Wi musu libi soso gi a dei fu tide?

„NOITI mi e prakseri a tamara. Awansi fa a no fa, a sa kon.” A sani disi di sma lobi taki e komoto fu a pôpi sabiman Albert Einstein. Furu sma e taki a srefi sortu sani disi. Kande den e taki: „Fu san ede mi musu broko mi ede nanga a tamara?” Noso kande yu yere sma e taki: „Du san yu musu du.” „Libi gi tide.” „No broko yu ede nanga a tamara.”

A no de fu taki dati a denki disi a no wan nyun denki. „Nyan, dringi, èn meki prisiri. No broko yu ede nanga tra sani.” Na so den Epikuriasma fu owruten ben lobi fu taki. Son sma na ini a ten fu Paulus ben abi a srefi denki disi. Den ben e taki: „Meki wi nyan èn dringi, bika tamara wi o dede” (1 Korentesma 15:32). Den sma disi ben e bribi taki a syatu libi disi na ala, èn dati meki den ben e gi sma deki-ati fu du ala san den man fu kisi wini fu a libi nownowde.

Milyunmilyun sma na ini a ten disi e du ala san den man fu kisi wini fu a libi, ma a no de so taki den sma disi e suku nomo fu abi prisiri. A muilek situwâsi di furu sma de na ini, e meki taki den musu feti doronomo fu tan na libi. Fu san ede den musu prakseri a ten di e kon, noso „a tamara”? Nofo tron den no abi nowan enkri howpu gi a tamara, a no so?

Wi musu seti sani gi a ten di e kon?

Srefi sma di abi en pikinso moro bun feni taki a no de fanowdu fu seti sani gi a tamara. Kande den sma disi e aksi densrefi: „Fu san ede mi musu broko mi ede nanga a sani dati?” Èn sonwan fu den ben kan feni taki sma di e seti sani gi a tamara e lasi-ati te sani no e waka so leki fa den ben fruwakti. Srefi a famiri-edeman Yob fu owruten ben lasi-ati trutru di a si taki a „no ben man du” den sani di a ben abi na prakseri fu du, èn na so en nanga en osofamiri no ben kan abi a koloku libi di den ben wani.—Yob 17:11; Preikiman 9:11.

Robert Burns, wan puwema skrifiman fu Skotland, e agersi a muilek situwâsi fu wi nanga a di fu wan pikin moisimoisi. Di Burns ben e plugu a gron fu en, dan sondro fu a sabi, a pori a nesi fu a moisimoisi disi. Di a puwema skrifiman si a sani disi, dan a ben e denki: ’Iya,  furu tron wi srefi no man du notinoti te sani e miti wi, awinsi o bun wi e suku fu seti a libi fu wi.’

Sobun, a tru taki a no de fanowdu fu seti sani gi a tamara? Fu taki en leti, te wi no e seti sani bun na fesi, dan dati kan tyari furu takru bakapisi kon te bigi ogri winti e wai, noso te tra rampu e pasa. A no de fu taki dati nowan sma ben kan tapu a bigi ogri winti Katrina di tyari bigi pori kon. Ma efu sma ben seti sani moro bun na fesi, dan furu presi na ini a foto no ben o pori, èn den sma drape no ben o pina so, a no so?

San yu e denki fu a tori? A bun te wi e libi soso gi a dei fu tide, èn te wi no e poti prakseri na a tamara? Luku san a tra artikel e taki fu a tori disi.

[Prenki na tapu bladzijde 3]

„Nyan, dringi, èn meki prisiri. No broko yu ede nanga tra sani”

[Prenki na tapu bladzijde 4]

Efu sma ben seti sani na fesi, dan a bigi winti Katrina no ben o tyari so wan bigi pori kon, a no so?

[Sma di abi a reti fu a prenki]

U.S. Coast Guard Digital