Meki muiti fu du a wani fu Gado na ini a ten disi
Meki muiti fu du a wani fu Gado na ini a ten disi
„[Krestes] dede gi ala sma so taki den sma di e libi, no ben sa libi gi densrefi moro.”—2 KORENTESMA 5:15.
1. Fruteri san wan zendeling ondrofeni na ini a diniwroko fu en.
„BAKA di a borgufeti na ini wan Afrikan dorpu ben kon na wan kaba, dan wi ben de den fosi sma di rèi go drape nanga oto.” Na so wan zendeling di nen Aaron e taki. * A brada disi e taki moro fara: „Wi no ben yere noti fu a pikin gemeente di ben de drape, èn wi ben musu go yepi den brada nanga sisa drape. Boiti nyanyan, krosi, nanga Bijbel publikâsi, wi tyari a video Jehovah’s Getuigen — De organisatie achter de naam. * Wi drai a video disi tapu telefisi na ini wan bigi kampu di meki fu drei grasi, èn a kampu dati ben kon de leki a kino-oso fu a dorpu. So furu sma kon luku a video, taki wi ben musu drai en tu leisi. Ibri leisi te wi ben drai a video, someni sma ben wani studeri Bijbel. A no de fu taki, dati a muiti di wi meki ben abi bakapisi.”
2. (a) Fu san ede Kresten e bosroiti fu gebroiki den libi fu dini Gado? (b) Na sortu aksi wi sa poti prakseri now?
2 Fu san ede Aaron nanga den mati fu en bosroiti fu du so wan muilek wroko? Fu di den de nanga tangi gi a frulusu-ofrandi fu Yesus Krestes, meki den gi den libi abra na Gado, èn den wani gebroiki en fu du a wani fu Gado. Neleki den brada disi, ala dopu Kresten bosroiti fu ’no libi gi densrefi moro’, ma fu du ala san den man „fu a bun nyunsu ede” (2 Korentesma 5:15; 1 Korentesma 9:23). Den Kresten dati sabi taki te a sistema disi sa kisi pori, dan ala moni nanga biginen di sma abi na ini a grontapu disi, no sa warti noti. Sobun, fu di den de gosontu, meki den wani gebroiki a krakti fu den fu du a wani fu Gado (Preikiman 12:1). Fa wi kan du disi? Fa wi kan kisi a deki-ati nanga a krakti fu du dati? Na sortu fasi wi kan du diniwroko gi Gado?
Du sani di sa yepi yu fu tan go na fesi
3. San na wan tu fu den fosi sani di wi musu du efu wi wani du a wani fu Gado?
3 Tru Kresten sabi taki den musu du a wani fu Gado den heri libi langa. Nofo tron den e bigin go tapu a Theokrasia Diniwroko-skoro, den e leisi Bijbel ibri dei, den e teki prati na a preikiwroko, èn te fu kaba den e teki dopu. Te wi e go na fesi, dan wi e memre den wortu fu na apostel Paulus di ben taki: „Prakseri bun fu den sani disi; denki soso dati wawan, so taki ala sma kan si taki yu e go na fesi” (1 Timoteyus 4:15). Wi no e go na fesi fu gi wisrefi grani, ma fu sori taki wi abi a fasti bosroiti fu du a wani fu Gado, fu di wi lobi en. Te wi e du dati, dan wi e sori taki wi wani Gado fu tiri wi na ini ala san wi e du, èn a sa du dati moro bun leki wi.—Psalm 32:8.
4. San kan yepi wi fu no broko wi ede tumusi?
4 Ma te wi e tweifri, noso te wi e denki taki wi no sa man dini Gado soleki fa a wani, dan dati kan tapu wi fu go na fesi na ini a diniwroko fu Gado (Preikiman 11:4). Sobun, fu man dini Gado nanga trawan na wan fasi di e gi wi trutru prisiri, dan a kan de fanowdu taki wi e leri fu no broko wi ede tumusi. Fu eksempre, Erik ben e prakseri fu go dini na ini wan gemeente pe sma e taki wan tra tongo. Ma a ben e broko en ede nanga wan tu sani. A ben e aksi ensrefi: ’Mi o man feni en nanga den sma drape? Mi sa lobi den brada nanga sisa? Den sa lobi mi?’ Erik e taki: „Te fu kaba, mi kon si taki mi no ben musu poti tumusi furu prakseri na misrefi, ma taki mi ben musu denki den brada nanga sisa. Mi bosroiti taki mi no ben o broko mi ede moro nanga den tori dati. Na presi fu dati, mi ben o du ala san mi man fu yepi trawan. Mi begi Gado fu yepi mi, èn mi go na a tra gemeente. Now mi e prisiri fu dini na ini a gemeente dati” (Romesma 4:20). Iya, o moro wi e gi wisrefi fu dini Gado nanga trawan, o moro wi sa prisiri, èn o moro wi sa de koloku.
5. Fu san ede wi musu teki koni bosroiti efu wi wani du a wani fu Gado? Fruteri wan ondrofenitori.
5 Efu wi wani du a wani fu Gado, dan wi musu teki koni bosroiti. A bun te wi no meki tumusi furu paiman, fu di dati kan meki wi tron wan srafu fu a sistema disi, èn wi no o abi nofo ten fu du a wroko fu Gado. Bijbel e memre wi: „A leniman na a futuboi fu a sma di e leni en” (Odo 22:7). Te wi e frutrow tapu Yehovah èn te wi e poti na anbegi fu en na a fosi presi na ini wi libi, dan dati sa yepi wi fu sabi san na den moro prenspari sani. Luku a tori fu Guoming. A brada disi nanga en tu sisa e libi nanga den mama na ini wan kontren pe oso diri èn pe a muilek fu feni wroko. Ma den e gebroiki a moni fu den na wan koni fasi, èn den e yepi makandra fu pai den kostu fu den. Na so den man sorgu densrefi, srefi te sonwan fu den no abi wan wroko. Guoming e taki: „Son leisi sonwan fu wi no abi moni. Ma toku, wi kan tan pionier èn wi e tan sorgu bun gi wi mama. Wi breiti taki a mama fu wi no wani taki wi musu tapu nanga a diniwroko fu wi, soso fu man gi en moimoi sani.”—2 Korentesma 12:14; Hebrewsma 13:5.
6. Sortu eksempre e sori fa wi kan tyari kenki kon na ini wi libi so taki wi kan du a wani fu Gado?
6 Kande now yu e gebroiki furu fu yu ten fu meki moni na ini grontapu, noso fu du tra grontapu sani. Ma efu yu wani poti a wani fu Gado na a fosi presi na ini yu libi, dan yu sa abi fu tyari bigi kenki kon. Nofo tron a e teki ten fu tyari den kenki disi kon, èn te sani no e waka bun na ini a bigin, dan yu no musu denki taki yu no o man doro a marki fu yu. Luku a tori fu Koichi. A brada disi ben abi a takru gwenti fu gebroiki furu fu en ten fu meki prisiri. Di Koichi ben de wan yongu boi, dan a ben studeri Bijbel kaba, ma furu yari langa a ben e gebroiki furu fu en ten fu prei video game. Wan dei, Koichi taigi ensrefi: ’San mi e du? Mi pasa 30 yari kaba, ma toku mi no e du nowan enkri bun sani nanga mi libi!’ Koichi bigin studeri Bijbel baka, èn a teki a yepi di a gemeente gi en. Aladi a no ben makriki gi en fu tyari kenki kon, toku a horidoro. Fu di a begi Gado doronomo èn fu di trawan gi en deki-ati, meki te fu kaba a ben man tapu nanga a takru gwenti fu en (Lukas 11:9). Now Koichi e dini leki wan dinari ini a diniwroko, èn a de koloku.
Wi musu kon sabi san na den moro prenspari sani
7. Fu san ede wi musu sabi san na den moro prenspari sani te wi e du a wroko fu Gado?
7 Wi musu du ala san wi man fu du a wani fu Gado. Noiti wi musu kibri skin, èn noiti wi musu lesi fu dini Gado (Hebrewsma 6:11, 12). Toku Yehovah no wani taki wi wroko so hebi gi en taki wi e kon weri so te taki wi no man du noti moro. Èn a no wani taki wi e kon bruya, noso taki wi e lasi-ati. Te wi abi a sakafasi fu frustan taki wi wawan no man du a wroko fu En, dan na so fasi wi e gi en glori èn wi e sori taki wi sabi san wi man du èn san wi no man du (1 Petrus 4:11). Yehovah e pramisi taki a sa gi wi a krakti di wi abi fanowdu fu man du a wani fu en. Ma wi no musu fruwakti tumusi furu fu wisrefi. Sobun, wi no musu du sani di Gado no e fruwakti fu wi (2 Korentesma 4:7). Efu wi wani tan dini Gado sondro fu kon weri dorodoro, dan wi musu gebroiki wi krakti na a yoisti fasi.
8. San pasa di wan yongu Kresten pruberi fu poti a grontapuwroko fu en na a fosi presi, aladi a ben e pionier?
8 Fu eksempre, tu yari langa, Ji Hye, wan pionier na ini Owstu Asia, ben abi wan grontapuwroko di ben e teki furu fu en ten. A e taki: „Mi ben wani du furu gi Yehovah, ma mi ben wani poti furu prakseri tu na a grontapuwroko fu mi. Mi ben e sribi feifi yuru nomo wan dei. Te fu kaba, mi no ben abi krakti moro fu teki prati na a tru anbegi, èn a diniwroko no ben e gi mi prisiri moro.” Fu di Ji Hye ben wani dini Yehovah nanga en ’heri ati, en heri sili, nanga en heri frustan’, meki a go suku wan wroko di no ben e teki so furu fu en ten (Markus 12:30). Ji Hye e taki: „Aladi mi famiri ben e dwengi mi fu meki furu moni, toku mi meki muiti fu poti Gado na a fosi presi na ini mi libi. Te nanga now, a moni di mi e meki, nofo fu bai den moro prenspari sani di mi abi fanowdu, soleki bun krosi. Èn mi breiti so te taki mi man sribi bun! Mi e prisiri nanga a diniwroko fu mi, èn mi kon abi wan moro bun matifasi nanga Yehovah. Dati e kon fu di mi no e poti so furu prakseri na grontapu sani.”—Preikiman 4:6; Mateyus 6:24, 28-30.
9. Fa a muiti di wi e du kan tyari wini kon gi sma di wi e miti na ini a preikiwroko?
9 A no ala sma kan dini Gado leki wan furuten preikiman. Kande yu no man go na ini a furuten diniwroko fu di yu kon owru, fu di yu siki, noso fu di wan tra sani e tapu yu. Efu dati de so, dan hori na prakseri taki Yehovah e warderi en taki yu e dini en na wan getrow fasi nanga yu heri ati (Lukas 21:2, 3). Fu dati ede, nowan fu wi musu frigiti taki a muiti di wi e meki kan tyari wini kon gi trawan, awansi wi no man du furu. Fu eksempre, kande wi miti difrenti sma na ini a preikiwroko wan leisi, ma nowan sma no ben wani kon sabi moro fu a boskopu. Baka te wi gowe, dan a kan taki den sma sa tan taki fu a wroko fu wi omeni dei baka dati, èn a kan taki srefi den sma di no ben arki wi sa du dati! Wi no e fruwakti taki ala sma di e arki wi sa gi yesi na a bun nyunsu, ma wan tu fu den sa gi yesi (Mateyus 13:19-23). Kande son sma sa wani arki bakaten, te a situwâsi na grontapu noso na ini den eigi libi kenki. Awansi fa a no fa, te wi e du san wi man na ini a preikiwroko, dan wi e du a wroko fu Gado, iya, wi e „wroko makandra nanga Gado”.—1 Korentesma 3:9.
10. Sortu okasi ala sma na ini a gemeente abi?
10 Boiti dati, wi alamala kan yepi den famiriman fu wi èn sosrefi den Kresten brada nanga sisa fu wi (Galasiasma 6:10). Den bun sani di wi e taki èn den sani di wi e du kan abi bigi krakti tapu trawan, èn den no sa frigiti dati makriki (Preikiman 11:1, 6). Te owruman nanga dinari ini a diniwroko e du a wroko fu den fayafaya, dan dati e tranga a gemeente èn a wroko e go na fesi. Wi kan abi a dyaranti taki, te wi abi „furu fu du na ini a wroko fu Masra”, dan a wroko fu wi „no sa de fu soso”.—1 Korentesma 15:58.
Wi kan du furuten diniwroko gi Gado
11. Sortu tra okasi de fu du diniwroko gi Gado, boiti den sani di wi kan du na ini a gemeente?
11 Wi leki Kresten breiti taki wi de na libi, èn wi wani gi Gado glori na ini ala san wi e du (1 Korentesma 10:31). Te wi e preiki a bun nyunsu fu a Kownukondre na wan getrow fasi, èn te wi e leri trawan fu hori densrefi na ala den komando fu Yesus, dan wi sa kon si taki wi kan du difrenti sortu diniwroko gi Gado di sa gi wi furu prisiri (Mateyus 24:14; 28:19, 20). Boiti taki wi kan wroko makandra nanga a gemeente fu wi, wi kan go dini tu na wan presi pe moro preikiman de fanowdu. Kande wi kan go dini na ini wan tra kontren, na ini wan gemeente pe sma e taki wan tra tongo, noso na ini wan tra kondre. Owruman nanga dinari ini a diniwroko di no trow ete, kan kisi a kari fu go na a Dinariskoro, èn baka dati den kan go dini na ini wan gemeente pe lepi Kresten de fanowdu, na ini den eigi kondre noso na ini wan tra kondre. Trowpaar di e du furuten diniwroko, kan kisi a grani fu go na a Gileadskoro èn baka dati den kan go dini na ini wan tra kondre. Èn ala ten sma de fanowdu fu go yepi na Bethel, èn fu go yepi bow Kownukondre zaal nanga bijkantoro.
12, 13. (a) San sa yepi yu fu bosroiti sortu diniwroko yu kan du gi Yehovah? (b) Fruteri fa na ondrofeni di wi e kisi te wi abi wan spesrutu grani, kan yepi wi fu du tra wroko na ini a tru anbegi.
12 Sortu diniwroko yu musu du gi Gado? Leki wan getrow futuboi fu Yehovah, wi musu suku rai na Yehovah èn na a organisâsi fu en ala ten. A „bun yeye” fu en sa yepi yu fu teki a yoisti bosroiti (Nehemia 9:20). Nofo tron, te wi abi wan spesrutu grani, dan dati e sreka wi gi tra grani, èn te wi kisi ondrofeni nanga koni na ini a wan diniwroko, dan wi sa man gebroiki dati fu du wan tra sortu diniwroko bakaten.
13 Fu eksempre, Dennis nanga en wefi Jenny, gwenti fu yepi bow Kownukondre zaal. Baka di a bigi winti Katrina tyari pori kon na a zuidzei fu Amerkankondre, dan den tu sma disi ben de klariklari fu go yepi nanga a wroko di ben de fu du. Dennis e taki: „Fu di wi gwenti bow Kownukondre zaal, meki wi gebroiki a koni dati fu yepi den brada nanga sisa fu wi. A sani dati gi wi furu prisiri. A naki wi ati trutru fu si fa den sma di wi yepi ben e warderi a wroko di wi du. Furu tra grupu ben gi sma yepi tu, ma sani no waka so bun nanga a wroko fu den. Yehovah Kotoigi meki moro leki 5300 oso di ben broko, èn furu fu den oso disi ben pori krinkrin. Boiti dati, den meki bun furu Kownukondre zaal. Sma e si a wroko di den brada nanga sisa disi du, èn now den wani kon sabi moro fu a boskopu fu wi.”
14. San yu kan du efu yu wani go na ini a furuten diniwroko?
14 Yu wani go na ini a furuten diniwroko? Efu dati de so, dan a no de fu taki dati yu sa kisi furu blesi. Efu sani e tapu yu fu du dati now, dan kande yu musu tyari wan tu kenki kon na ini yu libi. Begi Gado neleki fa Nehemia ben du dati di a ben angri fu du wan prenspari wroko: „Ke, Yehovah, grantangi, . . . meki sani waka bun nanga a futuboi fu yu” (Nehemia 1:11). Baka dati, yu musu du san yu begi Gado, aladi yu e poti yu frutrow tapu „a Yereman fu begi” (Psalm 65:2). Efu yu wani taki Yehovah blesi a muiti di yu e du fu du moro gi en, dan yu musu meki muiti fosi. Te yu bosroiti taki yu o go na ini a furuten diniwroko, dan yu no musu kenki prakseri. Baka wan pisi ten, yu sa kisi moro ondrofeni, èn yu sa abi moro prisiri.
Wan libi di e tyari trutru wini kon
15. (a) Fa wi e kisi wini fu den ondrofenitori fu Kresten di e dini Gado langa ten kaba? (b) Fruteri wan ondrofenitori di gi yu bun furu deki-ati.
15 San yu kan fruwakti te yu e suku fu du a wani fu Gado? Taki nanga sma di dini Yehovah langa ten kaba, spesrutu den wan di e du furuten diniwroko furu yari langa kaba. Yu sa si taki den sma disi abi wan trutru marki na ini den libi, èn taki den de koloku! (Odo 10:22) Den sa fruteri yu taki, ala ten Yehovah yepi den fu kon abi den sani di den ben abi fanowdu trutru, èn den kisi moro leki dati srefi. Iya, Yehovah yepi den srefi na ini muilek ten (Filipisma 4:11-13). Na ini den tijdschrift The Watchtower di kon na doro fu 1955 te go miti 1961, difrenti ondrofenitori e fruteri fu a libi fu getrow Kresten. Den artikel disi nen “Pursuing My Purpose in Life” („Mi doro a marki di mi ben poti na ini mi libi”). Sensi a ten dati, hondrohondro tra ondrofenitori skrifi na ini A Waktitoren. Ibri ondrofenitori e sori taki den brada nanga sisa e wroko fayafaya èn taki den de koloku, soleki fa a ben de nanga den Kresten na ini a Bijbel buku Tori fu den Apostel. Te wi e leisi den moi ondrofenitori disi, dan wi sa taki: ’Dati na a libi di mi wani!’
16. Fu san ede wi kan taki dati Kresten abi wan marki na ini a libi èn taki den de koloku?
16 Aaron, di kari na a bigin, e taki: „Di mi ben de na Afrika, dan mi ben gwenti miti yongusma di ben e go fu a wan presi na a trawan, fu di den no ben sabi san den ben musu du nanga den libi. Furu fu den noiti no doro wan marki na ini a libi. Ma now wi ben e preiki a bun nyunsu fu a Kownukondre, fu di wi ben wani du a wani fu Gado. Èn aladi a libi fu wi no ben makriki, toku a ben e tyari trutru wini kon gi wi. Wisrefi ondrofeni taki sma de moro koloku te den e gi sani, leki te den e kisi sani.”—Tori fu den Apostel 20:35.
17. Fu san ede wi musu du a wani fu Gado nownow kaba?
17 Fa a de nanga yu? San yu wani du nanga yu libi? Efu yu no sabi krin sortu diniwroko yu wani du gi Yehovah, dan a no sa teki langa fosi yu o bigin gebroiki yu ten fu du tra sani. Fu san ede yu ben o lasi yu ten nanga yu krakti na ini a grontapu fu Satan di e kori sma? Heri esi, te a „bigi banawtu” sa kon, dan gudu nanga biginen no sa man tyari wini kon gi sma. A sani di sa yepi wi, na a matifasi di wi abi nanga Yehovah. Wi sa de nanga tangi trutru taki wi dini Gado, taki wi yepi trawan, èn taki wi du a wani fu Gado nanga wi heri ati!—Mateyus 24:21; Openbaring 7:14, 15.
[Futuwortu]
^ paragraaf 1 Wi kenki wan tu nen.
^ paragraaf 1 Yehovah Kotoigi tyari a video disi kon na doro.
Yu kan tyari disi kon na krin?
• Fa Yehovah feni en taki wi e du diniwroko gi en?
• Sortu bun sani wi kan du fu dini Gado èn fu yepi trawan, èn san wi musu hori na prakseri?
• Na sortu difrenti fasi wi kan du diniwroko gi Yehovah?
• Fa wi kan abi wan trutru marki na ini wi libi nownow kaba?
[Aksi fu a tori disi]
[Prenki na tapu bladzijde 23]
Efu wi wani dini Yehovah nanga wi heri sili, dan wi musu hori na prakseri san de moro prenspari
[Prenki na tapu bladzijde 24]
Wi kan du diniwroko gi Yehovah na difrenti fasi