Yu e gebroiki ibri okasi fu taki fu a bribi fu yu?

SMA na ini Polen ben kisi na okasi fu teki prati na wan strei fu sori suma man skrifi a moro moi tori. Den ben musu skrifi fu a tori disi: „Wan sani kan de tru dorodoro?” Den sani di den ben musu tyari kon na krin, na disi: „Wi no abi fu kon sabi efu wan sani tru dorodoro. Dati no de fanowdu, bika te yu luku en bun, dan wan sani no kan de tru dorodoro.” Agata, wan Kotoigi fu Yehovah di abi 15 yari èn di e go na middelbaar skoro, bosroiti fu teki na okasi disi fu meki trawan kon sabi fu a bribi fu en.

Fosi Agata bigin sreka ensrefi fu skrifi a tori disi, a aksi Yehovah fu yepi en, èn baka dati a go ondrosuku san den publikâsi e taki fu a tori disi. Na ini A Waktitoren fu 1 yuli 1995, a feni wan artikel di ben e taki fu a tori dati. A taki fu a prenspari aksi disi di Pontius Pilatus ben poti gi Yesus, namku: „San na waarheid?” (Yohanes 18:38) Agata taki dati na aksi disi e sori krin taki Pilatus no ben e bribi taki wan sani kan de tru dorodoro. A de neleki a e aksi: ’Waarheid? San na dati? A sani dati no de!’ Agata ben skrifi: „Na aksi fu Pilatus e meki mi prakseri a nen fu a tori di wi musu skrifi.”

A skrifi tu taki moro nanga moro sma e kon abi a denki taki san tru gi a wan sma no abi fu de tru gi wan tra sma, ma toku ala tu sma kan „abi leti”. Agata poti aksi soleki: „Suma ben o abi a deki-ati fu frei na ini wan opolani te a sabi taki na opolani no ben o man frei bun?” Baka dati a poti prakseri na Bijbel èn a taki: „Difrenti buweisi de di e meki taki wi kan poti wi frutrow na ini Gado Wortu.” A sori moro fara taki a e howpu taki den wan di trutru wani kon sabi san tru dorodoro, sa tan meki muiti teleki den kon sabi dati.

Agata kisi wan spesrutu diploma gi a tori di a skrifi, èn a kisi na okasi tu fu hori wan takimakandra na fesi a klas. Di a aksi wan tu fu den pikin na ini a klas efu den ben wani wan bijbelstudie, dan wan tu fu den ben wani dati. Agata e prisiri trutru taki a gebroiki na okasi disi fu taki nanga trawan fu a bribi fu en. Iya, te yu de klariklari fu gebroiki den okasi di yu e kisi fu gi kotoigi, dan yu kan abi bun bakapisi tu. Na sortu okasi yu kan taki fu a bribi fu yu?