Sortu marki yu abi na ini a libi?

KENNY ben e wroko gi wan bigi bisnis, a ben e rèi wan diri wagi, èn a ben e libi na ini wan bigi foto. Boiti dati, a ben e tan na ini wan diri oso di ben de na ini wan birti pe soso gudusma e libi. Fu di a ben sabi heri bun fa fu dyompo nanga parachuut, meki a ben lobi fu dyompo komoto na ini opolani di e frei bun hei. A sani dati ben e gi en wan switi firi. A de koloku fu di a e du ala den sani disi? Soleki fa wan tijdschrift e taki, dan Kenny ben taki: „Now mi abi 45 yari, èn mi no sabi fa mi libi sa waka tamara . . . A libi no e gi noti” (The Wall Street Journal).

Elyn ben meki ala muiti fu tron wan pôpi sport uma. Te fu kaba a doro a marki dati. Elyn ben kon pôpi, soleki fa a ben wani. A taki: „Ma fu san ede mi no de koloku? Mi ben e firi leki mi ben de mi wawan, èn a firi dati no ben switi srefisrefi. Te fu kaba mi o kon owru èn aladi mi ben abi furu moni, toku a libi no ben o gi noti kwetikweti, efu na disi wawan mi ben o du nanga mi libi.”

 Hideo ben sabi meki moi skedrei, èn a sani dati ben de a moro prenspari sani na ini en libi. A no ben e seri den skedrei fu en, fu di a ben feni taki den skedrei fu en ben warti moro moni. Na a kaba fu en libi, di a ben abi 98 yari, a gi wan museum furu fu den skedrei fu en. A ben gebroiki ala en ten nanga en krakti fu meki skedrei. Ma toku a no ben de koloku, fu di a ben feni taki noiti a no ben o man meki skedrei di bun dorodoro.

Son sma e gebroiki ala den ten, den krakti, nanga den moni fu yepi trawan. Fu eksempre, luku a tori fu wan man di e meki felem na ini Hollywood. A man disi ben de wan ondro-driktoro fu wan fu den moro bigi felem bisnis na ini Amerkankondre. A ben sabi furu pôpisma èn a ben e libi na ini wan guduman birti. A ben de nanga fakansi na ini Kambodya, èn di a ben e nyan na wan presi na ini Phnom Penh, dan wan pikin meisje kon begi en moni. A gi a meisje wán Amerkan dala èn a bai wan dringi gi en. A meisje ben breiti. Ma a neti baka dati, a meisje ben de drape baka e begi sma sani. A man kon si taki a meisje ben abi moro yepi fanowdu.

Wan yari baka dati, a driktoro disi bosroiti fu du wan tra wroko. A no ben o meki felem moro, ma a ben o yepi pôtisma na ini Kambodya. A opo wan skoro pe pikin kan tan, pe den e kisi nyanyan, èn pe den e kisi leri. Ma aladi a man disi breiti nanga san a ben man du gi den pôtisma, toku a e broko en ede nanga den someni problema di e kon na en tapu.

Ala den fo sma disi ben denki taki den ben sabi san den ben wani du nanga den libi. Den wroko bun tranga, èn te fu kaba den doro a marki fu den. Ma toku den no ben de koloku. Sortu marki yu abi na ini a libi? San na a moro prenspari sani gi yu? Yu de seiker taki a no sa hati yu bakaten taki yu no du wan tra sani nanga yu libi?