Suku okasi fu prèise trawan

OITI yu yere wan wrokoman e krutu taki en basi no gwenti prèise en gi a wroko di a du? Oiti yu srefi taki a srefi sani disi? Yu leki yonguwan oiti taki dati yu papa nanga mama, noso den sma di e gi yu leri na skoro no e prèise yu?

Kande sonwan fu den sma disi abi leti fu taki dati sma no e prèise den. Ma luku san wan Doisriman e taki. A man disi di abi a wroko fu gi sma deki-ati fu du bun, e taki dati te wrokoman feni taki a basi fu den no e prèise den, dan fu taki en leti den no e mandi fu di a basi fu den no e sori warderi gi den, ma fu di a no e broko en ede nanga den. Awinsi fa a no fa, den feni taki a basi fu den no e sori nofo warderi gi den. Efu wi wani libi bun nanga trawan, dan a de tumusi prenspari taki wi e prèise den èn taki wi e broko wi ede nanga den.

Na so a musu de tu na ini a tru anbegi. Na ini a Kresten gemeente a de prenspari taki sma e prèise makandra, taki den lobi makandra, èn taki den e broko den ede nanga makandra. Sani sa tan waka na a fasi disi te den memre fu a gemeente e fiti den rai di skrifi na ini Bijbel. Ma awinsi fa sma na ini a gemeente lobi makandra, toku den musu tan meki muiti fu sori taki den e warderi makandra. Nanga a sani disi na prakseri, wi sa luku dri moi eksempre fu sma di ben prèise trawan. Den sma disi na Elihu, wan futuboi fu Gado di ben e libi bifo a ten fu Krestes, na apostel Paulus, nanga Yesus Krestes srefi.

Gi rai na wan switi fasi èn na wan lespeki fasi

Elihu, di ben de wan fara famiri fu Abraham, ben de wan bigi yepi gi Yob, fu di a yepi en fu kon kisi a yoisti denki fu Gado. Elihu ben sori switifasi nanga lespeki gi Yob. Nanga pasensi a wakti teleki a ten ben doro gi en fu taki. Den man di ben e kari densrefi mati fu Yob, ben e krutu Yob doronomo. Ma tra fasi leki den man disi, Elihu no gi Yob rai nomo, ma a ben de klariklari fu prèise Yob fu di a ben de wan opregti sma. Tra fasi leki den tra man, Elihu prèise Yob na wan switi fasi, èn a kari en na en nen. Disi e sori taki a ben e broko en ede trutru nanga a mati fu en. Na wan switi fasi a aksi Yob: „O Yob, grantangi arki den wortu fu mi, èn poti prakseri na ala san mi e taki.” Na wan lespeki fasi, Elihu sori taki a ben e frustan fa Yob ben e firi, èn fu dati ede a taki: „Luku! Gi a tru Gado, mi nanga yu na a srefi; mi srefi meki fu kleidoti. Efu yu abi wan sani fu taki, piki mi; taki, bika mi lobi a regtfardikifasi fu yu.”—Yob 33:1, 6, 32.

Te wi e sori switifasi nanga lespeki gi trawan, dan na so wi e sori warderi gi den. Fu taki en leti, wi e taigi den sma disi: „Mi e warderi yu, èn mi abi lespeki gi yu.” Te wi e  du dati, dan wi e sori taki wi lobi den sma disi èn taki wi e broko wi ede nanga den.

Te wi e sori lespeki gi trawan, dan dati no wani taki nomo dati wi e handri bun nanga sma fu di wi wani sori taki wi abi bun maniri. Efu wi wani doro na ati fu trawan, dan wi musu sori lespeki gi den na wan opregti fasi, èn nanga wi heri ati. Wi musu sori taki wi e broko wi ede trutru nanga den èn taki wi lobi den.

Prèise trawan te dati fiti

Na apostel Paulus sori o prenspari a de fu prèise trawan te dati fiti. Fu eksempre, na a ten di a ben go preiki leki zendeling fu a di fu tu leisi, dan a ben de na ini Ateine. Drape a opo taki gi a Kresten bribi, di a ben e taki nanga wan tu Griki filosofiaman. Luku fa a du dati sondro fu afrontu den man disi. Bijbel e taki: „Wan tu fu den Epikurus-sma nanga den Stoisisma di ben de filosofiaman bigin haritaki nanga en, èn sonwan fu den ben taki: ’Sortu lawlaw sani a man disi wani fruteri wi?’ Trawan fu den ben taki: ’Soleki fa a sori, dan a e fruteri sma fu tra gado’” (Tori fu den Apostel 17:18). Aladi den man ben taki den sani dati, toku Paulus no atibron, ma a piki den: „Sma fu Ateine, mi e si taki na ini ala sani unu abi moro lespeki gi den gado, leki tra sma.” Paulus no krutu den sma disi fu di den ben e anbegi falsi gado, ma na presi fu dati a prèise den fu di den ben abi bigi lespeki gi den gado fu den.—Tori fu den Apostel 17:22.

Paulus ben e hoigri fu di a taki dati? Kwetikweti. A ben sabi taki a no ben musu krutu sma, èn a ben sabi heri bun taki wan ten ben de di en srefi no ben sabi a tru bribi. A no ben kisi a wroko fu krutu trawan, ma a ben musu fruteri sma a boskopu fu Gado. En srefi ben kon sabi wan sani di furu Yehovah Kotoigi na ini a ten disi kon sabi tu: Son sma di e horibaka fayafaya gi falsi bribi, te fu kaba kan tron sma di e hori baka fayafaya gi a tru bribi.

Paulus ben handri bun, èn dati meki a ben abi bun bakapisi. „Sonwan fu den bigin waka nanga en, èn den tron bribiman; Dionisius, wan krutuman fu a krutu-oso fu na Areopagus ben de wan fu den, sosrefi wan uma di ben nen Damaris, nanga tra sma tu” (Tori fu den Apostel 17:34). Soleki fa wi si, dan den sma fu Ateine no ben abi soifri sabi, ma toku Paulus no krutu den. Na presi fu dati, a prèise den gi na opregtifasi fu den, aladi den ben e anbegi falsi gado. Srefi sma di no e handri bun fu di trawan fruteri den lei, kan de sma di abi wan bun ati.

Di Paulus ben musu opo taki gi ensrefi na fesi Herodes Agrepa II, dan a luku bun tu fu no afrontu en. Sma ben sabi taki Herodes ben e hori nanga en sisa Bernice, èn Gado Wortu e sori krin taki a sani dati no fiti kwetikweti. Ma toku Paulus no krutu a man disi. Na presi fu dati, a feni wan bun reide fu prèise Herodes. A ben taki: „Mi breiti, Kownu Agrepa, taki mi kan opo taki gi misrefi na fesi yu tide fu sori taki den sani di den Dyu e taki fu mi no tru, spesrutu fu di yu sabi sortu gwenti nanga kesekese den Dyu abi.”—Tori fu den Apostel 26:1-3.

Iya, a bun te wi e handri na a srefi fasi nanga trawan! Te wi e prèise wan birtisma, wan pikin na wi skoro, noso wan sma na wi wrokope, dan dati kan meki taki a sma e handri bun nanga wi èn taki a e tyari ensrefi na wan bun fasi. Te wi e prèise opregtisma te dati fiti, dan wi sa doro na ati fu den, èn a sani disi kan meki taki den e bigin denki èn handri na wan yoisti fasi.

Yesus gi a moro bun eksempre fa fu prèise trawan

Yesus ben gwenti fu prèise trawan. Fu eksempre, baka di Yesus kisi wan opobaka èn di a go na hemel, dan Gado meki a taigi na apostel Yohanes fu skrifi brifi gi den seibi gemeente na ini Pikin Asia. Yesus no frigiti fu prèise den wan di ben e frudini dati. Na ini a brifi gi den gemeente Efeise, Pergamum, nanga Tiatira, a taki sani soleki: „Mi sabi den sani di yu e du, èn mi sabi taki yu e wroko tranga, taki yu e horidoro, taki yu no man frudrage ogrisma.”  A ben taki moro fara: „Yu e tan horibaka gi a nen fu mi, èn yu no ben tapu fu bribi na ini mi.” Èn a ben taki tu: „Mi sabi den sani di yu e du, èn mi sabi taki yu abi lobi nanga bribi; mi sabi fa yu e du a diniwroko fu yu, sosrefi taki yu e horidoro èn taki den sani di yu e du now, bigi moro den sani di yu ben du fosi.” Aladi Yesus ben musu gi a gemeente Sardes seryusu piri-ai, toku a no frigiti fu prèise den wan di ben e frudini dati. A ben taki: „Toku wan tu sma de na Sardes di no doti den krosi fu den, èn den o waka nanga mi aladi den weri weti krosi, bika den warti fu du dati” (Openbaring 2:2, 13, 19; 3:4). A no de fu taki dati Yesus gi wi wan bun eksempre!

Neleki Yesus, wi noiti musu krutu wan heri grupu sma soso fu di wan tu sma nomo meki fowtu, èn noiti wi musu gi sma rai sondro fu prèise den te dati fiti. Ma a bun fu hori na prakseri taki te wi e prèise sma soso fu di wi wani gi den rai, dan son leisi sma no o warderi dati. Wi musu kon abi a gwenti fu prèise sma ibri leisi te a fiti fu du dati! Te wi e du dati, dan sma sa de klariklari fu teki a rai di wi e gi den.

Owruman di e prèise sma te dati fiti

Cornelia, na wan Kresten uma di e dini na a bijkantoro fu Yehovah Kotoigi na ini wan kondre na Europa. Na uma disi e memre taki na ini den yari syatu baka 1970, a kring-opziener di ben kon na a gemeente, aksi en efu a ben e feni ten fu studeri Bijbel èn fu leisi ala den tijdschrift. „Mi ben e syen pikinso”, na so Cornelia taki. Ma a taigi a kring-opziener krin taki a no ben feni ten fu leisi ala den artikel na ini den tijdschrift. Cornelia e taki: „A kring-opziener no krutu mi, ma na presi fu dati a  prèise mi gi a muiti di mi ben e meki fu leisi den tijdschrift. A sani di a taigi mi, gi mi so furu deki-ati, taki sensi a ten dati, mi e sorgu taki mi e leisi ala den artikel.”

Ray, na wan brada di e dini na wan bijkantoro na ini Europa. A e memre a fosi dei di a bigin pionier. A fesiman-opziener fu a gemeente na wan brada di abi wan grontapuwroko, a abi en eigi osofamiri fu sorgu, èn a abi furu frantwortu na ini a gemeente. Ma toku, di a kon na ini a Kownukondre zaal a neti dati, a waka go langalanga na Ray, èn a aksi en: „Fa a pionierwroko go a fosi dei?” Now, pikinmoro 60 yari baka dati, Ray e memre ete fa na owruman dati poti prakseri na en.

Soleki fa den tu ondrofenitori disi e sori, dan wi kan gi sma furu deki-ati te wi e sori warderi gi den sani di den du. Wi no musu du en leki wan plekti nomo, ma wi musu prèise den na wan opregti fasi. Wi abi furu reide fu prèise den Kresten brada nanga sisa fu wi. Prakseri a muiti di den e meki fu dini Yehovah, den bun piki di den e gi, a deki-ati di den e kisi fu hori lezing noso tra prati na den konmakandra, a muiti di den e du fu preiki, fu gi sma leri, èn fu poti Kownukondre afersi na a fosi presi na ini den libi. Te wi e prèise trawan, dan wi e kisi furu blesi. Wi e kon de koloku èn wi e kisi wan bun denki fu sani.—Tori fu den Apostel 20:35.

A bun te gemeente owruman e prèise a gemeente gi a bun wroko di den e du. Èn te den musu gi rai, dan den sa du dati na wan lobi-ati fasi. Ma den no musu broko den ede so kefalek, taki den e bigin si ala pikinpikin fowtu di den brada nanga sisa e meki, leki wan seryusu swakifasi.

A bun te Kresten owruman de leki Elihu, Paulus nanga Yesus. Elihu ben sori lespeki nanga switifasi, Paulus no ben e afrontu sma, èn Yesus ben e broko en ede nanga trawan fu di a ben lobi den. Te owruman e teki na eksempre fu den man disi, dan den sa man gi den brada nanga sisa fu den trutru deki-ati. Te wi e prèise trawan, dan dati sa gi den deki-ati fu tron moro bun sma, èn wi o meki bun mati. A no de fu taki dati, di Yesus teki dopu, dan a ben breiti fu yere fa en hemel Tata prèise en na a fasi disi: „Yu na mi Manpikin, a lobiwan; na yu mi feni bun!” (Markus 1:11) Meki wi prèise wi brada nanga sisa na wan opregti fasi so taki den e firi prisiri.

[Prenki na tapu bladzijde 15]

Fu di Paulus no ben afrontu sma, meki a ben abi bun bakapisi, èn wi kan du dati tu

[Prenki na tapu bladzijde 16]

Te wi e prèise sma nanga wi heri ati, dan dati kan tyari bun bakapisi kon