Go pe a leti de

DEN toren na sesyoro, di e skèin leti fu sori sipiman pe den musu tyari a sipi, kibri a libi fu furu sma. Te wan sma di de wan heri pisi ten na tapu se, e si wan faya farawe, dan a faya dati no e sori en nomo pe den ston de na ini a watra. A faya dati e meki a kon frustan tu taki heri esi a o doro syoro. Na so a de tu nanga Kresten na ini a ten disi. A langa waka di den e teki, e doro wan kaba. Den e pasa na ini wan dungru grontapu di kan swaki a bribi fu den. Bijbel e agersi libisma di no sabi Gado, nanga „a krasi se di no man kon tiri èn di e tan trowe wiwiri nanga tokotoko go na loktu” (Yesaya 57:20). A pipel fu Gado e libi na mindri den sortu sma disi. Ma aladi dati de so, den abi a moi howpu taki den sa kisi frulusu, èn a howpu dati de leki wan leti gi den (Mika 7:8). Tangi fu Gado nanga a Wortu fu en, meki „leti srefi kon de gi a regtfardikiwan, èn prisiri srefi gi den wan di abi wan opregti ati”.—Psalm 97:11. *

Ma son Kresten meki sani kori den, so taki den no e si a leti fu Yehovah moro. Den Kresten disi di lasi bribi na ini Gado, kon de leki wan sipi di go naki panya na tapu bigi ston, fu di den go feti baka gudu, den du hurudu, noso den fadon komoto na bribi srefi. Iya, neleki fa a ben de na ini a fosi yarihondro, na so son Kresten na ini a ten disi „meki a bribi fu den kon lasi neleki wan sipi di sungu” (1 Timoteyus 1:19; 2 Petrus 2:13-15, 20-22). Wi kan agersi a nyun grontapu nanga a lanpe pe wi musu doro. Fu di a nyun grontapu dati de so krosibei, meki a ben o de wan sari sani trutru efu wi ben o meki taki Yehovah no feni wi bun moro!

Sorgu taki yu ’no e lasi bribi’

Fosi, a ben e pasa furu taki wan sipi ben e sungu te a ben e doro a lanpe, aladi sani ben e waka bun di a ben de na se. Nofo tron a sipi ben kan sungu moro makriki te a ben de krosibei fu a syoro. Na so a de tu taki furu sma kan lasi bribi moro makriki na ini „den lasti dei” disi. Bijbel e sori krin taki den dei disi „tranga fu pasa”, spesrutu gi getrow Kresten.—2 Timoteyus 3:1-5.

Fu san ede den lasti dei disi muilek so? We, Satan sabi taki „en ten syatu” èn taki dyonsro a no o man gens a pipel fu Gado moro. Fu dati ede, a e meki moro muiti srefi fu meki den lasi bribi (Openbaring 12:12, 17). Ma wi e kisi yepi nanga rai. Te now ete Yehovah na wan kibripresi gi den wan di e fiti den rai fu en (2 Samuel 22:31). A gi wi eksempre di e warskow wi gi den difrenti triki di Satan e gebroiki fu kori wi. Meki wi luku tu fu den eksempre dati di abi fu du nanga a pipel fu Israel di ben doro krosibei fu a Pramisi Kondre.—1 Korentesma 10:11; 2 Korentesma 2:11.

Den de krosibei fu a Pramisi Kondre

A pipel fu Israel ben komoto na ini katibo na Egepte, èn Moses ben de a fesiman fu den. A no ben teki langa fosi den doro krosibei fu a zuidsei pisi fu a Pramisi Kondre. Ne Moses seni 12 man fu go luku a kondre na wan kibri fasi. Tin fu den man no ben abi frutrow na ini Gado, èn den drai kon baka nanga nyunsu di meki a pipel lasi-ati. Den taki dati Israel no ben o man wini den Kanansma fu di den ben „bigi  srefisrefi” èn a legre fu den ben makti. San den Israelsma du di den yere dati? Bijbel e taki dati den bigin krutu nanga Moses nanga Aron. Den ben taki: „Fu san ede Yehovah tyari wi kon na a kondre disi fu meki sma kiri wi nanga feti-owru? Den o tyari den wefi nanga den pikin fu wi gowe. . . . Meki wi poti wi eigi edeman, èn meki wi drai go baka na Egepte!”—Numeri 13:1, 2, 28-32; 14:1-4.

Denki a tori! Na a srefi pipel disi ben si san Yehovah ben du nanga a makti Egepte di ben de a grontapumakti na a ten dati. Yehovah ben gi a kondre dati syen nanga yepi fu tin rampu, èn nanga yepi fu a bigi wondru di a du na a Redi Se. Èn fu di den Israelsma ben de so krosibei fu a Pramisi Kondre, meki den ben abi fu waka go na ini a kondre nomo, neleki fa wan sipi e go na a presi pe wan faya e sori en fu go. Ma den Israelsma no ben e bribi taki Yehovah ben o man pori den difrenti foto fu Kanan di ben swaki moro Egepte. A ben musu hati Yehovah di a si taki a pipel no ben e frutrow na en tapu. Yosua nanga Kaleb, di ben go luku a kondre tu èn di ben abi deki-ati, ben musu fu firi sari tu, bika den ben feni taki Israel ben man „nyan den [Kanansma] lalalala”! Den tu man disi ben si nanga den eigi ai fa a kondre Kanan ben de, fu di den ben go na ala sei fu a kondre dati. Di a pipel no go na ini a Pramisi Kondre, dan Yosua nanga Kaleb ben musu tan na ini a sabana someni tenti yari langa, ma den no dede drape makandra nanga den wan di no ben de getrow. Iya, Yosua nanga Kaleb tyari den bakapikin fu a pipel di ben  libi na ini a sabana, go na ini a Pramisi Kondre (Numeri 14:9, 30). Di Israel ben de fu go na ini a Pramisi Kondre fu a di fu tu leisi, dan wan tra tesi miti den. Den ben o man pasa a tesi dati?

Kownu Balak fu Moab pruberi fu meki a falsi profeiti Bileam fluku Israel. Ma Yehovah sorgu taki Bileam no ben abi bun bakapisi, fu di A kenki den fluku fu en kon tron blesi (Numeri 22:1-7; 24:10). Ma a sani dati no tapu Bileam fu kon nanga wan tra triki fu sorgu taki a pipel no ben o kisi a kondre. San a du? A kori den fu du hurudu èn fu anbegi Bâal. Aladi a no ben man kori a heri pipel, toku 24.000 Israelsma fadon na ini a trapu disi. Den du hurudu nanga den umasma fu Moab, èn den tron anbegiman fu Bâal fu Peor.—Numeri 25:1-9.

Denki a tori! Furu fu den Israelsma dati ben si fa Yehovah ben tyari den pasa na ini ’a sabana di bigi srefisrefi èn di e meki sma frede’ (Deuteronomium 1:19). Toku, di a pipel fu Gado ben de fu kisi a gudu fu den, dan 24.000 fu den meki den takru lostu fu den basi den, èn a sani dati meki taki Yehovah kiri den. A sani disi na wan warskow gi futuboi fu Gado na ini a ten disi di de fu kisi wan moro bigi gudu!

Na ini den lasti dei disi, Satan e pruberi fu gens den futuboi fu Yehovah so taki den no e kisi a gudu fu den. Ma Satan no e gebroiki nyun triki. Neleki fa a ben du nanga Israel di den ben de fu go na ini a Pramisi Kondre fu a fosi leisi, na so a e pruberi doronomo fu meki sma frede èn fu meki den tweifri. Iya, a e meki sma tapu skreki gi wi, a e meki den frufolgu wi, noso a e meki den spotu wi. Den sani disi meki taki son Kresten naki futu (Mateyus 13:20, 21). Wan tra triki di Satan e gebroiki heri bun, na taki a e meki sma tyari densrefi na wan fasi di no fiti. Ten na ten, son sma di kon nanga takru denki na ini a Kresten gemeente, pruberi fu pori den wan di abi wan swaki bribi, èn di no e waka na ini a leti fu Gado di e sori sma a yoisti pasi.—Yudas 8, 12-16.

Lepi Kresten e si krin taki Satan en ten kon syatu, fu di moro nanga moro sma na heri grontapu e tyari densrefi na wan fasi di no fiti. Iya, Satan sabi taki heri-esi a no o man du ogri moro nanga den getrow futuboi fu Gado. Sobun, a no de fu taki dati wi musu abi wan tranga bribi fu man kakafutu gi den triki fu Satan.

Sani di e yepi wi fu tan abi wan tranga bribi

Na apostel Petrus ben agersi a profeitiwortu fu Gado nanga „wan lampu di e skèin na ini wan dungru presi”, fu di a wortu disi e yepi Kresten fu kon frustan taki a wani fu Gado e kon tru (2 Petrus 1:19-21). Den sma di e kon lobi a Wortu fu Gado èn di e tan teki a tiri fu en, sa ondrofeni taki Yehovah sa meki den pasi fu den kon reti (Odo 3:5, 6). Fu di den sma disi di de nanga tangi na ati abi wan tranga howpu, meki den e ’bari fu prisiri bika na ati fu den e firi bun’. Ma den wan di no sabi Yehovah noso di e drai baka gi en, e firi ’sari na ini den ati’, èn den „e firi brokosaka” (Yesaya 65:13, 14). Fu dati ede, te wi e studeri Bijbel fayafaya èn te wi e du san wi e leri, dan wi sa man tan poti prakseri na a howpu fu wi di sa kon tru seiker, èn wi no sa poti prakseri na den prisiri sani fu grontapu di sa lasi gowe.

A de tumusi prenspari tu taki wi e begi Gado doronomo, fu man tan abi wan tranga bribi. Di Yesus ben e taki fu a kaba fu a sistema disi, dan a taki: „Tan na ai èn begi ala ten taki unu man lowe gi ala den sani di musu pasa, èn taki unu kan tanapu na fesi a Manpikin fu libisma” (Lukas 21:34-36). Luku taki Yesus e gi wi deki-ati fu begi doronomo, fu di a ben sabi taki na ini a muilek ten disi wi kan lasi a grani di wi abi fu kisi têgo libi. Den begi fu yu e sori taki yu e du ala san yu man fu tan abi wan tranga bribi?

Wi no musu frigiti taki neleki fa wan sipi kan sungu moro makriki te a e doro a lanpe, na so a kan pasa moro makriki na ini den lasti dei disi, taki wi lasi a grani di wi abi fu kisi a gudu fu wi. Sobun, a de prenspari trutru taki wi e tan luku a leti di kan yepi wi fu kisi frulusu.

 Luku bun nanga falsi leti

Fosi, a ben de so taki na neti te a mun no ben e skèin, ogri-ati man ben e meki faya na syoro fu kori den sipiman di no ben sabi fa fu doro a syoro. Te den sipiman ben e tyari a sipi go pe den faya disi ben de, dan den sipi fu den ben e naki panya na tapu den bigi ston, den ogri-ati man disi ben e fufuru den sani fu den, èn sma na ini den sipi ben e lasi den libi.

Na a srefi fasi Satan, na „engel fu leti” di e kori sma, wani pori a matifasi di sma abi nanga Gado. Kande a e gebroiki „falsi apostel” nanga sokari „dinari di e du san regtfardiki”, fu kori den wan di no de na ai (2 Korentesma 11:13-15). Ma wan kapten nanga den tra sipiman di abi ondrofeni èn di de na ai, no sa meki falsi leti kori den. Na so Kresten no sa bribi falsi leri nanga denki di e tyari takru bakapisi kon, fu di den „leri fa fu gebroiki den frustan fu man si sani krin, so taki den kan sabi san bun èn san no bun”.—Hebrewsma 5:14; Openbaring 2:2.

Sipiman ben abi wan karta fu den difrenti toren na syoro di ben e skèin faya fu sori den pe den ben musu tyari a sipi. A karta disi ben e sori den fa ibriwan fu den toren disi tan, èn na sortu fasi a ben e skèin faya. Wan buku e taki: „Te den sipiman ben e si wan fu den toren disi, dan den ben luku fa a toren tan, èn efu a toren ben de na tapu a karta. Na so den ben sabi pe den ben de” (The World Book Encyclopedia). Na so Gado Wortu e yepi reti-atisma tu fu kon sabi san na a tru anbegi èn suma na den tru anbegiman. Spesrutu na ini den lasti dei disi Yehovah poti a tru anbegi moro hei leki falsi anbegi (Yesaya 2:2, 3; Maleaki 3:18). Yesaya 60:2, 3 e sori krin san na a difrenti na mindri a tru anbegi nanga falsi anbegi, fu di den tekst dati e taki: „Dungru srefi sa tapu grontapu, èn deki dungru den nationaal grupu; ma na yu tapu Yehovah sa skèin, èn na yu tapu a glori fu en sa de fu si. Èn den pipel seiker sa go pe a leti fu yu de, èn kownu sa go pe a leti fu yu e skèin.”

Fu di milyunmilyun sma fu ala pipel nanga kondre e tan waka na ini a leti fu Yehovah, meki den no sa lasi bribi na a lasti pisi fu a pasi di den abi fu waka. Ma neleki sipi, den sa pasa den lasti dei fu a sistema disi sondro taki ogri e miti den na pasi, èn den sa go na ini a nyun grontapu, na agersi lanpe pe vrede de.

[Futuwortu]

[Prenki na tapu bladzijde 15]

Neleki sipiman, Kresten e luku bun taki falsi leti no e kori den