Ondrofenitori

Mi leri fu poti ala mi frutrow tapu Yehovah

Soleki fa Aubrey Baxter fruteri

Wan satra bakadina na ini 1940, tu man kon na mi tapu, dan den naki mi so tranga taki mi fadon na gron. Tu skowtu ben e tanapu leti drape, ma den no yepi mi. Na presi fu dati, den bigin kosi mi èn den taigi den tu man taki den ben abi leti fu naki mi. Na ogri disi di miti mi, ben abi fu du nanga wan prenspari bosroiti di mi ben teki feifi yari na fesi. Na a ten dati, mi ben e wroko na ini wan mijn. Meki mi fruteri unu san pasa.

MI GEBORE na ini 1913, na ini Swansea, wan foto na a syoro fu New South Wales, na Australia. Mi mama nanga papa ben abi fo boi, èn mi ben de a di fu dri fu den boi dati. Di mi ben abi feifi yari, dan wi heri osofamiri kisi na ogri-ati siki di sma e kari a Spaanse griep. A siki disi kiri milyunmilyun sma na heri grontapu. Koloku taki a siki disi no kiri no wan fu wi. Ma na ini 1933, mi mama dede di a ben abi 47 yari, èn a sani dati ben de wan bigi sari gi na osofamiri. Mi mama ben de wan sma di ben lobi Gado, èn di a ben de na libi ete, a ben kisi tu fu den buku di nen Verlichting (Leti). Yehovah Kotoigi ben e gebroiki den buku disi fu gi sma leri fu Bijbel.

Na a ten dati, mi ben e wroko na wan mijn. Son pisi ten wi ben abi furu wroko, ma na tra pisi ten furu wroko no ben de fu du. Te wi no ben abi furu fu du, mi ben e tyari den tu buku go na wroko èn mi ben e leisi den nanga yepi fu a lampu di ben fasi na a helm fu mi. Heri esi mi kon si taki mi ben feni a tru anbegi. Mi bigin arki Bijbel lezing di Yehovah Kotoigi ben e hori tapu radio. Wan tra sani di gi mi moro prisiri, na di mi papa nanga den brada fu mi ben wani kon sabi moro tu fu den tru tori fu Bijbel.

Na ini 1935, ete wan sari sani pasa. Mi pikin brada Billy kon siki na den fokofoko fu en, èn a dede. A ben abi 16 yari nomo. Ma disi leisi na opobaka howpu ben de wan trowstu gi wi (Tori fu den Apostel  24:15). Baka wan pisi ten, mi papa nanga den bigi brada fu mi, namku Verner nanga Harold, èn sosrefi den wefi fu den, gi den libi abra na Gado. Mi na a wan-enkri sma di de na libi ete fu mi krosibei famiri. Ma Marjorie, a di fu tu wefi fu Verner, nanga Elizabeth, a wefi fu Harold, e dini Yehovah fayafaya ete.

Mi e leri fu frutrow tapu Yehovah

A fosi leisi di misrefi miti nanga Yehovah Kotoigi, ben de na ini 1935 di wan uma na tapu wan baisigri kon na wi oso. Na uma disi ben de fu Ukraini. A sonde baka dati, mi go na wan Kresten konmakandra fu a fosi leisi, èn wán wiki baka dati mi go na ini a preikiwroko makandra nanga a grupu. A Kotoigi di ben e teki fesi na a preikiwroko konmakandra, gi mi wan tu buku èn mi skreki di a seni mi fu go preiki mi wawan! Di mi ben de na a fosi oso, dan mi ben senwe so te, taki mi ben winsi taki a gron ben kan priti opo swari mi! Ma na ososma ben abi switifasi, èn den teki wan tu buku srefi.

Den bijbeltekst soleki Preikiman 12:1 nanga Mateyus 28:19, 20 ben naki mi ati trutru, èn dati meki mi ben wani tron wan pionier, noso wan furuten preikiman. Mi papa ben e horibaka gi mi. Aladi mi no ben dopu ete, toku mi bosroiti fu bigin pionier tapu 15 yuli 1936. A dei dati, mi go na a bijkantoro fu Yehovah Kotoigi na ini Sydney, èn mi kisi a grani fu wroko makandra nanga 12 tra pionier na ini a kontren fu Dulwich Hill na ini Sydney. Den pionier disi leri mi fu wroko nanga wan miri di mi ben musu drai nanga anu. Na a ten dati, den pionier ben e gebroiki a miri disi fu meki blon, so taki den no ben abi fu pai tumusi furu moni fu bai nyanyan.

Wi e pionier na den boitipresi

Di mi dopu wan tu mun baka dati, mi ben musu go wroko na ini a distrikt Queensland makandra nanga tu tra pionier, namku Aubrey Wills nanga Clive Shade. Wi go nanga na oto fu Aubrey, tu baisigri, wan gramofon fu drai Bijbel lezing, wan tenti pe wi ben o tan dri yari langa na ini, dri bedi, wan tafra, nanga wan patu fu bori nyanyan. Wan neti di mi ben musu bori, dan mi bosroiti fu bori wan kefalek switi nyanyan. Mi bori gruntu nanga blonpapa. Ma nowan fu wi ben man nyan a nyanyan dati. Wan asi ben de krosibei, èn mi poti a nyanyan disi gi en. A smeri en, a seki en ede, èn a waka gowe! Dati ben de a lasti leisi di mi bori wan nyun sani gi a grupu.

Baka wan pisi ten, wi bosroiti fu klari a kontren fu wi moro esi. Sobun, wi prati a kontren na ini dri pisi, èn ibriwan fu wi ben e wroko na ini wan fu den pisi dati. Son leisi te a ben kon lati, dan mi no ben e rèi go baka na oso, fu di mi ben de tumusi fara fu a presi pe a tenti fu wi ben de. Dati meki son leisi, mi ben e tan sribi na sma te den ben e kari mi kon fu tan na den oso na den boitipresi. Wan leisi, mi sribi na ini wan moi diri bedi na ini na oso fu wan sma di ben abi wan burugron. A neti baka dati mi ben e didon na tapu a gron fu a kampu fu wan man di ben e onti kanguru, aladi ipi-ipi tingi leri buba ben de na mi lontu. Nofo tron, mi ben e sribi na ini a busi. Wan leisi, busi dagu ben lontu mi, èn mi ben frede di mi ben e yere fa den ben e bari na ini a dungru. A neti dati mi no ben man sribi. Di mamanten doro, mi kon si taki a no mi den ben wani nyan, ma den ben wani nyan wan dede meti di sma ben trowe na ini a birti drape.

Wi e preiki nanga yepi fu wan wagi di abi bigi boksu

Wi ben e meki a Kownukondre boskopu bekènti nanga yepi  fu wan wagi di ben abi boksu. Na ini a foto Townsville, na ini Noord-Queensland, skowtu gi wi primisi fu drai lezing na ini a kontren pe furu wenkri de. Ma wan tu memre fu a Leger des Heils kisi atibron di den yere a lezing di wi ben e drai, èn den taigi wi fu gowe fu drape. Di wi weigri fu du dati, dan feifi fu den sma dati seki a wagi fu wi bun tranga. A pisi ten dati, mi ben de na ini a wagi e drai a lezing! Wi kon si taki, awansi wi ben o taigi den taki wi ben kisi primisi fu drai a lezing, toku dati no ben o yepi. Dati meki di den kaba muilek wi, dan wi gowe fu drape.

Na ini Bundaberg wan man di ben wani sabi moro fu Bijbel, leni wi wan boto so taki wi ben kan drai a lezing na tapu Burnett-liba di e lon pasa na ini a foto. Aubrey nanga Clive poti a gramofon nanga den boksu na ini a boto, èn den go preiki na tapu a liba. Ma mi tan na a presi di wi ben yuru fu hori konmakandra. A neti dati, wi drai wan lezing fu Joseph F. Rutherford, di ben de fu na edekantoro fu Yehovah Kotoigi. A krakti sten fu en ben de fu yere na ini heri Bundaberg, èn a ben e meki wan krakti Bijbel boskopu bekènti. A no de fu taki, dati a pipel fu Gado ben musu abi deki-ati nanga wan tranga bribi na ini a ten dati di furu span sani ben e pasa.

A grontapufeti e tyari moro tesi kon

Syatu baka di a di fu Tu Grontapufeti bigin na ini 1939, The Watchtower fu 1 november sori taki Kresten no e teki prati na politiek afersi èn na orloku. Bakaten, mi ben breiti taki mi ben studeri na artikel dati di ben kon na doro na a yoisti ten. Na a ten dati, mi, Aubrey, nanga Clive, ben e wroko makandra dri yari langa kaba, ma now ibriwan fu wi ben o go dini na wan tra presi. Mi ben musu go dini leki kring-opziener na ini Noord-Queensland, èn mi ben o abi fu frutrow tapu Yehovah doronomo.

Na ini augustus 1940, mi ben e dini na ini gemeente Townsville. A gemeente disi ben abi fo pionier, namku Percy nanga Ilma Iszlaub, * èn Norman nanga Beatrice Belloti, di ben de brada nanga sisa. Siksi yari baka dati, mi trow nanga Beatrice. Wan satra neti, baka di mi nanga wan tu tra brada nanga sisa ben kaba du stratiwroko, dan tu man kon feti nanga mi, soleki fa mi ben taki kaba na a bigin. Ma na ogri disi di miti mi, gi mi moro deki-ati fu tan dini Yehovah.

Tu pionier sisa, namku Una nanga Merle Kilpatrick, ben e du bun wroko na a noordsei fu a kondre. Wan dei, di mi ben wroko switi nanga den na ini a preikiwroko, dan den aksi mi fu pari wan boto fu tyari den go abra liba. Den ben wani go na wan osofamiri di ben wani sabi moro fu Bijbel. Dati ben wani taki, dati mi ben abi fu swen go teki wan boto na abrasei fu a liba, èn mi ben musu pari a boto go baka na den sisa fu tyari den go na abrasei. Ma di mi doro na a boto, mi no ben man feni den pari! Bakaten wi kon sabi taki wan sma di ben wani gens a wroko fu wi, ben kibri den pari. Ma a sani dati no tapu wi. Mi ben man swen bun ete, fu di wan tu yari langa mi ben abi a wroko fu puru sma na watra. Sobun, mi tai a titei fu na ankra na mi bere, èn mi hari a boto go na abrasei na den sisa. Di mi doro drape, dan mi hari den go baka na abrasei. Yehovah blesi a muiti di wi ben e meki, fu di na osofamiri pe den sisa disi ben wani go, tron Kotoigi te fu kaba.

 Yehovah kibri wi

Den srudati no ben wani taki ogri ben musu pasa na ini a kontren drape, èn dati meki den tapu a pasi krosibei fu a foto Innisfail. Fu di mi ben e tan na ini a kontren drape, meki mi ben man kisi wan karta di ben e gi sma primisi fu go na ini a foto. Disi ben de wan bigi yepi te sma fu a bijkantoro fu Yehovah Kotoigi ben e kon na den gemeente. Fu man pasa den srudati, mi ben e kibri den brada disi na ondro a baka sturu fu mi wagi.

Na a ten dati, oli no ben de fu feni makriki, èn furu wagi ben abi wan sani na inisei fu den, di ben e meki gas nanga yepi fu krofaya. Son leisi te mi ben e rèi te neti, dan mi ben e poti saka krofaya na tapu a presi pe a brada ben e kibri na ini na wagi. Te mi ben doro a presi pe den srudati ben tapu a pasi, dan mi ben meki a masyin fu a wagi drai hei, èn mi ben e sorgu taki a krofaya baki ben faya srefisrefi. Mi no ben wani taki den srudati ben musu kon luku san mi ben abi na ini na wagi. Wan fu den neti di mi ben du a sani disi, dan mi bari gi wan fu den srudati: „Efu mi stop a masyin, dan a wagi no o kisi gas moro, èn a o muilek fu start en baka.” Fu di a wagi ben faya srefisrefi, fu di a ben e meki wan lo babari, èn fu di a ben e gi wan lo smoko, meki den srudati luku a wagi esi-esi, èn den gi mi primisi fu hari gowe.

Na a ten dati, mi ben musu seti sani gi wan kongres di ben o hori gi den Kotoigi na ini Townsville. Nofo nyanyan no ben de fu feni. Fu dati ede, mi go aksi a krutuman fu a kontren drape fu yepi wi, so taki wi ben kan kisi a nyanyan di wi ben abi fanowdu. Na a pisi ten dati, lanti ben e poti den Kresten brada na strafu-oso fu di den no ben wani teki prati na orloku. Sobun, di mi go aksi primisi fu taki nanga a krutuman, dan mi ben e prakseri: ’Mi e du wan koni sani, noso na problema mi e suku?’ Ma toku, mi go taki nanga a krutuman, soleki fa den brada ben taigi mi fu du.

A krutuman ben e sidon baka wan bigi tafra, èn a taigi mi fu sidon. Di mi taigi en fu san ede mi kon taki nanga en, dan wantronso a tan tiri, èn a piri en ai luku mi. A man disi no atibron, ma a hori ensrefi, èn a aksi: „O furu nyanyan yu wani?” Mi gi en wan papira pe wi ben skrifi san na de moro prenspari sani di wi ben abi fanowdu. A luku a papira, èn a taki: „Mi no denki taki den sani disi o sari. Wi o gi yu tu tron so furu leki san yu aksi.” Mi komoto na ini a kantoro fu en, èn mi ben de nanga bigi tangi taki Yehovah yepi mi èn taki a ben sori mi ete wan tron taki mi ben musu frutrow na en tapu.

Na ini yanuari 1941, den tiriman fu Australia tapu a wroko fu Yehovah Kotoigi na ini a kondre dati. Furu sma bigin denki takru fu wi, èn den taki srefi dati wi ben e wroko leki spion gi Yapan! Wan leisi, tu wagi di ben lai nanga skowtu broko kon na ini Kingdom Farm, wan pisi gron di wi ben bai fu prani nyanyan. A gron disi ben de na tapu a hei presi di nen Atherton Plateau. Den skowtu ben feni taki wi ben abi wan bun bigi lampu di wi ben e skèin faya fu seni boskopu gi den feanti, èn den ben kon suku a lampu disi. Den ben feni tu taki wi ben e prani karu na wan spesrutu fasi so taki den feanti ben kan leisi a boskopu dati te den ben e frei pasa na ini wan opolani! A no de fu taki, dati bakaten den kon si taki den sani di sma ben e taki fu wi, no ben tru.

Fu di wi no ben mag preiki na ini a kondre, meki wi ben musu handri nanga koni te wi ben e tyari publikâsi go na den gemeente. Fu eksempre, di a buku Kinderen (Pikin) kon na doro, dan mi go teki wan dosu nanga den buku disi na ini Brisbane. Mi teki wan loko go na a noordsei fu a kondre, èn mi tyari den buku go na den gemeente drape. Fu di mi no ben wani taki den skowtu nanga den srudati ben musu opo a dosu, meki mi tai wan lontu sa na tapu a dosu, fosi mi komoto na ini a loko. Aladi a sani di mi du ben de wan lawlaw sani, toku a yepi wi fu pasa den skowtu nanga den srudati sondro problema. A pipel fu Yehovah ben breiti srefisrefi, fu di na ini yuni 1943, den kisi primisi baka fu du a wroko fu den. Wan krutuman ben taki dati sma „ben tapu a wroko fu wi fu espresi soso fu gens wi”.

Mi kisi kari fu go na ini a legre

Na ini 1944, mi, Aubrey Wills, nanga Norman Bellotti kisi kari fu go na ini a legre. Aubrey nanga Norman ben musu go wan wiki fosi mi, èn den kisi siksi mun strafu. Na a ten dati, a postkantoro ben e teki ala den Waktitoren di ben e go na Kotoigi, ma den no ben teki den Waktitoren di ben e go na sma di no ben de Kotoigi. Wi ben musu feni wán fu den sma disi di no ben de Kotoigi, èn wi ben musu meki kopi fu den tijdschrift fu prati den gi den tra Kotoigi. Na a fasi disi, wi ben man tan kisi leri fu Bijbel.

 Di mi kisi siksi mun strafu, dan mi go na krutu wantewante, soleki fa den brada fu a bijkantoro na ini Sydney ben taigi mi fu du. Wi du dati, fu di wi ben wani wini ten teleki den ben feni wan tra sma fu du a wroko di mi ben e du. Mi gebroiki a pisi ten di mi no ben de na strafu ete, fu go luku wan tu fu den 21 Kotoigi di ben de na strafu-oso na ini Noord-Queensland. Furu fu den Kotoigi disi ben de na ini a srefi strafu-oso, èn na edeman fu a strafu-oso no ben lobi wi kwetikweti. Di mi taigi en taki den domri fu tra kerki ben mag kon luku den sma fu den sondro problema, dan a man atibron srefisrefi. A bari gi mi: „Efu a ben de na mi, dan mi ben o poti ala Yehovah Kotoigi tanapu, èn mi ben o sutu den kiri!” Den waktiman fu a strafu-oso tyari mi go na dorosei esi-esi.

Di a ten ben doro gi mi fu go na krutu, dan mi kisi wan lanti afkati fu krutu na afersi fu mi, soleki fa a wet ben taki. Ma fu taki en leti, mi srefi krutu mi eigi afersi. Dati ben wani taki dati mi ben musu frutrow dorodoro tapu Yehovah. Yehovah fu en sei, no frigiti mi (Lukas 12:11, 12; Filipisma 4:6, 7). Mi no ben man bribi taki mi wini na afersi dati. Mi ben wini fu di sma ben meki wan tu fowtu na tapu den papira di ben abi fu du nanga na afersi!

Na ini 1944, mi ben musu go dini leki kring-opziener fu wan bigi kontren. Mi ben musu go na ala den gemeente na South Australia, den wan na a noordsei pisi fu a presi Victoria, èn den wan na ini a foto Sydney na New South Wales. A yari baka dati, den brada bigin hori publikitaki na heri grontapu, èn ibri takiman ben musu sreka en eigi lezing nanga yepi fu wan schema fu wán bladzijde di na organisâsi ben e gi den. A no ben makriki fu hori wan lezing wán yuru langa, ma toku wi du dati èn wi ben abi a frutrow taki Yehovah ben o yepi wi. Èn na dati pasa tu.

Mi trow èn mi kisi nyun frantwortu

Na ini yuli 1946, mi trow nanga Beatrice Bellotti, èn wi ben e pionier makandra. Wi ben e tan na ini wan bigi wagi di wi ben e gebroiki leki oso. Na ini december 1950, wi kisi wan umapikin di wi kari Jannyce (Jann), èn a de wi wan-enkri pikin. Wi pionier na difrenti presi, sosrefi na ini a foto Kempsey, na New South Wales, èn wi ben de den wan-enkri Kotoigi drape. Ibri sonde wi ben e go na wan gebow na ini a foto, èn mi ben de srekasreka fu hori wan publikitaki. Wi ben prati papira kaba fu gi sma wan kari fu kon arki a lezing disi. Wan tu mun langa, Beatrice nanga Jann, a beibi fu wi, ben de den wan-enkri sma di ben arki a lezing. Ma baka wan pisi ten, wanwan sma bigin kon. Tide na a dei, tu gemeente de na ini a foto Kempsey èn den gemeente dati e go na fesi.

Di Jann ben abi tu yari, dan wi froisi go na Brisbane. Èn baka di a klari skoro, dan wi ala dri pionier fo yari langa na ini a foto Cessnock na New South Wales. Baka dati, wi froisi go baka na Brisbane fu sorgu gi a mama fu Beatrice di ben kon siki. Nownowde, mi abi a grani fu dini leki owruman na ini gemeente Chermside.

Mi nanga Beatrice e taigi Yehovah tangi gi den someni blesi di a gi wi, soleki a grani di wi kisi fu yepi 32 sma fu kon sabi En. Mi fu mi sei, e taigi Yehovah tangi taki a gi mi wan lobi-ati wefi di no ben frede fu opo taki gi a tru anbegi, aladi a de wan tiri wefi di abi switifasi. Fu di a lobi Gado, fu di a e frutrow na en tapu, èn fu di en ai „krin”, meki a de wan bun wefi èn wan bun mama (Mateyus 6:22, 23; Odo 12:4). A e agri nanga mi te mi e taki nanga mi heri ati: „Blesi fu a man di gosontu èn tranga na skin fasi, di e poti en frutrow na ini Yehovah.”—Yeremia 17:7.

[Futuwortu]

[Prenki na tapu bladzijde 9]

Wi gebroiki a wagi disi di ben abi bigi boksu, fu preiki na ini Noord-Queensland

[Prenki na tapu bladzijde 10]

Mi e yepi Una nanga Merle Kilpatrick fu pusu a wagi fu den na ini alen-ten na Noord-Queensland

[Prenki na tapu bladzijde 12]

Tapu wi trowdei