Fu san ede a no makriki fu abi sakafasi?

FURU sma feni taki a no e tyari wini kon te yu abi sakafasi na ini a ten disi. Den sma di trawan e lespeki èn di abi moro bun bakapisi na ini a libi, na den wan di lobi strei nanga trawan, den wan di abi heimemre, èn den wan di de nomonomo fu kisi san den wani. Furu sma no wani de leki den sma di abi sakafasi nanga safri-ati fasi, ma den wani de leki den gudusma nanga den pôpisma. Nofo tron, den sma di abi bun bakapisi na ini a libi, lobi fu meki bigi taki na fu di den wroko so tranga, meki den doro so fara. Den sma disi no abi sakafasi srefisrefi, ma na presi fu dati, den e meki bigi fu di sani e waka bun gi den.

Wan ondrosukuman fu Kanada ben taki dati na ini a ten disi, ’moro nanga moro sma na ini a kondre fu en e denki densrefi nomo’. Trawan feni taki wi e libi na ini wan grontapu pe furu sma feni en moro prenspari fu abi prisiri, leki fu tyari den frantwortu fu den. A ben taki tu dati moro nanga moro sma na ini a ten disi e denki densrefi nomo. Fu di disi na a situwâsi na ini a ten disi, meki a gersi leki sakafasi no e tyari wini kon.

A no de fu taki, dati furu sma feni taki a bun te tra sma abi sakafasi, fu di a moro makriki fu abi demakandra nanga sma di no e denki tumusi furu fu densrefi. Ma fu di furu sma na ini a ten disi lobi strei nanga makandra, meki wan tu sma no wani sori sakafasi, fu di den frede taki trawan sa feni taki den no abi deki-ati.

Gado Wortu, Bijbel, ben taki dati na ini a ten disi, sma sa „denki tumusi furu fu densrefi, den sa abi heimemre” (2 Timoteyus 3:1, 2). Yu srefi e si taki a profeititori disi e kon tru, a no so? Yu feni taki sakafasi e tyari wini kon? Noso yu denki taki wan sma di abi sakafasi no abi deki-ati, èn taki a e meki sma du nanga en san den wani?

Fu taki en leti, Bijbel e sori wi krin fu san ede a bun fu lobi sakafasi èn fu san ede wi musu meki muiti fu kon abi a fasi disi. Bijbel e sori krin san na sakafasi, èn sortu wini wi sa kisi te wi e kweki a fasi disi. Boiti dati, Bijbel e sori tu taki wan sma di abi sakafasi a no wan sma di no abi deki-ati, ma na wan sma di no frede fu du san bun. A tra artikel sa fruklari fu san ede dati de so.

[Prenki na tapu bladzijde 3]

Fa wi musu si den sani di wi du?