Den e tyari a bun nyunsu gi sma aladi problema e miti den

A TRUCK fu wi e doro na wan presi pe srudati tapu a pasi. Sowan 60 mansma, umasma, nanga yonguwan de drape, èn den abi gon na den. Sonwan fu den e weri srudatikrosi. Furu fu den sma disi abi bigi gon na ini den anu, soleki usi nanga dagadaga. Soleki fa a sori, dan den e wakti wi. Den sma na ini a kontren dati ben e opo densrefi teige a tirimakti.

Wi de na pasi fo dei langa, èn wi abi wan lai fu dusundusun Bijbel publikâsi. Wi no sabi efu den srudati o meki wi pasa. Wi no sabi efu wi o abi fu pai den. Wi no sabi o langa a sa teki fu overtoigi den taki wi no kon fu du ogri.

Wan man di gridi fu sutu a gon fu en e sutu go na loktu fu sori wi taki wi musu du san a e taigi wi. A e si den cellulair fu wi, èn a e taigi wi fu langa den gi en. Te wi e draidrai fu gi en den sani, dan a e meki wan sani nanga en anu fu sori wi taki a o koti wi neki puru. A sani dati e meki wi frustan krin san o pasa nanga wi te wi no du san a taki, èn fu dati ede wi e langa den cellulair gi en.

Wantronso wan umasma di weri srudatikrosi, e grabu en gon, èn a e waka kon miti wi. Na uma disi di taki dati en na a „sekretarsi” fu a grupu, wani taki wi musu gi en wan sani tu. A libi tranga èn den sma disi kan gebroiki iniwan sani di den kan puru na sma anu. Baka dati, wan tra srudati e opo a tank fu a truck fu wi, èn a e bigin lai oli na ini wan bigi plastik batra. Aladi wi e taigi en fu no du dati, toku a e go doro èn a e taigi wi taki a e du nomo san a basi taigi en fu du. Wi no man du noti. Wi e howpu nomo taki tra sma no sa wani du a srefi sani disi.

Te fu kaba, den e opo a pasi gi wi, èn mi nanga a brada di e rèi nanga mi breiti taki wi kan gowe fu drape. Wi ben e frede, ma wi kon gwenti den sani disi kaba. Na ini a pisi ten fu april 2002 te go miti yanuari 2004, wi rèi 18 leisi fu a lanpe fu Duwala, wan foto na ini Kamerun, go na Bangui, a mamafoto fu Republiek fu Centraal Afrika. Te wi e rèi a pasi disi di langa 1600 kilometer, dan ala ten fruferi sani e miti wi, èn sosrefi furu sani di wi no e fruwakti. *

„Ala den leisi di wi rèi a pasi disi, wi leri furu”, na so Joseph nanga Emmanuel e taki. Den brada disi e rèi a pasi disi difrenti leisi. „A bun fu begi  Gado doronomo, èn fu no bruya. A psalm skrifiman ben skrifi: ’Tapu Gado mi poti mi frutrow. Mi no sa frede. San wan sma fu grontapu kan du mi?’ Wi e pruberi fu abi a srefi denki dati. Wi abi na overtoigi taki Yehovah sabi taki wi e rèi go na den presi disi fu tyari wan boskopu di sa gi sma wan howpu di den abi tranga fanowdu.”—Psalm 56:11.

Bijbel publikâsi di komoto fu difrenti kondre

Furu sma na ini a kontren disi fu Afrika lobi fu arki a bun nyunsu fu Gado Kownukondre. Den Bijbel publikâsi di wi e tyari go gi sma, na fu yepi den sma disi fu kon moro krosibei na Gado (Mateyus 5:3; 24:14). A bijkantoro fu Yehovah Kotoigi na ini Duwala, wan foto na ini Kamerun, e prati publikâsi gi moro leki 30.000 Kownukondre prèikiman nanga tra sma na ini Kamerun di wani kon sabi moro fu Gado. Den e prati publikâsi tu gi tra kondre na ini a kontren dati.

Den publikâsi disi komoto fu farawe. Furu fu den publikâsi disi druk na ini Ingrisikondre, Fensikondre, Doisrikondre, Italiakondre, nanga Spanyorokondre. Baka dati, den seni den nanga sipi komoto fu Fransikondre. Wan container nanga Bijbel publikâsi e doro ibri tu wiki na a lanpe fu Duwala.

Sma e heisi a container poti na tapu wan truck di o tyari en go na a bijkantoro. Den brada nanga sisa di e wroko tapu na afdeling di e seni publikâsi go na difrenti gemeente, e seti den publikâsi disi so taki den kan sabi pe den musu go. A no makriki fu tyari den publikâsi disi go na den farawe kontren fu a kondre. Ma disi na wan fu den fasi fa den Kotoigi e tyari a bun nyunsu go „te na den moro farawe presi fu grontapu” (Tori fu den Apostel 1:8). A bijkantoro e gi wan tu brada a wroko disi. Den brada disi de klariklari fu rèi go na den presi disi, aladi ogri kan miti den na pasi. Na so milyunmilyun sma na ini centraal Afrika e kisi Bijbel publikâsi doronomo.

A fasi fa sani e waka na pasi

Den publikâsi di den brada e rèi tyari go nanga truck, na gi den brada nanga sisa na ini Kamerun, Tyaad, Ekwatoriaal Ginea, Gabon, nanga Republiek fu Centraal-Afrika. Meki wi luku san e miti den brada fu wi na pasi. Prakseri taki yu e sidon na sei den brada disi, èn sreka yusrefi gi den span sani di yu sa ondrofeni na ini den moro leki tin dei di yu sa de na pasi.

 Siksi brada e sidon na ini wan truck. Den brada disi musu tranga, den musu sabi rèi bun, den musu abi pasensi, èn den musu weri bun krosi. Den e weri Afrikan krosi, noso langabruku, empi, nanga das. Den lantiman di e luku den papira fu sma di e kon na ini a kondre, ben taki fu den brada fu wi: „Luku fa a truck fu den krin, èn den krosi di den e weri moi tu. Na den krosi disi den e weri tapu den fowtow na ini den buku fu den.” Wan sani di moro prenspari srefi leki den moi krosi di den brada e weri, na taki den de klariklari fu go na iniwan presi, soso fu man dini trawan.—Psalm 110:3.

Den brada e gowe libi Duwala pikinmoro siksi yuru mamanten, syatu baka te son-opo, fu di na a ten dati, furu oto no de na pasi na ini a foto disi di e kon moro bigi dei fu dei. Te wi abra wan broki krosibei fu a bijkantoro, dan wi e pasa na ini a foto di lai nanga sma. Baka dati wi e hari go na a owstusei fu go na a fosi presi pe wi musu de, namku Yahunde, a mamafoto fu Kamerun.

Ibriwan fu den siksi brada e agri taki a no makriki fu rèi wan truck di lai nanga dusundusun buku. Den fosi dri dei wi e rèi na tapu ston pasi, èn fu dati ede wi no e kisi furu problema na pasi. Ma toku wi musu poti ala wi prakseri na a pasi. Wantronso, hebi alen e fadon. Now wi e rèi na tapu wan santi pasi. Wi no man si so bun moro pe wi e go, èn a pasi grati. Wi no man rèi tranga, fu di a pasi lai nanga olo. A e bigin dungru. Wi e stop fu nyan pikinso, èn baka dati wi e langa wi futu, èn wi e pruberi fu sribi. Na so sani e waka te wi e rèi den langa pasi disi!

A tra mamanten wi e hari gowe frukufruku. Wan fu den brada e yepi fu luku pe moro bun fu rèi. A e warskow wi wantewante te wi e rèi tumusi krosibei fu wan gotro. Sma di e rèi truck, sabi heri bun taki efu den grati go na ini wan gotro, a kan teki omeni dei fu puru a truck. Wi e rèi go na ini Republiek fu Centraal Afrika, èn den pasi drape no moi tu. Wi e rèi 650 kilometer moro fara, èn wi e pasa na ini den boitipresi di lai nanga moi bon èn nanga pikin bergi. Pikin-nengre, owru sma, èn mama di tai den pikin fu den na den baka e wai anu gi wi te wi e rèi pasa safrisafri na ini den dorpu fu den. Ma fu di dyugudyugu de na ini a kontren dati, meki wan tu wagi nomo de na tapu den pasi na ini a ten disi, èn dati meki sma e fruwondru fu si wi na ini den truck.

Ondrofeni di e gi prisiri

Janvier, wan brada di e rèi wan fu den truck, e fruteri wi taki aladi den no wani lasi ten, toku den gwenti stop na ini den pikin dorpu fu rostu pikinso èn fu prati Bijbel publikâsi gi sma. A e taki: „Ala ten te wi ben de na ini Baboua, wi ben e pruberi fu taki nanga wan ati-oso wrokoman di ben angri fu kon sabi a Kownukondre boskopu. Èn ibri leisi te wi ben go na en, wi ben e studeri Bijbel syatu nanga en. Wan dei wi kisi na okasi srefi fu sori en nanga en osofamiri a video fu Noa. Mati nanga birtisma doro drape, èn fosi yu denki a heri oso ben lai  nanga sma di ben e prisiri taki den ben kan luku a video. Den alamala ben yere fu Noa, èn now den ben kan luku a tori fu en tapu telefisi. A ben naki wi ati fu si fa den ben warderi a sani disi. Baka dati, den sreka wan nyanyan gi wi fu di den ben warderi san wi du gi den, èn den aksi wi fu tan sribi drape. Ma wi ben musu gowe wantewante fu di wan langa pasi ben de na wi fesi ete. Ma wi ben brèiti taki wi ben man prati a bun nyunsu nanga den sma disi di abi sakafasi.”

Israel, wan tra brada di e rèi wan fu den truck, e memre san ben pasa wan fu den leisi di den ben musu go na Bangui, a presi pe wi musu tyari den buku go. A e taki: „O moro wi ben e kon krosibei fu Bangui, o moro presi wi ben e doro pe srudati ben tapu a pasi. Wi ben brèiti taki furu fu den srudati ben abi switifasi èn taki den ben sabi a truck fu wi, fu di wi ben pasa drape wan tu leisi kaba. Den srudati disi ben e kari wi fu kon sidon nanga den, èn den ben de klariklari fu teki den buku fu wi. Wan buku na wan prenspari sani gi den, èn fu dati ede den e skrifi den nen na ini a buku, sosrefi a dei di den kisi a buku, èn a nen fu a sma di gi den a buku. Sonwan fu den srudati abi famiri di de Kotoigi, èn disi ben de wan tra rèide fu san ede den ben sori switifasi gi wi.”

Joseph, di rèi den pasi disi moro langa leki den tra brada, e fruteri taki a sani di e gi en moro prisiri, na te den e doro a presi pe den musu tyari den buku go. A e fruteri fu wan fu den leisi di den ben musu rèi go na Bangui: „Di wi ben de wan tu kilometer fu Bangui, dan wi bel den brada drape fu taigi den taki wi ben o doro drape heri esi. Den brada tyari wi go na difrenti presi na ini a foto, èn den yepi wi fu seti den lasti papira tori. Di wi doro na ini Bangui, dan ala den sma na a bijkantoro kon na dorosei fu kon taki wi odi èn fu gi wi switi brasa. Brada nanga sisa fu den gemeente na ini a kontren dati, doro drape baka wan tu yuru, èn den kon yepi wi fu puru hondrohondro dosu nanga Bijbel, pikin buku, nanga tijdschrift na ini a truck, èn den poti den dosu disi na ini a maksin.”

Joseph e taki moro fara: „Son leisi te wi ben musu tyari lai go na a Demokrasia Republiek Kongo, dan boiti buku nanga tra publikâsi, wi ben e tyari sosrefi krosi, susu, nanga sani di pikin-nengre abi fanowdu. A ben gi wi prisiri fu si fa den brada nanga sisa ben e lafu fu di den ben de nanga tangi!”

Baka te wi rostu wan dei, dan wi e sreka wi truck, èn wi e drai go baka na oso. Wi sabi taki problema o miti wi na pasi, ma den moi sani di wi ondrofeni na pasi, e meki wi frigiti ala den problema dati.

Son leisi a no makriki fu rèi go so fara, èn a no switi te den pasi takru, te den banti fu a truck e boro, noso te a truck e broko na pasi. Den brada e kisi fu du doronomo nanga srudati di e du muilek. Ma toku den brada e firi prisiri te den e tyari a bun nyunsu fu a Kownukondre go na den farawe presi fu Afrika, èn te den e si fa a boskopu disi e kenki a libi fu den sma di e yere en.

Fu eksempre, fu di den brada e tyari den publikâsi go na den farawe presi disi na ini Republiek fu Centraal-Afrika, meki now wan man di e libi na ini wan dorpu krosibei fu Sudan, e leisi wan Bijbel di vertaal na ini a tongo fu en. A wefi fu en e studeri den nyun Waktitoren, èn den pikin fu den e kisi wini fu a buku Teki leri fu a bigi leriman. * Den sma disi nanga furu trawan sosrefi di e libi na ini den boitipresi disi, e kisi den publikâsi di den abi fanowdu fu man kon krosibei na Gado. Na so a de tu nanga den Kresten brada nanga sisa fu den di e libi na ini furu fu den bigi foto. A sani disi e gi den brada bigi prisiri trutru!

[Futuwortu]

[Karta/​Prenki na tapu bladzijde 9]

(Efu yu wani si pe den sani disi skrifi, luku a tijdschrift)

KAMERUN

Duwala

REPUBLIEK FU CENTRAAL-AFRIKA

Bangui

[Prenki na tapu bladzijde 9]

Joseph

[Prenki na tapu bladzijde 9]

Emmanuel

[Prenki na tapu bladzijde 10]

A bijkantoro fu Republiek fu Centraal-Afrika, na ini Bangui

[Prenki na tapu bladzijde 10]

Den brada na ini Bangui e puru lai na ini a truck