’Un musu abi sakafasi’

YU BEN abi wan man di ben kweki na ini wan prenspari foto. A man disi ben de wan Romesma, èn a kan taki a ben de fu wan lespeki famiri. A man dati ben de Saulus. A ben kisi a moro bun leri di wan sma ben kan kisi na ini a fosi yarihondro, a ben e taki moro leki wán tongo, èn a ben de wan memre fu wan pôpi Dyu kerkigrupu, namku den Fariseiman.

A ben musu fu de so taki Saulus ben leri fu wisiwasi mofinasma èn fu meki bigi, fu di a ben e si ensrefi leki wan regtfardikisma (Lukas 18:11, 12; Tori fu den Apostel 26:5). Den tra Fariseiman ben e du neleki den ben bun moro trawan, den ben lobi te sma ben e gi den grani, èn te sma ben e gi den biginen (Mateyus 23:6, 7; Lukas 11:43). A kan taki Saulus ben kisi heimemre fu di a ben e moksi nanga den sortu sma dati. Wi sabi taki a ben frufolgu den Kresten fayafaya. Furu yari baka dati, di a ben tron na apostel Paulus, dan a taki fa a ben de di a ben moro yongu. A taki fu ensrefi: „Mi ben taki ogri fu sma, mi ben frufolgu sma èn mi no ben abi syen.”—1 Timoteyus 1:13.

Iya, Saulus kon tron wan Kresten, namku na apostel Paulus, èn a kon kisi heri tra fasi. Leki wan Kresten apostel, a ben taki nanga sakafasi taki a ben de „a moro pikinwan fu ala den santawan” (Efeisesma 3:8). A ben abi bun bakapisi leki preikiman, ma a no ben e gi ensrefi grani gi dati. Na presi fu dati, a gi Gado ala grani (1 Korentesma 3:5-9; 2 Korentesma 11:7). Na Paulus ben gi den Kresten brada nanga sisa a rai disi: „Un musu abi trutru sari-ati, bun-ati, sakafasi, safri-ati, nanga langa pasensi, èn den fasi disi musu de leki wan krosi na un skin.”—Kolosesma 3:12.

A rai dati e tyari wini kon gi wi na ini a ten disi? A de so taki sakafasi e tyari wini kon? A tru taki wan sma di e sori sakafasi, na wan sma di no frede fu du san bun?

 A de so taki na Almakti Mekiman abi sakafasi?

Te wi e taki fu sakafasi, dan a de fanowdu fu luku fa Gado e si a tori. Fu san ede? Fu di en na wi Moro Hei Tiriman, èn sosrefi wi Mekiman. Wi musu sabi taki tra fasi leki en, wi abi swakifasi, èn wi musu hori a sani dati na prakseri. Wi abi en fanowdu. Elihu, wan koniman fu owruten ben taki: „Wi no kon sabi na Almaktiwan finifini; a abi makti moro iniwan tra sma” (Yob 37:23). Te wi e poti prakseri na a bigi hemel nanga grontapu na wi lontu, dan dati kaba musu meki wi kisi sakafasi, a no so? A profeiti Yesaya ben taki: „Luku go na loktu. Suma meki den sani disi? Na a Sma di e tyari a legre fu den go na doro, sosrefi a nomru fu den, a Sma di e kari den alamala srefi na den nen. Fu di a abi bigi krakti pasa marki, èn fu di a tranga srefisrefi tu, meki nowan fu den no e mankeri.”—Yesaya 40:26.

Boiti taki Yehovah na a almakti Gado, a abi sakafasi tu. Kownu David ben begi Gado: „Yu sa gi mi yu skelt fu frulusu, èn a sakafasi fu yu e meki mi kon bigi” (2 Samuel 22:36). Gado abi sakafasi fu di a e broko en ede nanga mofinasma di e pruberi fu du a wani fu en, èn a e sori sari-ati gi den sma disi. Na wan agersifasi, Yehovah e langa en anu komoto fu hemel fu sori switifasi gi den wan di abi frede gi en.—Psalm 113:5-7.

Boiti dati, Yehovah lobi te den futuboi fu en abi sakafasi. Na apostel Petrus ben skrifi: „Gado no lobi den sma di abi heimemre, ma a e sori no-frudini bun-ati na den sma di abi sakafasi” (1 Petrus 5:5). Disi na san wan Bijbel skrifiman ben taki fu sori fa Gado e si heimemre: „Ibriwan sma di abi bigimemre, na wan tegu sani gi Yehovah. Awansi anu e miti anu, toku wan sma sa kisi strafu” (Odo 16:5). Ma fu san ede wi kan taki dati wan sma di e sori sakafasi, na wan sma di no frede fu du san bun?

San na trutru sakafasi?

Te wan sma abi sakafasi, dan dati no wani taki dati a e gi trawan okasi fu wisiwasi en. Na ini son kulturu fu owruten, den sma di trawan ben e si leki sakafasi sma, ben de srafu. Den mofinasma disi ben e lagi densrefi gi trawan, èn den no ben de koloku. Tra fasi leki dati, Bijbel e sori krin taki wan sma di e saka ensrefi, sa kisi grani. Fu eksempre, a koniman ben skrifi: „Te wan sma abi sakafasi nanga  frede gi Yehovah, dan a o kisi gudu, glori, nanga libi” (Odo 22:4). Psalm 138:6 e taki: „Yehovah hei, èn toku a e si den sma di abi sakafasi; ma a no wani sabi den sma di abi bigimemre.”

Te wan sma abi sakafasi, dan dati no wani taki dati a no sabi du noti, noso taki a no du nowan enkri bun sani na ini en libi. Fu eksempre, Yesus Krestes noiti no taki dati a no ben de a wan-enkri Manpikin fu Gado. Èn a no ben e du tu neleki a diniwroko fu en no ben de prenspari (Markus 14:61, 62; Yohanes 6:51). Iya, Yesus ben sori taki a ben abi sakafasi fu di a ben gi en Tata grani gi ala den sani di a ben e du, èn a ben e gebroiki en krakti fu dini èn fu yepi trawan, na presi taki a ben e basi noso kwinsi den.

Sma di no frede fu du san bun

A no de fu taki dati den sma fu a ten fu Yesus Krestes, ben sabi en ’fu di a ben e du krakti wroko’ (Tori fu den Apostel 2:22). Ma son sma ben e si en leki „a moro mofina sma fu a libismafamiri” (Danièl 4:17). Boiti taki Yesus ben e libi leki wan mofina sma, a ben e leri sma doronomo fu san ede a bun fu abi sakafasi (Lukas 9:48; Yohanes 13:2-16). Ma aladi Yesus ben abi sakafasi, toku a no ben frede fu du san bun. A ben e sori deki-ati te a ben e opo taki gi a nen fu en Tata, èn te a ben e du a diniwroko fu en (Filipisma 2:6-8). Bijbel e agersi Yesus nanga wan lew di abi deki-ati (Openbaring 5:5). Na eksempre fu Yesus e sori taki wan sma di abi sakafasi, na wan sma di no frede fu du san bun.

Fu di wi e meki muiti fu kweki sakafasi, meki wi e frustan taki a no makriki fu sori sakafasi doronomo. Na presi taki wi e du san moro makriki gi wi, noso taki wi e meki den lostu fu wi basi wi, wi musu du a wani fu Gado ala ten. Wi musu abi a fasti bosroiti fu du san bun, fu di wi musu si en leki a moro prenspari sani fu dini Yehovah nanga trawan, leki fu denki wisrefi nomo.

Sakafasi e tyari wini kon

Wan sma di abi sakafasi, no abi heimemre, èn a no e denki tumusi furu fu ensrefi. Te wi e hori na prakseri sortu bun fasi èn sortu swakifasi wi abi, sortu bun bakapisi wi ben abi èn sortu fowtu wi meki, dan dati sa yepi wi fu abi sakafasi. Paulus e gi wi bun rai ini a tori disi. A ben skrifi: „Mi e taigi un alamala drape fu no denki moro fu unsrefi leki san de fanowdu, ma fu gebroiki un frustan na wan koni fasi” (Romesma 12:3). Den sma di e fiti a rai disi e sori taki den abi sakafasi.

Wi e sori sakafasi tu te wi e suku a bun fu trawan nanga wi heri-ati, na presi fu suku wi eigi bun. A santa yeye ben meki Paulus gi Kresten a rai disi: „No strei nanga makandra èn no prakseri tumusi furu fu unsrefi, ma nanga sakafasi un musu si trawan moro hei leki unsrefi” (Filipisma 2:3). A sani disi e kruderi nanga a komando di Yesus ben gi den bakaman fu en: „A moro bigiwan na un mindri musu de un dinari. Den o saka a sma di e hei ensrefi, èn den o hei a sma di e saka ensrefi.”—Mateyus 23:11, 12.

Iya, te sma abi sakafasi, dan Gado sa warderi den. A disipel Yakobus ben sori taki a sani disi tru. A ben skrifi: „Saka unsrefi na fesi Yehovah, èn a sa hei unu” (Yakobus 4:10). Suma no ben o wani taki Gado hei en?

Fu di sma no abi sakafasi, meki bruya nanga trobi kon na mindri sma, èn srefi na mindri bigi grupu sma. Ma te sma abi sakafasi,  dan dati e tyari wini kon. Wi sa de koloku te Gado feni wi bun (Mika 6:8). Wi sa abi wan korostu firi, bika te wi abi sakafasi, dan wi sa de moro koloku, leki te wi abi heimemre (Psalm 101:5). Wi sa man libi moro bun nanga famiriman, mati, sma na wi wrokope, èn nanga tra sma. Sma di abi sakafasi no muilek, èn den no e dwengi trawan fu du san den wani, fu di a sani dati kan meki sma atibron makriki, a kan tyari trobi kon, èn a kan meki sma kisi bita-ati.—Yakobus 3:14-16.

Iya, te wi e leri fu abi sakafasi, dan dati sa yepi wi fu libi bun nanga trawan. Wi sa sabi fa wi musu tyari wisrefi na ini a grontapu disi pe furu sma e denki densrefi nomo, èn pe sma lobi strei nanga trawan. Fu di Gado yepi na apostel Paulus, meki a no ben abi heimemre moro, ma a kisi heri tra fasi. Na so wi musu luku bun tu taki noiti wi kisi heimemre, èn taki noiti wi e bigin denki taki wi bun moro trawan. Bijbel e warskow: „Bigimemre e kon bifo wan sma fadon, èn wan yeye fu heimemre e kon bifo wan sma e naki futu” (Odo 16:18). Te wi e teki na eksempre fu Paulus, èn te wi e fiti a rai fu en, dan wi sa si taki a bun fu ’abi trutru sakafasi’.—Kolosesma 3:12.

[Prenki na tapu bladzijde 4]

Paulus ben leri fu no abi heimemre moro

[Prenki na tapu bladzijde 7]

Te wi abi sakafasi, dan dati sa yepi wi fu libi bun nanga trawan

[Sma di abi a reti fu a prenki na tapu bladzijde 5]

Anglo-Australian Observatory/David Malin Images