Aksi fu leisiman

A bun te wan Kresten e onti meti noso e fanga fisi?

Bijbel no e krutu den sani disi (Deuteronomium 14:4, 5, 9, 20; Mateyus 17:27; Yohanes 21:6). Toku Kresten di e onti meti noso di e fanga fisi, musu poti prakseri na wan tu Bijbel gronprakseri.

Gado ben gi Noa nanga den bakapikin fu en primisi fu kiri èn fu nyan meti. Ma den ben musu meki a brudu lon komoto na ini a skin fu den meti disi, fosi den nyan den (Genesis 9:3, 4). A komando disi e sori krin taki wi musu lespeki a libi fu meti, fu di na Gado gi den a libi disi. Sobun, Kresten no e kiri meti na wan ogri-ati fasi, soso fu abi prisiri.—Odo 12:10.

A fasi fa wi e denki fu a tori disi, de prenspari tu. A no de fu taki dati den apostel di ben de fisiman, ben breiti te den ben fanga furu fisi. Ma Bijbel no e taki dati den ben e meki bigi taki den na bun fisiman noso bun ontiman. Bijbel no e taki tu dati den ben e go fisi fu strei nanga trawan, fu sori taki den kefalek, noso fu firi switi te den fanga fisi noso kiri wan meti.—Psalm 11:5; Galasiasma 5:26.

Sobun, wi musu aksi wisrefi: ’Mi e si a libi soleki fa Yehovah e si en? A de so taki mi e prakseri soso fu go onti meti èn fu go fanga fisi, èn mi e taki soso fu den sani dati? A fasi fa mi e libi e sori taki mi na wan anbegiman fu Gado, noso a e sori taki a moro prenspari sani gi mi, na fu go onti meti èn fu go fanga fisi? A gwenti di mi abi fu onti noso fu fanga fisi e meki taki mi abi furu demakandra nanga grontapusma? A gwenti disi e meki taki mi no abi ten gi mi osofamiri?’—Lukas 6:45.

Son sma e onti meti noso den e fanga fisi fu man sorgu densrefi. Kande sonwan fu den sma disi feni taki den no man yepi te den no e teki prati na a Kresten diniwroko na a ten fu a yari te meti nanga fisi lai. Ma te wi no e gi pasi taki tra sani e kon moro prenspari gi wi leki na anbegi fu Gado, dan na so wi e sori taki wi e frutrow na En tapu (Mateyus 6:33). Boiti dati, Kresten e gi yesi na ala den wet fu „Caesar” di abi fu du nanga na onti di sma e onti meti, èn a fanga di sma e fanga fisi. Kresten e gi yesi na den wet disi awinsi lanti no e strafu sma di e pasa den wet disi.—Mateyus 22:21; Romesma 13:1.

Wan sma di wani abi a srefi denki fu Yehovah te a abi fu du nanga na onti di sma e onti meti èn a fanga di sma e fanga fisi, sa musu kon sabi fa Yehovah e denki fu den sani disi (Efeisesma 4:22-24). Ma efu wan sma en konsensi e gi pasi taki a teki wan spesrutu bosroiti, dan wi no musu krutu a sma dati. Fu dati ede na apostel Paulus ben gi wi a rai disi: „No meki wi krutu makandra moro, ma meki wi teki a bosroiti fu no poti wan sani gi wi brada di kan meki taki a e sondu, noso di kan meki a fadon”(Romesma 14:13). Te wi e sori trawan taki wi lobi den èn taki wi abi lespeki gi den, dan vrede sa de na ini a gemeente. Boiti dati, wi Mekiman, a Sma di meki ala sani, sa prisiri.—1 Korentesma 8:13. *

[Futuwortu]