Fu san ede Gado e gi pasi taki sma e du ogri?

YU KAN si na ala sei taki sma e du ogri èn taki sma e pina. Te orloku de, dan srudati nanga sma di no e teki prati na a feti, e lasi den libi. Bun furu ogri-ati sani e pasa. Kande sma desko yu no so langa pasa, noso kande sma no handri bun nanga yu. Kande den sani disi meki taki yu aksi yusrefi: ’Fu san ede Gado e gi pasi taki sma e du ogri?’

Furu sma aksi densrefi a sani disi. Sowan 3600 yari pasa, Yob, wan getrow futuboi fu Gado ben aksi: „Fu san ede den ogrisma e tan na libi?” (Yob 21:7) Yeremia, a profeiti fu a di fu seibi yarihondro, ben e broko en ede nanga den ogri di den kondreman fu en ben e du. Fu dati ede a ben taki: „Fu san ede a pasi fu den ogrisma waka bun? Fu san ede ala den sma di e tori trawan de sondro broko-ede?” (Yeremia 12:1) Yob nanga Yeremia ben sabi taki Gado de regtfardiki. Ma toku den ben aksi densrefi fu san ede so furu ogri e pasa na grontapu. Kande yu e aksi yusrefi a sani disi tu.

Son sma e taki dati na Gado e meki taki ogri e pasa èn taki sma e pina. Tra sma e aksi densrefi: ’Efu Gado abi ala makti, efu a de regtfardiki, èn efu a de wan lobi-ati Gado, dan fu san ede a no e tyari wan kaba kon na ogridu nanga pina? Fu san ede a gi pasi taki sma e du ogri te na a dei fu tide?’ A tra artikel di e kon sa poti prakseri na den aksi disi èn sosrefi na tra tumusi prenspariwan.

[Sma di abi a reti fu a prenki na tapu bladzijde 3]

AP Photo/Adam Butler