Teki bosroiti di o meki yu de koloku

„MI WINSI taki mi ben du sani tra fasi!” Omeni leisi yu taigi yusrefi a sani disi? Wi alamala wani teki bun bosroiti, spesrutu te den bosroiti dati sa abi krakti tapu a libi fu wi. Ma fa wi kan teki bosroiti di sa meki wi de koloku?

Na a fosi presi, wi musu abi markitiki di wi kan frutrow dorodoro. Den markitiki dati de fu feni? Furu sma no e bribi dati. Sma ben du wan ondrosuku na ini Amerkankondre, èn na ondrosuku dati tyari kon na krin taki 75 procent fu den studenti na ini den moro hei klas fu den heiskoro e bribi taki markitiki no de di e sori sma krin san bun èn san no bun. Disi e kon fu di ala sma e hori densrefi na tra markitiki èn fu di ala sma kweki na wan tra fasi. A sani disi e meki taki sma abi difrenti denki te a abi fu du nanga san bun èn san no bun.

Wi abi leti fu denki taki libisma musu bosroiti srefi fa den wani tyari densrefi? Nôno, wi no abi leti fu denki so. Efu sma ben kan du iniwan sani di den wani, dan dati ben o tyari soso bruya kon. Suma ben o wani libi na wan presi pe wet, krutubangi, nanga skowtu no de? Boiti dati, a no ala ten wi kan frutrow tapu wi eigi denki. Kande wi bosroiti fu du wan spesrutu sani, fu di wi feni taki a sani dati bun, ma bakaten wi e si taki dati no de so. Iya, te wi e luku fa sani waka na ini ala den dusundusun yari di pasa, dan wi e si taki a sani di Bijbel taki tru. Bijbel e taki: „A no de na wan libisma di e waka srefi fu taki pe a wani poti en futu” (Yeremia 10:23). We dan, pe wi kan suku rai di sa yepi wi te wi musu teki prenspari bosroiti na ini wi libi?

A yongu tiriman di kari na ini a fosi artikel ben du wan bun sani fu di a go suku rai na Yesus. Soleki fa wi si, dan Yesus poti prakseri na  san skrifi na ini a Wet fu Gado, fu piki na aksi fu a yonguman. Yesus ben sabi taki Yehovah Gado na a moro Prenspari Sma di kan gi wi koni nanga sabi, èn taki en na a Sma di sabi san bun gi wi. Fu dati ede, Yesus ben taki: „Den sani di mi e leri sma, a no fu mi srefi, ma den de fu a sma di seni mi kon” (Yohanes 7:16). Iya, Gado Wortu e gi wi bun rai di sa yepi wi fu teki koni bosroiti. Meki wi luku wan tu fu den gronprakseri na ini Gado Wortu, di sa meki wi de koloku te wi e hori wisrefi na den.

Fa wi musu libi nanga trawan?

Na ini a pôpi Bergitaki fu en, Yesus ben taki fu wan prenspari gronprakseri di kan yepi wi fu libi bun nanga trawan. Disi na san a taki: „Fu dati ede, ala sani di unu wani meki sma du gi unu, na dati un musu du gi den tu” (Mateyus 7:12).

Son sma gebroiki den srefi wortu disi, ma den drai den wortu disi. Den sma disi e taki: „San yu no wani taki sma du nanga yu, na dati yu no musu du nanga den.” Te wi e luku na agersitori di Yesus ben gi fu a bun Samariasma, dan wi kan si a difrenti na mindri a gronprakseri na ini Mateyus 7:12, nanga a fasi fa sma e gebroiki den wortu fu Yesus. Sma ben fon wan Dyu èn den libi en dededede na sei pasi. Wan priester nanga wan Leifisma ben si a man disi, ma den waka pasa. Den ben kan feni taki, solanga den no ben fon a man moro fara noso fufuru en moni, dan den no ben du nowan ogri. Den man disi fiti a gronprakseri fu Mateyus 7:12 na a fasi disi: „San yu no wani taki sma du nanga yu, na dati yu no musu du nanga den.” Ma wan Samariasma di ben e waka pasa, yepi a man. Tra fasi leki a priester nanga a Leifisma, a Samariasma disi krin den soro fu a man, èn a tyari en go na wan presi pe sma ben kan yuru kamra. A yepi a man, fu di a ben o wani taki trawan yepi en tu. A Samariasma ben du san a gronprakseri fu Yesus ben taki, èn na so a teki wan bun bosroiti.—Lukas 10:30-37.

Furu fasi de fa wi kan hori wisrefi na a gronprakseri disi, so taki dati kan tyari wini kon. Kon meki wi taki dati wan osofamiri e froisi kon tan na ini a birti fu yu. Fu san ede yu no e go taki den odi? Yu kan yepi den fu kon sabi a kontren moro bun èn yu kan yepi den tu te den wani kon sabi spesrutu sani, noso te den abi spesrutu sani fanowdu. Te yu e pruberi fu yepi den nyun birtisma disi, dan unu sa libi bun nanga makandra. Yu sa firi prisiri tu fu di yu sabi taki yu du san Gado feni bun. A sani disi na wan koni bosroiti, a no so?

Bosroiti di wi e teki fu di wi lobi trawan

Boiti a gronprakseri fu Mateyus 7:12, Yesus ben gi tra rai di sa yepi yu fu teki koni bosroiti. Di wan sma aksi Yesus san na a moro bigi komando na ini a Wet di Gado ben gi Moses, dan Yesus piki en: „’Yu musu lobi Yehovah yu Gado nanga yu heri ati, nanga yu heri sili, èn nanga yu heri frustan.’ Disi na a fosi èn a moro bigi komando. A di fu tu komando de leki a wan disi, èn dati na: ’Yu musu lobi tra sma leki fa yu lobi yusrefi.’ A heri Wet nanga den leri fu den Profeiti e anga na den tu komando disi.”—Mateyus 22:36-40.

A neti fosi Yesus dede, a gi den disipel fu en „wan nyun komando” fu lobi makandra (Yohanes 13:34). Fu san ede Yesus ben taki dati a komando disi na wan nyunwan? Fu taki en leti, a ben taigi den kaba taki wan fu den tu moro prenspari komando na ini a Wet, na fu lobi tra sma, a no so? A Wet di Gado ben gi Moses, ben taigi den Israelsma: „Un musu lobi tra sma leki fa un lobi unsrefi” (Lefitikus 19:18). Ma now Yesus ben e gi den disipel fu en a komando fu du moro leki dati. A srefi neti dati, Yesus taigi den taki a ben o gi en libi gi a bun fu den. Ne a taigi den: „Disi na a komando fu mi, taki un musu lobi makandra neleki fa mi lobi unu. Nowan sma abi moro lobi leki a sma di gi en libi gi den mati fu en” (Yohanes 15:12, 13). Iya, a komando disi ben de wan nyunwan fu di a ben e leri sma fu suku a bun fu trawan fosi.

Furu fasi de fa wi kan sori taki wi e hori trawan na prakseri, na presi taki wi e denki wisrefi nomo. Fu eksempre, kon meki wi taki dati  yu e libi na ini wan oso èn yu lobi drai poku tranga, aladi wan birtisma fu yu no lobi a babari dati. Yu ben o sori taki yu e hori a birtisma fu yu na prakseri, fu di yu no e prei a poku so tranga soleki fa yu lobi?

Luku wan tra situwâsi. Wan dei, tu Kotoigi fu Yehovah na ini Kanada go na wan owru man. A dei dati a ben kowru srefisrefi, èn furu snew ben e fadon. Di den ben e taki nanga makandra, dan a man taigi den Kotoigi taki a no ben man puru a snew na en mofodoro, fu di a ben e siki na en ati. Pikinmoro wán yuru baka dati, a man disi yere fa sma ben e krabu a gron na dorosei. Den tu Kotoigi ben drai kon baka fu krin a mofodoro nanga a stupu fu a man. A man skrifi wan brifi go na a bijkantoro fu Yehovah Kotoigi na ini Kanada, èn a brifi disi ben e taki: „Tide mi si nanga mi eigi ai fa tru Kresten e sori lobi. A sani disi meki mi kisi wan moro bun denki fu sma na ini a ten disi. Mi kisi moro lespeki tu gi a wroko di unu e du na heri grontapu.” Iya, te wi e bosroiti fu yepi trawan, dan dati kan abi wan bun krakti na den tapu, awansi wi du wan pikin sani gi den. A e gi wi prisiri trutru te wi e bosroiti fu yepi trawan!

Bosroiti di wi e teki fu di wi lobi Gado

Wan tra sani di wi musu hori na prakseri te wi e teki bosroiti, na a wet di Yesus ben kari a moro bigi komando, namku taki wi musu lobi Gado. Yesus ben taigi den Dyu a sani disi, èn den ben e anbegi Yehovah kaba leki wan pipel. Toku ibri Israelsma ben musu bosroiti efu a ben o anbegi a Gado fu en nanga en heri sili èn nanga en heri ati.—Deuteronomium 30:15, 16.

Na so a de tu taki den bosroiti di yu e teki, e sori efu yu lobi Gado trutru. Fu eksempre, te yu e tan kisi moro warderi gi Bijbel, dan yu sa musu teki wan bosroiti tu. Yu sa de klariklari fu studeri Bijbel doronomo fu tron wan bakaman fu Yesus? Te yu e du dati, dan yu sa kon de koloku trutru, fu di Yesus ben taki: „Koloku fu den sma di sabi taki den de na nowtu na yeye fasi.”—Mateyus 5:3.

Wi no sabi efu bakaten a yongu tiriman ben e sari fu a bosroiti di a teki. Ma wi sabi fa na apostel Petrus ben e si a grani di a ben abi fu dini Yesus Krestes furu yari langa. Na a kaba fu en libi, na a ten fu 64 G.T., Petrus gi den Kresten brada nanga sisa fu en a deki-ati disi: „Un musu du ala muiti fu meki [Gado] si wi te fu kaba leki sma di de sondro flaka, sondro fowtu, èn na ini vrede” (2 Petrus 1:14; 3:14). A de krin fu si taki a no ben hati Petrus taki a ben teki a bosroiti moro leki 30 yari na fesi fu tron wan bakaman fu Krestes. Èn a no ben hati en tu taki a ben gi trawan deki-ati fu tan wan bakaman fu Krestes.

Te wi e teki a rai fu Petrus, dan fu taki en leti, wi de klariklari fu tyari den frantwortu di wan disipel fu Yesus abi, èn wi de klariklari sosrefi fu gi yesi na den komando fu Gado (Lukas 9:23; 1 Yohanes 5:3). A kan gersi leki a sani disi muilek fu du, ma wi no musu frigiti taki Yesus ben gi wi a pramisi disi: „Un kon na mi, un alamala di musu wroko hebi èn di musu tyari hebi lai, èn mi sa gi unu krakti baka. Teki mi tyatyari na un tapu èn leri fu mi, bika mi abi  safri-ati nanga sakafasi, èn unu sa kisi krakti baka. Bika a tyatyari fu mi switi fu tyari èn mi lai lekti.”—Mateyus 11:28-30.

Luku na ondrofenitori fu Arthur. Di Arthur ben abi tin yari, dan a bigin leri prei finyoro, èn a ben wani tron wan pôpi pokuman. Di a ben abi 14 yari, dan a ben de wan memre fu wan grupu pokuman, èn furu sma ben sabi en kaba. Toku a no ben de koloku. A papa fu en ben wani kon sabi san na a marki fu a libi, èn a ben lobi fu kari kerki leriman kon na en oso. Ma noiti den ben man gi en a yoisti piki tapu den aksi fu en. Na osofamiri fu Arthur ben wani sabi efu wan Gado de trutru èn fu san ede a e gi pasi taki ogri e pasa, èn den ben gwenti fu taki nanga makandra fu den tori disi. Ne wan dei, Arthur en papa bigin taki nanga Yehovah Kotoigi. Arthur en papa bigin lobi den sani di den Kotoigi ben e fruteri en, èn a sani disi meki taki a heri osofamiri fu en bigin studeri Bijbel.

Baka di Arthur studeri Bijbel wan pisi ten, dan a kon frustan fu san ede Gado e gi pasi taki sma e pina, èn a kon frustan krin tu san na a marki fu a libi. Makandra nanga dri tra sma fu en famiri, Arthur teki a bosroiti fu gi en libi abra na Yehovah. Èn te na a dei fu tide a no e hati en taki a teki a bosroiti dati. A e taki: „Mi breiti so te taki Yehovah blesi mi fu di a yepi mi fu kon sabi a tru anbegi, èn fu di a yepi mi fu kon frustan taki a no ben o bun fu tron wan pokuman di e strei nanga trawan. Sma de klariklari fu du kruka sani fu man doro wan sani.”

Te nanga now, Arthur lobi fu prei finyoro gi den mati fu en, ma dati no de a moro prenspari sani na ini en libi. Na presi fu dati, a moro prenspari sani na ini en libi, na fu dini Gado. A e dini na wan fu den bijkantoro fu Yehovah Kotoigi. Tra fasi leki a yongu tiriman, Arthur nanga milyunmilyun trawan ben teki wan bosroiti di meki taki den de koloku trutru. Iya, den teki a kari di Yesus gi den fu tron wan bakaman fu en. Yu kan du dati tu.

[Prenki na tapu bladzijde 6]

A bosroiti di yu e teki kan tyari wini kon gi trawan

[Prenki na tapu bladzijde 7]

Yu wani studeri Bijbel fu tron wan bakaman fu Yesus?