„Un Tata abi sari-ati”

„Tan abi sari-ati, neleki fa un Tata abi sari-ati.”​—LUKAS 6:36.

1, 2. Fa den sani di Yesus ben taigi den leriman fu Wet, den Fariseiman, nanga den bakaman fu en, e sori taki a bun fu sori sari-ati gi trawan?

A WET di Gado gi Moses ben abi sowan 600 markitiki nanga wet. Aladi den Israelsma ben musu hori densrefi na a Wet di Gado gi Moses, toku a ben de prenspari srefisrefi taki den ben e sori sari-ati gi trawan. Luku san Yesus ben taigi den Fariseiman di no ben abi sari-ati gi trawan. Na tu okasi a piri-ai gi den, èn a taigi den san Gado ben gi leki komando. A taigi den: „Mi wani sari-ati, mi no wani srakti-ofrandi” (Mateyus 9:10-13; 12:1-7; Hosea 6:6). Yesus ben taki na a kaba fu a diniwroko fu en: „Helu fu unu, un leriman fu Wet nanga Fariseiman, un hoigriman! Bika unu e gi a di fu tin pisi fu a menti-wiwiri nanga a dille-wiwiri nanga a dyira, ma unu e frigiti den moro prenspari sani fu a Wet, namku retidu nanga sari-ati nanga getrowfasi.”—Mateyus 23:23.

² A no de fu taki, dati Yesus ben feni en prenspari trutru taki sma ben e sori sari-ati gi trawan. A ben taigi den bakaman fu en: „Tan abi sari-ati, neleki fa un Tata abi sari-ati” (Lukas 6:36). Ma fu man „waka baka na eksempre fu Gado”, dan wi musu kon sabi san na trutru sari-ati (Efeisesma 5:1). Boiti dati, te wi e frustan sortu wini wi sa kisi te wi e sori sari-ati gi trawan, dan wi sa meki moro muiti fu sori sari-ati.

Sori sari-ati gi den wan di de na nowtu

3. Fu san ede wi musu luku na eksempre fu Yehovah fu kon sabi san na trutru sari-ati?

³ A psalm skrifiman ben skrifi: „Yehovah abi switifasi nanga sari-ati; a no e atibron esi-esi èn a abi lobi bun-ati pasa marki. Yehovah bun gi ala sma, èn a e sori sari-ati gi ala sani di a meki” (Psalm 145:8, 9). Yehovah na „a Tata di abi bigi sari-ati, èn en na a Gado fu ala trowstu” (2 Korentesma 1:3). Wan sma di e sori sari-ati gi wan trawan, e handri na wan lobi-ati fasi nanga a sma dati. Sari-ati na wan fu den moro prenspari fasi fu Gado. Te wi e luku na eksempre fu en èn den rai di a e gi wi, dan wi sa kon sabi san na trutru sari-ati.

4. San Yesaya 49:15 e leri wi fu sari-ati?

⁴ Soleki fa Yesaya 49:15 e sori, dan Yehovah e taki: „Wan uma kan frigiti en pikin di a abi na bobi, so taki a no ben sa firi sari gi a manpikin fu en bere?” Na ini Psalm 145: 8, 9 a psalm skrifiman gebroiki tra Hebrew wortu di abi fu du nanga a Hebrew wortu di vertaal dyaso nanga „firi sari gi”. Na ini a tekst dati, a gebroiki den wortu disi makandra nanga a wortu „sari-ati”. Bijbel e  agersi a sari-ati di Yehovah e sori gi sma, nanga a lobi di wan mama abi gi a pikin fu en di de na bobi. Kande angri e kiri a pikin, noso kande wan tra sani e du en. Fu di a mama abi sari-ati nanga a pikin, meki a e gi a pikin san a abi fanowdu. Na so Yehovah e firi tu te a e sori sari-ati gi sma.

5. Fa Yehovah sori „bun furu sari-ati” gi Israel?

⁵ A bun te wi abi sari-ati nanga sma di de na nowtu, ma a moro bun te wi e du wan sani fu yepi den sma disi. Luku san Yehovah du di den anbegiman fu en ben de na ini katibo na Egepte sowan 3500 yari pasa. A ben taigi Moses: „A no de fu taki, dati mi si fa mi pipel e pina na ini Egepte, èn mi yere fa den e bari krei fu di sma e dwengi den fu wroko, iya, mi sabi heri bun sortu pen den e firi. Mi o saka go fu frulusu den fu den Egeptesma, èn mi o puru den fu a kondre dati fu tyari den go na wan bun èn bigi kondre. Mi o tyari den go na wan kondre di lai merki nanga oni” (Exodus 3:7, 8). Sowan 500 yari baka dati, Yehovah frulusu den Israelsma fu Egepte, èn a memre den fu a sani disi: „Mi na a sma di tyari Israel komoto fu Egepte. Na mi frulusu unu fu den Egeptesma èn fu ala den tra kownukondre di ben e kwinsi unu” (1 Samuel 10:18). Fu di den Israelsma no ben e hori densrefi moro na den regtfardiki markitiki fu Gado, meki nofo tron den ben e kon na ini problema. Ma toku, Yehovah ben abi sari-ati nanga den, èn ibri tron baka a yepi den (Krutuman 2:11-16; 2 Kroniki 36:15). A sani disi e sori taki wi lobi-ati Gado e yepi sma di de na nowtu, sma di de na ini situwâsi pe ogri kan miti den, noso sma di de na ini problema. Yehovah abi „bun furu sari-ati”.—Efeisesma 2:4.

6. Fa Yesus Krestes sori sari-ati leki en Tata?

⁶ Di Yesus Krestes ben de na grontapu, dan a sori sari-ati soifri leki en Tata. San Yesus du di tu breniman begi en fu yepi den? Den man disi ben taki: „Masra, Manpikin fu David, abi sari-ati nanga wi.” Den man disi ben e begi Yesus fu du wan wondru so taki den ben kan si baka. Yesus du a wondru dati, ma a no du dati soso fu di den man ben aksi en. Bijbel e taki: „Fu di Yesus ben sari den, meki a fasi den ai; wantewante den ben kan si” (Mateyus 20:30-34). Fu di Yesus ben abi sari-ati nanga sma, meki a du furu wondru di tyari frulekti kon gi breniwan, sma di ben abi ogri-yeye na den tapu, gwasiman, èn papa nanga mama di ben abi siki pikin.—Mateyus 9:27; 15:22; 17:15; Markus 5:18, 19; Lukas 17:12, 13.

7. San na eksempre fu Yehovah Gado nanga en Manpikin e leri wi fu sari-ati?

⁷ Na eksempre fu Yehovah Gado nanga Yesus Krestes e sori taki tu sani de fanowdu fu man sori sari-ati gi trawan. Wi musu firi sari gi den wan di abi yepi fanowdu, èn wi musu du wan sani fu yepi den sma disi. Ala den tu sani disi de fanowdu fu man sori sari-ati gi trawan. Na ini Bijbel, sari-ati furu tron abi fu du nanga den bun sani di sma e du fu di den e broko den ede nanga trawan di de na nowtu. Ma fa wan sma musu sori sari-ati te a abi fu du nanga wan krutu afersi? A de so taki wi no musu strafu sma fu di wi feni taki dati a no wan bun sani fu du?

Yehovah e sori sari-ati gi sma di sondu

8, 9. Fa Gado sori sari-ati gi David baka di a sondu nanga Batseiba?

⁸ Luku san pasa baka di a profeiti Natan krutu Kownu David fu Israel fu owruten, fu di a ben du sutadu nanga Batseiba. David ben abi berow, èn a ben begi: „Sori taki yu feni mi bun, o Gado, akruderi yu lobi bun-ati. Figi den sondu fu mi puru, akruderi den sari-ati fu yu di de pasa marki. Wasi den fowtu fu mi puru krinkrin, èn krin mi fu mi sondu srefi. Bika mi sabi den fowtu fu mi, èn mi sondu de na mi fesi doronomo. Teige yu wawan mi sondu, san no bun na ini yu ai, na dati mi du.”—Psalm 51:1-4.

 ⁹ David ben sari srefisrefi. Yehovah gi en pardon gi a sondu di a du, èn a no gi en nanga Batseiba a strafu di den ben musu kisi. Soleki fa a Wet di Gado ben gi Moses ben taki, dan David nanga Batseiba ben musu kisi dedestrafu (Deuteronomium 22:22). Den ben mag tan na libi, ma den ben o abi fu ondrofeni sonwan fu den takru bakapisi fu a sondu fu den (2 Samuel 12:13). Te Gado e sori sari-ati gi sma, dan dati wani taki dati a e gi den pardon gi den sondu fu den. Ma toku a sa gi den a yoisti strafu.

10. Aladi a de so taki Yehovah e sori sari-ati te a e krutu sma, toku a no de fruplekti fu sori sari-ati gi wi. Fu san ede dati de so?

¹⁰ Fu di „wán man [Adam] meki sondu kon na grontapu” èn fu di „a pai di sma e kisi gi sondu na dede”, meki ala sma e frudini fu dede (Romesma 5:12; 6:23). Wi kan de nanga tangi trutru taki Yehovah e sori sari-ati gi wi te a e krutu wi! Ma wi no musu denki taki Gado de fruplekti fu sori sari-ati gi wi. Deuteronomium 32:4 e taki: „[Yehovah] e du ala sani na wan reti fasi.” Te Gado e sori sari-ati gi sma, dan ala ten a e hori ensrefi na den regtfardiki markitiki fu en.

11. Fa Yehovah sori taki a lobi retidu, di a krutu David gi a sondu di a du nanga Batseiba?

¹¹ Fosi Yehovah bosroiti taki David nanga Batseiba no ben o kisi dedestrafu, dan a ben musu gi den pardon gi a sondu fu den. Den krutuman fu Israel no ben abi a reti fu du dati. Efu na den ben musu krutu na afersi dati, dan den ben o abi fu gi den dedestrafu. Na dati a Wet ben e taki. Ma fu di Yehovah ben meki wan frubontu nanga David, meki Yehovah ben wani si efu wan bun reide ben de fu gi David pardon gi a sondu fu en (2 Samuel 7:12-16). Fu dati ede, Yehovah Gado, „a Sma di e krutu heri grontapu”, èn „di e ondrosuku na ati”, bosroiti fu krutu na afersi ensrefi (Genesis 18:25; 1 Kroniki 29:17). Gado ben sabi soifri san ben de na ini na ati fu David, èn a ben kan si efu a ben abi trutru berow. Na so a ben kan gi en pardon gi a sondu fu en.

12. San sondu libisma kan du fu meki Gado sori sari-ati gi den?

¹² A sari-ati di Yehovah e sori gi sma e puru wi na ini katibo fu a sondu di wi kisi, èn a sani dati e kruderi nanga Yehovah en retidu. Yehovah wani gi wi pardon gi den sondu fu wi, sondro taki a e pasa den regtfardiki markitiki fu en. Fu dati ede, a gi en Manpikin, Yesus Krestes, leki wan frulusu-ofrandi. Dati ben de a moro bun fasi fa wan sma ben kan sori sari-ati (Mateyus 20:28; Romesma 6:22, 23). Efu wi wani taki Gado sori sari-ati gi wi, so taki wi no kisi strafu gi den sondu fu  wi, dan wi musu ’bribi na ini a Manpikin’.—Yohanes 3:16, 36.

Wan Gado di abi sari-ati èn di lobi retidu

13, 14. A de so taki a sari-ati di Gado e sori gi sma e tapu en fu du san reti? Fruklari dati.

¹³ Soleki fa wi si, dan Yehovah no e pasa den regtfardiki markitiki fu en te a e sori sari-ati. Ma a de so taki a sari-ati di Yehovah e sori gi sma, e tapu en fu du san reti ala ten? Nôno.

¹⁴ Yehovah ben meki a profeiti Hosea taigi den Israelsma: „Mi sa teki yu fu tron mi wefi fu têgo, èn mi sa teki yu leki mi wefi na ini regtfardikifasi, na ini retidu, nanga lobi, èn nanga sari-ati” (Hosea 2:19). Den wortu disi e sori krin taki te Yehovah e sori sari-ati gi sma, dan ala ten dati e kruderi nanga den tra bun fasi fu en, soleki retidu. Yehovah na „wan Gado di abi sari-ati nanga switifasi, . . . di e gi sma pardon te den meki fowtu, te den du ogri, èn te den du sondu. Ma a no sa puru a strafu fu den wan di meki fowtu; a no sa du dati kwetikweti” (Exodus 34:6, 7). Yehovah na wan Gado di abi sari-ati èn di lobi retidu. Bijbel e taki fu en: „A Klepston, den sani di a e du bun dorodoro, bika a e du ala sani na wan reti fasi” (Deuteronomium 32:4). Neleki fa Gado e sori retidu na wan volmaakti fasi, na so a e sori sari-ati na wan volmaakti fasi tu. Den ala tu prenspari a srefi, èn noiti a sari-ati di Yehovah e sori gi sma, e tapu en fu du san reti. Na presi fu dati, a e sori ala den tu fasi disi sondro fu pasa den regtfardiki markitiki fu en.

15, 16. (a) Fa wi du sabi taki Gado e handri na wan reti fasi ala ten? (b) Te Yehovah sa krutu na ogri sistema disi, dan sortu dyaranti anbegiman fu en sa abi?

¹⁵ Yehovah e handri na wan reti fasi ala ten, srefi te a musu strafu sma. Nofo tron retidu abi fu du nanga a krutu di sma e kisi fu di den du ogri so taki den kan kisi a strafu di den e frudini fu kisi. Ma te Gado e sori retidu, dan dati kan tyari frulusu kon tu gi den wan di de getrow. Fu eksempre, di a pori den ogrisma na ini den foto Sodom nanga Gomora, dan a famiri-edeman Lot nanga den tu umapikin fu en tan na libi.—Genesis 19:12-26.

¹⁶ Wi kan abi a dyaranti taki te Yehovah o krutu na ogri sistema disi, dan a sa frulusu a „bigi ipi” tru anbegiman, di ’wasi den langa krosi fu den èn di meki den kon weti na ini a brudu fu a Pikin Skapu’. Sobun, den sa „komoto na ini a bigi banawtu”.—Openbaring 7:9-14.

Fu san ede wi musu sori sari-ati gi trawan?

17. Fu san ede a de prenspari fu sori sari-ati gi trawan?

¹⁷ Den eksempre fu Yehovah nanga Yesus Krestes e sori wi krin san na trutru sari-ati. Odo 19:17 e sori wi o prenspari a de fu sori sari-ati gi trawan. Drape skrifi: „A sma di e yepi den mofinawan, e leni Yehovah, èn A sa pai a sma dati gi san a du.” Yehovah breiti te wi e sori sari-ati gi trawan, neleki fa En nanga en Manpikin e du  dati (1 Korentesma 11:1). Èn te wi e sori sari-ati gi sma, dan den o wani du a srefi.—Lukas 6:38.

18. Fu san ede wi musu meki muiti fu sori sari-ati gi trawan?

¹⁸ Wan sma di e sori sari-ati gi trawan, e sori difrenti bun fasi. A sma dati e sori switifasi, lobi, nanga bunfasi gi trawan. Wan prenspari reide fu san ede wi e sori sari-ati gi trawan, na fu di wi e broko wi ede nanga den. Soleki fa wi si, dan a sari-ati di Yehovah abi gi sma no e tapu en fu du san reti. Ma boiti dati, Yehovah no e atibron esi, èn a e gi sondusma nofo okasi fu sori berow, fu di a abi pasensi nanga den (2 Petrus 3:9, 10). Sobun, wan sma di e sori sari-ati gi trawan, na wan sma di abi langa pasensi. Fu di sari-ati abi fu du nanga furu difrenti bun fasi, sosrefi nanga difrenti froktu fu a yeye fu Gado, meki wi kan kweki den fasi disi te wi e sori sari-ati gi trawan (Galasiasma 5:22, 23). Wi musu meki muiti trutru fu sori sari-ati gi trawan!

„Koloku fu den sma di abi sari-ati gi trawan”

19, 20. Fa sari-ati e wini krutu?

¹⁹ A disipel Yakobus e fruteri wi fu san ede wi musu abi sari-ati gi trawan ala ten. A ben skrifi: „Sari-ati e wini krutu” (Yakobus 2:13b). Yakobus ben taki fu a sari-ati di wan anbegiman fu Yehovah e sori gi trawan. Sari-ati e wini krutu fu di te a ten doro taki wan sma musu „gi Gado frantwortu”, dan Yehovah sa hori na prakseri taki a sma disi ben sori sari-ati gi trawan. Yehovah sa gi a sma disi pardon nanga yepi fu a frulusu-ofrandi fu En Manpikin (Romesma 14:12). A no de fu taki dati wan fu den reide fu san ede Gado sori sari-ati gi David di ben du sondu nanga Batseiba, na fu di David srefi ben de wan sma di ben lobi fu sori sari-ati gi trawan (1 Samuel 24:4-7). Ma „te wan sma no abi a gwenti fu sori sari-ati gi trawan, dan Gado no sa sori sari-ati gi a sma dati te a sa krutu en” (Yakobus 2:13a). Fu dati ede, a no e fruwondru wi taki sonwan fu den sma di Gado e si leki sma di „musu dede”, na sma „di no abi sari-ati”!—Romesma 1:31, 32.

²⁰ Yesus ben taki na ini a Bergitaki fu en: „Koloku fu den sma di abi sari-ati gi trawan, bika sma o abi sari-ati gi den” (Mateyus 5:7). Den wortu disi e sori krin taki den sma di wani taki Gado sori sari-ati gi den, musu sori sari-ati tu gi trawan! Na artikel di e kon sa tyari kon na krin fa wi kan sori sari-ati gi trawan ala ten.

San yu leri?

• San na sari-ati?

• Fa wan sma e sori sari-ati gi trawan?

• Fu san ede wi kan taki dati Yehovah na wan Gado di abi sari-ati èn di lobi retidu?

• Fu san ede wi musu sori sari-ati gi trawan?

[Aksi fu a tori disi]

[Prenki na tapu bladzijde 21]

Neleki fa wan mama e broko en ede na wan lobi-ati fasi nanga a beibi fu en, na so Yehovah e broko en ede nanga den wan di de na nowtu

[Prenki na tapu bladzijde 23]

Fa den wondru fu Yesus e leri wi fu abi sari-ati?

[Prenki na tapu bladzijde 24]

A de so taki Yehovah no handri na wan reti fasi di a sori sari-ati gi David?

[Prenki na tapu bladzijde 25]

Te Gado e sori sari-ati gi sondu libisma, dan a no e pasa den regtfardiki markitiki fu en