Wi kan abi wan bun marki na ini a libi
Wi kan abi wan bun marki na ini a libi
„Ibri sani di e bro, meki a prèise Yah.”—PSALM 150:6.
1. Fruteri fa wan yonkuman ben suku fu kon abi wan marki na ini a libi.
„MI BEN e studeri fu tron datra, fu di mi ben wani yepi sma. Boiti dati, mi ben denki taki mi ben o de koloku fu di sma ben o abi lespeki gi mi leki datra, èn fu di mi ben o meki furu moni.” Na so Seung Jin, di kweki na Korea, ben taki. * „Di mi kon si taki datra no man gi sma a yepi di den abi fanowdu trutru, dan a sani dati meki mi lasi-ati. Bakaten, mi bigin meki skedrei, ma den sani dati no ben e tyari wini kon gi sma, èn mi ben feni taki mi ben e denki misrefi nomo. Sobun, mi tron wan leriman, èn heri esi mi kon si taki aladi mi ben e leri sma sani, mi no ben man yepi den fu kon de koloku trutru.” Neleki furu tra sma, Seung Jin ben e suku fu kon abi wan marki na ini a libi.
2. (a) Te wan sma abi wan marki na ini a libi, dan san dati wani taki? (b) Fa wi du sabi taki a Mekiman no poti wi na grontapu fu soso?
2 Te wi abi wan trutru marki na ini a libi, dan dati wani taki dati wi sabi fu san ede wi de na libi, wi sabi krin san wi wani na ini a libi, èn a sani dati na a moro prenspari sani gi wi. Libisma man abi so wan marki trutru? Iya! A de krin fu si taki wi Mekiman no poti wi na grontapu fu soso, fu di a gi wi koni, wan konsensi, nanga frustan. Sobun, wi kan frustan taki wi sa man kon abi wan trutru marki na ini a libi soso te wi e libi soleki fa a Mekiman wani wi fu libi. Èn te wi e du dati, dan sani sa waka bun gi wi.
3. San Gado wani gi libisma?
3 Bijbel e sori taki di Gado meki wi, dan a ben abi furu sani na prakseri gi wi. Fu eksempre, a tumusi moi fasi fa wi meki, e sori krin taki Gado lobi wi èn taki a e suku a bun fu wi (Psalm 40:5; 139:14). Fu dati ede, te wi e libi soleki fa Gado wani, dan wi sa lobi trawan èn wi sa suku a bun fu den, soleki fa Gado e du dati (1 Yohanes 4:7-11). Boiti dati, wi sa gi yesi na den rai di Gado e gi wi fu di a lobi wi, èn den rai disi e yepi wi fu libi soleki fa a wani.—Preikiman 12:13; 1 Yohanes 5:3.
4. (a) Fa wi kan kon abi wan trutru marki na ini a libi? (b) San na a moro bun marki di wan sma kan abi na ini a libi?
4 Gado ben wani tu taki libisma de koloku èn taki den e libi na ini vrede nanga makandra èn nanga den tra libisani (Genesis 1:26; 2:15). Ma san wi musu du fu de koloku, fu man abi a dyaranti taki sani sa waka bun nanga wi, èn fu man abi wan korostu firi? Wan pikin di sabi taki en papa nanga mama de krosibei, sa firi koloku èn a sa abi a dyaranti taki ogri no sa miti en. Efu wi wani abi wan trutru marki na ini a libi, dan wi musu abi wan bun matifasi tu nanga wi hemel Tata (Hebrewsma 12:9). Gado e gi wi okasi fu kon lobi en leki wi papa, fu di a e hari wi kon krosibei na en, èn fu di a e arki den begi fu wi (Yakobus 4:8; 1 Yohanes 5:14, 15). Te wi ’e waka na wan getrow fasi nanga Gado’ èn te wi e tron mati fu en, dan dati e gi wi hemel Tata prisiri, èn a e kisi glori tu (Genesis 6:9; Odo 23:15, 16; Yakobus 2:23). Dati na a moro bun marki di wan sma kan abi na ini a libi. A psalm skrifiman ben taki: „Ibri sani di e bro, meki a prèise Yah.”—Psalm 150:6.
Sortu marki yu abi na ini a libi?
5. Fu san ede a no bun te wi e feti nomo baka gudu?
5 Wan fu den sani di Gado wani gi wi, na taki wi e sorgu bun gi wisrefi èn gi wi osofamiri. Disi wani taki dati wi musu yepi den fu tan gosontu èn fu tan abi wan tranga bribi. Ma wi musu luku bun taki grontapu sani no e kon moro prenspari gi wi leki na anbegi fu wi (Mateyus 4:4; 6:33). A sari fu si taki furu sma e feti nomo baka gudu. Ma te wi e denki taki wi sa de koloku te wi e feti nomo baka gudu, dan wi sa si taki a sani dati no tru. No so langa pasa, sma du wan ondrosuku, èn den kon si taki furu fu den gudusma na ini Asia „no abi a dyaranti taki sani sa waka bun gi den, èn den abi broko-ede. Disi de so, aladi den sma disi sabi taki trawan na ini a libimakandra e lespeki den, èn aladi den gudu fu den e gi den a firi taki den doro wan marki na ini a libi”.—Preikiman 5:11.
6. Sortu rai Yesus ben gi den bakaman fu en?
6 Yesus ben taki fu „a bedrigifasi fu gudu” (Markus 4:19). Fa gudu e bedrigi sma? We, a kan gersi leki sma de koloku te den abi gudu, ma dati no de so. Koni Kownu Salomo ben taki: „Wan sma di lobi solfru nomo, no sa de tevrede nanga solfru” (Preikiman 5:10). Ma wan sma kan dini Gado nanga en heri ati aladi a e feti baka gudu? Nôno, dati no kan. Yesus ben taki: „Nowan sma kan dini tu masra leki srafu; bika a sa teige a wan masra èn lobi a trawan, noso a sa tan nanga a wan èn wisiwasi a trawan. Unu no kan dini Gado èn dini Gudu na a srefi ten.” Yesus no ben gi den bakaman fu en a rai fu tyari gudu kon na wan na grontapu, ma a ben gi den a rai fu „kibri gudu na ini hemel”. Dati wani taki dati wi musu meki muiti fu kon abi wan bun nen na Gado, di ’sabi san wi abi fanowdu srefi bifo wi aksi en’.—Mateyus 6:8, 19-25.
7. Fa wi kan „grabu a trutru libi hori bun steifi”?
7 Di na apostel Paulus ben skrifi Timoteyus, di ben wroko makandra nanga en, dan a gi en seryusu rai di ben abi fu du nanga gudu. A taigi Timoteyus: „Taigi den sma di gudu . . . taki den no musu frutrow tapu gudu di kan lasi gowe, ma den musu frutrow tapu Gado di e gi wi ala sani bogobogo, so taki wi kan abi prisiri. . . , den no musu gridi fu gi sma sani, èn den musu lobi fu prati sani nanga trawan; na so fasi den e poti wan bun fondamenti gi a tamara, neleki wan gudu di kibri bun, so taki den kan grabu a trutru libi hori bun steifi.”—1 Timoteyus 6:17-19.
San na „a trutru libi”?
8. (a) Fu san ede bun furu sma e feti fu kon gudu èn fu kon abi biginen? (b) San den sma disi e frigiti?
8 Gi furu sma, den wortu „a trutru libi” e meki den prakseri gudu nanga prisiri. Wan tijdschrift fu Asia e taki: „Te fu kaba den sma di e luku felem nanga telefisi sa wani den sani di den e si, èn den e tan prakseri fa a ben o de fu abi den sani dati.” Furu sma e du ala san den man fu kon gudu èn fu kon abi biginen. Furu sma e feti baka den sani disi, awansi den no e nyan bun fu den yongu yari fu den, awansi den e kon siki, awansi na osofamiri libi fu den e broko, èn awansi a bribi fu den e kon swaki. Furu sma e frigiti taki den sani di den e si na ini den felem, abi fu du nanga „a yeye fu grontapu”. Iya, a yeye disi na a denki di abi krakti tapu bun furu sma èn di e meki taki den no e libi soleki fa Gado wani (1 Korentesma 2:12; Efeisesma 2:2). Dati meki a no e fruwondru wi taki furu sma na ini a ten disi no de koloku!—Odo 18:11; 23:4, 5.
9. San libisma noiti o man du, èn fu san ede dati de so?
9 Fa a de nanga den sma di e wroko tranga fu yepi sma di de nanga angri, fu dresi sikiwan, èn fu feti gi den reti fu trawan? A muiti di den sma disi e meki fu yepi trawan, na wan bun sani èn nofo tron a e tyari wini kon gi furu sma. Toku den noiti no sa man kenki a situwâsi na grontapu. Fu san ede? Fu di „heri grontapu de na ini a makti fu na ogriwan”, namku Satan di wani taki sani musu tan leti so.—1 Yohanes 5:19.
10. O ten getrowsma sa libi „a trutru libi”?
10 A de wan sari sani te wan sma e denki taki a libi disi na ala! Paulus ben skrifi: „Efu na ini a libi disi wawan wi howpu tapu Krestes, dan wi de fu sari moro leki ala tra libisma.” Den sma di e bribi taki a libi disi na ala, e taki: „Meki wi nyan èn meki wi dringi, bika tamara wi o dede” (1 Korentesma 15:19, 32). Ma wan howpu de, iya, Gado pramisi wi ’nyun hemel nanga wan nyun grontapu èn drape regtfardikifasi o tan’ (2 Petrus 3:13). Na a ten dati, Kresten sa man libi „a trutru libi”, namku „têgo libi” sondro sondu, na hemel noso na ondro a lobi-ati tiri fu Gado Kownukondre!—1 Timoteyus 6:12.
11. Fu san ede a hori di wan sma e horibaka gi Gado Kownukondre, na a moro bun marki di wan sma kan abi na ini en libi?
11 Na Gado Kownukondre wawan sa lusu ala den problema fu libisma. Fu dati ede, a moro bun marki di wan sma kan abi na ini en libi, na fu horibaka gi Gado Kownukondre (Yohanes 4:34). Te wi e teki prati na a wroko dati, dan wi hemel Tata sa feni wi bun, èn dati na wan grani trutru. Wi sa kisi prisiri tu fu di wi e dini makandra nanga milyunmilyun Kresten brada nanga sisa di abi a srefi marki na ini den libi.
Teki bun bosroiti
12. Sori fa a libi na ini a ten disi e difrenti fu „a trutru libi”.
12 Bijbel e taki dati a grontapu disi „e pasa gowe nanga den lostu fu en”. Nowan enkri pisi fu a grontapu fu Satan sa tan abra. Wan kaba sa kon tu na a feti di sma e feti fu kisi biginen èn fu kon gudu. Tra fasi leki dati „a sma di e du a wani fu Gado sa tan fu têgo” (1 Yohanes 2:15-17). Soleki fa wi si, dan na ini a grontapu disi, gudu nanga biginen na sani di kan lasi gowe, èn a prisiri di sma abi no de fu ala ten. Ma „a trutru libi”, namku têgo libi na ondro a Kownukondre fu Gado e tyari wini kon fu ala ten. Fu dati ede, efu wi wani kisi a warti libi disi, dan wi musu tan teki bun bosroiti.
13. Sortu bun bosroiti wan trowpaar teki?
13 Luku na eksempre fu Henry nanga Suzanne. Den sma disi e bribi trutru na ini a pramisi di Gado gi taki A sa yepi ala sma di e poti a Kownukondre na a fosi presi na ini den libi (Mateyus 6:33). Sobun, Henry nanga Suzanne bosroiti fu libi na ini wan oso di no ben diri so, so taki den ala tu no ben o abi fu du grontapuwroko. Na so den ben abi moro ten fu teki prati na a diniwroko makandra nanga den tu umapikin fu den (Hebrewsma 13:15, 16). Wan mati fu den di ben abi a bun fu den na prakseri, no ben man frustan fu san ede den ben teki a bosroiti disi. Na uma disi ben taki: „Suzanne mi gudu, efu yu wani wan moro moi oso, dan yu abi fu du wan sani.” Ma Henry nanga Suzanne ben sabi taki, te den ben o poti Yehovah na a fosi presi na ini den libi, dan den ben o kisi ’wan pramisi di abi fu du nanga a libi di den e libi now, èn sosrefi nanga a libi di den o kisi na ini a ten di e kon’ (1 Timoteyus 4:8; Titus 2:12). Te fu kaba, den umapikin fu den kon tron fayafaya furuten preikiman. Henry nanga Suzanne ondrofeni taki den nanga na osofamiri fu den no lasi noti. Na presi fu dati, den kisi bun furu wini fu di den suku fu libi „a trutru libi”.—Filipisma 3:8; 1 Timoteyus 6:6-8.
„No gebroiki den sani fu grontapu dorodoro”
14. Sortu sari sani kan miti wi te wi e frigiti a trutru marki di wi ben abi na ini a libi?
14 Ma wi musu luku bun taki wi no e frigiti a trutru marki di wi abi na ini a libi, èn wi no musu lasi warderi gi „a trutru libi”. A sani dati kan meki taki ’den broko-ede nanga den gudu nanga den prisiri fu a libi e meki wi lasi pasi’ (Lukas 8:14). Te wan sma e tan angri gi sani, èn te a e ’broko en ede nanga den sorgu fu na aladei libi’, dan dati kan meki taki a e poti tumusi furu prakseri na grontapu sani (Lukas 21:34). A de wan sari sani taki son sma e feti baka gudu, èn te fu kaba den sma disi „gowe libi a bribi èn den gi densrefi furu sari nanga pen”. Sonwan fu den sma disi lasi a grani srefi di den ben abi fu de mati fu Yehovah. Dati na trutru wan sari sani di miti den sma disi, fu di den no „grabu a têgo libi hori bun steifi”!—1 Timoteyus 6:9, 10, 12; Odo 28:20.
15. Fa wan osofamiri kisi wini fu di den „no gebroiki den sani fu grontapu dorodoro”?
15 Paulus taigi ’den wan di e gebroiki den sani fu grontapu, fu de leki sma di no e gebroiki den sani fu grontapu dorodoro’ (1 Korentesma 7:31). Keith nanga Bonnie fiti a rai disi. Keith e taki: „Mi tron wan Kotoigi fu Yehovah na a ten di mi ben de fu klari a heiskoro pe mi ben e studeri fu tron tifidatra. Mi ben musu teki wan bosroiti. Mi ben kan bosroiti fu yepi furu sma, so taki mi ben kan meki furu moni. Ma efu mi ben o du dati, dan mi no ben o abi ten fu anbegi Gado na a yoisti fasi. Mi bosroiti fu no yepi tumusi furu sma na ini wan dei. Na so mi ben kan abi moro ten fu yepi mi wefi nanga den feifi umapikin di wi kisi te fu kaba, fu kon abi wan tranga bribi èn fu de koloku. Aladi wi no ben abi furu moni, toku wi leri fu gebroiki wi moni na wan koni fasi, èn ala ten wi ben abi den sani di wi ben abi fanowdu. Mi nanga mi osofamiri ben gwenti du sani makandra, èn a lobi di wi abi gi makandra ben e gi wi furu prisiri. Te fu kaba, wi alamala tron furuten preikiman. Now den umapikin fu wi abi wan koloku trowlibi, èn dri fu den abi pikin. Den osofamiri fu den de koloku tu, fu di den e poti a wani fu Yehovah na a fosi presi na ini den libi.”
Wi musu poti a wani fu Gado na a fosi presi na ini wi libi
16, 17. Taki fu wan tu sma na ini Bijbel di ben abi koni. Fa wi e memre den sma disi?
16 Bijbel e gi eksempre fu sma di poti a wani fu Gado na a fosi presi na ini den libi, èn fu sma di no du dati. Wi kan leri wan sani fu den eksempre disi, awinsi omeni yari wi abi, awinsi fa wi kweki, noso awinsi wi de na ini difrenti situwâsi (Romesma 15:4; 1 Korentesma 10:6, 11). Nimrod ben bow wan bigi foto, ma a du dati fu gens Yehovah (Genesis 10:8, 9). Ma furu trawan ben de bun eksempre. Fu eksempre, a hei posisi di Moses ben abi na ini Egepte, no ben de a moro prenspari sani gi en. Na presi fu dati, a ben e si den grani di Gado ben gi en, „leki wan gudu di bigi moro den gudu fu Egepte” (Hebrewsma 11:26). A kan taki a datra Lukas ben e yepi Paulus nanga trawan te den ben e siki. Ma a moro prenspari fasi fa Lukas yepi trawan, na fu di a ben de wan preikiman nanga wan Bijbel skrifiman. Èn furu sma no sabi Paulus leki wan sabiman fu Wet, ma leki wan zendeling, noso „wan apostel gi den trakondre sma”.—Romesma 11:13.
17 Furu sma no e memre David leki wan legre edeman, noso leki wan pokuman èn wan puwema skrifiman, ma leki ’wan sma di Gado ben lobi’ (1 Samuel 13:14). Wi no e memre Danièl leki wan heihei sma di ben e wroko gi a tirimakti fu Babilon, ma leki wan getrow profeiti fu Yehovah. Wi no e memre Ester leki na umakownu fu Persia, ma leki wan uma di ben abi deki-ati èn sosrefi wan tranga bribi. Wi no e memre Petrus, Andreas, Yakobus, nanga Yohanes leki bun fisiman, ma wi e memre den leki apostel fu Yesus. Leki lasti, wi no e memre Yesus leki „a temreman”, ma leki „a Krestes” (Markus 6:3; Mateyus 16:16). Ala den sma disi ben e frustan heri bun taki awansi sortu koni, noso biginen den ben abi, toku a moro prenspari sani na ini den libi no ben musu de a grontapuwroko fu den, ma a diniwroko di den ben e du gi Gado. Den ben sabi taki a moro bun marki di den ben kan abi na ini den libi, na fu de wan man noso wan uma di e anbegi Gado.
18. Fa wan yongu Kresten bosroiti fu gebroiki en libi, èn san a kon frustan?
18 Seung Jin, di wi ben kari na a bigin, kon frustan a sani disi tu. A e taki: „Mi no gebroiki ala mi krakti fu du datrawroko, fu meki skedrei, noso fu gi sma leri. Na presi fu dati, mi bosroiti fu dini Gado na wan getrow fasi. Nownowde mi e dini na ini wan kontren pe moro preikiman de fanowdu, èn mi e yepi sma fu kon feni a pasi di sa tyari den go na têgo libi. Fosi, mi ben e denki taki a furuten preikiwroko no ben o gi mi prisiri. Now mi abi moro prisiri leki fosi, fu di mi e pruberi fu kisi moro bun fasi èn mi e pruberi tu fu studeri Bijbel moro bun nanga sma fu difrenti kulturu. Mi e si taki a moro bun marki di wi kan abi na ini a libi, na fu poti a wani fu Yehovah na a fosi presi na ini wi libi.”
19. Fa wi kan kon abi wan trutru marki na ini a libi?
19 Wi leki Kresten abi sabi di kan kibri wi libi èn wi abi a howpu taki wi sa kisi frulusu (Yohanes 17:3). Fu dati ede, wi no musu „meki a no-frudini bun-ati fu Gado de fu soso” (2 Korentesma 6:1). Na presi fu dati, meki wi gebroiki den warti dei nanga yari fu wi libi fu prèise Yehovah. Meki wi preiki a bun nyunsu di e yepi sma fu kon de koloku trutru nownowde, èn di sa meki den kisi têgo libi te fu kaba. Te wi e du dati, dan wi sa si taki Yesus ben abi leti di a taki: „Wan sma sa de moro koloku te a e gi sani, leki te a e kisi sani” (Tori fu den Apostel 20:35). Na a fasi disi wi sa kon abi wan trutru marki na ini a libi.
[Futuwortu]
^ paragraaf 1 Wi kenki wan tu nen.
Yu kan tyari disi kon na krin?
• San na a moro bun marki di wi kan abi na ini wi libi?
• Fu san ede a no bun fu feti baka gudu?
• San na „a trutru libi” di Gado e pramisi?
• Fa wi kan gebroiki wi libi fu du a wani fu Gado?
[Aksi fu a tori disi]
[Prenki na tapu bladzijde 18]
Kresten musu teki bun bosroiti