Den e „tan gi froktu te den ede-wiwiri kon weti”

FURU sma na ini den kondre na a Mindrikondre Se e prani dadelbon (wan sortu palmbon) na ini den dyari. Den bon disi moi èn den froktu fu den switi. Boiti dati, den bon disi e tan gi froktu awansi den abi moro leki wán hondro yari.

Na ini wan puwema di Kownu Salomo fu Israel fu owruten ben skrifi, a e agersi a skin fu wan moi umapikin fu Sulem, nanga wan palmbon (Singi fu Salomo 7:7). Wan buku e taki: „A Hebrew wortu di vertaal nanga dadelbon, na ’tàmâr’. Gi den Dyu, a bon disi e prenki moifasi nanga lespekifasi, èn den ben gwenti fu gi umapikin a nen disi” (Plants of the Bible). Fu eksempre, a moi afu-sisa fu Salomo ben nen Tamar (2 Samuel 13:1). Son papa nanga mama na ini a ten disi e gi den umapikin fu den a nen disi tu.

Ma sma no e agersi a palmbon nanga moi umasma wawan. A psalm skrifiman ben skrifi: „A regtfardikiwan srefi sa gi bromki neleki wan palmbon; leki wan sedre na ini Libanon, na so a sa gro kon bigi. Den wan di prani na ini na oso fu Yehovah, na ini den fesidyari fu wi Gado, den sa gi bromki. Den sa tan gi froktu te den ede-wiwiri kon weti, den sa fatu èn den sa moi doronomo.”—Psalm 92:12-14.

Furu reide de fu san ede wi kan agersi owrusma di e dini Gado na wan getrow fasi, nanga wan moi palmbon. Bijbel e taki: „Weti wiwiri de leki wan kownu-ati di e moi wan sma, te a sma dati e libi na wan regtfardiki fasi” (Odo 16:31). Aladi a skin fu den owrusma e kon swaki moro nanga moro, toku den kan kisi krakti te den e studeri Gado Wortu, Bijbel, doronomo (Psalm 1:1-3; Yeremia 17:7, 8). Den bun sani di getrow owruwan e taki, èn a bun eksempre fu den, de wan bigi deki-ati gi trawan èn den owruwan disi e tan gi froktu ibri yari (Titus 2:2-5; Hebrewsma 13:15, 16). Neleki a dadelbon, owrusma kan tan du bun na ini den owrudei.