A wortu fu Yehovah e kon tru ala ten
A wortu fu Yehovah e kon tru ala ten
„Yehovah un Gado du ala den bun sani di a pramisi unu. Ala den sani disi kon tru.”—YOSUA 23:14.
1. Suma ben de Yosua, èn san a du na a kaba fu en libi?
BIJBEL e taki fu wan tranga man di ben abi deki-ati, èn a man disi ben e teki fesi na ini feti. A man disi ben abi wan tranga bribi èn a ben de getrow. A ben de wan futuboi fu Moses, èn Yehovah srefi ben bosroiti taki a ben de a yoisti man di ben musu tyari a pipel Israel komoto na ini a gran sabana di ben e meki sma frede. A ben musu tyari den go na ini wan kondre di lai nanga merki nanga oni. Na a kaba fu en libi, a man disi di nen Yosua, hori wan lasti takimakandra nanga den owru man fu Israel, èn den sani di a ben taki naki na ati fu den. A no de fu taki, dati den wortu dati tranga a bribi fu den wan di ben arki en. Den wortu dati kan tranga a bribi fu yu tu.
2, 3. San ben de a situwâsi fu Israel di Yosua taki nanga den owru man fu a pipel, èn san Yosua ben taki?
2 Luku san ben de a situwâsi na a ten dati, soleki fa Bijbel e sori: „Yehovah ben meki sani waka so, taki den feanti fu Israel no ben kon feti nanga den moro. Na so, furu yari pasa. Yosua ben kon owru kaba. Ne Yosua kari a heri pipel fu Israel kon. A kari den owru man kon, sobun den edeman, den krutuman, nanga den fesiman, èn a taigi den: ’Mi kon owru kaba.’”—Yosua 23:1, 2.
3 Yosua ben abi pikinmoro 110 yari, èn a ben e libi na ini wan ten pe wan lo sani ben e miti a pipel fu Gado. A ben si den makti sani di Gado du, èn a ben si fa furu fu den pramisi fu Yehovah kon tru. Sobun, na fu di ensrefi ben ondrofeni den sani dati, meki a ben taki nanga overtoigi: „Unu sabi heri bun taki Yehovah un Gado du ala den bun sani di a pramisi unu. Ala den sani disi kon tru. Iya, a du ala den sani di a pramisi.”—Yosua 23:14.
4. Sortu sani Yehovah ben pramisi den Israelsma?
4 Sortu pramisi fu Yehovah kon tru na a ten fu Yosua? Wi sa luku dri fu den sani di Yehovah ben pramisi den Israelsma. A fosi sani, na taki a ben o puru den na ini katibo. A di fu tu sani, na taki a ben o kibri den. Èn a di fu dri sani, na taki a ben o sorgu gi den. Yehovah pramisi a pipel fu en na ini a ten disi den srefi sortu sani dati, èn wi si taki den pramisi dati kon tru. Ma fosi wi sa taki fu den sani di Yehovah du na ini a ten disi, meki wi luku san a du na ini a ten fu Yosua.
Yehovah e puru a pipel fu en na ini katibo
5, 6. Fa Yehovah puru den Israelsma na ini katibo na Egepte, èn san disi ben sori?
5 Di den Israelsma ben de na ini katibo na Egepte, dan den ben bari kari Gado fu yepi den, èn Yehovah arki den (Exodus 2:23-25). Di Moses ben de na a busi di ben e bron, dan Yehovah taigi en: „Mi o saka go fu frulusu [a pipel fu mi] fu den Egeptesma, èn mi o puru den fu a kondre dati fu tyari den go na wan bun èn bigi kondre. Mi o tyari den go na wan kondre di lai merki nanga oni” (Exodus 3:8). A ben musu fu naki Yosua en ati fu si taki Yehovah du san a ben taki! Di Farao weigri fu meki den Israelsma gowe libi Egepte, dan Moses taigi en taki Gado ben o meki a watra fu a Nijl-liba tron brudu. Èn na dati pasa tu. A watra fu a Nijl-liba kon tron brudu. Den fisi dede, èn a watra no ben bun moro fu dringi (Exodus 7:14-21). Farao tan weigri fu seni a pipel gowe. Fu dati ede, Yehovah meki ete neigi rampu pasa, èn ibri tron baka a ben e taki san ben o pasa (Exodus, kapitel 8-12). Baka di a di fu tin rampu kiri a fosi gebore manpikin fu Egepte, dan Farao gi komando fu seni den Israelsma gowe. Èn den Israelsma no draidrai fu gowe!—Exodus 12:29-32.
6 Fu di den Israelsma ben komoto na ini katibo, meki Yehovah ben man teki den leki en pipel. A sani disi gi Yehovah grani leki a Sma di e du san a pramisi, iya, a sma di ala ten e du san a taki. A sani disi sori taki Yehovah makti moro den gado fu den tra pipel. Te wi e leisi fu a fasi fa Yehovah frulusu a pipel fu en, dan dati e tranga a bribi fu wi. Prakseri fa a ben o de efu yu ben de drape! Yosua kon si taki Yehovah trutru ben de „a Moro Heiwan fu heri grontapu”.—Psalm 83:18.
Yehovah e kibri a pipel fu en
7. Fa Yehovah kibri den Israelsma gi a legre fu Farao?
7 Fa a de nanga a di fu tu pramisi di e taki dati Yehovah ben o kibri a pipel fu en? Di Yehovah pramisi a pipel fu en taki a ben o puru den na ini katibo na Egepte èn taki a ben o meki den go na ini a Pramisi Kondre, dan dati ben wani taki dati a ben o abi fu kibri den. Memre taki Farao di ben atibron srefisrefi, hari go baka Israel nanga a makti legre fu en di ben abi hondrohondro asiwagi. A man dati di ben abi heimemre, ben musu fu denki taki a ben o man teki den Israelsma abra baka, spesrutu di a si taki den bergi nanga a se ben e tapu pasi gi den Israelsma fu hari go moro fara! Now Gado du wan sani fu kibri a pipel fu en, èn a poti wan wolku na mindri den Israelsma nanga a legre fu Farao. Na a sei pe den Egeptesma ben de, ben dungru, ma na a sei pe den Israelsma ben de, faya ben e skèin. Di a wolku ben e tapu den Egeptesma fu hari go moro fara, dan Moses opo en tiki go na loktu èn a watra fu a Redi Se prati na mindri. A sani disi meki taki den Israelsma ben man lowe, ma a srefi sani disi tron wan trapu gi den Egeptesma. Yehovah pori a makti legre fu Farao krinkrin, èn na so a sorgu taki den Egeptesma no pori a pipel fu En.—Exodus 14:19-28.
8. Fa Yehovah kibri den Israelsma (a) di den ben de na ini a gran sabana èn (b) di den ben e go na ini a Pramisi Kondre?
8 Baka di den Israelsma abra a Redi Se, dan den ben e wakawaka lontu na ini wan kondre di Bijbel e kari wan „gran sabana di bigi èn di e meki sma frede, pe takru sneki nanga kruktutere de, èn pe a gron drei fu di a no abi watra” (Deuteronomium 8:15). Yehovah kibri a pipel fu en tu di den ben de drape. Èn fa a ben de di den ben e go na ini a Pramisi Kondre? Den makti legre fu den Kanansma gens den. Ma Yehovah taigi Yosua: „Opo. Abra a Yordan-liba disi, makandra nanga a heri pipel, èn go na ini a kondre di mi sa gi den manpikin fu Israel. Solanga yu e libi mi sa sorgu taki nowan sma e gens yu. Neleki fa mi ben de nanga Moses, na so mi sa de nanga yu. Mi no sa gowe libi yu kwetikweti” (Yosua 1:2, 5). Sani waka soleki fa Yehovah ben taki. Na ini sowan siksi yari, Yosua wini 31 kownu, èn a teki bigi pisi fu a Pramisi Kondre abra (Yosua 12:7-24). A no ben o man du den sani dati efu Yehovah no ben horibaka gi en.
Yehovah e sorgu gi a pipel fu en
9, 10. Fa Yehovah sorgu gi a pipel fu en na ini a gran sabana?
9 Luku a di fu dri sani di Yehovah ben pramisi a pipel fu en. A ben taki dati a ben o sorgu gi den. Syatu baka di Gado puru den Israelsma na ini katibo na Egepte, dan a pramisi den: „Mi sa meki brede fadon komoto na hemel. Ibriwan sma musu go piki san a abi fanowdu gi a dei dati.” A no de fu taki dati Gado ben gi den ’brede komoto fu hemel’. „Di den manpikin fu Israel si dati, den bigin aksi makandra: ’San na a sani disi?’” A sani disi ben de mana, a brede di Yehovah ben pramisi den.—Exodus 16:4, 13-15.
10 Na ini den 40 yari di den Israelsma ben de na ini a gran sabana, Yehovah sorgu gi den, èn a gi den sani fu nyan nanga watra fu dringi. A sorgu srefi taki den krosi na den skin no ben e priti, èn taki den futu no ben e kon sweri (Deuteronomium 8:3, 4). Yosua ben si ala den sani disi. Yehovah frulusu a pipel fu en, a kibri den, èn a sorgu gi den, neleki fa a ben pramisi den.
Yehovah e puru wi na ini katibo na ini a ten disi
11. San ben pasa na ini Brooklyn, New York, na ini 1914, èn sortu ten ben doro?
11 Fa a de na ini a ten disi? Tapu freida mamanten, 2 oktober 1914, Charles Taze Russell, di ben de fesiman fu den Bijbel Ondrosukuman na a ten dati, waka kon na ini a nyanyan kamra fu Bethel na ini Brooklyn, New York. „Kumorgu, ala sma”, na so a taki nanga wan breiti sten. Ne, fosi a go sidon, a meki bekènti nanga prisiri: „A ten fu den Heiden kon na wan kaba; den kownu fu den no e tiri moro.” A ten ben doro baka gi Yehovah, a Moro Hei Tiriman fu hemel nanga grontapu, fu handri fu a bun fu a pipel fu en. Èn na dati a du tu!
12. Suma Yehovah frulusu na ini 1919, èn san ben de a bakapisi fu dati?
12 Feifi yari nomo baka dati, Yehovah puru a pipel fu en na ini katibo na „Babilon a Bigiwan”, a bigi grontapumakti fu falsi bribi (Openbaring 18:2). Furu fu wi no ben gebore ete di a tumusi moi sani dati pasa. Ma wi e si krin san na den bakapisi fu a sani dati. Yehovah seti a tru anbegi baka, èn a tyari den wan di ben e angri fu anbegi en, kon na wán. Yehovah ben meki a profeiti Yesaya taki dati a sani disi ben o pasa. Yesaya ben taki: „A musu pasa na ini a kabapisi fu den dei taki a bergi fu na oso fu Yehovah sa poti kon steifi, èn a sa hei moro leki na ede fu den bergi, èn trutru den sa hei en moro leki den pikin bergi; èn na en ala den nâsi musu go.”—Yesaya 2:2.
13. Fruteri fa yu srefi si taki moro nanga moro sma tron anbegiman fu Yehovah.
13 Den wortu fu Yesaya kon tru. Na ini 1919, a salfu fikapisi bigin preiki nanga deki-ati na heri grontapu, èn a sani disi meki taki na anbegi fu a tru Gado go na fesi. Na ini den yari baka 1930, a kon na krin taki „den tra skapu” ben e kon na wán (Yohanes 10:16). Na ini a bigin, dusundusun sma ben e opo taki gi a tru anbegi, baka dati hondrohondro dusun sma, èn now milyunmilyun sma e du dati! Na apostel Yohanes ben kisi wan fisyun, èn na ini a fisyun dati a e kari den sma disi „wan bigi ipi sma di nowan sma ben man teri; den ben komoto fu ala kondre, lo, pipel, nanga tongo” (Openbaring 7:9). San yu srefi si? Omeni Kotoigi fu Yehovah ben de na grontapu di yu kon leri sabi a tru anbegi? Tide na a dei, moro leki 6.700.000 sma e dini Yehovah. Fu di Yehovah puru a pipel fu en na ini katibo na Babilon a Bigiwan, meki moro nanga moro sma na heri grontapu e tron anbegiman fu en, èn a sani dati e naki wi ati trutru.
14. Fa Gado sa frulusu a pipel fu en na ini a ten di e kon?
14 Yehovah sa du ete wan tra sani fu frulusu a pipel fu en, èn a sani disi sa abi krakti tapu ibriwan sma na grontapu. Yehovah sa gebroiki a makti fu en na wan tumusi moi fasi fu pori ala sma di e gens en, èn a sa frulusu a pipel fu en so taki den kan go na ini wan nyun grontapu pe regtfardikifasi sa de. A sa gi wi prisiri trutru fu si fa wan kaba sa kon na ogridu èn fa wan tumusi moi ten di noiti ben de bifo, sa bigin!—Openbaring 21:1-4.
Yehovah e kibri wi na ini a ten disi
15. Fu san ede a de fanowdu taki Yehovah kibri a pipel fu en na ini a ten disi?
15 Soleki fa wi si, dan a ben de fanowdu taki Yehovah kibri den Israelsma na ini a ten fu Yosua. Ma a de so taki Yehovah no abi fu kibri a pipel fu en na ini a ten disi? Kwetikweti! Yesus ben warskow den bakaman fu en: „Sma o tyari banawtu kon na un tapu èn den o kiri unu; na ini ala kondre den sma o teige unu fu mi nen ede” (Mateyus 24:9). Na ini den yari di pasa, sma gens èn frufolgu Yehovah Kotoigi na ini difrenti kondre na wan ogri-ati fasi. Ma toku Yehovah horibaka gi a pipel fu en (Romesma 8:31). A Wortu fu en e gi wi a dyaranti taki noti, iya, ’nowan fetisani di sma sa meki teige wi’ sa man tapu a wroko di wi e du fu preiki a Kownukondre boskopu èn fu gi sma leri.—Yesaya 54:17.
16. Fa yu srefi si taki Yehovah e kibri a pipel fu en?
16 A pipel fu Yehovah go na fesi, aladi furu sma na grontapu abi bita-ati gi den. A wroko fu Yehovah Kotoigi e go na fesi na ini 236 kondre, èn a sani disi e sori krin taki Yehovah de nanga wi trutru èn taki a e kibri wi gi den wan di wani pori wi èn di wani gens a wroko fu wi. Yu e memre den nen fu den tiriman nanga den kerki fesiman di kwinsi Gado en pipel na wan ogri-ati fasi sensi yu de? San pasa nanga den? Pe den de now? Furu fu den no de moro, neleki fa dati pasa nanga Farao na ini a ten fu Moses nanga Yosua. Èn fa a de nanga den getrow futuboi fu Gado di dede na ini a ten disi? Den de na ini Yehovah en prakseri. Dati na a moro bun presi pe den ben kan de. A de krin fu si taki Yehovah kibri a pipel fu en trutru.
Yehovah e sorgu gi a pipel fu en na ini a ten disi
17. Fa Yehovah gi a pipel fu en na ini a ten disi, a dyaranti taki a o sorgu gi den?
17 Yehovah ben sorgu gi a pipel fu en di den ben de na ini a gran sabana, èn na ini a ten disi a e du dati tu. „A getrow èn koni srafu” e yepi wi fu kon moro krosibei na Gado (Mateyus 24:45). Wi e kisi sabi fu Bijbel tori di ben de kibritori hondrohondro yari langa. Na engel ben taigi Danièl: „Kibri den wortu èn sroto a buku, teleki a ten fu a kaba. Furu sma sa go-kon, èn a tru sabi o lai srefisrefi.”—Danièl 12:4.
18. Fu san ede wi kan taki dati wan sma kan kon sabi furu tru tori fu Bijbel na ini a ten disi?
18 Now wi e libi na ini a ten fu a kaba, èn wi kon sabi bun furu sani fu Gado. Na heri grontapu, a santa yeye meki taki sma di lobi san tru, kon kisi soifri sabi fu a tru Gado èn fu den sani di a o du. Bun furu Bijbel de fu feni now na heri grontapu, sosrefi buku di e yepi sma fu kon frustan den tumusi prenspari tru tori fu Bijbel. Fu eksempre, luku fu sortu tori a buku San Bijbel e wi leri trutru? * e taki. Disi na a nen fu wan tu fu den kapitel na ini a buku dati: „Suma na Gado trutru?”, „Pe den dedewan de?”, „San na a Kownukondre fu Gado?”, èn „Fu san ede Gado e gi pasi taki libisma e pina?” Libisma aksi densrefi den sani disi dusundusun yari langa. Now sma kan feni piki tapu den aksi disi. Hondrohondro yari langa sma no ben man frustan Gado Wortu, èn na ini a heri pisi ten dati, Krestenhèit leri sma falsi leri. Toku Gado Wortu de ete, èn a e yepi ala sma di e angri fu dini Yehovah.
19. Sortu pramisi yu si kon tru na ini a ten disi, èn san a sani dati e sori yu?
19 A no de fu taki, dati den sani di wi si nanga wi eigi ai, musu meki wi taki: „Yehovah un Gado du ala den bun sani di a ben pramisi unu. Ala den sani disi ben kon tru. Iya, a du ala den sani di a pramisi” (Yosua 23:14). Yehovah e frulusu, a e kibri, èn a e sorgu gi den futuboi fu en. Yu sabi wan pramisi fu en di no kon tru na a yoisti ten? Den alamala kon tru. Wi e frutrow na ini a Wortu fu Gado di no e lei, èn dati na wan koni sani fu du.
20. Fu san ede wi kan abi a dyaranti taki den pramisi fu Yehovah sa kon tru na ini a ten di e kon?
20 Fa a sa de na ini a ten di e kon? Yehovah taigi wi taki furu fu wi kan abi a howpu fu libi na ini wan grontapu di sa tron wan moi paradijs. Sonwan fu wi abi a howpu fu tiri makandra nanga Krestes na hemel. Awansi sortu howpu wi abi, wi abi ala reide fu tan getrow neleki Yosua. A dei o kon te a howpu fu wi sa kon tru. Dan wi sa prakseri ala den pramisi di Yehovah ben gi wi, èn wi tu sa taki: „Den alamala kon tru.”
[Futuwortu]
^ paragraaf 18 Yehovah Kotoigi tyari en kon na doro.
Yu kan fruklari disi?
• Sortu pramisi fu Yehovah kon tru na ini a ten fu Yosua?
• Sortu pramisi fu Gado yu si kon tru na ini a ten disi?
• Sortu dyaranti wi kan abi te a abi fu du nanga a wortu fu Gado?
[Aksi fu a tori disi]
[Prenki na tapu bladzijde 23]
Yehovah frulusu a pipel fu en
[Prenki na tapu bladzijde 23]
Fa Yehovah kibri a pipel fu en na a Redi Se?
[Prenki na tapu bladzijde 24]
Fa Yehovah sorgu gi a pipel fu en na ini a gran sabana?
[Prenki na tapu bladzijde 25]
Yehovah e sorgu gi a pipel fu en na ini a ten disi