Ondrosuku „den dipi sani fu Gado”

„A yeye e ondrosuku ala sani, iya, srefi den dipi sani fu Gado.”​—1 KORENTESMA 2:10.

1. San na wan tu fu den tru tori fu Bijbel di e gi sma prisiri te den e bigin studeri Bijbel?

FURU fu wi na ini a Kresten gemeente kan memre fa wi ben prisiri di wi kon leri sabi den tru tori na ini Bijbel. Wi kon sabi fu san ede a nen fu Yehovah prenspari, fu san ede a e gi pasi taki sma e pina, fu san ede son sma e go na hemel, èn san Gado o du gi sma di de getrow na en. Kande wi ben ondrosuku Bijbel kaba fosi wi kon sabi a tru anbegi, ma neleki furu tra sma, wi no ben kon frustan den sani disi. Na agersi fasi, wi ben de leki wan man di e pruberi fu si sortu moi sani de na ini a se. Nanga en soso ai, a no o man si den moi sani di de na ondro watra. Ma te a e go na ondro watra nanga wan spesrutu bril, noso te a e sidon na ini wan boto di na ondrosei fu en meki fu grasi, dan a sa fruwondru fu si den fisi nanga den tra libisani di abi kefalek moi kloru. Na so a de tu, taki a fosi leisi di wi kon si „den dipi sani fu Gado”, na di wan sma yepi wi fu kon frustan Bijbel.—1 Korentesma 2:8-10.

2. Fu san ede wi kan tan abi prisiri te wi e ondrosuku a Wortu fu Gado?

² A de so taki wi musu breiti kaba te wi sabi pikinso nomo fu den tru tori fu Bijbel? Den wortu „den dipi sani fu Gado”, wani taki dati wi musu frustan a koni fu Gado. Kresten e kon sabi a koni dati nanga yepi fu a santa yeye, aladi a koni dati kibri gi tra sma (1 Korentesma 2:7). A koni fu Gado no abi kaba, èn wi e prisiri srefisrefi te wi e ondrosuku a Wortu fu en! Noiti wi o kon sabi a koni fu Gado dorodoro. Te wi e tan ondrosuku „den dipi sani fu Gado”, dan wi sa tan abi a prisiri di wi  ben abi di wi kon sabi den prenspari leri fu Bijbel fu a fosi leisi.

3. Wi musu sabi fu san ede wi e bribi den sani di wi e bribi. Fu san ede dati de so?

³ Fu san ede wi musu frustan „den dipi sani” dati? Boiti taki wi e frustan den sani di wi e bribi, wi musu sabi tu fu san ede wi e bribi den sani dati. Disi sa tranga a bribi fu wi, èn a sa gi wi na overtoigi taki den sani di wi e bribi de tru. Bijbel e taki dati wi musu gebroiki wi „frustan” fu „kon sabi gi [wisrefi] san na Gado en wani di bun, di e plisi en, èn di de volmaakti” (Romesma 12:1, 2). Te wi e frustan fu san ede Yehovah wani taki wi e libi na wan spesrutu fasi, dan dati e gi wi deki-ati fu gi yesi na en. Dati meki, te wi sabi „den dipi sani”, dan dati kan gi wi a krakti fu kakafutu gi tesi, èn fu no du sani di Gado no feni bun. Boiti dati, a sabi dati kan meki wi de „fayafaya fu du bun wroko”.—Titus 2:14.

4. San a wani taki fu studeri Bijbel?

⁴ Fu man frustan den dipi sani fu Bijbel, dan wi musu studeri. Ma te wi e studeri wan sani, dan dati a no a srefi leki te wi e leisi wan sani. Te wi e studeri, dan wi e ondrosuku den sani di skrifi, fu si fa den e kruderi nanga den sani di wi sabi kaba (2 Timoteyus 1:13). Iya, wi musu kon sabi fu san ede wi kan bribi den sani dati. Te wi e studeri Bijbel, dan wi musu denki dipi tu fa wi kan gebroiki den sani di wi leri, fu teki koni bosroiti èn fu yepi trawan. Boiti dati, wi musu kon leri sabi „ibri wortu di Yehovah mofo taki” fu di „na Gado srefi ben meki sma skrifi ala den sani di de na ini Gado Buku [èn fu di] den sani disi bun fu gi leri” (Mateyus 4:4; 2 Timoteyus 3:16, 17). A no de fu taki dati wi musu meki furu muiti son leisi fu studeri Bijbel! Ma wi sa kisi prisiri tu te wi e du dati, èn a no muilek tumusi fu frustan „den dipi sani fu Gado”.

Yehovah e yepi sma di abi sakafasi fu kon frustan a Wortu fu en

5. Suma kan frustan „den dipi sani fu Gado”?

⁵ Awansi yu no ben gwenti wroko bun na skoro, noso awansi yu no ben gwenti fu studeri sani, toku yu no musu denki taki yu no o man frustan „den dipi sani fu Gado”. Di Yesus ben e du a diniwroko fu en na grontapu, dan Yehovah no meki den koniwan nanga den wan di abi frustan kon sabi san a o du. Ma wan lo sma di no ben kisi furu leri èn di no ben abi hei posisi, ben de klariklari fu teki leri fu Gado en futuboi, èn na den sma dati kisi a grani fu kon sabi san Yehovah ben o du. Den sma disi ben de leki nyofi pikin te yu ben e teki den gersi nanga den sma di ben kisi hei skoroleri (Mateyus 11:25; Tori fu den Apostel 4:13). Na apostel Paulus ben skrifi den Kresten brada nanga sisa fu en fu fruteri den fu „den sani di Gado sreka gi den wan di lobi en”. A ben taki: „Gado tyari den sani dati kon na krin gi wi nanga yepi fu a yeye fu en, bika a yeye e ondrosuku ala sani, iya, srefi den dipi sani fu Gado.”—1 Korentesma 2:9, 10.

6. San den wortu fu 1 Korentesma 2:10 wani taki?

⁶ Fa a yeye fu Gado e ondrosuku „ala sani, srefi den dipi sani fu Gado”? Yehovah no e tyari sani kon na krin gi ibri Kresten aparti, ma na presi fu dati a e meki a yeye fu en tiri na organisâsi fu en, fu meki a heri pipel fu en kon frustan Bijbel (Tori fu den Apostel 20:28; Efeisesma 4:3-6). Na heri grontapu, ala gemeente e kisi a srefi leri fu Bijbel. Baka wan tu  yari, den gemeente poti prakseri na ala den leri fu Bijbel. A santa yeye e wroko na ini a gemeente fu yepi sma fu kon kisi a denki di de fanowdu fu man frustan „den dipi sani fu Gado”.—Tori fu den Apostel 5:32.

San na „den dipi sani fu Gado”?

7. Fu san ede furu sma no e frustan „den dipi sani fu Gado”?

⁷ Wi no musu denki taki ala ten „den dipi sani fu Gado” muilek fu frustan. Furu sma no sabi „den dipi sani fu Gado”, ma dati no e kon fu di a koni fu Gado muilek tumusi fu frustan, ma fu di Satan e kori sma fu no teki a yepi di Yehovah e gi den nanga yepi fu na organisâsi fu En.—2 Korentesma 4:3, 4.

8. Fu sortu dipi sani Paulus ben taki na ini a di fu dri kapitel fu a brifi di a ben skrifi gi den Efeisesma?

⁸ A di fu dri kapitel fu a brifi di Paulus ben skrifi gi den Efeisesma, e sori taki „den dipi sani fu Gado” abi fu du nanga furu tru tori di furu anbegiman fu Yehovah e frustan heri bun. Wan tu fu den tori disi e sori suma na a Pikin di Gado ben pramisi. Den tori disi abi fu du tu nanga den sma di Gado gi a howpu fu libi na hemel, èn nanga a Mesias Kownukondre. Paulus ben skrifi: „Sma fu owruten no ben kon sabi a kibritori disi, soleki fa a yeye tyari en kon na krin na ini a ten disi gi den santa apostel èn gi den profeiti fu Gado. A santa kibritori disi, na taki den trakondre sma ben o kisi a gudu tu, taki den ben o tron wan pisi fu a srefi skin, èn sosrefi taki den ben o tron sma di kisi a srefi pramisi di wi kisi nanga yepi fu a bun nyunsu fu di wi de wán nanga Krestes Yesus.” Paulus ben taki dati a ben kisi a wroko fu ’sori sma fa a santa kibritori e wroko, èn taki Gado ben kibri a santa kibritori disi sensi owruten kaba’.—Efeisesma 3:5-9.

9. Fu san ede a de wan grani taki wi man frustan „den dipi sani fu Gado”?

⁹ Paulus fruklari moro fara taki Gado wani tu taki „den tirimakti nanga den makti na ini hemel ben sa kon sabi now fa Gado e sori koni na furu difrenti fasi” (Efeisesma 3:10). Den engel e kisi wini fu di den e si èn e frustan a koni fasi fa Yehovah e handri nanga a Kresten gemeente. A de wan grani trutru taki wi man frustan den sani di srefi engel wani sabi! (1 Petrus 1:10-12) Baka dati, Paulus e taki dati wi musu pruberi fu „frustan krin san na a bradi nanga a langa nanga a hei nanga a dipi” fu a Kresten bribi (Efeisesma 3:11, 18). Meki wi luku wan tu fu den dipi sani now di kan yepi wi fu kon frustan sani moro bun.

Wan tu fu den dipi sani fu Gado

10, 11. O ten Yesus tron a moro prenspari „pikin” fu a hemel „uma” fu Gado, soleki fa Bijbel e sori?

¹⁰ Wi sabi taki Yesus na a moro prenspari „pikin” fu na hemel „uma” fu Gado di kari na Genesis 3:15. Fu di wi wani frustan sani moro bun, meki wi kan aksi wisrefi: ’O ten Yesus tron a pramisi Pikin? A de so taki a sani dati pasa di a ben e libi leki wan engel na hemel, di a gebore leki libisma, di a teki dopu, noso di a kisi wan opobaka?’

¹¹ Gado ben pramisi taki en organisâsi na hemel, di a e kari en „uma” na ini wan profeititori, ben o kisi wan pikin di ben o masi a sneki na en ede. Ma dusundusun yari baka dati, na uma fu Gado no ben meki wan pikin ete di ben o man tyari wan kaba kon na Satan èn na den sani di a ben e du. Dati meki a profeititori fu Yesaya e taki dati na uma disi „no man kisi pikin” èn taki a „brokosaka na ini yeye” (Yesaya 54:1, 5, 6). Te fu kaba, Yesus gebore na ini Betlehem. Ma na baka di a teki dopu èn di a tron wan salfu manpikin fu Gado di ben kisi spesrutu grani, dan fosi Yehovah meki bekènti: „Disi na mi Manpikin” (Mateyus 3:17; Yohanes 3:3). Te fu kaba a kon na krin suma ben de a moro prenspari „pikin” fu na uma. Bakaten, den bakaman fu Yesus tron salfuwan tu èn den kisi santa yeye sosrefi. Te fu kaba, na „uma” fu Yehovah di wan heri pisi ten ben e firi leki wan „uma di no ben kisi pikin”, ben kan „bari fu prisiri”.—Yesaya 54:1; Galasiasma 3:29.

12, 13. Sortu bijbeltekst e sori taki ala salfu Kresten makandra na „a getrow èn koni srafu”?

 ¹² Wan tra dipi sani di wi kon sabi, abi fu du nanga den 144.000 sma di Gado teki na mindri libisma (Openbaring 14:1, 4). Wi e frustan èn wi e bribi taki ala den salfuwan makandra na grontapu, na „a getrow èn koni srafu” di ben o gi den futuboi fu Yesus „nyanyan” na a yoisti ten, soleki fa Yesus ben taki (Mateyus 24:45). Sortu bijbeltekst e sori taki a tori disi tru? A de so taki Yesus ben wani sori taki „a getrow èn koni srafu” abi fu du nanga ibri Kresten di e tranga a bribi fu tra Kresten brada nanga sisa?

¹³ Gado ben taigi a pipel fu Israel: „Unu na mi kotoigi . . . iya, mi futuboi di mi frukisi” (Yesaya 43:10). Ma tapu 11 Nisan fu a yari 33, Yesus taigi den fesiman fu Israel, taki Gado no ben wani den moro leki a futuboi fu En. Yesus ben taki: „Den sa puru a kownukondre fu Gado na un anu èn den sa gi en na wan pipel di e meki den froktu fu a kownukondre.” Yesus ben taigi den ipi-ipi sma: „Luku! Gado o gowe libi un oso gi unu” (Mateyus 21:43; 23:38). A pipel Israel, di ben de a srafu fu Yehovah, no ben de getrow, èn a pipel disi no ben koni tu (Yesaya 29:13, 14). A srefi dei dati, Yesus aksi den: „Suma na trutru a getrow èn koni srafu?” Fu taki en leti, a ben aksi den: „Sortu koni pipel sa tron a getrow srafu fu Gado na presi fu Israel?” Na apostel Petrus ben gi piki tapu na aksi dati di a taigi a gemeente fu salfu Kresten: „Unu na . . . ’wan santa pipel, wan pipel di de wan spesrutu gudu’” (1 Petrus 1:4; 2:9). A pipel dati, namku „na Israel fu Gado”, kon tron a nyun srafu fu Yehovah (Galasiasma 6:16). Neleki fa ala den Israelsma makandra ben de wán „futuboi”, na so ala salfu Kresten makandra na „a getrow èn koni srafu”. A de wan grani trutru taki wi e kisi „nyanyan” nanga yepi fu a srafu fu Gado!

Wi kan kisi prisiri te wi e studeri Bijbel

14. Fu san ede wi sa kisi moro prisiri te wi e studeri Bijbel, leki te wi e leisi en nomo?

¹⁴ Te wi e bigin frustan den tru tori fu Bijbel, dan wi breiti te wi e si fa dati e tranga a bribi fu wi, a no so? Dati meki wi kan kisi furu prisiri te wi e studeri Bijbel, na presi fu leisi en nomo. Sobun, te yu e leisi den Kresten publikâsi, dan aksi yusrefi: ’Fa den sani disi e kruderi nanga san mi ben sabi kaba fu a tori disi? Sortu tra bijbeltekst di mi sabi, e kruderi nanga den sani di skrifi na ini na artikel disi, noso mi ben sabi pikinso kaba fu a tori disi?’ Efu yu musu ondrosuku sani moro fini, dan skrifi den sani di yu wani kon sabi, so taki yu kan ondrosuku den bakaten.

15. Sortu tori sa gi yu prisiri te yu e ondrosuku den, èn fa yu kan tan kisi wini fu den tori disi?

¹⁵ Sortu moi tori yu kan ondrosuku moro fini? Fu eksempre, yu kan kon frustan sani moro krin te yu e ondrosuku den difrenti frubontu di Gado sroto fu a bun fu libisma. Te yu e ondrosuku den profeititori di abi fu du nanga Yesus Krestes, noso te yu e ondrosuku ibri vers fu wan fu den Bijbel buku fu den profeiti, dan dati sa tranga a bribi fu yu. Wan tra sani di sa tranga a bribi fu yu, na te yu e leisi a buku Jehovah’s Getuigen — Verkondigers van Gods koninkrijk, efu a buku disi de fu kisi na ini a tongo fu yu. * A buku disi e taki fu a wroko fu Yehovah Kotoigi na ini den yari di pasa. Èn te yu e leisi den artikel di nen „Aksi fu leisiman” di kon na doro na ini den Waktitoren  na ini a ten di pasa, dan a no de fu taki dati yu o man frustan spesrutu tekst moro bun. Poti prakseri spesrutu na a fasi fa Bijbel e horibaka gi den sani di skrifi na ini den artikel disi. Disi sa yepi yu fu gebroiki yu „frustan” èn fu kisi a koni fu man si sani krin (Hebrewsma 5:14). Te yu e studeri, dan skrifi na ini yu Bijbel noso na tapu papira sortu sani yu wani hori na prakseri. Yu sa tan kisi wini fu den sani disi, èn yu sa man yepi trawan moro bun.

Yepi yonguwan fu kon lobi studeri Bijbel

16. Fa yu kan yepi yonguwan fu kon lobi studeri Bijbel?

¹⁶ Papa nanga mama kan du furu fu yepi den pikin fu den fu kon si en leki wan prenspari sani fu kon moro krosibei na Gado. No denki taki a muilek tumusi gi yonguwan fu kon frustan den dipi sani fu Bijbel. Te yu e meki den pikin fu yu ondrosuku spesrutu tori fosi yu e bigin studeri nanga den, dan yu kan aksi den san den kon sabi. Yu kan leri den pikin fu yu tu fa fu opo taki gi a bribi fu den, èn fa fu sori trawan taki den sani di den leri na tru tori. Boiti dati, yu kan gebroiki a brochure ’Zie het goede land’ * fu sori den pe den kondre na ini Bijbel ben de, èn fu yepi den fu kon frustan na alawiki leisipisi fu Bijbel moro bun.

17. Fu san ede wi no kan gebroiki ala wi ten fu studeri Bijbel?

¹⁷ Soleki fa yu si, dan a studeri di yu e studeri Bijbel, kan gi yu furu prisiri, èn a kan tranga a bribi fu yu. Ma luku bun taki yu no e teki so furu ten fu studeri Bijbel taki yu no man sreka yusrefi bun gi den konmakandra. Yehovah e gebroiki den konmakandra tu fu gi wi leri nanga yepi fu „a getrow èn koni srafu”. Ma te yu e ondrosuku sani moro fara, dan dati kan yepi yu fu gi bun piki na den konmakandra, soleki na a Gemeente Bukustudie, noso te wi e taki fu den edepenti fu na alawiki Bijbel leisipisi tapu a Theokrasia Diniwroko-skoro.

18. Fu san ede a muiti di yu e meki fu ondrosuku „den dipi sani fu Gado”, no sa de fu soso?

¹⁸ Te yu e studeri Gado Wortu finifini, dan dati kan yepi yu fu kon moro krosibei na Yehovah. A de prenspari trutru fu du dati, fu di Bijbel e taki: „Koni e kibri sma neleki fa moni e kibri sma; ma a wini di sabi e tyari kon, na taki koni srefi e hori den sma di abi en, na libi” (Preikiman 7:12). Fu dati ede, a muiti di yu e meki fu kon frustan den tori fu Bijbel moro bun, no sa de fu soso. Disi na san Bijbel e pramisi den wan di e tan ondrosuku sani: „Yu sa feni a sabi fu Gado srefi.”—Odo 2:4, 5.

[Futuwortu]

Yu kan fruklari disi?

• San na „den dipi sani fu Gado”?

• Fu san ede yu musu tan ondrosuku den dipi sani fu Gado?

• Fu san ede ala Kresten abi a moi okasi fu kon frustan „den dipi sani fu Gado”?

• Fa yu kan kisi moro wini te yu e frustan „den dipi sani fu Gado”?

[Aksi fu a tori disi]

[Prenki na tapu bladzijde 28]

O ten Yesus tron a Pikin di Gado ben pramisi?

[Prenki na tapu bladzijde 31]

Papa nanga mama kan meki den pikin fu den ondrosuku spesrutu tori, fosi den e bigin studeri nanga den