A reti di Yehovah abi fu tiri, èn a kownukondre fu en

„Na yu, o Yehovah, abi a bigi nen, nanga a makti, nanga a moifasi, nanga a glori, nanga a wartifasi . . . Na yu abi a kownukondre, o Yehovah.”​—1 KRONIKI 29:11.

1. Fu san ede Yehovah wawan abi a reti fu de Tiriman fu hemel nanga grontapu?

„YEHOVAH srefi seti en kownusturu steifi na hemel; èn a e tiri ala sani leki kownu” (Psalm 103:19). Nanga den wortu dati, a psalm skrifiman e sori krin suma abi a reti fu tiri ala sani. Fu di Yehovah Gado na a Mekiman, meki en wawan abi a reti fu de Tiriman fu hemel nanga grontapu.

2. San Danièl e taki fu a tirimakti di Yehovah abi na ini hemel?

² A no de fu taki, dati wan tiriman musu abi sma di a kan tiri. Den fosi sma di Yehovah bigin tiri, na den engel di a meki. A meki en wan-enkri gebore Manpikin fosi, èn baka dati a meki den tra engel (Kolosesma 1:15-17). Dusundusun yari baka dati, a profeiti Danièl kisi wan fisyun pe a si fa Yehovah e tiri na ini hemel. Danièl ben skrifi: „Mi tan luku teleki den poti kownusturu èn a Wan di de fu sensi Owruten go sidon. . . . Dusundusun ben de di ben e tan dini en, èn tindusun tron tindusun ben e tan tanapu leti na en fesi” (Danièl 7:9, 10). Milyardmilyard yari kaba, Yehovah, „a Wan di de fu sensi Owruten”, na a Moro Hei Tiriman fu ala den engel di de leki wan bigi famiri di orga bun, èn di de „dinari” di e du a wani fu en.—Psalm 103:20, 21.

3. Fa a du kon taki Yehovah bigin tiri den stari nanga planeiti na hemel?

³ Te fu kaba, Yehovah meki ala den milyunmilyun stari nanga planeiti, èn sosrefi grontapu, èn a bigin tiri den sani dati tu (Yob 38:4, 7). Gi wan libisma na grontapu, a kan gersi leki den stari nanga den planeiti na hemel no abi nowan sma fanowdu fu tiri den, fu di ala sani e waka na so wan orga fasi. Ma toku a psalm skrifiman ben taki: „Yehovah srefi ben gi a komando, èn den kon de. Èn a e meki den tan fu têgo, iya, te ten di no skotu. A poti wan wet di sa de fu ala ten” (Psalm 148:5, 6). Ala ten Yehovah tiri den engel, den stari, nanga den planeiti na hemel.—Nehemia 9:6.

4. Fa Yehovah e tiri libisma?

⁴ Di Gado meki a fosi man nanga uma, dan a bigin tiri na ete wan tra fasi. Boiti taki Yehovah gi Adam nanga Eva ala san den ben abi fanowdu fu libi wan koloku libi, a gi den a frantwortu tu fu tiri den meti na grontapu (Genesis 1:26-28; 2:8, 9). Sobun, a de krin taki Gado no e sori switifasi nomo gi den wan di a e tiri, ma a e gi den grani tu, èn a e  meki den firi taki den warti. Solanga Adam nanga Eva ben e saka densrefi na Yehovah ondro, den ben abi a howpu fu libi fu têgo na ini wan paradijs na grontapu.—Genesis 2:15-17.

5. San wi kan taki fu a fasi fa Yehovah e tiri?

⁵ San wi e leri fu ala den sani disi? A fosi sani, na taki ala ten Yehovah ben e tiri den sani di a meki. A di fu tu sani, na taki Gado e sori switifasi gi den wan di a e tiri èn a e meki den firi taki den warti. Wan tra sani di wi e leri te fu kaba, na taki te wi e gi yesi na Gado èn te wi e horibaka gi en leki a Moro Hei Tiriman, dan wi sa kisi blesi fu têgo. Fu dati ede, a no e fruwondru wi taki Kownu David fu owruten Israel ben taki: „Na yu, o Yehovah, abi a bigi nen, nanga a makti, nanga a moifasi, nanga a glori, nanga a wartifasi; bika ala sani na hemel èn na grontapu na fu yu. Na yu abi a kownukondre, o Yehovah, a Sma di hei moro ala sma.”—1 Kroniki 29:11.

Fu san ede a Kownukondre fu Gado de fanowdu?

6. San a Kownukondre fu Gado abi fu du nanga a reti di A abi fu tiri ala sani?

⁶ Efu ala ten Yehovah, a Moro Hei Tiriman, sori a bigi makti fu en, dan fu san ede a Kownukondre fu Gado de fanowdu? Nofo tron, wan tiriman e tiri a pipel fu en nanga yepi fu wan tirimakti. Fu dati ede, a Kownukondre fu Gado na a tirimakti di Gado e gebroiki fu tiri den mekisani fu en na hemel èn na grontapu.

7. Fu san ede Yehovah seti wan nyun fasi fu tiri?

⁷ Na difrenti pisi ten, Yehovah tiri na wan tra fasi. Ma now a ben o seti wan nyun fasi fu tiri, fu di a situwâsi kon kenki. Dati pasa di Satan, wan engel di ben opo ensrefi teige a tirimakti fu Gado, kori Adam nanga Eva fu opo densrefi tu teige a tirimakti fu Yehovah. Satan sori taki a no ben e agri taki na Gado abi a reti fu tiri. Fa a du dati? Satan taigi Eva taki a „no sa dede kwetikweti” te a ben o nyan fu a froktu di a no ben mag nyan. Fu taki en leti, a taigi Eva taki Yehovah e lei, èn taki A no de fu frutrow. Satan ben taigi Eva tu: „Gado sabi taki na a dei di unu o nyan den froktu, un ai o opo èn unu o de leki Gado. Unu o sabi san bun èn san ogri.” Nanga den wortu disi, Satan ben wani sori Adam nanga Eva taki a ben o moro bun te den no ben o gi yesi na a komando fu Gado, èn te den ben e libi soleki fa densrefi ben wani (Genesis 3:1-6). Na a fasi disi, Satan sori krin taki a no e agri taki na Gado abi a reti fu tiri, èn a sori tu taki a no e agri nanga a fasi fa Gado e tiri. San Yehovah ben o du?

8, 9. (a) San wan libisma tiriman ben o du efu sma na ini a kondre fu en ben opo densrefi teige en? (b) San Yehovah du di sma opo densrefi teige en na ini Eden?

⁸ San wi denki taki wan tiriman ben o du te sma na ini a kondre fu en ben o opo densrefi teige en? Sma di sabi fa sani waka na ini den yari di pasa, kan memre wan tu fu den sortu situwâsi dati. Nofo tron, wan tiriman no sa libi a tori so, awinsi a de wan lobi-ati tiriman. Na presi fu dati, a sa bosroiti taki den gensman kisi strafu, fu di den opo densrefi teige a tirimakti fu en. Kande a tiriman sa gi wan sma a frantwortu fu broko a makti fu den gensman èn fu tyari vrede kon baka na ini a kondre. Na so Yehovah sori tu taki a ben abi ala makti fu lusu a problema, fu di a bosroiti wantewante taki den gensman musu kisi strafu. A sori Adam nanga Eva taki den no ben warti moro fu kisi têgo libi, èn a yagi den puru na ini a dyari fu Eden.—Genesis 3:16-19, 22-24.

⁹ Di Yehovah taigi Satan taki a o strafu en, dan A tyari kon na krin taki a ben o tiri na wan heri tra fasi, iya, èn a ben o du dati fu tyari vrede kon baka na hemel èn na grontapu. Gado ben taigi Satan: „Mi o meki yu nanga na uma tron feanti, èn yu pikin nanga en pikin o de feanti. A pikin fu na uma o  masi yu ede, èn yu o masi a pikin fu na uma na en bakafutu” (Genesis 3:15). Na so fasi Yehovah sori taki a ben o gi wan „pikin” a makti fu pori Satan nanga den bakaman fu en, èn fu buweisi taki na En abi a reti fu tiri.—Psalm 2:7-9; 110:1, 2.

10. (a) Suma ben de a „pikin”? (b) San Paulus ben taki fu a kontru fu a fosi profeititori?

¹⁰ Soleki fa a sori, dan a „pikin” dati na Yesus Krestes, makandra nanga wan grupu sma di ben o tiri nanga en. Den alamala makandra, na a Mesias Kownukondre fu Gado (Danièl 7:13, 14, 27; Mateyus 19:28; Lukas 12:32; 22:28-30). Ma ala den sani disi no ben kon na krin wantewante. Fu taki en leti, a fosi profeititori ben tan wan ’santa kibritori di sma no ben sabi wan heri pisi ten’ (Romesma 16:25). Hondrohondro yari langa, man di ben abi bribi ben e angri fu kon sabi o ten „a santa kibritori” ben o kon na krin, èn o ten a fosi profeititori ben o kon tru, so taki ala sma ben kan kon sabi taki na Yehovah abi a reti fu tiri hemel nanga grontapu.—Romesma 8:19-21.

Safrisafri „a santa kibritori” kon na krin

11. San Yehovah ben taigi Abraham?

¹¹ Bakaten, safrisafri Yehovah bigin tyari difrenti tori kon na krin di ben abi fu du nanga „a santa kibritori fu Gado kownukondre” (Markus 4:11). Wan fu den sma di Yehovah ben fruteri a kibritori disi ben de Abraham, di Bijbel e kari ’Yehovah en mati’ (Yakobus 2:23). Yehovah ben pramisi Abraham taki A ben o ’meki a tron wan bigi pipel’. Bakaten, Gado taigi Abraham a sani disi tu: „Kownu sa komoto fu yu” èn „yu bakapikin sa meki taki ala den pipel fu grontapu sa man kisi blesi gi densrefi trutru”.—Genesis 12:2, 3; 17:6; 22:17, 18.

12. Fa a kon na krin baka a Frudu, suma ben de den pikin fu Satan?

¹² Na a ten fu Abraham, libisma ben e pruberi fu tiri trawan. Fu eksempre, disi na san Bijbel e taki fu Nimrod, wan bakapikin fu Noa: „Nimrod ben de a fosi sma di ben abi bigi makti na grontapu. A ben tron wan kefalek ontiman di ben opo ensrefi teige Yehovah” (Genesis 10:8, 9). A de krin taki Satan ben e sorgu taki Nimrod nanga den tra sma di ben poti densrefi leki tiriman, ben e du sani soleki fa en ben wani. Den tiriman disi èn den sma di ben e horibaka gi den, ben tron pikin fu Satan.—1 Yohanes 5:19.

13. San Yehovah ben tyari kon na krin nanga yepi fu Yakob?

¹³ Aladi Satan e poti difrenti libisma leki tiriman, toku Yehovah e tan du san a abi na prakseri. Yehovah ben meki Yakob, a granpikin fu Abraham, taki: „A kownutiki no sa komoto na Yuda sei, èn a tiriman-tiki sa tan na mindri den futu fu en teleki Silo kon. Ala pipel sa gi yesi na en” (Genesis 49:10). A wortu „Silo” wani taki „a sma di abi reti na tapu; a sma di abi en”. Sobun, a profeititori dati e sori taki wán sma nomo ben o abi a reti fu kisi „a kownutiki”, noso a makti fu  tiri, èn en ben o kisi „a tiriman-tiki”, noso a reti fu tiri „den pipel”, iya, a heri libisma famiri. Suma ben o de a Sma dati?

„Teleki Silo kon”

14. Sortu frubontu Yehovah ben sroto nanga David?

¹⁴ A skapuman David, wan manpikin fu Isai, ben de a fosi bakapikin fu Yuda di Yehovah ben poti leki kownu fu tiri a pipel fu en (1 Samuel 16:1-13). * Aladi David ben sondu èn ben meki bigi fowtu, toku Yehovah ben feni en bun fu di a ben tan horibaka gi Yehovah leki a Moro Hei Tiriman. A frubontu di Yehovah sroto nanga David e yepi wi fu frustan moro bun san Yehovah ben abi na prakseri di a taki a fosi profeititori na ini Eden. A ben taigi David: „Mi o poti wan pikin fu yu fu tiri leki kownu èn a kownukondre fu en o tan.” A profeititori disi no ben e taki nomo fu Salomo, a manpikin fu David di ben o tiri baka en, fu di a frubontu e taki moro fara: „Mi o meki a kownukondre fu en tiri fu ala ten.” A frubontu dati di Yehovah ben sroto nanga David ben tyari kon na krin taki a pramisi „pikin” di ben o tron kownu na ini a Kownukondre te fu kaba, ben o de wan bakapikin fu David.—2 Samuel 7:12, 13.

15. Fu san ede wi kan taki dati a kownukondre na ini Yuda ben e prenki Gado Kownukondre?

¹⁵ Den tra kownu di ben kon baka David, ben de famiri fu David, èn nofo tron wan granpriester ben salfu den nanga santa oli. Fu taki en leti, den kownu disi ben de salfuwan, noso mesias (1 Samuel 16:13; 2 Samuel 2:4; 5:3; 1 Kownu 1:39). Bijbel e taki dati den ben e sidon na tapu a kownusturu fu Yehovah fu teki presi gi Yehovah leki kownu na ini Yerusalem (2 Kroniki 9:8). Dati meki wi kan taki dati a kownukondre na ini Yuda ben e prenki Gado Kownukondre, iya, Yehovah ben e tiri nanga yepi fu a kownukondre dati.

16. San pasa nanga a kownukondre fu Yuda te fu kaba?

¹⁶ Te a kownu nanga a pipel ben e saka densrefi na Yehovah ondro, dan A ben e kibri den èn A ben e blesi den. Di Salomo ben e tiri leki kownu, dan sani ben e go heri bun nanga a pipel èn den ben de na ini vrede. Noiti ete a ben de so. A fasi fa sani ben e waka na a pisi ten dati, e sori wi pikinso fa a sa de te Gado Kownukondre o tyari wan kaba kon na ala den wroko fu Satan èn te a o tyari kon na krin taki na Yehovah wawan abi a reti fu tiri (1 Kownu 4:20, 25). A de wan sari sani taki furu fu den kownu di ben de bakapikin fu David no hori densrefi na den markitiki fu Yehovah, èn taki a pipel bigin du sutadu nanga hurudu. Te fu kaba, Yehovah gi pasi taki den Babilonsma pori a kownukondre na ini 607 bifo Krestes. A ben gersi leki a sani di Satan taki dati Yehovah no ben de wan bun Tiriman, ben tru.

17. San e sori taki Yehovah ben e tiri ete, aladi a kownukondre fu den bakapikin fu David ben fadon?

¹⁷ Soleki fa wi si, dan a kownukondre fu den bakapikin fu David fadon, èn wan pisi ten na fesi, a srefi sani disi ben pasa tu nanga a noordsei kownukondre fu Israel. Ma disi no ben e sori taki Yehovah no ben abi a reti fu tiri, noso taki a no de wan bun Tiriman. Na presi fu dati, a sani dati e sori sortu takru bakapisi e kon te Satan abi krakti tapu libisma èn te libisma no wani teki a tiri fu Gado (Odo 16:25; Yeremia 10:23). Yehovah ben wani sori taki a ben e tiri ete, èn fu dati ede A meki a profeiti Esekièl taki: „Puru na edebanti di de na tapu yu ede, èn puru a kownu-ati. . . . Wan ston-ipi, wan ston-ipi, wan ston-ipi a sa tron. Èn a sani disi sosrefi, seiker a no sa tron fu nowan sma teleki a sma kon di abi a reti na tapu, soleki fa wet e taki, èn mi musu gi en dati” (Esekièl 21:26, 27).  Den wortu dati e sori taki a „pikin” di Gado ben pramisi, namku a Sma ’di abi a reti soleki fa wet e taki’, ben musu kon ete.

18. San na engel Gabrièl ben taigi Maria?

¹⁸ Meki wi go poti prakseri now na wan sani di pasa na ini a yari 2 bifo Krestes. Gado ben seni na engel Gabrièl go na Maria, wan nyunwenke di ben e libi na ini a foto Nasaret fu Galilea, na a noordsei fu Palestina. Na engel ben taki: „Yu o de nanga bere èn yu o kisi wan manpikin di yu musu kari Yesus. A o abi biginen èn den o kari en a Manpikin fu a Moro Heiwan; Yehovah Gado o gi en a kownusturu fu en papa David; a o tiri fu têgo leki kownu fu a famiri fu Yakob èn en kownukondre no sa kaba.”—Lukas 1:31-33.

19. Sortu tumusi moi sani ben o pasa baka di Yesus gebore?

¹⁹ Now fosi a ten ben doro taki „a santa kibritori” ben o kon na krin. Heri esi a ben o kon na krin suma ben de a moro prenspari „pikin” di Gado ben pramisi (Galasiasma 4:4; 1 Timoteyus 3:16). Satan ben o masi en na en bakafutu. Ma a „pikin” dati, sa masi Satan na en ede. Dati wani taki dati a sa pori Satan nanga den bakaman fu en krinkrin. A pikin disi ben o sori tu taki a Kownukondre fu Gado o tyari wan kaba kon na ala den takru bakapisi di Satan tyari na wi tapu, èn taki na Yehovah abi a reti fu tiri (Hebrewsma 2:14; 1 Yohanes 3:8). Fa Yesus ben o du dati? Sortu eksempre a gi wi? Na ini a tra artikel wi sa feni den piki tapu den aksi disi.

[Futuwortu]

Yu kan tyari disi kon na krin?

• Fu san ede Yehovah na a Sma di abi a reti fu tiri hemel nanga grontapu?

• Fu san ede Yehovah bosroiti fu seti a Kownukondre?

• Fa Yehovah tyari kon na krin safrisafri san na „a santa kibritori”?

• San e sori taki Yehovah ben e tiri ete, aladi a kownukondre fu den bakapikin fu David fadon?

[Aksi fu a tori disi]

[Prenki na tapu bladzijde 23]

San Yehovah ben tyari kon na krin nanga yepi fu Abraham?

[Prenki na tapu bladzijde 25]

Fu san ede a fadon di a kownukondre fu den bakapikin fu David fadon, no e sori taki Yehovah no de wan bun tiriman?