Sirakusa—Wan fu den foto pe Paulus ben doro

NA A ten fu a yari 59, wan boto hari gowe fu na èilanti Malta di de na ini a Mindrikondre Se. A boto disi di ben e go na Italiakondre, ben abi a nen „Den Manpikin fu Zeus”. Sma ben e bribi taki den gado disi ben e kibri den botoman. A Bijbel skrifiman Lukas e fruteri taki a boto dati ben „doro na a lanpresi fu Sirakusa” di ben de na a zuid-owstusei syoro fu Sisilia, èn a „tan drape dri dei langa” (Tori fu den Apostel 28:11, 12). Lukas, Aristarkus nanga na apostel Paulus ben de na ini a boto. Den srudati ben e tyari Paulus go na Rome pe a ben o kisi krutu.—Tori fu den Apostel 27:2.

Wi no sabi efu Paulus kisi na okasi fu go na ini a foto Sirakusa. Efu en, noso den mati fu en ben kisi na okasi dati, dan san den ben si?

Fosi, Sirakusa ben de wan prenspari foto tu, neleki Ateine nanga Rome. Sma e bribi taki na den Korentesma ben seti a foto disi na ini 734 bifo Krestes. Ten na ten sani ben e waka heri bun nanga a foto Sirakusa, èn pôpisma fu owruten gebore drape. Wan tu fu den sma dati, na a skrifiman Epikarmus, nanga Arkimeides, wan sabiman fu wiskunde. Na ini 212 bifo Krestes, den Romesma teki Sirakusa abra.

Te yu e go na Sirakusa na ini a ten disi, dan yu kan kon sabi pikinso fa a foto disi ben de na ini a ten fu Paulus. A foto ben prati na ini tu pisi, èn wan fu den pisi na a pikin èilanti Ortigia, pe a kan taki a sipi fu Paulus ben doro. A tra pisi fu a foto ben de na a sesyoro fu Sisilia.

Na ini a ten disi, yu kan si san tan abra fu a moro owru Griki tempel na ini Sisilia, namku a tempel fu Apolo di de fu a di fu siksi yarihondro bifo Krestes. Na tapu na èilanti, yu abi pilari tu fu wan tempel di ben gi abra na Ateina, èn den pilari disi de fu a di fu feifi yarihondro bifo Krestes. Den pilari disi tron wan pisi fu a kathedraal.

Na ini a ten disi, furu fu den wenkri nanga wrokopresi fu Sirakusa no de na tapu na èilanti, ma na tapu a pisi di de na a sesyoro fu Sisilia. Drape yu kan go na Neapolis, wan pisi kontren pe owruten sani de fu si. Krosibei fu a kontren disi yu abi wan Griki komedi-oso. Na komedi-oso disi na wan fu den moro moi komedi-oso di de ete èn di e sori fa den Grikisma ben e bow fosi. Na komedi-oso disi di de krosibei fu a se, ben de wan heri moi presi fu hori komediprei. Te na a zuidsei fu Neapolis, yu abi a bigi stadion fu den Romesma, èn a stadion disi de fu a di fu dri yarihondro. A lontu stadion disi di langa 140 meter, èn di bradi 119 meter, na wán fu den dri moro bigi stadion na ini Italiakondre.

Efu yu e kisi okasi fu go na Sirakusa, dan go sidon na tapu wan bangi na a syoro fu Ortigia, èn opo yu Bijbel na Tori fu den Apostel 28:12. Te yu du dati, dan yu musu prakseri na apostel Paulus di ben de na ini a boto di ben seiri go na a lanpresi drape.

[Karta na tapu bladzijde 30]

(Efu yu wani si pe den sani disi skrifi, luku a tijdschrift)

Malta

Sisilia

Sirakusa

ITALIAKONDRE

Regium

Puteoli

Rome

[Prenki na tapu bladzijde 30]

A brokopresi fu wan Griki komedi-oso na ini Sirakusa