga man” (Psalm 127:4). Luku fa wi kan fiti na agersitori disi. Wan man di o sutu wan peiri, e hori a peiri wan syatu pisi ten nomo na ini a bo fu en. A musu lusu a peiri esi-esi so taki a kan doro a marki. Na so papa nanga mama abi wan syatu pisi ten nomo fu yepi den pikin fu den fu kon lobi Yehovah nanga den heri ati. Baka wan tu yari nomo, den pikin e kon bigi èn den e gowe libi na oso (Mateyus 19:5). Den pikin sa doro a marki? Den sa tan lobi Gado èn den sa tan dini en, baka te den gowe libi na oso? Difrenti sani de prenspari fu man doro a marki dati. Wi sa poti prakseri na dri fu den sani dati. A fosi sani, na a fasi fa papa nanga mama e kweki den pikin fu den. A di fu tu sani, na a situwâsi na ini na osofamiri, èn a di fu dri sani, na a fasi fa a pikin e teki a leri di a e kisi fu en papa nanga mama. Meki wi go luku ibriwan fu den tori disi moro fini. Wi sa poti prakseri fosi na wan tu sani di papa nanga mama kan du fu kweki den pikin fu den na wan yoisti fasi.
Papa nanga mama musu gi wan bun eksempre
3. Fu san ede papa nanga mama musu du san den e taki?
3 Yesus gi papa nanga mama wan bun eksempre fu di a ben e du san a ben e leri sma (Yohanes 13:15). Ma a ben e krutu den Fariseiman di ben gwenti fu taki sani, aladi den no ben e du san den ben e taki (Mateyus 23:3). Efu papa nanga mama wani leri den pikin fu den fu lobi Yehovah, dan densrefi musu du san den e taki. Te wan sma no e du san a e taki, dan a de neleki wan bo sondro titei.—1 Yohanes 3:18.
4. Sortu sani papa nanga mama musu aksi densrefi, èn fu san ede den musu du dati?
4 Fu san ede papa nanga mama musu de wan bun eksempre? Neleki fa bigisma kan leri fu lobi Gado fu di den e teki na eksempre fu Yesus, na so pikin kan leri fu lobi Yehovah te den e teki a bun eksempre fu den papa nanga mama. Den mati fu wan pikin kan gi en deki-ati fu du bun, noso den kan ’pori den bun gwenti’ fu a pikin (1 Korentesma 15:33). Fu a moro bigi pisi fu wan pikin en libi, a papa nanga mama fu a pikin dati, na den wan di abi moro demakandra nanga en, èn den na den wan di abi moro bigi krakti na en tapu. Dati de so spesrutu na ini den fosi yari fu a pikin en libi, fu di na ini den yari disi, a pikin e leri sani di sa abi krakti tapu den fasi fu en. Dati meki a bun te papa nanga mama e aksi densrefi den sani disi: ’Sortu krakti mi abi tapu a pikin fu mi? Na eksempre fu mi e yepi a pikin fu kisi bun gwenti? Na eksempre di mi e gi a pikin, e gi en deki-ati fu begi èn fu studeri Bijbel?’
Papa nanga mama musu begi nanga den pikin fu den
5. San pikin kan leri te den papa nanga mama e begi?
5 Den pikin fu yu kan leri furu fu Yehovah te den e arki den begi fu yu. Te den e yere fa yu e taki Gado tangi te unu o nyan èn te den e yere fa yu e begi te yu e studeri Bijbel nanga den, dan san den kan leri fu dati? A no de fu taki dati den sa leri taki na Yehovah e gi wi den sani di wi abi fanowdu, èn taki den musu taki En tangi gi den sani dati. Den sa leri tu taki na En e leri wi den tru tori fu Bijbel. Disi na tumusi prenspari sani di den pikin musu sabi.—Yakobus 1:17.
6. Fa papa nanga mama kan yepi den pikin fu den fu kon si taki Yehovah e broko en ede nanga ibriwan fu den?
6 Ma te yu e begi nanga yu osofamiri na tra okasi tu, èn te yu e taki fu spesrutu sani di abi fu du nanga yu èn nanga den pikin fu yu, dan yu sa man leri den pikin fu yu moro sani srefi. Yu sa yepi den fu kon si taki Yehovah na wan pisi fu yu osofamiri, èn taki a e broko en ede nanga ibriwan fu unu (Efeisesma 6:18; 1 Petrus 5:6, 7). Wan papa e taki: „Sensi di wi umapikin gebore, wi bigin begi nanga en. Di a ben e gro kon bigi, dan wi begi fu sani di ben abi fu du nanga den mati fu en, èn fu tra tori di ben abi fu du nanga en. Wi tan begi nanga en ibri dei, teleki a gowe libi na oso, baka di a trow.” Kande yu kan begi ibri dei tu nanga den pikin fu yu. Kande yu kan yepi den fu kon si Yehovah leki wan Mati di e gi den san den abi fanowdu fu tan na libi, fu abi wan tranga bribi, èn di e broko en ede tu nanga den firi fu den.—Filipisma 4:6, 7.
7. San papa nanga mama musu sabi efu den wani begi fu sani di abi fu du nanga den pikin fu den?
7 A no de fu taki, dati efu yu wani begi fu sani di abi fu du nanga den pikin fu yu, dan yu musu sabi san e miti den. Luku san wan papa di kweki tu pikin e taki: „Na a kaba fu ibri wiki, mi ben e aksi misrefi tu sani: ’Nanga sortu sani den pikin fu mi broko den ede a wiki disi? Sortu bun sani miti den?’” Papa nanga mama, kande unu kan aksi unsrefi den sani disi so taki unu kan begi fu den tori disi nanga den pikin fu unu? Te unu e du dati, dan unu sa leri den fu begi Yehovah, a Yereman fu begi, èn unu sa leri den tu fu lobi En.—Psalm 65:2.
Papa nanga mama musu leri den pikin fu studeri Bijbel bun
8. Fu san ede papa nanga mama musu yepi den pikin fu den fu studeri Gado Wortu doronomo?
8 Fa a fasi fa wan papa noso wan mama e studeri Bijbel kan abi krakti tapu a bribi di a pikin abi na ini Gado? Te sma wani tron mati fu makandra, èn te den wani tan mati, dan den no musu taki nomo nanga makandra, ma den musu arki makandra tu. Wan fasi fa wi e arki Yehovah, na te wi e studeri Bijbel nanga yepi fu den publikâsi di ’a getrow srafu’ tyari kon na doro (Mateyus 24:45-47; Odo 4:1, 2). Fu dati ede, efu papa nanga mama wani yepi den pikin fu den fu tan lobi Yehovah, dan den musu gi den deki-ati fu studeri Gado Wortu doronomo.
9. Fa papa nanga mama kan yepi den pikin fu den fu studeri Bijbel doronomo?
9 Fa papa nanga mama kan yepi den pikin fu den fu studeri Bijbel doronomo? Soleki fa wi ben taki kaba, dan a moro bun fasi fa wan papa noso wan mama kan du dati, na fu de wan bun eksempre. Den pikin fu yu gwenti si fa yu e leisi noso e studeri Bijbel? A no de fu taki dati den pikin fu yu e teki furu fu yu ten, èn kande yu no sabi pe fu feni ten fu leisi èn fu studeri Bijbel. Ma aksi yusrefi a sani disi: ’Den pikin fu mi gwenti si mi e luku telefisi?’ Efu dati de so, dan kande yu kan gebroiki pikinso fu a ten dati fu studeri Bijbel so taki yu kan de wan bun eksempre gi den.
10, 11. Fu san ede papa nanga mama musu studeri Bijbel doronomo nanga den pikin fu den?
10 Wan tra bun fasi fa papa nanga mama kan leri pikin fu arki Yehovah, na te den e taki fu Bijbel tori doronomo nanga na osofamiri fu den (Yesaya 30:21). Ma kande wan tu sma sa aksi densrefi a sani disi: ’Fu san ede pikin musu studeri nanga a papa nanga mama fu den, te den e tyari den go kaba na den gemeente konmakandra?’ Wan tu bun reide de fu san ede dati de fanowdu. Yehovah gi papa nanga mama a prenspari frantwortu fu gi den pikin fu den leri (Odo 1:8; Efeisesma 6:4). Te papa nanga mama e studeri nanga den pikin fu den, dan den pikin e kon frustan taki den no musu anbegi Gado makandra nanga tra sma wawan, ma taki den musu du dati tu makandra nanga na osofamiri fu den.—Deuteronomium 6:6-9.
11 Boiti dati, te papa nanga mama e studeri bun nanga den pikin fu den, dan dati e gi den na okasi fu kon sabi fa den pikin fu den e denki fu sani di abi fu du nanga Gado, èn nanga a fasi fa den musu tyari densrefi. Fu eksempre, te den pikin yongu ete, dan papa nanga mama kan gebroiki a buku Teki leri fu a Bigi Leriman. * Pikinmoro ibri paragraaf na ini a buku disi e gi pikin na okasi fu taki fa den e denki fu den tori di skrifi na ini a buku. Te papa nanga mama e taki nanga den pikin fu den bijbeltekst di kari na ini a buku, dan den o man yepi den pikin fu kisi a koni fu „sabi san bun èn san no bun”.—Hebrewsma 5:14.
12. Fa papa nanga mama kan sorgu taki den sani di den e studeri nanga den pikin fu den e fiti den pikin? San yu kan du fu doro a marki dati?
12 Te den pikin fu yu e kon bigi, dan den sani di yu e studeri nanga den musu fiti den. Luku fa wan papa nanga mama yepi den tini pikin fu den fu kon si efu a ben o bun fu go na wan skorodansi. A papa e taki: „Wi taigi den pikin fu wi taki a tra leisi te wi ben o studeri nanga den, dan mi nanga mi wefi ben o prei leki wi na den pikin, èn den umapikin fu wi ben o prei leki den na wi papa nanga mama. A no ben abi trobi sortuwan fu den pikin ben e prei papa noso mama, ma den ben musu wroko makandra fu ondrosuku san den publikâsi e taki fu skorodansi, so taki den ben kan gi wi rai.” San ben de a bakapisi? A papa e taki moro fara: „Wi ben fruwondru fu si fa wi umapikin (di ben e prei papa nanga mama) gebroiki Bijbel fu taigi wi (di ben e prei den pikin) na wan seryusu fasi fu san ede a no ben o bun fu go na a dansi. San ben moi tu, na den rai di den gi wi fu du wan tra bun sani na presi fu go na a dansi dati. A sani disi ben de wan yepi fu di wi kon frustan moro bun fa den ben e denki, èn san den ben wani.” A no de fu taki, dati papa nanga mama musu horidoro, den musu suku nyun fasi fu tan studeri doronomo nanga den pikin fu den, èn den musu du dati na wan fasi di e tyari wini kon gi den. Ma a muiti di den e meki no sa de fu soso.—Odo 23:15.
Sorgu taki sani e waka bun na ini na osofamiri
13, 14. (a) Fa papa nanga mama kan sorgu taki sani e waka bun na ini a osofamiri? (b) Sortu wini a e tyari kon te papa nanga mama de klariklari fu taki dati den meki fowtu?
13 Wan peiri sa doro a marki moro makriki te wan sma e luku fosi pe a o sutu a peiri go èn te a e lusu en sondro taki wan sani e meki a misi a marki. Na so a de tu taki pikin sa leri moro makriki fu lobi Yehovah, te papa nanga mama e sorgu taki sani e waka bun na ini na osofamiri. Yakobus ben skrifi: „Den siri fu a froktu fu regtfardikifasi e sai te vrede de, èn dati de fu a bun fu den sma di e meki vrede nanga trawan” (Yakobus 3:18). Fa papa nanga mama kan sorgu taki sani e waka bun na ini na osofamiri? Trowpatna musu de bun mati fu makandra. Te wan masra nanga en wefi abi lobi nanga lespeki gi makandra, dan den sa man leri den pikin fu den moro bun fa fu abi lobi nanga lespeki gi trawan, èn gi Yehovah (Galasiasma 6:7; Efeisesma 5:33) Te trowpatna abi lobi nanga lespeki gi makandra, dan den sa libi bun nanga makandra. Èn te papa nanga mama e libi bun nanga makandra, dan den sa sabi moro bun san fu du te problema e opo kon na ini na osofamiri.
14 A no de fu taki, dati ala osofamiri abi en problema, neleki fa ala trowlibi abi en problema. Son leisi papa nanga mama no e sori a froktu fu a yeye na ini a fasi fa den e handri nanga den pikin fu den (Galasiasma 5:22, 23). Te dati pasa, dan san papa nanga mama musu du? Te papa nanga mama de klariklari fu taki dati den meki wan fowtu, dan a sani dati sa meki den pikin lasi lespeki gi den? Luku na eksempre fu na apostel Paulus. A ben de leki wan papa gi furu Kresten brada nanga sisa (1 Korentesma 4:15). Ma toku a ben de klariklari fu taki dati a ben meki fowtu (Romesma 7:21-25). Toku wi no e lasi lespeki gi en, ma wi e kisi moro lespeki gi en fu di a sori sakafasi èn fu di a ben de opregti. Aladi Paulus ben abi swakifasi, toku a ben kan skrifi a gemeente Korente nanga ala overtoigi: „Waka baka na eksempre fu mi, neleki fa mi e waka baka na eksempre fu Krestes” (1 Korentesma 11:1). Te yu de klariklari tu fu taki dati yu meki wan fowtu, dan den pikin fu yu no sa hori yu na ati gi den fowtu dati.
15, 16. Fu san ede papa nanga mama musu leri den pikin fu den fu lobi den Kresten brada nanga sisa fu den, èn fa den kan du dati?
15 Sortu tra sani papa nanga mama kan du fu sorgu taki den pikin fu den e gro kon tron sma di lobi Yehovah? Na apostel Yohanes ben skrifi: „Efu wan sma e taki: ’Mi lobi Gado’, ma toku a e teige en brada, dan a sma dati na wan leiman. Bika a sma di no lobi en brada di a man si, no man lobi Gado di a no man si” (1 Yohanes 4:20, 21). Fu dati ede, te yu e leri den pikin fu yu fu lobi den Kresten brada nanga sisa fu den, dan yu e leri den fu lobi Gado. A bun te papa nanga mama e aksi densrefi a sani disi: ’Mi gwenti taki bun fu den brada nanga sisa na ini a gemeente, noso mi gwenti krutu den?’ Fa yu kan sabi dati? Arki bun fa den pikin fu yu e taki fu den konmakandra èn fu den brada nanga sisa na ini a gemeente. Te dati de so, dan den sani di den e taki sa kruderi nanga a fasi fa yu e denki.
16 San papa nanga mama kan du fu sorgu taki den pikin fu den lobi den Kresten brada nanga sisa fu den? Peter, wan papa di abi tu tini boi, e taki: „Di den boi fu wi ben yongu, wi ben gwenti fu kari lepi brada nanga sisa fu kon nyan nanga wi èn fu kon abi demakandra nanga wi. A sani dati ben gi wi furu prisiri. Den boi fu wi gro kon nanga sma di lobi Yehovah, èn now den e si taki a e gi prisiri fu dini Gado.” Dennis, wan papa di abi feifi umapikin, e taki: „Wi gi den umapikin fu wi deki-ati fu tron mati nanga den moro owru pionier na ini a gemeente, èn te a ben man, wi ben e kari a kring-opziener nanga a wefi fu en kon na wi oso.” Kande yu kan meki muiti fu yepi den pikin fu yu fu kon si den sma na ini a gemeente leki tra memre fu na osofamiri fu yu.—Markus 10:29, 30.
A frantwortu di pikin abi
17. Sortu bosroiti pikin musu teki te fu kaba?
17 Luku na agersitori baka fu a sma di o sutu wan peiri. Awansi a man sutu bun, toku a peiri fu en no sa doro a marki te a peiri dati kron. A no de fu taki dati papa nanga mama sa meki ala muiti fu boigi a kron peiri kon bun baka, noso fu pruberi fu kenki a takru denki fu a pikin fu en. Ma te fu kaba den pikin srefi musu bosroiti efu den sa gi pasi taki a grontapu disi abi krakti na den tapu, noso efu den o gi pasi taki Yehovah meki den ’pasi fu den kon reti’.—Odo 3:5, 6; Romesma 12:2.
18. Sortu krakti den bosroiti fu wan pikin kan abi tapu trawan?
18 Aladi papa nanga mama abi a hebi frantwortu fu kweki den pikin fu den nanga ’a leri fu Yehovah, èn aladi den musu frumane den fu kisi a denki fu En’, toku a pikin srefi sa musu bosroiti te fu kaba san a wani du nanga en libi (Efeisesma 6:4) Fu dati ede, unu pikin, aksi unsrefi: ’Mi sa teki a leri di mi papa nanga mama e gi mi na wan lobi-ati fasi?’ Te unu e du dati, dan dati na a moro bun fasi fa unu kan libi. Un papa nanga mama o breiti srefisrefi. Ma san de moro prenspari, na taki unu sa meki Yehovah en ati prisiri.—Odo 27:11.
[Futuwortu]
^ paragraaf 11 Yehovah Kotoigi tyari a buku disi kon na doro.
Yu e memre disi ete?
• Fa papa nanga mama kan de wan bun eksempre te a abi fu du nanga den begi fu den èn nanga a studeri di den e studeri Bijbel?
• Fa papa nanga mama kan sorgu taki sani e waka bun na ini na osofamiri?
• Sortu bosroiti pikin musu teki, èn sortu krakti den bosroiti disi sa abi tapu trawan?
[Aksi fu a tori disi]
[Prenki na tapu bladzijde 28]
Yu e gi den pikin fu yu wan bun eksempre nanga a fasi fa yu e studeri Bijbel?
[Prenki na tapu bladzijde 29]
Te sani e waka bun na ini na osofamiri, dan den pikin sa de koloku