Kweki fasi di sa yepi yu fu meki disipel
Kweki fasi di sa yepi yu fu meki disipel
„Go na sma fu ala kondre èn meki den tron disipel.”—MATEYUS 28:19.
1. Sortu koni nanga fasi son futuboi fu Gado na ini owruten ben musu kon abi?
SON leisi den futuboi fu Yehovah musu kon abi spesrutu koni nanga fasi fu man du a wani fu en. Fu eksempre, Abraham nanga Sara gowe libi a gudu foto Ur, soleki fa Gado ben taigi den fu du, èn te fu kaba den ben musu kon abi spesrutu fasi nanga koni fu man libi na ini tenti (Hebrewsma 11:8, 9, 15). Fu man tyari den Israelsma go na ini a Pramisi Kondre, dan Yosua ben abi deki-ati fanowdu, a ben musu abi frutrow na ini Yehovah, èn a ben musu sabi a Wet fu en (Yosua 1:7-9). Èn awinsi sortu koni Besaleèl nanga Oholiab ben abi kaba, a ben musu fu de so taki a yeye fu Gado yepi den man disi fu du a wroko na a tabernakel moro bun, èn a yepi den tu fu teki fesi na a wroko dati.—Exodus 31:1-11.
2. Na sortu aksi wi sa poti prakseri?
2 Hondrohondro yari baka dati, Yesus Krestes gi den bakaman fu en a komando disi: „Go na sma fu ala kondre, èn meki den tron disipel . . . Leri den fu du ala san mi komanderi unu” (Mateyus 28:19, 20). Noiti ete sma ben kisi a grani fu du so wan bigi wroko. Sortu fasi wan sma musu abi fu man meki disipel? Fa wi kan kweki den fasi dati?
Sori taki yu lobi Gado nanga yu heri ati
3. Te wi e gi yesi na a komando fu meki disipel, dan san dati e sori?
3 Te wi wani overtoigi sma taki den musu anbegi a tru Gado, dan wi musu lobi Yehovah nanga wi heri ati. Efu den Israelsma ben wani sori taki den lobi Gado, dan den ben musu de klariklari fu gi yesi na den komando fu en, den ben musu tyari bun ofrandi, èn den ben musu singi prèisesingi gi en (Deuteronomium 10:12, 13; 30:19, 20; Psalm 21:13; 96:1, 2; 138:5). Leki sma di e meki disipel, wi e hori wisrefi tu na den wet fu Gado, ma wi e sori tu taki wi lobi En te wi e fruteri trawan fu en èn fu den sani di a o du. Wi musu taki nanga overtoigi, èn wi musu gebroiki den yoisti wortu fu sori taki wi e bribi trutru na ini a howpu di Gado gi wi.—1 Tesalonikasma 1:5; 1 Petrus 3:15.
4. Fu san ede Yesus ben e prisiri fu gi sma leri fu Yehovah?
4 Fu di Yesus ben lobi Yehovah nanga en heri ati, meki a ben prisiri trutru fu taki fu den sani di Gado o du, fu a Kownukondre, èn fu a tru anbegi (Lukas 8:1; Yohanes 4:23, 24, 31). Fu taki en leti, Yesus ben taki: „Mi nyanyan na taki mi musu du a wani fu a sma di seni mi kon èn fu klari a wroko fu en” (Yohanes 4:34). Disi na san a psalm skrifiman ben taki fu Yesus: „Mi prisiri fu du yu wani, o mi Gado, èn yu wet de na ini den inisei pisi fu mi. Mi fruteri a bun nyunsu fu regtfardikifasi na ini a bigi gemeente. Luku! Mi no e tapu mi mofo fu taki. O Yehovah, yusrefi sabi dati heri bun.”—Psalm 40:8, 9; Hebrews 10:7-10.
5, 6. San na a moro prenspari fasi di e yepi wi fu meki disipel?
5 Sma di kon sabi den tru tori fu Bijbel no so langa ete, èn di kon abi lobi gi Gado, e fruteri trawan fu Yehovah èn fu a Kownukondre. Son leisi den e du dati nanga so wan tranga overtoigi, taki den e kisi sma so fara fu studeri Bijbel (Yohanes 1:41). A moro prenspari sani di e gi wi deki-ati fu meki disipel, na a lobi di wi abi gi Gado. Fu dati ede, meki wi tan leisi Gado Wortu èn meki wi tan denki dipi fu en, so taki wi no e lasi a lobi di wi abi gi Gado.—1 Timoteyus 4:6, 15; Openbaring 2:4.
6 A no de fu taki, dati na fu di Yesus Krestes lobi Yehovah, meki a ben de wan fayafaya preikiman. Ma dati no ben de a wan-enkri reide fu san ede a ben abi bun bakapisi te a ben e preiki a Kownukondre boskopu. We, dan sortu tra fasi di Yesus ben abi yepi en fu meki furu disipel?
Sori taki yu e broko yu ede nanga trawan
7, 8. Fa Yesus sori taki a ben e broko en ede nanga sma?
7 Yesus ben e broko en ede nanga sma èn a ben wani kon sabi den trutru. Srefi di a ben e libi na hemel leki a „tumusi bun wrokoman fu Gado”, a ben lobi libisma (Odo 8:30, 31). Ma di Yesus ben de na grontapu, dan a ben abi sari-ati nanga sma, èn a ben e trowstu den wan di ben e kon na en (Mateyus 11:28-30). Yesus ben sori lobi nanga sari-ati gi trawan soleki fa Yehovah e du dati, èn a sani disi meki taki sma ben wani anbegi a wan-enkri tru Gado. Ala sortu sma ben e arki Yesus fu di a ben e broko en ede nanga den, èn a ben e poti prakseri na a situwâsi fu den.—Lukas 7:36-50; 18:15-17; 19:1-10.
8 Di wan man ben aksi Yesus san a ben musu du fu man kisi têgo libi, dan ’Yesus luku a man, èn a kon firi lobi gi en’ (Markus 10:17-21). Luku fa Yesus ben e firi gi wan tu sma di a ben gi leri na Betania. Bijbel e taki: „Yesus ben lobi Marta, nanga en sisa, nanga Lasarus” (Yohanes 11:1, 5). Yesus ben e broko en ede so te nanga sma, taki a gi den leri srefi te a ben abi rostu fanowdu (Markus 6:30-34). Fu di Yesus ben e broko en ede so te nanga trawan, meki a ben man hari trawan kon na a tru anbegi, moro leki iniwan tra sma.
9. Sortu fasi di Paulus ben abi, yepi en fu meki disipel?
9 Na apostel Paulus ben e broko en ede tu nanga den sma di a ben miti na ini a preikiwroko. Fu eksempre, a ben taigi den Tesalonikasma di ben tron Kresten: „Fu di wi abi dipi firi gi unu, meki wi ben prisiri trutru fu fruteri unu a bun nyunsu fu Gado; ma a no dati wawan wi du, wi ben gi unu wi eigi libi tu, bika wi ben kon lobi unu srefisrefi.” A lobi di Paulus sori gi den sma na ini Tesalonika, meki taki sonwan fu den ’gowe libi den kruktugado fu den fu go dini leki srafu fu a Gado di e libi’ (1 Tesalonika 1:9; 2:8). Te wi e broko wi ede trutru nanga sma, soleki fa Yesus nanga Paulus ben e du dati, dan wi sa kisi a prisiri tu fu si fa a bun nyunsu e doro na ati fu den wan di abi a „yoisti denki fu man kisi têgo libi”.—Tori fu den Apostel 13:48.
Du iniwan sani fu yepi trawan
10, 11. Fu san ede wi musu de klariklari fu du iniwan sani fu yepi sma fu kon tron disipel?
10 Kresten di sabi fa fu meki disipel, na sma di de klariklari fu du iniwan sani di de fanowdu fu yepi trawan. Gudu no de a moro prenspari sani kwetikweti gi den Kresten disi. Fu taki en leti, Yesus ben taigi den disipel fu en: „Gi den sma di abi moni, a o muilek trutru fu go na ini a kownukondre fu Gado!” Den disipel skreki di den yere dati, ma Yesus taki moro fara: „Pikin, a muilek trutru fu go na ini a kownukondre fu Gado! A moro makriki gi wan kameili fu pasa na ini wan nanai-olo, leki gi wan guduman fu go na ini a kownukondre fu Gado” (Markus 10:23-25). Yesus ben gi den bakaman fu en a rai fu no feti baka den sani fu grontapu, so taki den kan poti ala den prakseri na a wroko di den e du fu meki disipel (Mateyus 6:22-24, 33). Fu san ede wi musu de klariklari fu du iniwan sani di de fanowdu fu man meki disipel?
11 Wi musu meki furu muiti fu leri sma ala den sani di Yesus komanderi wi. Wan Kresten di wani meki disipel, e du muiti fu studeri Bijbel ibri wiki nanga wan sma di wani kon sabi moro fu Bijbel. Fu man feni moro sma di wani studeri Bijbel, dan son Kownukondre preikiman tapu fu wroko heri wiki, èn den go wroko wan tu dei nomo na ini a wiki. Dusundusun Kresten leri wan tra tongo fu man preiki gi sma di e taki wan tra tongo, èn di e libi na ini a kontren fu den. Tra preikiman froisi go tan na wan tra kontren noso kondre, fu du moro na ini a preikiwroko (Mateyus 9:37, 38). Fu man du den sani disi, dan wi musu de klariklari fu yepi trawan. Ma wi musu kon abi tra fasi tu te wi wani meki disipel.
Abi pasensi, ma no lasi ten
12, 13. Fu san ede wi musu abi pasensi te wi wani meki disipel?
12 Wan tra sani di sa yepi wi fu meki disipel, na te wi abi pasensi. A boskopu di wi e tyari e sori taki wi no musu draidrai, ma nofo tron a e teki furu ten nanga pasensi fu meki disipel (1 Korentesma 7:29). Yesus no ben lasi pasensi nanga Yakobus, na afu-brada fu en. Soleki fa a sori, dan Yakobus ben sabi a bun nyunsu di Yesus ben e preiki. Ma wan pisi ten wan sani ben e tapu en fu tron wan disipel (Yohanes 7:5). Ma baka di Krestes dede, sani kon kenki bika syatu baka dati, namku tapu a Pinksterfesa fu a yari 33, a ben de krin taki Yakobus ben tron wan disipel. Bijbel e sori taki na a dei dati, a kon makandra nanga en mama, den brada fu en, nanga den apostel, fu begi Gado (Tori fu den Apostel 1:13, 14). Yakobus go na fesi, èn bakaten a kisi bigi frantwortu na ini a Kresten gemeente.—Tori fu den Apostel 15:13; 1 Korentesma 15:7.
13 Neleki fa den sani di gronman e prani e gro safrisafri, na so den sma di e kisi leri fu den bakaman fu Krestes, e go na fesi safrisafri tu. Kresten e leri sma fu kon frustan Gado Wortu, fu kon lobi Yehovah, èn fu kon de leki Krestes. Den musu abi pasensi fu man du dati. Yakobus ben skrifi: „Brada, un musu abi pasensi teleki a denoya fu Masra. Luku! A gronman e wakti a warti nyanyan di a gron e gi; a e wakti nanga pasensi teleki a pikin alenten nanga a bigi alenten bigin. Unu sosrefi musu abi pasensi; teki deki-ati, bika a denoya fu Masra kon krosibei” (Yakobus 5:7, 8). Yakobus ben e gi tra brada nanga sisa a rai fu „abi pasensi teleki a denoya fu Masra”. Efu den disipel no ben e frustan wan sani, dan Yesus ben e fruklari den sani dati nanga pasensi gi den, èn son leisi a ben e du dati nanga yepi fu wan agersitori (Mateyus 13:10-23; Lukas 19:11; 21:7; Tori fu den Apostel 1:6-8). Now di wi e libi na ini a denoya fu Masra, wi musu abi pasensi tu te wi e pruberi fu meki disipel. Fu man yepi sma fu tron bakaman fu Krestes na ini a ten disi, dan wi musu abi pasensi te wi e studeri Bijbel nanga den.—Yohanes 14:9.
14. Aladi wi abi pasensi, fa wi kan gebroiki wi ten bun te wi e yepi sma fu tron disipel?
14 Ma aladi wi abi pasensi te wi e studeri Bijbel nanga sma, toku furu fu den sma dati no e tron disipel (Mateyus 13:18-23). Fu dati ede, te wi du ala san wi man fu yepi den sortu sma disi, dan a bun fu tapu nanga a studie, èn wi musu pruberi fu feni sma di abi moro warderi gi den tru tori fu Bijbel (Preikiman 3:1, 6). A no de fu taki, dati awinsi sma abi warderi gi den sani di den e leri, toku a kan taki wi sa musu yepi den sma disi wan heri pisi ten fosi den kon kisi wan tra denki fu sani, èn fosi den kon abi wan tra marki na ini a libi. Dati meki wi abi pasensi nanga den sma disi, neleki fa Yesus ben abi pasensi nanga den disipel fu en di no ben man si sani na a yoisti fasi ete.—Markus 9:33-37; 10:35-45.
Du muiti fu tron wan bun leriman
15, 16. Fu san ede a de prenspari fu gi sma leri na wan makriki fasi èn fu sreka wisrefi bun?
15 Soleki fa wi si, dan wi musu abi lobi gi Gado, wi musu broko wi ede nanga sma, wi musu de klariklari fu du iniwan sani fu yepi den, èn wi musu abi pasensi nanga den. Ala den sani disi sa yepi wi fu meki disipel. Ma wi musu kon abi a koni tu fu gi sma leri, fu di dati sa yepi wi fu fruklari sani na wan fasi di makriki fu frustan. Fu eksempre, furu fu den sani di Yesus Krestes, a Bigi Leriman, ben taki, doro na ati fu sma, fu di den sani dati ben makriki fu frustan. Kande yu e memre den sani disi di Yesus ben taki: „Kibri yu gudu na ini hemel.” „No gi den dagu santa sani.” „Na den regtfardiki sani di wan sma e du, e sori taki a koni.” „Pai Caesar den sani di de fu Caesar, ma pai Gado den sani di de fu Gado” (Mateyus 6:20; 7:6; 11:19; 22:21). A no de fu taki, dati Yesus no ben taki den syatu sani disi wawan. A ben e gi sma leri na wan makriki fasi, èn a ben fruklari sani gi den te dati ben de fanowdu. Fa yu kan gi leri neleki Yesus?
16 Wan prenspari sani di kan yepi yu fu gi sma leri na wan makriki fasi, na te yu e sreka yusrefi bun. Nofo tron, wan preikiman di no sreka ensrefi bun e taki tumusi furu. Kande a e taki so furu, taki den moro prenspari penti fu wan tori no e kon na krin, fu di a e fruteri ala san a sabi fu a tori. Ma wan preikiman di sreka ensrefi bun, e poti prakseri na a sma di a e gi leri, a e denki dipi fu den sani di a wani leri a sma dati, èn a e leri a sma soso den sani di prenspari (Odo 15:28; 1 Korentesma 2:1, 2). A preikiman disi e luku san a studenti sabi kaba èn sortu sani a musu tyari kon na krin te a e studeri nanga en. Kande a preikiman sabi furu moi sani di abi fu du nanga a tori, ma efu a wani yepi a studenti fu frustan a tori krin, dan a musu taki soso fu den prenspari sani.
17. Fa wi kan yepi sma fu kon frustan Bijbel?
17 Yesus no ben e fruteri sma nomo san den ben wani sabi, ma a ben yepi den fu denki. Fu eksempre, wan leisi a ben aksi: „San yu denki, Simon? Fu suma den kownu fu grontapu e kisi edemoni noso belasting moni? Fu den manpikin fu den, noso fu den freimdesma?” (Mateyus 17:25). Kande wi lobi fu fruklari Bijbel so te, taki wi musu hori wisrefi fu gi a studenti na okasi fu taki san ensrefi e denki, noso fa a e frustan wan tori. A no de fu taki, dati wi no musu poti wan lo aksi gi sma. Ma te wi e taki na wan lespeki fasi nanga sma, te wi e fruteri bun agersitori, èn te wi e poti bun aksi gi den, dan wi kan yepi den fu kon frustan den tori fu Bijbel di skrifi na ini den buku fu wi.
18. O ten wi kan taki dati wan Kresten abi ’a koni fu gi sma leri’?
18 Bijbel e taki fu ’a koni di wi musu abi fu gi sma leri’ (2 Timoteyus 4:2). Dati no wani taki nomo dati wi musu yepi sma fu memre wan tu sani. Wi musu pruberi fu yepi a studenti fu kon frustan san tru èn san no tru, san bun èn san ogri, san na wan koni sani fu du èn san na wan don sani fu du. Te wi e du disi, èn te wi e meki muiti fu yepi wan sma fu kon lobi Yehovah nanga en heri-ati, dan kande a sa kon frustan fu san ede a musu gi yesi na En.
Du ala san yu man fu meki disipel
19. Fa ala Kresten e yepi fu meki disipel?
19 A Kresten gemeente na wan organisâsi di e meki disipel. Te wan sma e tron wan disipel, dan a Kotoigi fu Yehovah di feni a sma disi èn di studeri Bijbel nanga en, no de a wan-enkri sma di sa breiti. Fu eksempre, te sma e seti wan grupu fu go suku wan pikin di lasi, dan a kan taki wán sma nomo e feni a pikin dati. Ma te den e tyari a pikin go baka na en papa nanga mama, dan ala sma di yepi suku a pikin e prisiri (Lukas 15:6, 7). Na so a de tu te wi e meki disipel. Wi alamala e wroko makandra. Ala Kresten e yepi fu suku sma di kan tron disipel fu Yesus. Èn te wan sma e bigin kon na a Kownukondre zaal, dan ibri Kresten drape e yepi a sma fu kisi moro warderi gi a tru anbegi (1 Korentesma 14:24, 25). Sobun, ala Kresten kan prisiri taki dusundusun sma e tron disipel ibri yari.
20. San yu musu du te yu wani leri trawan den tru tori fu Bijbel?
20 Furu getrow Kresten ben o breiti efu den ben o kisi na okasi fu leri wan sma fu kon sabi Yehovah èn fu teki a tru anbegi. Ma aladi den e meki furu muiti, toku a kan taki den no kisi a grani dati ete. Efu na so a de nanga yu, dan tan kisi moro lobi gi Yehovah, broko yu ede nanga sma, du iniwan sani fu yepi trawan, abi pasensi, èn meki muiti fu gi bun leri. Ma san moro prenspari, na taki yu musu begi Gado fu yepi yu feni sma di wani kon sabi den tru tori fu Bijbel (Preikiman 11:1). Meki a de wan trowstu gi yu fu sabi taki iniwan sani di yu e du na ini a diniwroko fu Yehovah, na fu a bun fu a wroko di wi e du fu meki disipel, èn a wroko dati e gi Gado glori.
Yu kan fruklari disi?
• Fu san ede wan Kresten di lobi Gado trutru, musu du muiti fu meki disipel?
• Sortu fasi wi musu abi fu man meki disipel?
• O ten wi kan taki dati wan Kresten abi a ’koni fu gi sma leri’?
[Aksi fu a tori disi]
[Prenki na tapu bladzijde 21]
Kresten di lobi Gado nanga den heri ati, e du muiti fu meki disipel
[Prenki na tapu bladzijde 23]
Fu san ede Kresten di wani meki disipel musu broko den ede nanga trawan?
[Prenki na tapu bladzijde 24]
Sortu fasi Kresten musu abi te den wani meki disipel?
[Prenki na tapu bladzijde 25]
Ala Kresten e prisiri te den e si omeni sma e tron disipel