„San na waarheid?”

PONTIUS PILATUS, a tiriman fu Rome, ben aksi Yesus a sani disi, fu di a no ben agri nanga Yesus. Fu taki en leti, a no ben wani kisi piki trutru tapu na aksi fu en, èn dati meki Yesus no piki en tu. Kande Pilatus ben feni taki libisma noiti no ben o man kon sabi san tru.—Yohanes 18:38.

Furu sma na ini a ten disi abi a srefi denki dati. Iya, srefi kerki fesiman, leriman, nanga politiekman e denki so. Den sma disi feni taki sma noiti no o man kon sabi san tru, spesrutu te a abi fu du nanga a fasi fa den musu tyari densrefi èn a fasi fa den musu anbegi Gado, fu di den markitiki fu libisma e kenki doronomo. A no de fu taki dati a sani disi e gi sma a denki taki den srefi kan bosroiti san bun èn san no bun (Yesaya 5:20, 21). Sma e denki tu taki den no abi fu hori densrefi moro na den markitiki fu fosi, fu di den feni taki den markitiki disi no fiti gi a ten disi.

A moi fu sabi fu san ede Pilatus ben poti na aksi gi Yesus. A ben aksi Yesus a sani dati, fu di Yesus ben taki: „Na fu disi ede mi gebore èn na fu disi ede mi kon na grontapu, so taki mi kan kotoigi fu a waarheid” (Yohanes 18:37). Yesus no ben e bribi taki sma noiti no ben o man kon sabi san tru. A ben pramisi den disipel fu en: „Unu o sabi a waarheid èn a waarheid o meki unu kon fri.”—Yohanes 8:32.

Fa wi kan kon sabi san tru? Wan leisi, di Yesus ben e begi Gado, dan a taki: „Yu wortu na waarheid” (Yohanes 17:17). Bijbel di sma skrifi nanga yepi fu santa yeye, e tyari tru tori kon na krin di e gi wi bun leri èn wan trutru howpu gi a ten di e kon, namku têgo libi.—2 Timoteyus 3:15-17.

Pilatus no teki na okasi di a ben kisi fu kon sabi den tru tori dati. Fa a de nanga yu? Fu san ede yu no e aksi Yehovah Kotoigi fu fruteri yu san na „a waarheid” di Yesus ben e leri sma? Den sa breiti fu fruteri yu den tru tori fu Bijbel.