„Mi ben abi lespeki gi en fu di a ben abi furu deki-ati”

NA INI 2006, Günter Grass, wan skrifiman fu Doisrikondre di ben wini a Nobelprijs gi Literatuur na ini 1991, tyari wan buku kon na doro di ben e taki fu a libi fu en. Na ini a buku disi a taki dati, di a ben abi 17 yari, dan a ben musu go na ini a legre fu Doisrikondre. Na ini a srefi buku dati, a e fruteri fu wan man di ben du wan sani di naki en ati so te, taki moro leki 60 yari baka dati, a no ben frigiti a man dati. Di a man disi ben e kisi frufolgu, dan a opo taki gi a bribi fu en, aladi nowan sma ben e horibaka gi en.

Na ini wan interview, Grass ben taki fu na aparti sma disi di ben weigri fu teki prati na a feti, èn a koranti di nen Frankfurter Allgemeine Zeitung ben sori san Grass ben taki na ini na interview dati. Grass ben taki dati a man disi „no ben e horibaka gi nowan fu den pôpi denki fu a ten dati, èn a no ben de wan Nazisma, wan Communist, noso wan Socialist. A ben de wan Kotoigi fu Yehovah”. Grass no sabi moro fa a Kotoigi dati nen, ma a ben kari en ’Wirtunsowasnicht’ (Disi wani taki: Wi no e du den sortu sani dati). Yehovah Kotoigi kon si taki a man dati ben de Joachim Alfermann. Baka di den srudati ben fon en èn ben wisiwasi en ibri tron baka, dan den sroto en wawan na ini wan kamra. Ma Alfermann tan tanapu kánkan èn a weigri fu go na ini a legre.

Grass e taki: „Mi ben abi lespeki gi en fu di a ben abi furu deki-ati. Mi ben aksi misrefi: ’Fa a du kon taki a man disi e tan horidoro? Pe a e feni a krakti?’” Alfermann tan horidoro aladi den srudati pruberi wan heri pisi ten fu meki a drai baka gi Gado. Te fu kaba, den seni en go na a strafuman-kampu Stutthof na ini februari 1944. A no lasi en libi na a ten fu a feti, ma na ini april 1945, a kon fri èn a tan wan getrow Kotoigi fu Yehovah te na a dede fu en na ini 1998.

Ala nanga ala, sowan 13.400 Kotoigi ben de na ini Doisrikondre èn na ini den kondre di ben de na ondro a Nazi tirimakti. Bun furu ogri sani miti den Kotoigi disi fu di den ben de anbegiman fu Gado, èn Alfermann ben de wan fu den Kotoigi dati. Den ben gi yesi na a rai di Bijbel e gi fu no teki sei na ini politiek afersi, èn fu no teki prati na feti (Mateyus 26:52; Yohanes 18:36). Den tirimakti fu Hitler poti sowan 4200 Kotoigi na ini strafuman-kampu, èn 1490 fu den Kotoigi disi lasi den libi. Srefi na ini a ten disi, a fasi fa den Kotoigi dati opo taki gi a bribi fu den e naki na ati fu furu sma. Aladi den sma disi abi wan tra bribi, toku den e lespeki a fasti bosroiti di den Kotoigi dati ben abi.

[Prenki na tapu bladzijde 32]

Joachim Alfermann