Yu e gi trawan deki-ati?

NA A zuidsei pisi fu den Anti Libanon-bergi yu abi a Hermon-bergi di hei 2814 meter. A moro bigi pisi fu a yari, snew de na tapusei fu a Hermon-bergi, èn a waran winti di e wai abra a bergi te neti e meki taki dow e fadon. A dow e fadon na tapu den pinabon nanga den froktubon di e gro na a sei fu den bergi, èn sosrefi na ini den droifidyari na a futu fu a bergi. Na ini a langa dreiten fu Israel fu owruten, a dow di ben e fadon ben de a moro prenspari fasi fa den bon na ini a kontren dati ben e kisi watra so taki den ben kan gro bun.

Na ini wan singi di skrifi nanga yepi fu santa yeye, wan psalm skrifiman e agersi a switi fasi fa den anbegiman fu Yehovah e libi nanga makandra, nanga „a dow fu Hermon di e saka kon na tapu den Sion-bergi” (Psalm 133:1, 3). Neleki fa a Hermon-bergi e sorgu taki dow e fadon na tapu den bon so taki den kan gro bun, na so wi kan meki sma di wi e miti, firi bun tu. Fa wi kan du dati?

Yesus ben e gi sma deki-ati

Yesus Krestes ben e gi sma furu deki-ati. Awinsi sma ben de makandra nanga en fu wan momenti nomo, toku a ben e meki den sma dati firi bun. Fu eksempre, na Evangelie skrifiman Markus ben taki: „[Yesus] brasa den pikin-nengre hori, a blesi den, èn a poti en anu na den tapu” (Markus 10:16). Den pikin-nengre dati ben musu fu firi bun di Yesus du dati nanga den!

A lasti neti di Yesus ben de na grontapu leki wan libisma, a wasi den futu fu den disipel fu en. A no de fu taki, dati a naki den ati fu si a sakafasi di Yesus ben abi. Baka dati, Yesus taigi den: „Mi gi unu na eksempre, so taki unu kan du tu san mi du gi unu” (Yohanes 13:1-17). Iya, den ben musu abi sakafasi tu. Den apostel no ben frustan wantewante san Yesus ben wani leri den, èn a srefi neti dati den bigin krutu nanga makandra suma fu den ben de a moro bigiwan. Toku Yesus no atibron nanga den. Na presi fu dati, a teki en ten fu taki nanga den so taki den ben kan frustan sani moro bun (Lukas 22:24-27). Srefi „te sma ben e kosi [Yesus], dan a no ben e kosi den baka”. Fu taki en leti, „te a ben e nyan pina, dan a no ben e taigi den sma taki a ben o du den ogri, ma a ben tan saka ensrefi na ondro a sma di e krutu sani na wan regtfardiki fasi”. A bun te wi e teki na eksempre fu Yesus.—1 Petrus 2:21, 23.

Yesus ben taki: „Teki mi tyatyari na un tapu èn leri fu mi, bika mi abi safri-ati nanga sakafasi, èn unu sa kisi krakti baka” (Mateyus 11:29). Prakseri fa a ben o de te Yesus srefi ben e gi yu leri. Di den sma fu a kontren pe Yesus ben e libi, yere fa a ben e gi leri na ini a snoga drape, dan den ben fruwondru. Den taki: „Fu pe a man disi komopo nanga a koni disi èn nanga den bigi wondru disi?” (Mateyus 13:54) Te wi e leisi fu a libi èn fu a diniwroko fu Yesus, dan wi kan kon sabi moro fini fa wi kan gi trawan deki-ati neleki en. Meki wi go luku a moi fasi fa Yesus e leri wi fu taki sani di e gi sma deki-ati èn fu de klariklari fu yepi trawan.

Taki sani di e gi trawan deki-ati

A moro makriki fu broko wan oso, leki fu bow wan nyunwan. Na so a de tu nanga den sani di wi e taki. A moro makriki fu taki sani di e broko sma saka, leki fu taki sani di e gi sma deki-ati. Fu di wi na sondu libisma, meki wi alamala e meki fowtu èn wi abi swakifasi.  Kownu Salomo ben taki: „Nowan regtfardiki sma no de na grontapu, di e tan du bun èn di no e sondu” (Preikiman 7:20). A makriki fu si den fowtu fu wan sma èn fu taki sani di e broko en saka (Psalm 64:2-4). Ma a moro muilek fu taki sani di e gi sma deki-ati.

Yesus ben e taki sani di ben e gi sma deki-ati. A ben e gi sma howpu fu di a ben e meki a bun nyunsu fu a Kownukondre bekènti (Lukas 8:1). Boiti dati, den wan di ben tron disipel fu en, ben e kisi deki-ati tu fu di a ben e meki den kon sabi en hemel Tata moro bun (Mateyus 11:25-27). Wi kan frustan fu san ede sma ben lobi fu abi demakandra nanga Yesus!

Tra fasi leki Yesus, den leriman fu Wet nanga den Fariseiman no ben e broko den ede nanga trawan. Yesus ben taki: „Den lobi sidon na den moro prenspari presi te den e nyan te neti èn den lobi sidon na fesisei na ini den snoga” (Mateyus 23:6). Fu taki en leti, den man disi ben e wisiwasi den mofinawan, èn den ben e taki: „A pipel disi di no sabi a Wet, na frufruktu sma” (Yohanes 7:49). Den man disi no ben e gi trawan deki-ati kwetikweti!

Nofo tron, den sani di wi e taki e sori fa wi e denki, fa wi e firi, èn fa wi e si trawan. Yesus ben taki: „Wan bun sma e puru bun sani fu a bun gudu na ini en ati, ma wan ogri sma e puru ogri sani fu na ogri gudu fu en; bika san furu na ati, na dati mofo e taki” (Lukas 6:45). Fa wi kan sorgu taki wi e taki sani di e gi trawan deki-ati?

Wán sani di wi kan du, na taki wi kan denki fosi wi e taki wan sani. Odo 15:28 taki: „Na ati fu a regtfardikiwan e prakseri dipi fu sani, so taki a kan gi piki.” Wi no abi fu denki wan heri pisi ten fosi wi taki wan sani. Te wi teki pikinso ten fu denki bun san wi o taki, dan nofo tron wi o sabi efu den sani di wi o taki sa gi trawan deki-ati. Wi kan aksi wisrefi: ’A sani di mi wani taki, e sori taki mi e hori den firi fu trawan na prakseri? A sani di mi wani taki, na wan tru tori noso na yere mi yere en nomo? A de „wan wortu di taki na a yoisti ten?” A sa gi den sma di e arki mi, deki-ati?’ (Odo 15:23) Te wi kon si taki a sani di wi wani taki no ben o de wan bun sani fu taki, noso taki a no de wan sani fu taki na a momenti dati, dan a bun fu dwengi wisrefi fu no taki a sani dati. A ben o moro bun fu taki wan sani di e gi trawan deki-ati, noso fu taki wan sani di fiti. Te wi e taki sani sondro fu denki, dan a de neleki wi „e dyuku sma nanga wan feti-owru”. Ma te wi e taki bun sani, dan dati de leki „wan dresi”.—Odo 12:18.

Wan tra sani di wi kan du, na fu poti prakseri na den bun fasi di den brada nanga sisa fu wi abi, èn di e meki taki Gado lobi den. Yesus ben taki: „Nowan sma kan kon na mi, efu a Tata di seni mi kon no e hari en kon” (Yohanes 6:44). Yehovah e si den bun fasi fu ibriwan fu den getrow futuboi fu en, iya, a e si srefi den bun fasi fu den futuboi di wi e si leki muilek sma. Te wi e meki muiti fu si den bun fasi fu wi brada nanga sisa, dan wi sa abi reide fu taki bun fu den.

Yepi trawan

Yesus ben sabi heri bun taki den sma di ben e kisi kwinsi, no ben abi en makriki. Iya, „di a si ala den sma, a ben sari den, bika sma ben pina  den èn den ben waka bruyabruya leki skapu di no abi skapuman” (Mateyus 9:36). Ma boiti taki Yesus ben si a muilek situwâsi fu den sma disi, a ben du wan sani tu fu yepi den. A gi den a kari disi: „Un kon na mi, un alamala di musu wroko hebi èn di musu tyari hebi lai, èn mi sa gi unu krakti baka.” A gi den a dyaranti disi tu: „A tyatyari fu mi switi fu tyari èn mi lai lekti.”—Mateyus 11:28, 30.

Tide na a dei, wi e libi na ini ’muilek ten di tranga fu pasa’ (2 Timoteyus 3:1). „Den broko-ede fu a grontapu sistema disi” e meki taki furu sma no de koloku (Mateyus 13:22). Tra sma no de koloku fu di den abi wan lo problema (1 Tesalonika 5:14). Fa wi kan gi den sma dati deki-ati? Neleki Krestes, wi kan meki den sma disi firi moro bun.

Son sma e taki fu den problema fu den, fu di dati e meki den firi moro bun. Te sma di brokosaka e kon suku yepi na wi, dan wi e teki ten fu arki bun san den e taki? Wi musu dwengi wisrefi fu arki sma na wan fasi di e sori taki wi e firi gi den. Disi wani taki, dati te a sma e taki nanga wi, dan wi no musu bigin denki fa wi o piki a sma, noso fa wi o lusu a problema, ma wi musu tan poti prakseri na san a sma e taki. Te wi e arki bun san a sma e taki, te wi e luku a sma, èn te wi e lafu nanga a sma te dati fiti, dan wi e sori a sma taki wi e broko wi ede nanga en.

Na ini a Kresten gemeente, wi abi furu okasi fu gi wi brada nanga sisa deki-ati. Fu eksempre, te wi de na a Kownukondre zaal, dan wi kan poti prakseri na den wan di abi problema nanga a gosontu fu den. Son leisi te wi e teki wan tu miniti fu taki nanga den fosi a konmakandra bigin noso baka a konmakandra, dan dati nofo kaba fu gi den deki-ati. Boiti dati, wi kan hori den wan na prakseri di no ben de na a Gemeente Bukustudie. Kande wi kan bel den fu aksi den fa a de nanga den, noso fu aksi den efu den abi yepi fanowdu.—Filipisma 2:4.

Kresten owruman abi bigi frantwortu na ini a gemeente. Wi kan lekti a lai fu den brada disi te wi e wroko makandra nanga den, èn te wi de klariklari fu du iniwan wroko di den e gi wi fu du. Gado Wortu e gi wi a rai disi: „Gi yesi na den wan di e teki fesi na un mindri èn saka unsrefi na den ondro, bika den e sorgu unu; den e du disi leki sma di sa musu gi frantwortu fu dati; na so fasi den kan du disi nanga prisiri èn den no sa du dati nanga geme, bika disi no ben o bun gi unu” (Hebrewsma 13:17). Te wi de klariklari fu wroko makandra nanga den owruman, dan wi kan de wan deki-ati gi den wan „di e teki fesi na wan bun fasi”.—1 Timoteyus 5:17.

Abi a gwenti fu taki bun sani èn fu yepi trawan

A dow di e fadon so taki bon kan gro bun, na dusundusun pikin dropu watra di e fadon safri kon na gron, èn son leisi sma e aksi densrefi pe a dow disi e komoto. Na so a de tu taki, te wi wani gi trawan deki-ati, dan a no nofo fu du bun gi den wán leisi nomo, ma wi musu abi a gwenti fu du bun gi trawan soleki fa Krestes ben e du dati.

Na apostel Paulus ben skrifi: „Neleki fa brada lobi makandra, na so un musu abi dipi firi gi makandra. Unu fosi musu bigin sori trawan lespeki” (Romesma 12:10). Meki wi fiti a rai fu Paulus na ini wi libi. Fu tru, wi kan gi trawan deki-ati nanga yepi fu den sani di wi e taki èn e du.

[Prenki na tapu bladzijde 16]

A dow di e fadon komoto fu a Hermon-bergi e gi den bon watra so taki den kan gro bun

[Prenki na tapu bladzijde 17]

Wi sa gi trawan deki-ati te wi e arki den nanga ala wi prakseri