Fa yu kan leri yu pikin fu lobi Gado nanga en heri ati?

NA INI a ten disi, a no makriki srefisrefi gi sma fu kisi wan bun matifasi nanga Yehovah Gado (Psalm 16:8). Soleki fa Bijbel profeititori e sori, wi e libi na ini „muilek ten di tranga fu pasa”. Furu sma ’lobi prisiri na presi taki den lobi Gado’ (2 Timoteyus 3:1-5). Iya, na ini a ten disi, bun furu sma no de di lobi Gado nanga den heri ati.

Dati meki wi no musu denki taki wan pikin o kon lobi Gado fu ensrefi. Wi musu leri den pikin fu wi fu lobi Yehovah Gado nanga den heri ati. Fa wi kan du disi?

Taki krin nanga den

Wi kan leri den pikin fu wi fu lobi Gado nanga den heri ati, te wi srefi lobi En nanga wi heri ati (Lukas 6:40). Bijbel e gi wi a rai disi tu, fu di a e taki: „Yu musu lobi Yehovah, yu Gado, nanga yu heri ati, nanga yu heri sili èn nanga ala yu krakti. Èn den wortu disi di mi e komanderi yu tide, musu de na tapu yu ati; èn yu musu poti den go dipi na ini a manpikin fu yu.”—Deuteronomium 6:4-7.

Fa wi kan leri a pikin fu wi fu lobi Gado nanga en heri ati? Na a fosi presi, wi musu kon sabi san de na ini a pikin en ati. Na a di fu tu presi, wi musu meki a pikin kon sabi tu san de na ini wi eigi ati.

Di Yesus Krestes nanga tu fu den disipel fu en ben de na pasi fu go na Ema-us, dan a gi den deki-ati fu taki san de na tapu den ati. Yesus arki fosi san den ben abi fu taki, èn baka dati a sori den san Bijbel e taki, so taki den ben kan frustan sani moro bun. Bakaten den disipel taki: „A no dati meki wi ati ben prisiri trutru di a ben e taki nanga wi?” Yesus ben taki krin nanga den disipel disi (Lukas 24:15-32). Fa wi kan kon sabi fa a pikin fu wi e firi?

No so langa pasa, wan tu papa nanga mama fruteri san yepi den fu kon sabi san de na tapu na ati fu den pikin fu den. Den pikin fu den papa nanga mama disi kon bigi kaba èn den de wan bun eksempre na ini a gemeente. Fu eksempre, Glen di e tan na ini Meksikow, abi fo bigi pikin. * A e taki: „Papa nanga mama musu meki muiti fu kon sabi san de na tapu na ati fu den pikin fu den, fu di a sani dati no e kon fu ensrefi. Mi nanga mi wefi ben e meki ten gi den pikin. Di den ben de tini, dan son leisi wi ben e sidon nanga den te mofoneti, èn wi ben e taki fu ala sortu sani. Te wi ben e nyan makandra nanga den, dan wi ben gwenti fu arki tu fa den ben e taki nanga makandra. Na so wi ben kan kon si efu den ben e taki noso handri na wan fasi di e fiti. Wi ben e leri den san bun, sondro taki den ben sabi dati.”

Efu wi wani taki krin nanga trawan, dan wi musu meki den kon sabi tu san de na ini wi ati. Yesus ben taki: „Wan bun sma e puru bun sani fu a bun gudu na ini en ati, . . . bika san furu na ati, na dati mofo e taki” (Lukas 6:45). Toshiki abi dri pikin di e du furuten diniwroko na ini Yapan. A brada disi e taki: „Mi ben gwenti fu fruteri den fa a du kon taki mi bigin bribi na ini Yehovah, èn san yepi mi fu bribi nanga mi heri ati taki Gado de trutru. Mi ben gwenti fu fruteri den tu fa den sani di mi ondrofeni, gi mi na overtoigi taki den sani di skrifi na ini Bijbel na tru tori, èn taki Bijbel e gi wi a moro bun rai fa fu libi na a yoisti fasi.” Cindy di e libi na ini Meksikow, e taki: „Mi masra ben gwenti fu begi nanga den pikin fu wi. Te den ben e yere fa a ben e taki san de na tapu en ati, dan dati ben gi den na overtoigi taki Yehovah de trutru.”

Na eksempre fu wi de prenspari

A fasi fa wi e tyari wisrefi, prenspari moro den sani di wi e taki, fu di dati e sori den pikin  fu wi o tranga wi lobi Gado. Di sma ben e si fa Yesus Krestes ben e gi yesi na Yehovah, dan dati yepi den fu kon frustan o tranga a lobi Gado. Yesus ben taki: „Fu meki grontapu sabi taki mi lobi a Tata, meki mi e du san a Tata taigi mi fu du.”—Yohanes 14:31.

Gareth, wan Yehovah Kotoigi di e libi na ini Wales, e taki: „Den pikin fu wi musu si taki wi lobi Yehovah èn taki wi e meki muiti fu du sani soleki fa a wani. Fu eksempre, den pikin fu mi e si dati mi de klariklari fu taki dati mi meki wan fowtu, soleki fa Gado e leri wi. Now, den pikin fu mi e pruberi fu du a srefi sani.”

Greg di e libi na ini Australia, e taki: „Wi ben wani den pikin fu wi fu sabi taki a tru anbegi na a moro prenspari sani na ini wi libi. Te wi e bosroiti sortu wroko wi o teki, noso na sortu fasi wi o abi prisiriten, dan wi e luku fosi efu dati no sa tapu wi fu tyari den Kresten frantwortu fu wi. Wi e prisiri fu si fa wi umapikin fu 19 yari di de na ini a yepi-pionierwroko, teki a srefi denki disi.”

Wi e yepi den pikin fu wi fu kon sabi Gado moro bun

Wi no kan lobi noso frutrow wan sma di wi no sabi bun. Na apostel Paulus ben wani den Kresten na ini Filipi fu kon abi moro lobi gi Yehovah, èn fu dati ede a skrifi den: „Disi na san mi e tan begi, taki unu kan sori lobi moro nanga moro, èn taki unu kan abi soifri sabi èn ala koni fu man si sani krin” (Filipisma 1:9). Falconerio di e libi na ini Peru, abi fo pikin. A e taki: „Fu di mi e leisi èn e studeri Bijbel doronomo nanga den pikin fu mi, meki a bribi fu den e kon moro tranga. Son leisi mi no ben studeri nanga den, èn mi ben e si fa a bribi fu den ben e kon moro swaki.” Gary di e libi na ini Australia, e taki: „Nofo tron mi e taki nanga den pikin fu mi fu den buweisi di e sori taki Bijbel profeititori e kon tru. Mi e sori den tu sortu wini den sa kisi te den e hori densrefi na den gronprakseri fu Bijbel. A moro prenspari sani di yepi den fu kisi wan moro tranga bribi, na a studeri di wi e studeri Bijbel doronomo.”

Te wan pikin e kisi leri na wan prisiri fasi èn na wan lespeki fasi sosrefi, dan den sani di a e leri sa doro en ati moro makriki (Yakobus 3:18). Shawn nanga Pauline di e libi na ini  Ingrisikondre, abi fo pikin. Den e taki: „Te wi e studeri Bijbel nanga den pikin fu wi, dan wi e pruberi fu no bari den, awansi den e dyugudyugu pikinso. Wi ben e studeri nanga den na difrenti fasi. Son leisi wi ben e meki den pikin srefi taki san den ben wani studeri. Wi ben e drai den video di na organisâsi fu Yehovah tyari kon na doro. Son leisi wi ben e drai wan pisi fu a video ete wan leisi, noso wi ben e stop a video fu gi den pikin okasi fu taki fu den sani di den ben si.” Kim, wan tra mama di e libi tu na ini Ingrisikondre, e taki: „Mi e sreka misrefi bun fosi mi e studeri nanga den pikin fu mi, so taki mi kan aksi den sani di sa meki den denki bun. Wi lobi fu studeri nanga makandra, èn ala ten wan sani de fu lafu.”

Yepi den fu abi bun mati

Te den pikin fu wi gwenti fu abi demakandra nanga sma di lobi Gado, dan a sa moro makriki gi den fu lobi Yehovah èn fu warderi a tru anbegi. Kande a no makriki fu seti sani so taki den pikin fu wi kan taki noso prei nanga trawan di de wan bun eksempre gi den. Ma a sani disi sa tyari trutru wini kon! Boiti dati, a bun fu gi den pikin fu wi okasi fu abi demakandra nanga Yehovah Kotoigi di de na ini a furu ten diniwroko. Furu Kresten di de na ini a furu ten diniwroko, du dati fu di den ben abi demakandra nanga fayafaya futuboi fu Gado. Wan sisa di tron wan zendeling, e taki: „Mi papa nanga mama ben gwenti fu kari pionier fu kon nyan na wi oso. Fu di a ben de krin fu si taki den sma disi de koloku, meki mi ben wani dini Yehovah na a srefi fasi tu.”

A no de fu taki dati pikin kan leri bun sani nanga takru sani. Dati meki wi leki papa nanga mama musu sabi fa fu yepi den pikin fu kakafutu gi takru kompe (1 Korentesma 15:33). Wi musu sabi fa fu leri yonguwan fu no abi demakandra nanga sma di no lobi Yehovah èn di no sabi en (Odo 13:20). Shawn di wi ben kari na fesi, e taki: „Wi leri den pikin fu wi fu sori switifasi gi tra pikin na skoro, ma baka skoro den no musu suku fu abi moro demakandra nanga den pikin disi. Den pikin fu wi ben frustan fu san ede den no musu teki prati na prisiri sani di a skoro e orga.”

A de prenspari fu gi den pikin leri

Te wi e leri den pikin fu fruteri trawan fu a bribi fu den, dan dati sa meki en moro makriki gi den fu sori trawan taki den lobi Gado. Mark, di e libi na ini Amerkankondre, e taki: „Wi ben wani taki den boi fu wi musu sabi taki den ben kan fruteri trawan fu a bribi fu den na ala okasi. Den no musu du dati soso te den de na ini a preikiwroko. Sobun, te wi e go meki prisiri na wan presi, dan wi e tyari Bijbel nanga Bijbel publikâsi tu, èn wi e fruteri den sma drape fu a bribi fu wi. Den boi fu wi lobi en trutru fu gi kotoigi na a fasi disi. Te wi e taki nanga den sma, dan den boi e taki tu fu a bribi fu den.”

Na owru apostel Yohanes yepi furu sma fu kon abi wan tranga lobi gi Gado. A ben taki fu den sma disi: „Nowan tra sani e gi mi moro prisiri leki te mi e yere taki den pikin fu mi e tan waka na ini a waarheid” (3 Yohanes 4). Te wi e leri den pikin fu wi fu lobi Gado nanga den heri ati, dan a no de fu taki dati wi srefi sa prisiri tu.

[Futuwortu]

[Prenki na tapu bladzijde 9]

Wi musu meki ten fu taki krin fu a bribi fu wi nanga den pikin fu wi

[Prenki na tapu bladzijde 10]

Leri den pikin fu yu fu sori taki den lobi Gado

[Sma di abi a reti fu a prenki]

Courtesy of Green Chimneys Farm