Aksi fu leisiman

A fiti taki wan Kotoigi fu Yehovah e go na wan trow fu wan famiriman noso fu wan mati di no de wan Kotoigi?

Trow-oso na prisiri okasi, èn wi kan frustan taki wan Kresten ben o wani de drape fu meki prisiri. A no de fu taki, dati te yonguwan kisi wan kari fu go na wan trow-oso, dan den musu gi yesi na den papa nanga mama, noso na den sma di e sorgu gi den, fu di den sma disi abi a reti fu bosroiti te fu kaba efu den pikin kan go (Efeisesma 6:1-3). Ma san wan Kresten wefi kan du efu en masra di no de wan Kotoigi fu Yehovah, e aksi en fu go makandra nanga en na wan trow di o hori na ini wan kerki? Kande a konsensi fu a wefi e gi en pasi fu go na a trow, aladi a e bosroiti taki a no sa teki prati na den kerki seremonia di abi fu du nanga a trow.

Fu taki en leti, wan sma kan bosroiti gi ensrefi efu a sa go na so wan trow. Ma ibri Kresten musu hori na prakseri taki a musu gi frantwortu na Yehovah gi den sani di a e du, èn taki a musu poti prakseri na wan tu Bijbel gronprakseri fosi a bosroiti fu go na wan trow fu wan sma di no de wan Kotoigi.

A moro prenspari sani di wan Kresten musu hori na prakseri, na taki a musu tyari ensrefi na wan fasi di Gado feni bun. Yesus ben taki: „Gado na wan Yeye èn den sma di e anbegi en, musu anbegi en nanga yeye èn nanga waarheid” (Yohanes 4:24). Sobun, Yehovah Kotoigi no e moksi na anbegi fu den nanga tra anbegi. Den no e begi makandra nanga den èn den no e teki prati na seremonia di no e kruderi nanga den tru tori fu Bijbel.—2 Korentesma 6:14-17.

Wan Kresten sabi taki a bosroiti di a e teki, kan abi krakti tapu trawan tu. Efu yu bosroiti taki yu o go na wan trow, dan a bun fu aksi yusrefi efu den famiriman fu yu o mandi te yu no e teki prati na den seremonia fu a trow. Yu musu aksi yusrefi tu sortu krakti a bosroiti fu yu kan abi tapu yu Kresten brada nanga sisa (Romesma 14:13). Awansi yu, noso tra famiriman fu yu no ben o si en leki wan problema taki yu e go na wan trow fu sma di no de Kotoigi, toku yu musu aksi yusrefi efu a bosroiti fu yu kan meki yu Kresten brada noso sisa naki futu. Yu musu aksi yusrefi tu efu a o trobi a konsensi fu sonwan fu den efu yu o go na a trow.

Te famiriman fu yu di no de Kotoigi e trow, dan yu kan kisi fu du nanga wan tu fruferi situwâsi. Fa a de te sma e aksi yu fu teki prati na a trow srefi? Noso fa a de te yu trowpatna di no de wan Kotoigi, wani teki prati na ala sani fu a trow? Te wan trow e hori na wan lanti kantoro pe wan krutuman noso wan tra lantiman e teki fesi, dan a wan-enkri sani di e pasa drape, na taki den sma e trow soleki fa den wet fu a kondre e taigi den fu du.

Ma te wan trow o hori na ini wan kerki, noso te wan kerki fesiman o teki fesi na a trow, dan wi musu hori moro sani na prakseri. Kande yu wani arki a konsensi fu yu, èn yu no wani du sani di no e kruderi nanga a bribi fu yu, èn yu no wani meki den sma di o trow kisi syen. Dati meki yu e bosroiti fu no go na a trow (Odo 22:3). Yu kan sorgu taki problema no e opo kon, te yu e fruteri den famiriman fu yu na fesi san yu e bribi, sori den taki yu e hori yusrefi na den leri fu Bijbel. Yu kan fruteri den na sortu sani fu a trow yu sa teki prati.

Baka te son Kresten luku a tori finifini fosi, dan den kan bosroiti taki a no ben o fowtu fu go na wan trow fu wan sma di no de wan Kotoigi, solanga den no e teki prati na den seremonia. Ma kande wan Kresten feni taki, te a ben o de na a trow, a ben kan kisi tesi di kan meki taki a pasa Bijbel gronprakseri. A kan feni taki a moro bun fu no go na a trow. Efu a bosroiti fu no go na a trow, ma fu go na a fesa di o hori baka a trow, dan a musu abi a fasti bosroiti fu „du ala sani fu gi Gado glori” (1 Korentesma 10:31). Te sma e teki den sortu bosroiti disi, dan „ibri sma sa tyari en eigi lai”, sobun, ibri sma sa tyari a frantwortu gi den bosroiti di a e teki (Galasiasma 6:5). Fu dati ede, awinsi san yu e bosroiti fu du, hori na prakseri taki a de tumusi prenspari fu tan abi wan bun konsensi na fesi Yehovah Gado.