Aksi fu leisiman

Aladi den Dyu ben kisi a komando fu no gebroiki „nowan sani di abi srudeki na ini” te den ben e hori a Paskafesa, toku Yesus gebroiki win di a seti a Memrefesa fu a dede fu en. Fu san ede a du dati?—Exodus 12:20; Lukas 22:7, 8, 14-20.

A Paskafesa ben seti na ini 1513 bifo Krestes, èn den manpikin fu Israel ben e hori a fesa disi fu memre a dei di den komoto na ini Egepte. Di Yehovah meki den Israelsma kon sabi fa den ben musu hori a fesa disi, dan a taigi den: „Un no musu nyan nowan sani di abi srudeki na ini. Awansi pe un e tan, un musu nyan brede sondro srudeki” (Exodus 12:11, 20). A sani disi di Gado ben komanderi den, ben abi fu du soso nanga a brede di den ben o nyan na a Paskafesa. Gado no ben taki noti fu win.

A moro prenspari reide fu san ede den Israelsma no ben musu gebroiki srudeki, na fu di den ben musu hasti densrefi fu komoto na ini Egepte. Exodus 12:34 e taki: „A pipel teki a blon sondro taki den poti srudeki na ini, den teki den baki pe den ben e masi blon, èn den domru den na ini den dyakti, dan den poti dati na tapu den skowru.” Den bakapikin fu den ben o memre a prenspari sani disi, te den ben o gebroiki brede sondro srudeki na a Paskafesa.

Bakaten, sma ben e agersi srudeki nanga sondu, noso a pori di sani pori. Di na apostel Paulus ben e taki fu wan man di ben e du hurudu na ini a Kresten gemeente, dan a aksi: „Unu no sabi taki na pikinso srudeki nomo e meki taki a blon e kon swa?” Baka dati, a taki: „Puru na owru srudeki, so taki unu kan tron nyun blon, bika un musu de sondro srudeki. Bika Krestes, a Paska ofrandi fu wi, srakti trutru. Fu dati ede, meki wi hori a fesa, ma no nanga owru srudeki èn no nanga a srudeki di e agersi ogridu nanga takrudu, ma nanga brede sondro srudeki di e agersi opregti fasi nanga waarheid” (1 Korentesma 5:6-8). Brede sondro srudeki wawan ben kan prenki Yesus en libisma skin di no ben abi sondu.—Hebrewsma 7:26.

A gebroiki di den Dyu e gebroiki win na a Paskafesa, na wan sani di den bigin du bakaten. Kande den bigin du dati baka di den komoto na ini katibo na Babilon. Bijbel no e krutu a nyun gwenti disi, èn fu dati ede a ben fiti taki Yesus gebroiki win di a ben e nyan a Paska nyanyan makandra nanga den apostel. A no de fu taki dati a fasi fa sma na ini owruten ben e meki win, ben e difrenti fu a fasi fa den ben e meki brede nanga srudeki. Fu meki a brede disi, den ben e poti srudeki na ini a blon. Ma te sma ben e meki win fu droifi, dan den no ben abi fu gebroiki srudeki. Droifi abi sani kaba na ini den di e meki taki den e tron win. Fu di a Paskafesa ben e hori sowan aiti mun baka a pisi ten te sma ben e koti droifi, meki a no de fu taki dati a watra fu den droifi ben tron win na a ten fu a fesa disi.

Sobun, di Yesus gebroiki win na a Memrefesa, dan a no handri kontrari a rai di Gado ben gi fu no gebroiki srudeki. Iniwan redi win di no sukru, di no moksi nanga tra sopi, èn di no abi spesrei na ini, bun fu gebroiki leki wan sani di e prenki a „warti brudu” fu Krestes.—1 Petrus 1:19.