Teki na eksempre fu a Bigi Leriman
Teki na eksempre fu a Bigi Leriman
„Luku bun fa unu e arki.”—LUKAS 8:18.
1, 2. Fu san ede yu musu poti prakseri na a fasi fa Yesus ben e handri nanga sma na ini a diniwroko fu en?
YESUS KRESTES, a Bigi Leriman, ben taigi den bakaman fu en: „Luku bun fa unu e arki” (Lukas 8:16-18). A gronprakseri dati abi fu du nanga a diniwroko di yu e du leki Kresten. Te yu poti prakseri na den rai di Bijbel e gi, dan a bun fu fiti den na ini a diniwroko. Disi sa yepi yu fu tron wan bun preikiman fu a Kownukondre boskopu. A no de fu taki, dati yu no man yere a sten fu Yesus na ini a ten disi, ma yu kan leisi Bijbel fu kon sabi den sani di a ben e taki èn ben e du. Te wi e luku a fasi fa Yesus ben e handri nanga sma di a ben e miti na ini a diniwroko fu en, dan san wi e leri fu en?
2 Yesus ben de wan heri bun preikiman fu a bun nyunsu, èn a ben sabi heri bun tu fa fu leri trawan den tru tori fu Bijbel (Lukas 8:1; Yohanes 8:28). Fu man meki disipel, wi musu de preikiman nanga leriman. Ma toku son Kresten di de bun preikiman feni en muilek fu gi sma leri. Te wi e preiki, dan wi e meki wan boskopu bekènti. Ma te wi e gi sma leri fu Yehovah èn fu den sani di a o du, dan nofo tron a de fanowdu taki wi e kon leri sabi den sma moro bun (Mateyus 28:19, 20). Wi kan teki leri fu na eksempre fu Yesus Krestes, a Bigi Leriman.—Yohanes 13:13.
3. Sortu wini yu sa kisi te yu e meki disipel na a fasi fa Yesus ben e du dati?
3 Te yu e gi sma leri na a fasi fa Yesus ben e du dati, dan na so fasi yu e gi yesi na a rai di na apostel Paulus ben gi. A ben taki: „Tan waka nanga koni te unu de nanga den wan di de na dorosei, èn gebroiki ibri okasi bun. Un musu taki na wan switi fasi ala ten, iya, den wortu fu unu musu abi sowtu, so taki unu sabi fa un musu piki ibriwan sma” (Kolosesma 4:5, 6). A no makriki fu meki disipel na a fasi fa Yesus ben e du dati, ma te yu e meki muiti fu teki na eksempre fu en, dan yu sa man gi sma bun leri èn yu o sabi fa yu „musu piki ibriwan sma”.
Yesus ben e gi sma deki-ati fu taki san den e denki
4. Fu san ede wi kan taki dati Yesus ben de wan bun arkiman?
4 Sensi di Yesus ben pikin, a ben e gwenti fu arki te sma ben e taki, èn a ben e gi den deki-ati fu taki san den ben e denki. Fu eksempre, di a ben abi 12 yari, dan en papa nanga mama go feni en na mindri den leriman na ini a tempel. A ben ’e arki den èn a ben e poti aksi gi den’ (Lukas 2:46). Yesus no ben go na ini a tempel fu sori den leriman o furu sabi a ben abi. A ben go drape fu arki den, èn a poti aksi gi den sosrefi. Kande na fu di a ben de wan bun arkiman, meki Gado nanga tra sma ben lobi en.—Lukas 2:52.
5, 6. Fa wi du sabi taki Yesus ben e arki te den sma di a ben e gi leri, ben e taigi en fa den e denki?
5 Srefi baka di Yesus teki dopu èn Gado salfu en leki a Mesias, a ben e arki sma te den ben e taki san den ben e denki. Te a ben e gi leri, dan a no ben e frigiti taki den sma di ben kon fu arki en, ben kan abi wan tra denki fu sani. Nofo tron, a ben e aksi den san den e denki, èn a ben e arki san den ben abi fu taki (Mateyus 16:13-15). Fu eksempre, baka di Lasarus, a brada fu Marta, dede, dan Yesus taigi Marta: „A sma di e libi èn di e bribi na ini mi, no sa dede noiti.” Baka dati Yesus aksi en: „Yu e bribi disi?” Èn a no de fu taki, dati Yesus arki di Marta piki en: „Iya, mi Masra; mi e bribi taki yu na a Krestes, a Manpikin fu Gado” (Yohanes 11:26, 27). Yesus ben musu fu breiti di a yere fa Marta ben sori taki a abi bribi!
6 Di furu disipel drai baka gi Yesus, dan a ben wani sabi fa den apostel fu en ben e denki fu a tori. Dati meki a aksi den: „Unu no wani gowe tu?” Simon Petrus piki en: „Masra, na suma wi musu go? Yu abi wortu di e gi sma têgo libi; wi e bribi èn wi kon sabi taki yu na a Santawan fu Gado” (Yohanes 6:66-69). Yesus ben musu fu firi prisiri di Petrus taigi en a sani dati. A no de fu taki, dati yu sa firi prisiri tu te wan bijbelstudenti e taki wan srefi sortu sani fu sori taki a abi bribi.
Yesus ben e arki na wan lespeki fasi
7. Fa a du kon taki furu Samariasma poti bribi na ini Yesus?
7 Wan sani di meki taki Yesus ben abi bun bakapisi te a ben e pruberi fu meki disipel, na taki a ben e broko en ede nanga sma, èn a ben e arki den na wan lespeki fasi. Fu eksempre, wan leisi Yesus ben e gi kotoigi na wan uma fu Samaria di ben de krosibei fu a watrapeti fu Yakob, na ini Sikar. A no Yesus wawan ben e taki, ma a ben e arki tu san na uma ben abi fu taki. Di Yesus arki en, dan a kon si taki na uma disi ben wani anbegi Gado, èn a taigi en taki Gado e suku sma di wani anbegi En nanga yeye èn nanga waarheid. Fu di Yesus sori lespeki gi na uma disi èn fu di a sori en tu taki a ben wani yepi en, meki na uma fruteri tra sma fu den sani di Yesus ben taigi en. A sani disi meki taki „furu fu den Samariasma fu a foto dati ben kon bribi na ini Yesus, fu di na uma ben fruteri den”.—Yohanes 4:5-29, 39-42.
8. Fa yu kan bigin wan takimakandra nanga wan sma fu kon sabi fa a e denki fu wan spesrutu tori?
8 Nofo tron, sma lobi fu taki fa den e denki fu sani. Fu eksempre, den sma fu owruten Ateine ben lobi fu taki fa den ben e denki fu sani, èn den ben lobi fu arki te sma ben e fruteri den nyun sani. A sani disi meki taki na apostel Paulus ben abi bun bakapisi di a ben hori wan takimakandra na tapu na Areopagus di ben de na ini a foto dati (Tori fu den Apostel 17:18-34). Te yu e bigin wan takimakandra nanga wan sma di yu e miti na ini a diniwroko, dan yu kan taki: „Mi kon na yu fu di mi wani sabi fa yu e denki fu [wan spesrutu tori].” Arki te a sma e taigi yu fa a e denki fu a tori dati, èn taki san yu feni fu a denki dati, noso aksi a sma fu san ede a e denki so. Baka dati, sori a sma na wan lespeki fasi san Bijbel e taki fu a tori.
Yesus ben sabi san a ben musu taki
9. San Yesus du fosi a meki Kleopas nanga a tra disipel ’frustan finifini san skrifi na ini Gado buku’?
9 Ala ten Yesus ben sabi san a ben musu taki. Boiti taki a ben de wan bun arkiman, a ben sabi tu san sma ben e denki, èn a ben sabi soifri san a ben musu taki (Mateyus 9:4; 12:22-30; Lukas 9:46, 47). Luku na eksempre disi. Syatu baka di Yesus kisi wan opobaka, dan tu fu den disipel fu en ben e waka fu Yerusalem go na Ema-us. Na Evangelietori e taki: „Den ben e taki ete fu a tori, di Yesus kon na den èn a bigin waka nanga den; ma den no ben man si taki na en. A taigi den: ’Fu sortu tori unu e taki so fayafaya nanga makandra?’ Ne den tan tanapu nanga wan sari fesi. A wan di sma e kari Kleopas, piki en taki: ’Na fu di yu na wan freimde sma na ini Yerusalem, meki yu no sabi san pasa na ini a foto den dei disi?’ A taigi den: ’Sortu sani?’” A Bigi Leriman arki den disipel di den taigi en taki sma kiri Yesus fu Nasaret, a man di ben e gi sma leri èn di ben e du wondru. Now wan tu sma ben e taki dati a kisi wan opobaka. Yesus gi Kleopas nanga a tra disipel na okasi fu taki fa den ben e denki fu a tori. Baka dati, a taigi den san den ben musu sabi, èn a meki den ’frustan finifini san skrifi na ini Gado buku’.—Lukas 24:13-27, 32.
10. Te yu e miti wan sma na ini a preikiwroko, dan fa yu kan kon sabi sortu bribi a abi?
10 Kande yu no sabi srefisrefi sortu bribi wan sma abi. Fu kon sabi dati, dan yu kan taigi a sma taki yu ben o wani kon sabi fa a e denki fu a begi di sma musu begi Gado. Baka dati yu kan aksi en: „Yu denki taki Gado e arki begi?” A piki fu a sma kan yepi yu fu kon sabi fa a e denki fu a tori, èn yu sa kon sabi tu sortu bribi a abi. Efu a sma disi e bribi na ini Gado, dan yu kan pruberi fu kon sabi moro fini fa a e denki fu a tori di yu e taki nanga en. Kande yu kan aksi en: „Yu denki taki Gado e arki ala begi, noso wan tu begi de di a no feni bun?” Den sortu aksi disi, kan meki taki yu abi wan switi takimakandra nanga a sma. Te yu e kisi na okasi fu sori a sma san Bijbel e taki fu a tori, dan a bun fu du dati na wan lespeki fasi. Yu no musu krutu a bribi fu a sma. Te a sma lobi den sani di yu e fruteri en, dan kande a o wani taki yu kon baka fu taki moro fara nanga en. Ma san yu musu du te a sma e poti wan aksi gi yu di yu no man piki? A bun fu go ondrosuku a tori dati, èn fu go baka na a sma fu fruteri en fu ’a howpu di de na ini yu. Ma du dati na wan safri fasi èn nanga bigi lespeki’.—1 Petrus 3:15.
Yesus ben e yepi den wan di warti fu kisi leri
11. Fa yu kan feni sma di warti fu kisi leri?
11 Fu di Yesus ben de wan volmaakti libisma, meki a ben man si krin suma ben warti fu kisi leri. Ma a moro muilek gi wi fu feni sma „di abi a yoisti denki fu man kisi têgo libi” (Tori fu den Apostel 13:48). Den apostel ben abi a srefi problema disi. Dati meki Yesus ben taigi den: „Awinsi na ini sortu foto noso dorpu unu e go, suku suma warti fu teki unu na ini oso èn fu yere a boskopu” (Mateyus 10:11). Neleki den apostel fu Yesus, yu musu suku sma di wani arki a boskopu èn di wani kon sabi den tru tori fu Bijbel. Te yu de na ini a preikiwroko, dan arki bun san ibri sma di yu e miti, abi fu taki, èn poti prakseri na a fasi fa sma e denki fu sani. Disi sa yepi yu fu kon si suma trutru wani kisi leri fu Bijbel.
12. San yu kan du moro fara fu yepi wan sma di wani sabi moro fu Bijbel?
12 Baka te yu miti wan sma di wani kon sabi moro fu a Kownukondre boskopu, dan a bun fu tan prakseri fa yu kan yepi a sma dati moro fara. Te yu e skrifi den sani di yu kon sabi fu a sma disi baka te yu taki nanga en fu a bun nyunsu, dan dati sa yepi yu fu kon si fa yu kan yepi en fu kon sabi moro fu Bijbel. Arki bun te yu e go baka na a sma, so taki yu kan kon sabi moro fini san a e bribi, fa a e denki, èn san na a situwâsi fu en.
13. Fa yu kan kon sabi fa wan sma e denki fu Bijbel?
13 Fa yu kan gi wan sma deki-ati fu taigi yu fa a e denki fu Gado Wortu? Na ini son kontren, yu sa abi bun bakapisi te yu e aksi sma: „Yu feni en muilek fu frustan Bijbel?” Nofo tron, a sani di a sma e piki yu sa sori yu efu a abi lespeki gi Gado Wortu. Wan tra sani di yu kan du, na fu leisi wan bijbeltekst gi a sma, èn fu aksi en: „Fa yu feni a tekst disi?” Neleki Yesus, yu sa abi bun bakapisi na ini a diniwroko fu yu te yu e poti bun aksi gi sma. Ma toku wi musu luku bun nanga wan sani.
Yesus ben poti bun aksi gi sma
14. Fa yu kan kon sabi fa sma e denki, sondro taki yu e poti wan lo aksi di e meki den firi syen?
14 A bun te yu wani kon sabi fa wan sma e denki fu wan tori, ma yu no musu meki a sma firi syen. Teki na eksempre fu Yesus. A no ben e poti wan lo aksi gi sma sondro fu hori den firi fu den na prakseri, ma a ben e poti aksi gi den di ben e meki den denki fu sani. Yesus ben e arki bun te sma ben e taigi en san de na tapu den ati, èn a ben e trowstu den (Mateyus 11:28). Ala sortu sma ben lobi fu go na Yesus fu taigi en sortu problema den ben abi (Markus 1:40; 5:35, 36; 10:13, 17, 46, 47). Efu yu wani taki sma fruteri yu krin fa den e denki fu den leri na ini Bijbel, dan yu no musu poti wan lo aksi di kan meki den firi syen.
15, 16. Fa yu kan bigin taki fu Gado tori nanga sma?
15 Boiti taki yu e poti bun aksi gi sma, yu kan fruteri den wan moi sani fu Bijbel, èn arki san den e taki fu a tori. Fu eksempre, Yesus ben taigi Nikodeimus: „Efu wan sma no kon gebore baka, dan a no sa man si a kownukondre fu Gado” (Yohanes 3:3). Den wortu dati ben hari a prakseri fu Nikodeimus so te, taki a arki Yesus èn a taigi en san a ben e denki fu a tori (Yohanes 3:4-20). Kande yu kan du a srefi sani disi fu bigin wan takimakandra nanga sma.
16 Na ini a ten disi, sma lobi fu taki fu den someni nyun kerki di e opo kon. Srefi sma na presi soleki Afrika, Owstu Europa, nanga Latijns-Amerika e taki fu a tori disi. Na ini den kontren dati, furu preikiman abi bun bakapisi te den e bigin wan takimakandra na a fasi disi: „Mi e broko mi ede taki so furu kerki de na ini a ten disi. Ma mi howpu taki heri esi sma fu ala kondre sa anbegi Gado na a srefi fasi. Yu ben o wani dati tu?” Te yu e taki sortu howpu yu abi, dan kande sma o taki san den e denki fu a tori. Èn a moro bun fu poti wan aksi di a sma sa man piki makriki (Mateyus 17:25). Baka te a sma piki na aksi fu yu, dan yu srefi musu gebroiki wán noso tu bijbeltekst fu piki na aksi dati (Yesaya 11:9; Sefanya 3:9). Te yu e arki bun san a sma e taki, èn te yu e skrifi den sani dati, dan yu kan kon sabi san yu musu taki nanga a sma te yu e go baka na en.
Yesus ben e arki te pikin-nengre ben e taki nanga en
17. Fa wi du sabi taki Yesus ben e poti prakseri na pikin-nengre?
17 Boiti taki Yesus ben e poti prakseri na bigisma, a ben e poti prakseri na pikin-nengre tu. A ben sabi den sani di den yonguwan ben lobi prei, èn a ben sabi den tori di den ben lobi taki. Son leisi, a ben e kari pikin-nengre fu kon na en (Lukas 7:31, 32; 18:15-17). Furu pikin ben de na mindri den ipi-ipi sma di ben e arki Yesus. Di wan tu pikin boi ben e prèise a Mesias nanga wan tranga sten, dan Yesus yere dati èn a sori sma taki Bijbel ben taki na fesi taki disi ben o pasa (Mateyus 14:21; 15:38; 21:15, 16). Na ini a ten disi, furu pikin-nengre e tron disipel fu Yesus. Fa yu kan yepi den?
18, 19. Fa yu kan yepi yu pikin fu tron wan disipel fu Yesus?
18 Efu yu wani yepi yu pikin fu tron wan disipel fu Yesus, dan yu musu arki te den e taki. Yu musu kon sabi efu a fasi fa den e denki e kruderi nanga a fasi fa Yehovah e denki. Awinsi san yu pikin e taki, taigi en taki yu breiti taki a taigi yu fa a e denki. Baka dati, yu kan gebroiki den yoisti bijbeltekst fu yepi yu pikin fu kon frustan fa Yehovah e denki fu a tori.
19 Soleki fa wi si, dan a bun fu poti aksi gi sma. Ma neleki bigisma, pikin-nengre no lobi te sma e poti wan lo aksi gi den. Na presi taki yu e dwengi yu pikin fu piki wan lo muilek aksi, dan a moro bun fu fruteri a pikin syatu fa a ben de nanga yu. Kande yu kan fruteri en taki, fosi yu ben e si sani na wan spesrutu fasi, èn kande yu kan taigi den tu fu san ede dati ben de so. Baka dati, yu kan aksi en: „Na so yu e si en tu?” Kande den sani di yu pikin sa piki yu sa gi yu na okasi fu abi wan bun Bijbel takimakandra nanga en di sa gi en deki-ati.
Tan teki na eksempre fu a Bigi Leriman
20, 21. Fu san ede wi musu arki bun te wi e pruberi fu meki disipel?
20 Te yu e taki fu wan tori nanga yu pikin noso nanga wan tra sma, dan a de prenspari fu arki bun. Iya, te yu e arki bun, dan yu e sori taki yu lobi den sma disi. Te yu e arki, dan yu e sori taki yu abi sakafasi, taki yu e lespeki a sma, èn taki yu e broko yu ede nanga en. A no de fu taki, dati te yu e arki a sma, dan yu sa poti prakseri na den sani di a e taki.
21 Te yu de na ini a preikiwroko, dan yu musu arki bun san na ososma e taki. Te yu e poti bun prakseri na den sani di a sma e taki, dan yu sa kon si sortu Bijbel tori o hari a sma prakseri. Baka dati, pruberi fu gi den leri na a fasi fa Yesus ben e du dati. A sani disi sa gi yu prisiri èn yu sa de koloku fu di yu e teki na eksempre fu Yesus, a Bigi Leriman.
San yu ben sa piki?
• Fa Yesus ben gi sma deki-ati fu taki san den e denki?
• Fu san ede Yesus ben e arki den sma di a ben e gi leri?
• Sortu aksi wi kan poti gi sma te wi de na ini a preikiwroko?
• Fa yu kan yepi pikin-nengre fu tron disipel?
[Aksi fu a tori disi]
[Prenki na tapu bladzijde 28]
Sorgu taki yu e arki bun te yu e taki nanga sma na ini a preikiwroko
[Prenki na tapu bladzijde 30]
Te wi e yepi pikin-nengre fu tron disipel, dan wi e teki na eksempre fu Yesus